|
|
 سوداني فقد سودانيته
|
دي حيثيات ونسة قبل كم يوم كده مع واحد قلت أنقلها ليكم هنا، وأناشد بكري بتزويده بباسويرد عشان الزول ده عندو وجهة نظر قاسية تجاه السودان وشعب السودان وقال ما بحب السودان ولو لقى أقرب جواز سفر من أي بلد ما بتردد إنو يرجع ليكم جوازكم وفوق كلمة farewell for the Sudan بالبنط العريض ....
قال:
بتحبوا شنو في السودان؟؟؟ بالله عليكم الله حسه السودان ده فيهو حاجة تتحبه؟؟ خليكم واضحين مع أنفسكم وجابوا بصراحة، ما تقعدوا تقولوا لي قعدة جنب النيل ورقدة في الحوش بالليل مع الهواء العليل أحسن من فندق خمسة نجوم في باريس، وأهلنا الطيبين ... مافي زول طيب في البلد ديك ... لو في زول طيب يكون بقة طيب من شهر أبريل المضى ده لغاية الليلة (تاريخ عودتي من إجازتي في السودان) .. وللأوطان في دم كل حرٍ يد سلفت ودين مستحق، ما في لا يد سلفت ولا دين مستحق، قرينا بعرقنا واتجهجهنا لامن ربنا غفر لينا عشان نحصل على شهادة جامعية وبعد ذلك أوصدت أبواب الوظائف في وجوهنا... وبعدين وهمة تراب السودان ووووو من نوع السيمفونية الوهم الكل واحد قادينا بيها دي والله أي زول عايش الوهمة دي وعارف إنها محض زيف ساي ... ترعرعنا في السودان مع بواكير عهد مايو ... سلب نهب لخيرات البلد من قبل الحُكام وكبار المسئولين ... بالله وزراء حاكموهم مع سقوط نظام مايو سارقين عيني عينك بلا خجلة الواحد تلقاهو واقف يدافع عن نفسو أمام المحكمة والأدلة تدينه بكل وضوح، أي واحد يختوهو في مكان ينهب ويسرق ويجي البعدو بلا ضمير ولا مسئولية يسوي السواهو القبلو ويمشي وننتظر البعدو وعايشين في المأساة دي وما عارفين البمرقنا منها شنو زاتو ...
الناس البنبحو بي حب السودان في الخارج ديل ويتشدقوا بسمفونية مشروخة غزلاً بشعار العودة للوطن أي واحد فيهم لو قالوا ليهو أرجع حسه الجقلبة بتحصل وأنا أولهم بالمناسبة... وأي واحد رجع للسودان، رجع بعد أن فقد عمله وفتش عن بديل ما لقى أو اللقاهو ما جايب تعبو عشان كده رجع، أو واحد هيأ لنفسو في السودان واقع أجدى اقتصادياً وكانت الأسباب الأسرية المتمثلة في ارتباط الأبناء والبنات بالجامعات في السودان هو دافعه... وقطعاً لو كان التعليم في أي مكان في السودان أقل كُلفةً لما تردد في سحب خيار العودة للسودان من قائمة خياراته، وهذه هي الحقيقة لو لا أن الجميع يدفن عن قصد رأسه في الرمل عنها ... والقاعدين في السودان: جزء يراودهم حلم الخروج من السودان ولا سبيل إليه، وآخرين يبذلون قصارى جهده للخروج ولو ببيع كل ما يملك، أما المتمسكين بالبقاء ظروفهم الاقتصادية هي التي اقتضت ذلك فيما عدا ذلك هذه الفئة الأخيرة لو انقلب عليهم ترس المجن، الدنيا أدتهم قفاها لوجدتهم أو الباحثين عن المخارجة ...
نحلها في الجنوب عشان تقيف الحرب والحال ينصلح يقوموا ناس دارفور وكمان بعدد من الفصائل مش فصيل واحد... يرضّوا ده، يطلع لينا واحد بي هناك، قالوا شنو مناضلين من أجل السودان وعندهم أجندة ... ويطلعوا ليك كمان ناس الشرق ... الوحيدين القافلين خشمهم وساكتين راضين بي واقع مرير ناس الشمالية، وديل كمان بس مغلوبين على أمرهم ساي وما ناس شدائد وإلا كان المفترض أول ناس يخشوا الغابة، يعني فرصة استقرار دي أنسى خالص مما يعزز مزيداً من البهدلة والفقر والعوز للشعب المغلوب على أمره ...لأنو في النهاية كوارث الحرب دي لا بيعاني منها البشير وبطانتو ولا رؤساء وقواد الفصائل المتمردة دي ... بيعاني منها زول مسكين ساكن مرزوق وعايش على الله وعلى الماسكين زمام الأمور في البلد عشان يوفروا ليهو حياة كريمة ... وهمة كبيرة ونقعد نتجادل جدل بيزنطي سمج لا طائل من وراءه في السياسة ونحن ساستنا أثبتوا إننا غير جديرين في الأساس بمسئولية وطن في حجم قارة متعدد الثقافات والموارد والثروات قوموا بالله بلا وهم معاكم ...
فقدنا بريقنا الذي كُنا يوماً نزهو تيهاً به ... لا شيء يميزنا الآن سوى الفشل الذي يضرب جنبات حياتنا بكل جدارة واقتدار ... وروني عندنا شنو ... وأنا بوريكم رصيدنا من كل سوء الدنيا ... بلد متخمة بالفساد والمفسدين ... أدعياء دين لا دين ولا عقيدة لهم غير بطونهم وحسابات بنوكهم ... تحول السودان لمجتمع مادي وضاعت قيم الخير والجمال والإنسانية ... عشان تعمل أي حاجة في أي مكان في السودان وطنك لازم تدفع رشاوي أو تتعامل بالواسطة والمحسوبيات ... خدمة مدنية متردية بدرجة العدم ... كلو عايز يملى شبكتو ولا حد سائل في وطن ولا تقدم ولا تطور ولا تنمية ولا غيرو ... عمرنا ما سمعنا وزير استقال لإحساسه بالمسئولية المباشرة في تردي واقع وزارته وفشل وزارته في تحقيق أهدافها الموضوعة وطبعاً أصلا ما في وزارة عندها أهداف واضحة لانجاز مهامها ... اللهم هذا الوزير أو ذاك يحشد حوله كمية من المسئولين في أغلب الأحيان من جماعته – نفس القبيلة أو البلد – ويقعدوا كلهم ينخروا في عظم الوزارة إلى أن يحين أجله ليأتي خلفه بنفس الإستراتيجية والساقية لسه مدورة ... أقرب مثال بس خلونا ناخد وزارة الصحة ومستشفياتها ومرافقها المعفنة ...
تقول لي السودان والشعب السوداني؟؟ ياخي نحن شعب وسخااااااااان وسخان أمشوا شوفو الخرطوم وتعالوا ناقشوني ... حاجة مستغرب ليها إلى يومنا هذا ... زول كبير Mature يبول واقف على حيلو في الشارع ؟؟؟ المكان منطقة WCs مفتوحة في الهواء الطلق تقيف تتبول عادي وتتخارج ... والأدهى والأمر إنو في ناس بعملوا إإح عديل كده ... أها دي بس تجي كيف دي؟؟ بس أشرحوا لي ... والله القافل على السودان ده قافل على طافي بلد لا بتتقدم ولا حتتقدم كل سوء الدنيا مستوطن هناك ومعشعش ...
كنتُ من المداومين على قراءة جريدة الخرطوم ومنذ كانت تصدر في القاهرة ولازلت أحصل يومياً عليها أصبحت الآن لا أطيق النظر إليها وقلت للزول البجيبها لي تاني ما عايزها ذاتو لمها عليك... كذب نفاق كلام في وادي والواقع في آخر ... هراء وزراء غير مؤهلين ولا جديرين بالمناصب التي يستمتعون بخيراتها من سيارات وخدم وحشم ومليارات ...
واحد مرة قال عايز يخطط وينتهج أسس علمية، عمل حاجة اسمها الإستراتيجية القومية الشاملة ... من الاسم بان عليهو مزيف وأفاق ساي طلع ليها بند منصرفات طويل عريض لغفو وتاني لا شفناهو ولا سمعنا بالاستراتيجية القومية الشاملة، وأصلاً العيّنو ده لو جاد من الزمن داك كان الاستراتيجية دي جابت آخرنا ... لكن يكون سمعها في مكان ما وقال يستهلك بيها من زمنا الما ليهو أي قيمة ده ...
هووووووي ما عندكم أي شيء ... ما تجو تتبجحو والله وهم وهم ومحض إفتراء ووطن كلكم تفضلون غربتكم عليه
|
|
 
|
|
|
|
|
| العنوان |
الكاتب |
Date |
| سوداني فقد سودانيته | نادر | 07-11-06, 08:32 AM |
| Re: سوداني فقد سودانيته | Hussein Mallasi | 07-11-06, 08:48 AM |
| Re: سوداني فقد سودانيته | Abureesh | 07-11-06, 10:54 AM |
| Re: سوداني فقد سودانيته | hatim | 07-11-06, 10:57 AM |
| Re: سوداني فقد سودانيته | نادر | 07-12-06, 00:16 AM |
| Re: سوداني فقد سودانيته | نادر | 07-12-06, 00:10 AM |
 Re: سوداني فقد سودانيته | saadeldin abdelrahman | 07-11-06, 02:27 PM |
| Re: سوداني فقد سودانيته | نادر | 07-12-06, 00:20 AM |
| Re: سوداني فقد سودانيته | عبد الله عقيد | 07-11-06, 02:45 PM |
| Re: سوداني فقد سودانيته | فيصل محمد خليل | 07-11-06, 03:14 PM |
| Re: سوداني فقد سودانيته | نادر | 07-12-06, 00:49 AM |
| Re: سوداني فقد سودانيته | نادر | 07-12-06, 00:41 AM |
| Re: سوداني فقد سودانيته | DKEEN | 07-11-06, 05:24 PM |
| Re: سوداني فقد سودانيته | ناصر الحاج | 07-11-06, 06:27 PM |
| Re: سوداني فقد سودانيته | المسافر | 07-12-06, 00:23 AM |
| Re: سوداني فقد سودانيته | نادر | 07-12-06, 00:47 AM |
| Re: سوداني فقد سودانيته | نادر | 07-12-06, 01:27 AM |
 Re: سوداني فقد سودانيته | نادر | 07-12-06, 01:25 AM |
| Re: سوداني فقد سودانيته | Saifeldin Gibreel | 07-12-06, 03:09 AM |
| Re: سوداني فقد سودانيته | الصادق صديق سلمان | 07-12-06, 02:52 AM |
| Re: سوداني فقد سودانيته | othman mohmmadien | 07-12-06, 03:27 AM |
| Re: سوداني فقد سودانيته | Omar Bob | 07-12-06, 03:47 AM |
| Re: سوداني فقد سودانيته | shammashi | 07-12-06, 04:01 AM |
| Re: سوداني فقد سودانيته | حسن الجيلى سعيد | 07-12-06, 04:09 AM |
| Re: سوداني فقد سودانيته | مريم بنت الحسين | 07-12-06, 04:45 AM |
| Re: سوداني فقد سودانيته | نادر | 07-12-06, 07:11 AM |
| Re: سوداني فقد سودانيته | النصرى أمين | 07-12-06, 07:23 AM |
| Re: سوداني فقد سودانيته | DKEEN | 07-12-06, 07:44 AM |
| Re: سوداني فقد سودانيته | Mohammed Elhaj | 07-12-06, 07:51 AM |
| Re: سوداني فقد سودانيته | Mohammed Haroun | 07-12-06, 08:12 AM |
|
| |
فيس بوك
تويتر
انستقرام
يوتيوب
بنتيريست