حجة امنة ... استبيح كل الدروب شان ادخلك ...

حجة آمنة
صباح الخير
كلامي الداير اقولو ليك ده عشان نخش في الجد. انا جيتك لي الشغل.
أول في التبادي كان لي البنية الجابت ليك طاري العرس دي من قبل شوية، بت الصرة وأم الويحيدة، ما بجيب اسمها، عشان ما ادخل رقبتي في الدرب الضيق. أنا جبت اسم زول هنا؟ لا. وكت ما رديتي برد لي رقبتي. البنية دي ما تصدقيها، دي مطموسه ساكت بتدور تشوف مويتك يالرايقة . عرس واحد كايسالو مافي.
لكن اسمعي كلامي أنا.. أنا بنضم ساكت. أفـُّـو.
- أرخي أضانك ، بدور لي مره، آآآآآآآآآي مره ، زي ما بقولوا الجماعة (إمرأةً) ويعوجو خشومهم فوقها ، كيفن كدي ما بعرف.
بدورك ترمي ودعاتك ديل وتشوفيها لي.
مستغربه مالك ومنططة عويناتك، قولي بسم الله.البنية دي أسع ما جابت سيرة الكلام ده وقالت الدايراه، مالو أنا قندول مشنكل الريكة؟
أسمعي البنية البدورها بنية رايقة زي موية النقاع،
بدور احس بي محلها في جواي وكت تسكن شراشيفي،
أختها في بكان النتاحة الباقة في قلبي
بنية زي أمونة الغنو ليها كثير،
واحدين قالو باميي رهافه
واحدين قالو ضامر هافه
واحدين قالو شفنا الشافه
بس براي بجيد اوصافه
سابل ديسها فوق اكتافه
ما شفتوها ياخلاني؟
والله مقدرة وكت الولد سيف الجامعة ده يقول:
من يوم داك جاني الجاني
والله الدنيا تمسخ علي
*
- آآآآآآآآي بدور
المن النسيم تتضارى
*
بنية أحس بيها مارقة من نفسي(بفتح الفاء).
ولا زي ما قال عادل ود محمد خير ، الله يديه العافية
(كأنك بتنبعي من فرح جواي)
الوصف ده ياهو الغلب الداواي
بدور بنية زي......
زي نورة وكت حميد يوصفها


هيْ .. أقيفِنْ .. ‏
نورا فِيكِنْ
نورا ... نقّاحة الجِّروفْ .. ‏
نورا ... حَلاّبة اللِّبيني .. ‏
للصغيرين والضِّيوفْ ‏
نورا ساعة الحَرْ يولِّعْ .. ‏
تنقلِبْ نسمة وتطوفْ ‏
تَدِّي للجيعان لقيمة ‏
وتَدِّي للعطشان جغيمة ‏
والمَخَلِّي الحال مَصَنقِرْ .. ‏
في تَقَاة اللّيل تَندْقِرْ .. ‏
تدِّي لي باكر بسيمة ‏
تَكْسي للماشين عَرَايا ‏
وفوقا ينقطّعْ هديمه ‏
‏ما عِرفتِنْ ... نورا إنْتِنْ .
.قولِنْ إنتن شِنْ عِرفْتِنْ ‏
***** ‏
‏
نورا أخُتْ كُلّ الغلابة ‏
نورا حاحاية الشّقاوة .. ‏
نورا هَدّاية الضّهابة ‏
الأراضي اليَاما أدّتْ .. ‏
نورا ... بقّتْ من تُرابه ‏
وماشي في الأعماق سحابه ‏
مشتهنِّها .. والله جابه ‏
الله جابه ... الله جابه ‏
للجنوب طبلاً‎ ‎‏ يَهَدْهِدْ ‏
ليل مشاعر ناس تعابة ‏
وللشّمال طنبور يَسَكِّتْ .. ‏
دمعة الميتين كآبة ‏
ما عِرِفْتِنْ نورا إنتِنْ ..
قولِنْ إنتن شِنْ عِرِفْتِنْ ‏
نورا
‏ عايزه تقرأ . قالتْ ‏
فوقا حيطة الدِّنيا مَالتْ ‏
خَتّتْ الكرّاس وشَالتْ ‏
منجلاً صَالَتْ بو جَالَتْ ‏
لامِنْ إنجرحت بو شالَتْ ‏
لي التراب فوق إيده كَالَتْ ‏
ومَرّة يوم في الدُّونْكَا لِدْغَتْ ‏
جاء الفقير بالليل حَوَاهَا ‏
ويوم ملاها الهم قطايع .. ‏
جاء البصير بالنّار كَوَاهَا ‏
ونورا . ما قِدْرَتْ تمانع .. ‏
تقنع النّاس المعاها ‏
مرة شافت في رؤاها ... ‏
طيرة ... تاكل في جناها ‏
حيطة تِتمغّى وتفلّعْ .. ‏
في قَفَا الزّول البناها ‏
في جنينة سيدي سِمْعَتْ .. ‏
شتلة تصقع لي الوَرَاها ‏
الأرض .. ‏
‏ لابُدَّ ‏
‏ ترجع ... ‏
للتِّعِب فوقا ورعاها ... ‏
غيمة ... والنِّيل موجو لاها ‏
والعطش شقّقْ شفاها ‏
الشّمس طَبَقت ضُحَاهَا ‏
الخليقة لقت إلاها ‏
نار
عقاب إنسان مكسّر .. ‏
فوق تَلَكِّيات متاهة ‏
وضَوْ من الله .. رهاب مكتّفْ ‏
في وتيد اللّيل معاها ‏
بين ربوع حَضَره وخلاها ‏
فَسّرَتْ لي النّاس رُؤاها ‏
وقالوا .... جَنّت .... ومو براها ‏
ونورا زادت فوق شقاها ‏
‏ ‏و صَدّتْ الأيام .... تحُشْ ‏
تبني لي عصفورة عُشْ ‏
في السّواقي تشوف عزاها ‏
لما شوقه يسوِّي .. أُشْ !!! ‏
تملا ... تزرعْ ‏
ترعى .. تقرع ‏
للنهار في الليل تخُشْ ‏
عِرْفَتْ الشّقَا والشّقَاوة ‏
إلاّ .... ‏
ما عرفت تغُشْ !!! ‏
شايلة طولة البال من الله .. ‏
ومن أراضينا الإثارة ‏
وماشي تكدح طول نهاره ‏
وترجى لما الليل يَفلِّلْ .. ‏
تسرِق ألمي عشان خداره ‏
عشان صغاره .. ‏
عشان خداره ‏
عشان صغاره .. ‏
ولما ترجع لي دياره ‏
تنزف أحلام الفقارى ‏
من عويناته الحيارى ‏
لي غُبار الحال تقُشْ ‏
فوقو لي الآمال ترُشْ ‏
نورا .... ‏
تقعد ‏
‏ صاحيي تحلم .. ‏
بي بيوت بي نور ودُشْ ‏
وبالمحبة تشُق دروبه .. ‏
ولي قلوب الكل تخُشْ ‏
نورا ... ‏
‏ تحلم بي وجود ‏
ما مشت بينو القيود ‏
أفضل أفضل بي الكتير .. ‏
بي وطن من غير حدود ‏
نورا تحلم بي عوالم ‏
زي رؤى الأطفال حوالم ‏
لا درادر .. ‏
لا عساكر .. ‏
لا مظاليم ‏
لا مظالم ‏
نورا تحلم .. ‏
ولما تحلم ..... نورا ترجِفْ ‏
ولما ترجف .... نورا تحلم .. ‏
ولما ريح الواقع المُرْ .. ‏
لي عشيش أحلاما ينسِفْ ‏
نورا ..... تنزِفْ ‏
وفي الوجود .. وجدانه يهتفْ ‏
حالة .. تقرِفْ .. ‏
حالة تكسِفْ .. ‏
حالة تكسِفْ .. ‏
حالة تقرِفْ .. ‏
وتبدا تقضِفْ .. ‏
ولما تقضِفْ ‏
‏ بالا يهتِفْ .. ‏
وتملا باله أحلام بتلصِفْ ‏
يوم حا تنصِفْ ‏
يوم حا تنصِفْ ‏
نورا .. ‏
لسّه بعيد .. ‏
هناكَ .. ‏
وتبدأ تحلم .. ‏
ولما تحلم نورا ترجِفْ ‏
ولما ترجف نورا تحلم ‏
صاحيي تحلم.. ‏
وصَاحْ بتحلَمْ ‏
صاح بتحلَمْ ‏
بتحلم صاحْ

- استغفر الله يا ججة آمنة مالي الما ببكيني شنو؟ قايلاني بكيت بي إرادتي.

• ما أكتر عليك الكلام ياحجة، بسم الله ده بياضي رميتو.
كش كش
- لا ، لا الرمية دي لازم تعيديها ما عجبتني
كش كش
- لا ، لا لا لا .بالله شوفي الودع ده بحمر لي كيفن؟
- يلا، لمي ودعك ده ، أظنو الدنيا حر، أرميه لي وكت تاني ولا خليني أمشي لي الفكي. قالولك الفكي الجديد ده اسمه أبو بكر يوسف، والله كلامو شوف عين وإيدو لاحقة.
ودعتك الله