الزوج مرق من البيت من صباح الرحمن على الشغل في الخرطوم شايل هم العيشة وغلاء الاسعار.... جوالو اتسرق في زحمة المواصلات ....... جا راجع البيت آخر النهار من الشغل دمو فاير ومزاجو معكر ..... لقى مرتو مادا قدوما وتبكي وتلملم في هدوما !!!! الزوج: بسم الله الرحمن الرحيم ، يا وليه مالك ، في شنو؟!! انتي جنيتي ولا شنو؟!! الزوجة: في شنو؟! يعني عامل ما عارف كمان؟! انتا مش طلقتني بالتلاتة برسالة SMS؟!! الزوج: يا ولية طلاق تلاتة بتاع شنو؟!! انتي عايزة تجننيني زيادة ولا شنو؟!! ياخي والله العظيم انا جوالي سرقو حرامي في المواصلات، والليلة انا من الصباح ما اتصلت بي أي زول ولا رسلت SMS لأي مخلوق !! كدى اديني جوالك دا خليني اضرب للحرامي واتفاهم معاهو واشوف قصة طلاق تلاتة دي شنو!! الزوج: الو الو؟!! معاي منو؟!! معاي الحرامي؟!! يا حرامي ياخي بالله دي عملية تعملا؟!! ياخي سرقتا جوالنا ما قلنا حاجة ، كمان تطلق زوجتنا بالتلاتة؟!! الحرامي: ياخي زوجتك (سابقاً) دي جننتني جن وطلعت عيني عديل كده ، ياخي انا من لحظة سرقتا جوال الجن بتاعك دا ما ارتحتا ولا دقيقة !! ياخي زوجتك (سابقاً) دي شبكتني ليك رسالة SMS كل دقيقة، (جيب لحمة) ، (جيب خدار) ، (جيب رغيف) ، (جيب زيت) ، (جيب كرت جوال) ، (جيب حنة) ، (جيب جيب...) !!! وأنا والله العظيم حنيت عليك شديد وقتا اخد فيك الاجر عشان كده طلقتها ليك بالتلاتة !!!!! فيصل الدابي/المحامي
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة