|
Re: سودانيون .. لكن ما هي مواصفات المواطن السوداني المثالي ؟ (Re: يوسف الولى)
|
الكريم .. يوسف الولي
Quote: كدى النعرف الوطن السودانى بالاول ما هو السودان؟ يبداء من وين وينهى لى وين |
أتفق معك انو في حيرة حاصلة .. في شجن حاصل ..
لكن لما شفت الصور - صور السودان - في بوست الأخت نهال كرار شفت السودان سمح .. و لمحت خير الأرض اللي فيهو لكن كان واضح بؤس الإنسان الفي الصور يعني نحنا عندنا على الأقل أرض فيها خير كتير .. نحسد عليها فهل المشكلة في الإنسان السوداني ؟ مع ملاحظة انو الصور ما كانت هي السبب المباشر الذي اثار فكرة موضوع هذا البوست الذي أثار الفكرة .. منظر رأيته هنا في بلاد الغربة باكرا هذا اليوم.
ما يثير تساؤلي .. هو ليه نحنا منتظرين حكومة تجي و تربي الناس و تصحح الأوضاع و تحل المشاكل .. و طيب لو ما جات .. لو كانت الجاية أزفت من اللي قبليها .. و البعدها أزفت من الإتنين طيب الساسة ديل ما بشر زينا .. ليه هم البرسمو لينا معالم هويتنا ووطنا و مستقبلنا و كيانا و أخلاقنا و بيتنا و شارعنا ليه التغيير دا .. ما بينبع من دواخلنا نحنا لو اتصلحنا نحنا .. أكيد حيتصلح الوطن لأنو البلد ناس
في آية في القرآن عجيبة جدا بتوقفني كتير .. الله قالهاعن فرعون تعرف قال شنو .. " فاستخف قومه فأطاعوه " يعني هو لو ما شافهم خفيفين .. و لو هم كانوا ناس ماليين مركزهم ما كان تجرأ و قال ليهم انا ربكم الأعلى .. و لا كانوا هم أطاعوه
مش دي حالنا مع حكامنا و ساستنا .. يعني نحنا لو صحيح ماليين مركزنا كان الماشي و الجاي من الحكام .. حيمطوحنا كدة !؟ و يستهبلنا كدة !؟ و يستغفلنا كدة !؟
" لا يأخذ الآخرون من حقوقنا .. أكثر مما نعطيهم نحن منها"
فهل نحنا قادرين نعرف نفسنا أول .. الزول الكويس البنتمناه دة شكلو كيف ؟ صفاتو شنو ؟ دي أسئلة هامة يا يوسف .. و أنا متأكد عندك إجابات فهل تجود بها علينا
و لك التحية
رب اجعل هذا بلدا آمنا وارزق أهله من الثمرات
مكسب
|
|
![Edit](https://sudaneseonline.com/db/blank.gif)
|
|
|
|
|
|
|