|
Re: يلا يا جماعه نكون اكبر مكتبة اغاني مكتوبه اها معاي؟؟؟ (Re: يوسف الولى)
|
الأخ إيهاب
أواصل معك المشوار .
تخريمة :
الأخ يوسف .. فعلاً فكرة الفهرسة جميلة وحلوة ومفيدة ونأمل أن ترى هذه الفكرة النور قريباً ، وحتى ذلك الحين ، اسمح لي أن (أنوِّر) الأحباب ببعض كلمات أهل المغنى (على بال ما ود نميري يتصرف في الفهرسة) ، وهما الثنائي ود حاج سعيد و ود سيد أحمد في باقة من روائعهما :
( ليمو )
المســــافـة كلمات الشاعر : صلاح حاج سعيد غناء : مصطفى سيد أحمد
لسه بيناتنا المسافة والعيون .. واللهفة والخوف والسكون .. رنَّـة الحزن البخافا .. تعدِّي بالفرحة وتفوت .. وأبكي بالحسرة وأموت .. الأماني الفي السفر .. قبل الزمن كايس المواني .. يوم تجيني عليك بصدِّق .. إنو مرة الحظ طِراني .. وإحتواني معاك شجن .. عذَّبني قبلك .. ولسه منك جاي تاني .. تمشي وين الخطوة منك .. ما الزمن بالحب بلاك وإبتلاني .. يا عيونك .. يا مداين الفرحة والحب والجسارة .. عندي ليك مليون بشارة .. ألف طيف .. والكلمة شارة .. وإنتي لمّا الحب يهوِّم .. في عيوني ، وفي عيونك .. يبقى حائر بالأمارة .. الفرح منك يجيني .. ويعتريني الخوف عليك .. خطوة منك .. خطوة ليك .. راجي منك بس إشارة .. كلمة تديني البشارة ..
ريــدي ليك كلمات الشاعر : صلاح حاج سعيد غناء : مصطفى سيد أحمد
ريدي ليك الريح بعرفو .. شافو لما كتبت حرفو .. لما بات وسط الكتابة .. وضم إسمك برحابة .. لسه جوه عيون سحابة .. عشان بخاف الناس تعرفو .. مرة إنسو ويقرو حرفو .. عشان بخاف الناس تعرفو .. غيمة .. غيمة .. ساحة .. ساحة .. أي حتة معاك مشيتها .. كنت بستاهل مشاعر .. في شقا الأيام لقيتها .. يا حبيبة الخطوة عنك .. غربة ساقتني وأبيتا .. أعمل إيه يا ست همومي .. ماني راحتي معاك نسيتها .. قلت أكتب ليك حكايتي .. الفي جناح الريح طويتها .. عشان هواك الريح بعرفو .. شافو لما كتبت حرفو .. يا سماحة عينيك واحة .. للحزانا في إرتياحك يلقو راحة .. ما الأماني علي بخيلة .. يا البريدة ومشتهيها .. الفرحة في عزة سباها .. لو يغيظني الريد يعاند .. برضي برضى أزيد سماحة .. لينا ميعاد بالتلاقي .. وغربة ما حيطول براحها .. عشان هواك الريح بعرفو .. شافو لما كتبت حرفو ..
عـينـيـك مـدن كلمات الشاعر : صلاح حاج سعيد غناء : مصطفى سيد أحمد
عينيك مدن منسية .. في كتب التواريخ والزمن .. عينيك وطن مشدود .. على وتر التاريخ والشجن .. مدوَّن على حروف الكتابة .. مكدود عَنَا ومكتول صبابة .. فيه حطَّ النيل سكن .. عينيك سفر مكتوب أعيش في غربتو .. وأعشق عذابو وحرقتو وليلو الطويل .. أتخيلك يا حلوة زي نسمة سحر .. جيتي ومعاي حلمي المطوّل منتظر .. بعده الجميل .. عشقك زمان جواي رحل .. يتناها في الأعماق أمل .. ضمخ رؤاي إحساس نبيل .. أذهل طيوف خاطري القبيل .. جاشت ملامح روعتو .. وضج السكون في وحشتو .. والكان أمل في عيوني لاح .. زورق مدارات فرحة الوهج النضير المزدهر .. فجأة إنحصد قبضة رياح .. وسكت الكلام يا حلوة في القول المباح .. وقام الصباح بعدك رحل .. والكان أمل في غيم سماك .. أيقنت إنو عدم بلاك .. وإنو البيحلم بي علاك .. بختار ظروف أحلاها مر ..
عينيكي لو تصدق معاي الأمنية .. عينيكي لو أعرف ختام الأغنية .. بدأ الكلام والمنتهى .. والمستطاب والمشتهى .. كل المباهج في المواويل والغناء .. والعاشقين قلبي وأنا .. هزتنا في عينيك تصاوير الغنا .. يا أمنيات من كم سنة .. ويا أغنيات كل الأماسي .. المستحيلة وممكنة .. المستحيل عينيك تهون .. المستحيل قلبك يخون .. القدر ما طبع الوفاء .. والصدق ما شرط إنتفا .. وأنا حالي من بعدك كفاه .. المغنى والحب والشجن .. والوحشة والشوق للوطن .. العمر قبلك ضاع سدىً .. والعمر بعدك إيه يكون .. لو يبقى بي إحساس الزمن ..
صـفـــوة عاشــقين كلمات الشاعر : صلاح حاج سعيد غناء : مصطفى سيد أحمد
قلت ليها وإيدي في إيدا .. ودمعة حزن سالت .. جاي منك وماشي ليك .. يا مدائن غربة طالت .. ولا مدارات نجمي ضلت .. وسكة السفر إستحالت .. كوني في دربي الحقيقة .. الديمة ليها مشاعري مالت .. قلت ليها .. وكنت راجع لعينيها .. من أسى الزمن المسافر .. في المشاوير العصيبة .. من متاهات الأماسي الفي مداها .. الحزن مضناها ونصيبها .. بيني لا بينك مزار .. لا محطات إنتظار .. لا مواعيدك قريبة .. إنت يا الفرح الحقيقة المستحيل .. هدهدي الصبر الجميل .. وأمسحي الألم المخيِّم .. في المدارات الرحيبة .. قلت ليها .. الحقيقة الضايعة بين قلبي وعيونك .. إني لا قادر أفوتك ولا أجيك .. إني ما عارف بدونك ..
( ليمو )
|
|
|
|
|
|
|
|
|