|
|
 الحـجـاب..... ابــو طبـلــــــة
|
امما ظهرت...وبقت تمثل... انا مباريا ومندهش....ومبهوط.... من سماحتها دي.... وقدر ما كست لشي فيها شينة ما لقيتها..... علا ايامها الاخيرة وقت سمنت شوية لكن برضو.... في سمحاتها....وقت تكون في مسلسل والله فلم... اخلي شغلتي في الايدي... واجي اتحكر قدام النتلفزيون... واقعد اتأمل فيها.... سبحان الخالق....واعاين لبنياتنا بطرف عيني وبنيات الجيران....وهن بيتفرجن معاي... والقى الفرق واسع...الغريبة لو كانن بيشربن شاي بلقيمات.... والواحدة فيهن منتبهة للتلفزيون... تجغم في الشاي...بطول حسها..... واللقيمات يسعالني الله ما تقسمها نصين.... بحالها تحشرها في خشمها... وتعصرها بالنواجز...لمن تجيب الزيت...والزيت يسيل فوق االشلوفة التحت..... ويلتقي مع زيت دهن شعر الراس.... عند الحنك...وكلو جغمة شاي وبلعة لقيمات وراها نفة....اعاين لهن واعاين لليلى علوي....... واحمد الله ثم اثني عليه.....واحس بانو بنياتنا ديل اكيد ربنا خلقن كدا لحكمة ما يعلمها الا هو....واقول في سري الهم انا لا نسألك رد القضاء ولكن نسألك اللطف فيه.......عندنا واحدة بس هي السمحة قالو..... تاجوج....وقدر ما في زول غنى والله داير يشكر واحدة يقول تشبه تاجوج....واتضح ان المدعوة تاجوج ماتت... نتيجة لتسممها بالودك والشاكوين....وعين الناس الحارة.......و ظانيتو كان ما الفقرا بتاعين مدني ومايرنو.... ما كان في راجل قعد مع مرتو اكتر من حول....وبركة البقن يعرفن درب الفقرا ويسون لنا كواديك....وبقى الواحد فينا لو اسم مرتو جا في غنية ساكت تلقاهو قعد يرمش في عيونو.. حبا وهياما...ويمشي الحمام ويقعد يردد في الاغنية..... الله منك يا زينبو... الله منك يا زينبو...والحجبات زاتها انواع واشكال... فيها البيشربوهو وفيها البيعلقوهو في الصالة.... وفيها البيختوهو وسط هدوم الراجل ...وفيها البيسقوهو ليهو على جرعات...... ان بقيت جاي من السهلة والمرا لاقتك شايلة كباية ليمون بدون اي سبب ولا مسبوبية..... اعرف انك اتسجمت واترمدت فيها.... وخاصة لو كانت نسيبتك جاتكم زيارة.....وبعدين لاحظ عند دخلوك البيت تلقى المرا جرت طوالي على المبخر...وولعتو وبخرت البيت...وقعدت من بعيد تعاين لك دايراك تجي بعندو وتعلق فيك اكبر كمية من البخور..... وتقعد تحاحي وتدودر فيك لمن توصلك جنبو.....وكلو كوم و الحجاب ابو طلبة. كوم... طبلة عديل ملبسنها حجاب....ومفتاحها عند المرا والمرا تلقاها داساهو ورا الدولاب حق الهدوم الجن الاحمر ما يعرف دربو..يفتحوهو ساعة الحاجة.....اكان دايرنك تنضم وتتونس وتدفع وتجيب وتشتري....ويقفلوهو كان دايرين يكضموك وما تفتح حنكك ولا تقول تلت التلاتة كم؟.....سجيمان قوم اكل ... فنترب تقوم... سجيمان امشي الدكان فنترب تجري.... سجيمان امرق اتونس على السهلة دي من حضنت البيت دي... تدخل في جلابتك وجري علي العزابة....سجيمان حمم الشفع ديل..... تلقى نفسك... قعدت بلباسك وجريت الوليدات على الحمام..... وقعدت تحمم فيهم وانت تغني..... البريدو تايه ويا حليل البريدنا....والوليدات يرشو فيك بموية الصابون وانت تضحك وتقرقر والبريدو تايه ويا حليل البريدنا.......
|
|
 
|
|
|
|
|
| العنوان |
الكاتب |
Date |
| الحـجـاب..... ابــو طبـلــــــة | سجيمان | 05-08-03, 04:31 PM |
 Re: الحـجـاب..... ابــو طبـلــــــة | manubia | 05-08-03, 04:44 PM |
| Re: الحـجـاب..... ابــو طبـلــــــة | سجيمان | 05-08-03, 06:12 PM |
| Re: الحـجـاب..... ابــو طبـلــــــة | cola | 05-08-03, 06:58 PM |
| Re: الحـجـاب..... ابــو طبـلــــــة | سجيمان | 05-08-03, 08:18 PM |
 Re: الحـجـاب..... ابــو طبـلــــــة | HOPELESS | 05-08-03, 10:26 PM |
| Re: الحـجـاب..... ابــو طبـلــــــة | doma | 05-09-03, 09:31 AM |
| Re: الحـجـاب..... ابــو طبـلــــــة | سجيمان | 05-09-03, 03:48 PM |
| Re: الحـجـاب..... ابــو طبـلــــــة | Tumadir | 05-20-03, 09:19 AM |
| Re: الحـجـاب..... ابــو طبـلــــــة | كوليل | 05-20-03, 11:04 AM |
| Re: الحـجـاب..... ابــو طبـلــــــة | سجيمان | 05-20-03, 08:13 PM |
| Re: الحـجـاب..... ابــو طبـلــــــة | abuguta | 05-21-03, 09:24 AM |
| Re: الحـجـاب..... ابــو طبـلــــــة | سجيمان | 05-21-03, 05:24 PM |
|
| |
سجيمان
فيس بوك
تويتر
انستقرام
يوتيوب
بنتيريست