الاخ العزيز عبدالمنعم خير الله تحية طيبة 1- طبعا ليس ناقل الكفر بكافر وهذه وجهة نظر كوز قديم يعرف الناس ديل من الداخل وعبدالوهاب الافندي غنى عن التعريف ولازال يمجد الجبهة الوطنية 2006 على حساب المؤتمر الوطني الحاكم لاسباب شخصية...وظن انه يحسن صنعا.. 2- بعدين حبة التنمية القامو بيها اخيرا دي من مستوجبات الشراكة القوية مع مشروع حقيقى (السودان الجديد) للحركة...وخاصة ان المؤتمر الوطني غزوهو ناس كثيرين من الكفاءات السودانية في الحقبة السبعينية لمايو..وفعلا في جهد تنموي مقدر يفسده مهاجري ام قيس من اصحاب الفكر ذى الابعار...لان الاخوان المسلمين لايوجد اصلا في وعيهم احساس بالاخرين ويعانون من ((استحواذ)) مريض..وتصدق من زمان في الجامعة قسمتهم ثلاث شعب 1- كوز مسجد..وده مغيب في القرن السابع ومقابل المسجد بس في البركس..ويعتقد ان المدينة المنورة في زمن الرسول كانت فاضلةوكانه ما قرا سورة الحجرات والنور والايات المرتبطة باسباب النزول ووضحت المشهد تماما ا نذاك ولا قرا حتى تفسير ابو الاعلي المودودي لهذه السور..وديل المتقمص الزائف لشخصية الصحابة هم الذين ا نقرضو في الحقبة الترابية الكالحة و دخول الجنةمع الاعمال الشاقة للزواج بالحور العين بعد قتل الجنوبيين والنوبة المساكين في حروب البسوس السودانية... 2- كوز الصفرة..وده خطير وحسي لابعد درجة واناني...لو في عيشة واحدة في الصندوق او كباية لبن عايز يتخطى الصفوف عشان يشيلا ويحجزو احسن الغرف في الداخليات..وهؤلاء هم ارباب الثراء الحرام الان ولو لقو مال قارون مابشبعو... 3- كوز الجكس: وده بتاع بنات.. كمل النيفيا في شارع الجمهورية و ويتملس ويتحنكش ..بمشي الجامعة الصباح وما برجع الا بعد نص الليل بعد ان يشيع اخر توب او اسكرت الى مثواها الاخير(داخلية البنات)..وديل طبعا بتاعين الانكحة والزواج الجماعي والمسيار والحياة السرية للاشياء(كما يقول الاديب محسن خالد) وتبديد مال الشعب في ترف مقيت.... وكان مكضبني راجع الشعر الحلمنتيشي في تلك الفترة قصيدة مولانا وقصيدة سيد بشبش...(1980-1985) ومن هذا الفاصل في علم النفس السياسي...ستعرف تماما ان هؤلاء باقين في فسادهم دون ادنى شعر بالحياء او يتوبو من قريب والحياء شعبة من شعب الايمان..يعني الاستمرار في الهاكم التكاثر حتى ذرتم المقابر....الما بتنفع دي حتكون ديدنهم..وممكن يمارسو كل الوحشية في قمع الاخرين للابقاء على هذه الامتيازات التي لا يستحقوها.. وبعدين انت قايل مافى حلول اقتصادية ام الاقتصاد ليس علم... 1- يرجعو وزارة النفط او المالية للحركة... نيفاشا ما قلت ذلك عبث د. جون قرنق رجل عبقري الله يرحمو رحمة واسعة..عرف في احدى الوزارتين مقتلهم.. 2- يقلصو الحكم الفدرالي الخلى الوزارء اكثر من المزارعين بدون فايدة تذكر امنية او اقتصادية او اجتماعية... 3- اقامة تسويات مبدائية لاعادة كل الاموال المنهوبة بحسابات علنية تفتح في بنك السودان لان السترة والفضيحة متباريات 4- اعادة كافة المفصولين من القوات النظامية والخدمة المدنية والهيئات الدبلوماسية..لتعود الحياة لطبيعتها.. 5- اما كلامك على انو يجو الناس في البورد ده (الحكامات) يتحاورو معاي هنا... انت جديد... وما عارف الوجه الحقيقى لهذا البورد...واحسن نسكت(شوف الارشيف بتاعي) ******************** لقد قام الاخ الافندي بتحليل الجذور السياسية ونحن قمنا بتحليل الجذور النفسية(علم النفس السياسي) لان فكرة السودان الجديد النسخة الاصلية وليس المضروبة والمقرصنة تدعو للتحرر من ((شنو)) وليس من ((منو)) كما قال نبي الامة الذى انكره بنو تغلب(اهل الشمال بجهاته الثلاث..) جهلا واستكبارا طلب منهم الانتقال من وضع (الهاكم التكاثر*حتى ذرتم المقابر) المزري ...الي (ومن يوق شح نفسه اولئك هم المفلحون)...قيم المجتمع السوداني الحقيقية
سامعني ولى اقول كمان
الفيضان بدا ومنتظرين القمل والجراد والضفادع لاحقا وقل ربي لا تزر للظالمين ديارا
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
adil amin
فيس بوك
تويتر
انستقرام
يوتيوب
بنتيريست