الاستاذ ترهاقا تحياتي في كل الاحيان بدخل البورد متصفحة المواضيع واعرج بشكل خاص على مواضيع الساحة التي تتناول ما يحدث في السودان اقول لك الحق ، بقرا وبسمع حاجات ، ما عارفة تجعلني اتشكك مليون مرة اني مقيمة فعلا في الخرطوم او الا اكون نايمة نوم اهل الكهف ، لانه تذكر حقايق غير موجودة واشياء بعيدة كل البعد عن الواقع وتحليلات يتم التعامل معها من مفهوم انها الحقيقة فعلا ولا شيء غيرها نعم السودان في منعطف صعب وواقع اصعب ، لكن بنحتاج الى الكثير من الدقة قبل اطلاق ما يعتقده البعض انه حقيقة او واقع ، في كثير من الاحيان احس انه الناس بتعبر عن امنياتها تجاه الوطن في شكل معلومات يتم تمريرها على اعتبار انها حقائق مؤكدة كمية في المية من شعب السودان يكره حكم الجبهة والكيزان والعسكر لكن اطلاق الاماني البنفسجية على انها هي الحقايق بعينها قد يضر ويودي في مليون داهية نحن شعب يجيد لعبة الخطاب السياسي والكلام في اي موضوع سياسي يعني كل زول بتلقاهو سيد المشكلة وحقته وقادر على تحليلها اكتر من اي شخص اخر بل يصل الى تحديد الحقيقة من وجهة نظره ويحلف مية يمين انه ده الحاصل ودي الحقيقة وده هو اللي مرجعنا لورا في السودان ومشكلة السودان عمرها ما حتتحل بالطريقة دي اقول كما قال الفنان دريد لحام بس بطريقة تانية .. مشكلتنا ما مشكلة السودان .. مشكلتنا مشكلة المثقفاتية اللي بيحسبوا نفسهم خلفاء للوطن نحتاج الى نكون اكثر دقة وواقعية عند تناول اي امر سياسي يتعلق بالبلد سمعنا الالاف القصص في مقتل الشهيد محمد طه احمد ، وملايين الحقايق المزعومة لكن وين الصح ووين الحقيقة!! لا شيء مؤكد المؤكد حتى الان ان هذا الرجل قتل بطريقة صعبة للغاية والمطلوب هو مزيد من الدقة قبل تحويل الامر الى حرب قبلية جديدة بالجد السودان ده مشكلته كبيرة وبعد ده كلو يقولوا ليك الامم المتحدة ماتدخل السودان!!
وخيروقوا
( تم التعديل للاضافة)
(عدل بواسطة maia on 10-21-2006, 06:52 AM) (عدل بواسطة maia on 10-21-2006, 07:18 AM)
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة