رسالة من ( إكسبلورلر ) ....

Quote: نوبي أولا آسف جدآ على تاخري في الرد عليك لكن و كما تعلم انا لا املك كيبورد عربي و الكتابه بالعربي تاخذ وقتا طويلا مني و عشان الرساله دي بالذات لازم تتكتب بالعربي عشان كده كان التاخير فعذرا. اولا سيجمان ده ما نصيح؟؟؟؟هسع دي هي النكته النزل ليها بوست و مشى كم صفحه كده وشنو ما عارف و الاهم شحتفنا و حرق روحنا علشانا؟؟؟والله واجعاني الشحتفه عارف ليه لانو النكته ظريفه و ما بطاله......لكن قديييييييييييييمه. و النكته في الموضوع انو في واحد لا هو صاحب بكري زي سيجمان و لا يحزنون نزله في المنبر قبل حوالي شهرين او تلاته في البوست بتاع المساطيل او واحد من بوستات النكات. المحير سيجمان كان هارش كده لييه؟انا كنت فاكره نكته شدييييييييده و بعدين تحت الصره و فوق الركبه منطقة ممنوع الاقتراب و التصوير و كده طلعت نكته اقل من عاديه و مكرره. المهم نجي لموضوع دكين اولا خليني اكسر تلجي في الاول عشان انت بقيت ما مضمون.. بتاع مشاكل و كده. اولا داكين ده زول كتاااااااب و بتاع مواقف امنه مختار و محمد عادل يشهدوا و زول لسانو طويييييييل...مع الحشمه...و ظريف و ود بلد تب و اشهد انو عشا البيتات لي حدهن. لكن.............لامن نتكلم في الحته بتاعت العنكليزي دي .....انت و بت عجاج و اخرون (انا شخصيا بره....اقول ليك كتاب و لسانو طويل تقول لي ما تكسر تلج...حرم اكسر و اسيح كمان الخواف رابا عيالو) المهم في الحته دي بالذات هو و بكل امانه....غدا مقيلات سااااااي...والله و لا حتى غدا فطور بي سنداوش فول لو ما بقى قريض عيش سااي.....هسي زي غدا المقيلات دي اكتبه ب الانجليزي كيف...اليسمع يقول انا عرفتا عشا البيتات يكتبوها كيف. عارف ذكرني ببقال الناس اشتاغلتو في الكي بورت...لكن والله كان غايظني في الحته بتاعت brother امكن كيبورد صعبه عليه شويه لكن brother ؟؟؟ شابك اي زول breather....breather....breather لامن شفقني زاتو....مالك يازول انت ما قادر تتنفس و لا جاتك نوبة ازمه؟ يعني انا هسي اب جديد و فرحان....و كده...اخرتا ح اكون feather يعني شنو بعد التعب ده كلو و اطلع...ريشه؟؟؟؟و الله الا ابقى كوز ...ملعون ابو النضال اللي بيخلينا احنا نبقي ريشه و بقال مناضل شريف. المهم انا و الله استغربت كيف زول يكون في الجامعه و يكتب.. بروثر..غلط لغاية ما جيت انت(انا لسه بره..ااااي انت.. الكلمتني عايز تنكر) و وريتني في ناس و من غير ذكر اسماء بكتبوا اسماءهم غلط....يعني مثلا..مثلا واحد يكون اسمو dakeen و يقوم بقدرة قادر يعملها dkeen زي ده تقول عليه شنو؟؟ (لاحظ انت....انا لسع بره...عندي عيال يا بيه) اذا كان بقال صغير و جاهل.....ده شنو؟؟؟.....حكم يا زول ليك و لي فردك كلهم كل الحب....من ناذر لي بروبر لي القلب لي ناديه عثمان لي....اخرهم كل الحب و الاحترام....لكن دكيييين دا بالذات لآ.....لانو غييييياظ....له و لك مني كل الحب ملحوظه: الرساله كان المفروض تكون اطول.....لكن لظروف الزوار غير المعلنين هي اقصر...ما عارف حتقول الحمدالله و الا خساره. بالمناسبه كنت عايز ارسل ليك فيديو قممممممه في الظرافه من موقع صاحبك سوباجو كرهو عديييل كده مع انو في فيديوهات احلى بكتيييييرمن القاعد ينزله. حسب علمي انو الموقع محظور في كل الدول العربيه...والله يا نوبي موقع رهييييييب عامل زي قوقل لكن في الفيديو...تكتب الطلب و يجيبو ليك لكن بالفيديو...انا ما بعرف كتير في الكمبيوتر...لكن لو وريتني و الله تضحك لامن تنشقا زاتو...بس وريني كبف و الباقي علي اخوك احمد