|
|
 Re: يلا يا جماعه نكون اكبر مكتبة اغاني مكتوبه اها معاي؟؟؟ (Re: وفاء تاج الدين)
|
العزيز الغالي الأخ الفنان / إيهاب
لك التحية والتقدير .. وفعلاً فكرة جميلة ورائعة
للتوثيق ولتكوين مكتبة غنائية مكتوبة تقف مع
رصيفتها الموجودة وهي المكتبة المسموعة .
وكما ذكر أخي عصام أحمد ، يا حبذا لو تم ذكر
اسم الشاعر والمغني حتى تعم الفائدة .
وأها نحن معاك نبدأ المشوار ببعض روائع الكلم
من مختلف الشعراء المبدعين ممن تغنى لهم راحلنا
المقيم الأستاذ الفنان / مصطفى سيد أحمد ، طيب الله
ثراه وعطر قبره بشآبيب الرحمة مثلما عطـَّـر لنا
(أبو سامر ) أيامنا بالدرر الخوالد من جميل المغنى .
( ليمو )
الحــزن النبيـــل
كلمات الشاعر : صلاح حاج سعيد
غناء الراحل المقيم : مصطفى سيد أحمد
وبقيت أغني عليك ..
غناوي الحسرة والأسف الطويل ..
وعشان أجيب ليكي الفرح ..
رضيان مشيت .. المستحيل ..
ومعاكي في آخر المدى ..
فُتِّيني يا بهجة مواعيدي القبيل ..
بعتيني لي حضن الأسى ..
وجبتيني .. للحزن النبيل ..
ومشيت معاك ..
كل الخطاوي الممكنة ..
وبقدر عليها وبعرفا ..
أوفيت وما قصَّـرت في حقك ..
ولا كان عِرفه غيرك أصادفا ..
وقِـدِر هواكي يجيبني ليك ..
جمـِّـع قلوبنا .. وولَّـفا ..
وكتين بقيتي معايا في أعماقي ..
في أعماق مشاعري المرهفة ..
لا منك إبتدت الظروف ..
لا بيكي إنتهت ..
الأماني المترفة ..
ندمان أنا .. أبدا وحاتك ..
عمري ما شلت الندم ..
ما أصلو حال الدنيا ..
تسرق منية ، في لحظة عشم ..
ندمان أنا .. أبدا وحاتك ..
عمري ما شلت الندم ..
وأنا عندي ليك كان الفرح ..
رغم إحتمالي أساكي ..
يا جرح الألم ..
كان خوفي جاي ..
من لهفة خطاكي ..
على المواعيد الوهم ..
أهو نِحْنا في الآخر سوا ..
باعنا الهوى ..
ماشين على سكة عدم ..
قمـــــر الزمـــــان
كلمات الشاعر : صلاح حاج سعيد
غناء الراحل المقيم : مصطفى سيد أحمد
كتبت ليك ..
لا بيني بينك ..
ريدة لا قصة غرام ..
إخترت ليك ..
أجمل حروف ..
وأصدق فواصل ..
نادرة في لغة الكلام ..
لا قصدي ألهو معاكي ..
بي كلمات غناي ..
لا شعري ليك ..
مرجيحة من شعر الغمام ..
وكتبت ليك ..
والله يا قمر الزمان ..
شان جيتي بي زمن المحنة ..
وشفت في عينيك ..
حس أهلي القدام ..
كتبت ليك ..
كتبت ليك ..
وأنا جاي من زمن الشقا ..
المرسوم على ..
وش الثواني مظللها .
تتمدد الساعات ، سنين ..
تتفتح الأحزان ..
غريبة ومذهلة ..
وأشتاق أفتش نسمة ..
في الزمن العذاب ..
وأيامي من كُتر الأسى ..
وكُتر العزوف والإغتراب ..
صارت حروف مترهِّـلة ..
لحظات أسيفة ومهملة ..
كتبت ليك ..
و وقفت ليك .. لا من لقيتك ..
جاية في قلب الطريق ..
لمحت فيك .. راحة المشاوير البعيدة ..
ونفحة النسمة الحنينة ..
الجاية من جوف المضيق ..
حسيت عجايب الدنيا .. إتلمّت بقت ..
جاياني من عصراً سحيق ..
عينيك حِس أطفال ..
ينادوا القمرة للغايب يعود ..
وجبينك الضوّاي ..
حُجَا الحبوبة في الزمن السعيد ..
يا قمرة ..
أقلبي السنسن الحمرة ..
وشوفي ليه ما جا ..
يا قمرة ..
وأنا في قساوة الموحش ..
الزمن المكهرب بالحريق ..
أنا حيلتي إيه .. قولي لي يا قمر الزمان ..
غير أتَّـكي .. وأحلم معاكي ..
وأحضن أماسي الصحو .. والأمل البريق ..
الشــجـن الألـيــــم
كلمات الشاعر : صلاح حاج سعيد
غناء الراحل المقيم : مصطفى سيد أحمد
ببقى بعدك في الأسى ..
وتبقى إنت الظالم القاسي النسى ..
وغصب عني أزيح ظنوني ..
وأقول عليك إنت المسامح ..
وفوق شجوني ..
أعيش زمان بالفرقة جارح ..
عارفني منك ..
لا الزمن يقدر يحوِّل قلبي عنك ..
لا المسافة ولا الخيال يشغلني منك ..
تحرمني منك ..
المواعيد لا بتجيب منك تودي ..
لا رسالة تجيني منك .. لا خبر يطمّني عنك ..
وإنت سايق فيني ظنك ..
رغم إنك إنت عارف إنو منك ..
لا الزمن يقدر يحوّل قلبي عنك ..
لا المسافة ولا الخيال يشغلني منك ..
يا هوى الشجن الأليم ..
خليتني في الألم النعيم ..
وأبقى في كل المدائن ..
سكتي وسفري الجحيم ..
وإنت سايق فيني ظنك ..
رغم إنك إنت عارف إنو منك ..
لا الزمن يقدر يحوّل قلبي عنك ..
لا المسافة ولا الخيال يبعدني عنك ..
عِِــــزَّة هــَوَانَــا
كلمات الشاعر : صلاح حاج سعيد
غناء الراحل المقيم : مصطفى سيد أحمد
آه . يا جرح ..
يا جرح ، عِزَّة هوانا ..
الساكنة في حرف الكتابة ..
أصلو في زمن الأسى ..
المشدود على وتر الكآبة ..
في زمان الحرقة ..
والخوف والرتابة ..
إنكتم نبض الأغاني ..
وإنبهم حِس المعاني ..
وإنجرح خاطر الكتابة ..
جيتني في الزمن الأليم ..
قلبي مثخن ..
بي جراحات الهوى ..
وعمري ضايع ..
في متاهات النعيم ..
في دروب الغربة ..
لا تاب .. لا قوى ..
كان عيونك ..
فيهن الوصف القديم ..
معنى في الحب إنطوى ..
وضاع معاك ..
زمن الوسامة ..
وإختفى .. الفرح العلامة ..
لسه يا حزن الملامة ..
من سنين دربك سلامة ..
|
|
 
|
|
|
|
|
| |
abdulhalim altilib
فيس بوك
تويتر
انستقرام
يوتيوب
بنتيريست