|
كاتب ساخر من الدويم/ الطيب عبد الرحيم خلف الله
|
.
وصلني هذا النص من الأستاذ/ الطيب عبد الرحيم خلف الله ، عبر البريد الإلكتروني ووجدت فيه بغيتي كنموذج لنوع الكتابة، لا أسميه الآن وأدعو الجميع لمناقشته. أعجبتني فكرة النص ونشرتها دون إذن صاحبها. النص: حكاية في جباية دمغة الغريق
في المنزل: دق مندوب شركة تحصيل فواتير (التلفونات) باب منزل جارنا (حاج الطاهر( - ده منزل الطاهر فضل الله؟ - نعم - نحنا فواتير التلفونات. ثم ناوله فاتورة التلفون. أخرج حاج الطاهر نظارة القراءة من جيب جلابيته وبدأ يقرأ في تفاصيل الفاتورة.. محادثات عالمية.. محادثات محلية.. هاتف جوال.. ضريبة.. دمغة غريق قال حاج الطاهر في استغراب وهو يضع سبابته أمام (دمغة غريق) مخاطباً المتحصل: كدي أقرا ليا دي شنو، دمعة شنو؟ >- دي يا حاج ما دمعة.. دمغة.. بالغين مش بالعين . دمغة غريق.. ألف جنيه بس. - مش في ألف جنيه بس .. هي ذاتا شنو؟ - والله يا أستاذ انحنا بنتحصل القروش بس. لو عندك أي أسئلة، أمشي (شركة التلفونات. هناك يشرحوا ليك الموضوع. في الشركة: - عاوز أقابل الزول المسئول عن التحصيل - شفت الممر داك.. أمشي عديل. تاني لف شمال تاني لف يمين أول مكتب يقابلك دا هو مكتب مدير التحصيل. تابع حاج الطاهر الوصف؛ وجد نفسه ،وجهاً لوجه أمام مكتب مدير التحصيل. - السلام عليكم - وعليكم السلام >والله في الحقيقة أنا بس عندي استفسار.. قال المدير،مبتسماً: " ها تفضل" - الحقيقة جاتني فاتورة التلفون وفيها ألف جنيه مكتوب قدامها دمغة غريق.. أول حاجة الشيء الأنحنا عارفنو أنو الدمغة دي (طابعة) بلصقوها لمن الزول يجي يقدم طلب. والحاجة التانية غريق شنو؟ وأنا مالي ومال المسألة دي؟. محادثاتي وبدفعها ليكم.. تاني ما عندكم معاي حاجة يعني انتو لازم تاكلو أموال الناس بالباطل؟ أعتدل المدير في جلسته ثم قال: " يا أستاذ ما (تهيج) ساكت.. أول حاجة انحنا ما قاعدين ناكل مال زول بالباطل لأنو المسألة دي أجيزت من المجلس التشريعي للولاية.. وانتو النواب ديل انتخبتوهم.. يعني هم بمثلوكم.. يعني هم موافقين نيابة عنكم.. يعني بالعربي انتو موكلنهم.. وهم اصدروا القرار دا نحنا ما علينا إلا التنفيذ.. والحاجة التانية (الحكومة) ما شغالة بالتسميات شغالة بالجوهر . بالمضمون.. الدمغة دي يلصقوها.. يدبسوها.. ما مهم، المهم تندفع.. هسع لو المسائل تسميات كان تكون في حاجة اسمها المساهمة الإلزامية؟. - أها وهسع حكاية (دمغة الغريق) دي شنو...؟ - والله أنا ما بقدر افتيك لكن لو عاوز تعرف أكثر . لحسن حظك ، منظمة الغريق ذاتا المبنى بتاعا أهو داك.. العمارة الصفراء ديك ممكن تمشي تأخذ منهم معلومات وتعرف الحاصل شنو. في المنظمة: مبنى المنظمة عبارة عن (فيلا) فخمة ذات سياج معدني أنيق معلقة عليه بعض اللوحات الإعلانية التي تحض المواطن على تقديم الدعم والمساعدة للمنظمة ؛ من أجل القيام بدورها الاجتماعي فتلك لوحة كتب عليها: (أيها المواطن الكريم تبرع بكفن غريق تكسب ثواباً) وأخرى كتب عليها: (من كفن غريقاً فكأنما أطعم عشرين مسكيناً) وثالثة تقول: (الغرقى إخوانكم فتبرعوا لهم)، (الغرقان في ذمة العايش). بعد أن قام (حاج الطاهر) بقراءة كل تلك اللوحات.. ومتع ناظريه بمشاهدة السيارات البيضاء الفارهة، موديل العام نفسه. كانت السيارات تتراصَّ في مكان معد لها ومسقوف. دخل إلى المبنى الجميل وطلب من موظف الاستقبال مقابلة المدير العام للمنظمة. في مكتب المدير: مكتب المدير العام .. مكتب فسيح ، مكيف مركزيا، تتدلى من حيطانه ستائر إيطالية بينما غطيت أرضيته بالسجاد الإيراني . به طقم جلوس أمريكي فاخر وقاعة اجتماعات أنيقة من الخشب المصقول اللامع .. أمامها مكتب نصف دائري. يجلس عليه السيد المدير، بوجه لامع تبدو عليه آثار النعمة و(الراحات) و(التكييف طويل المدى( ، كما حدث نفسه. - السلام عليكم - وعليكم السلام ورحمة الله تعالى وبركاته .اتفضل. مشيراً إلى أحد كراسي الجلوس الوثيرة. وجلس (حاج الطاهر) ثم قال مخاطباً السيد المدير: - والله في الحقيقة أنا جاتني في فاتورة التلفون دمغتكم دي وقلت أجي أقابلكم أعرف الحاصل شنو؟ وما مدى (مشروعية) دفع الدمغة دي. - والله يا أخي نحنا (بنثمن) فيك الروح الطيبة دي وتجشمكم مشاق الحضور لي دارنا المتواضعة عشان تتعرف على ما تقوم به هذه المنظمة من عمل خيري، يهم المسلمين جميعاً. في الحقيقة المنظمة دي جات نتيجة لتزايد حالات الغرق.. كل يوم والثاني . يقولوا ليك ثلاثة أصحاب مشوا البحر غرقوا. ناس مشوا رحلة ما رجعوا.. وحافلة وقعت من الكوبري الركاب ما اتلقو.. وجثة طافية في النيل.. الناس ديل كلهم، الحكومة تجيب ليهم (غطاسين) من وين ؟؟؟ ونجيب ليهم (بكاسي) تشيل جثتهم من وين؟؟ .. ونجيب ليهم ثلاجات تحفظ جثثهم لحدت ما أهلهم يتعرفوا عليهم من وين ؟؟؟ .. الإجراءات .. حمل الجثمان للمشرحة .. وضعه في الثلاجة .. تشريحه .. تصويره وعمل إعلان في الجرائد عشان أهلو يتعرفوا عليهو .. وفي حالات عدم التعرف تكفينو ودفنو .. من وين ؟؟؟ وما تنسى مرات بيكون الزول الغرقان دا ذاتو مكتول. وفي الحالة دي نحنا في المنظمة بنتابع مع (الشرطة). الصرف دا كلو الحكومة تصرفوا من وين؟ .. في ميزانية الدولة في بند زي دا ؟؟ ما لازم منظمات المجتمع المدني مع المواطن يساهموا في المسألة دي . انت هسع ذاتك ما ممكن بكرة تقع بيك عربية في النيل يجبيو ليك غطاسين من وين ؟ باختصار نحنا مسؤولين من (الغريق) من لحظة دخولو الموية إلى لحظة دخولو القبر. - دا كلو كلام جميل لكن أنا ذنبي شنو؟ - ذنبك شنو كيف يا أستاذ.. مش أنت زول مسلم والبغرقوا ديل كلهم أخوانك في الإسلام؟ رد حاج الطاهر في استنكار: " لا .. البغرقو ديل كلهم (مواطنين) لكن ما كلهم مسلمين، وكلامك دا ضد (الدستور) واتفاقية ... قاطعه المدير: " لا .. لا .. انحنا الناس الما مسلمين ديل عندنا ليهم (إدارة) براها في المنظمة اسمها (إدارة الناطقين بغيره) .. بالشهادة يعني. - لكن هسع السودان كلو يدفع (للغريق) دا ؟ مسلم على غير مسلم .. يعني لو التلفونات دي فيها مليون مشترك وانتو قاعدين تاخدو ألف جنيه من كل واحد يبقى بتجمعو ليكم مليار جنيه في الشهر.. دا غير العاوز يطلع أو يجدد جواز أو بطاقة أو رخصة قيادة أو عاوز يطلع شهادة بحث دي كمان مليارات.. انتو بتودو القروش دي وين؟ أصلو القاعدين (يغرقو) ليكم في الشهر كم؟ تنفس المدير بصبر وصاح في حاج الطاهر: - يعني أنت بس دي (بالذات) عاوز تعرف أنها ماشة وين انت هسع (الباقين) عارفهم بمشو وين ؟." ولما لم يرد حاج الطاهر استطرد: "..عندك هسع دمغة (الطريح ودمغة) ودمغة (الشليق) ودمغة (الحابل) ودمغة (النابل) ..ديل كلهم عارفهم بمشو وين؟ ..أكيد تكون يا أستاذ افتكرت أنو القروش دي كتيرة .. أول حاجة يا أستاذ لازم تعرف أنو مسألة دي مكلفة .. لنشات وغطاسين وجازولين وخلافه .. عندك مثلاً الراجل الوقع من كبري (الإنقاذ) وانتحر الأسبوع الفات عشان ما قدر يدفع مليون جنيه رسوم ولدو الدراسية .. دا نحن بس عشان نلقى الجثمان بتاعو ؛المسألة كلفتنا ثلاثة مليون .. - طيب لو كان اديتو المليون ما كان انتحر. - يا استاذ أنا بكرر ليك دي ما مسؤولينها .. دي مسؤولية ديوان الزكاة .. صندوق التكافل .. الرعاية الاجتماعية .. صندوق دعم الطلاب أي حاجة تانية .. لكن مسؤوليتنا نحن ، تبدأ من لحظة موت الغريق داخل الموية وحتى ندفنو. طرح حاج الطاهر سؤاله في استنكار شديد، هذه المرة: - يعني القروش دي كلها.. يعني كم مليار جنيه في الشهر كلها غطاسين ولنشات وجازولين؟ .. معقول بس. - طبعاً لا يا أستاذ.. القروش البتفضل قاعدين نوظفها.. قاعدين نعاين للمستقبل.. هسع لما يجي يوم الناس دي كلها تغلبها المعايش تكابس البحر وتنتحر والله ما تلقى إلا المنظمة دي تسترها.. نحن - يا أستاذ - مستعدين للغرق (الجماعي) اللي را ح يحصل وعاملين حسابنا.. ومش كدا وبس نحن عملنا مشروعات استثمارية نوظف فيها القروش دي عشان تنمو وتعمل. رصيد كويس نقدر نجابه بيهو أي غريق. - زي شنو؟ - طيب تعال اتفرج على الصور دي.وفتح السيد المدير البوماً كبيراً مليئاً بالصور الملونة. شفت دي.. الشايفها دي .. المباني أم أربعين طابق دي .. دي أبراج الغريق التجارية في قلب الخرطوم وبتنفذ فيها شركة (صينية) و ح نبيعها شقق ومكاتب.. (يقلب الصفحة) والبصات السفرية السياحية الفاخرة دي .. دي مية وخمسين بص أسسنا بيهم شركة سفريات الغريق، الخرطوم - مدني - بورتسودان - دنقلا.. ثم المدير الصفحة. شايف كل صيدليات (الغريق) الفي العاصمة دي بتاعتنا .. ولسع عندنا مشروعات كتيرة.. دا كلو يا أستاذ استثمار عشان الغريق.. يعني السودان دا كلو لو غرق، انحنا ممكن بي إمكاناتنا دي نحصلو ونشيلو ندفنو.. أها بعد دا في زول يقول نحنا قاعدين نهمل الغريق؟؟ . زول يقول إنو البلد ما فيها آليات لدرء الغرق. - طيب انتو وكت القروش دي كتيرة كدا وعملتوها عمارات وشركات واستثمارها ما تفكرو تساعدو المواطنين (الغرقانين) في (الديون) والفقر والمرض ودا ذاتو يكون شيء وقائي عشان ما يمشوا ويغرقوا ليكم. - والله يا أستاذ حسب النظام الأساسي لمنظمة الغريق نحن بنعني بمساعدة الغريق البحري والنيلي، وحتى البغرق في (ترعة).. لكن (البري) دا ما معانا.. دا مسؤولية (الرعاية الاجتماعية).. (مواصلاً) : - شوف يا أستاذ نحن المواطن الغرقان دا همنا الأول والأخير ولازم يلقى عناية تليق بيهو مش هنا وبس حتى لو برة السودان.. نحن الأسبوع الجاي ح نفتتح مكاتب (جهاز شؤون الغرقانين بالخارج). عشان نكون مسؤولين من البغرق برة السودان كمان. ابتسم حاج الطاهر في سخرية وقال: - ودي طبعاً ح تكون دمغتها بالدولار والريال والاسترليني ولا شنو يا مــــولانا؟؟؟ - أكيد.. نحنا عملنا المنظمة دي عشان نحفظ للمواطن السوداني (الغريق) حقو في أنو يغرق غرقة لائقة.. يعني مش معقول يعيش (ممرمط) و(مشلهت) ولما تنسدا الأبواب في وشو ويقوم ينتحر ويغرق كما تاني يتبهدل. خرج حاج الطاهر من المكتب ، يجرجر رجليه وهو يتمتم: " وانتو ما (يتغرقو) مالكم؟؟ غواصات؟؟ الله لا كسبكم "
ملاحظة هامة عقب اتصال تلفوني بالأستاذ الطيب عبد الرحيم في السودان، نفى أن يكون العمل له، ولايذكر من أي جهة وصله النص. وأنا بدوري أعبر عن عميق أسفي للخطأ الذي حدث مني، وحتى لا يعد هذا تهجما على أعمال الآخرين. ولكن يبقى رأيي الشخصي في الموضوع كما هو ، ولا أستغرب أن يأتي الأستاذ الطيب بعمل مشابه أو أفضل مما وصلني. والحمد لله أن كان العمل فاتحة خير لحوارات ثرة. وسأبحث بعد عودة الأستاذ الطيب عن صاحب العمل، وله ألف معذرة. ذكرت ذلك إحقاقاً لحقوق الآخرين، وأشكر الأستاذ الطيب عبد الرحيم لأمانته وفي أقرب فرصة سأنشر شيئاً من أعماله، إن شاء الله.
(عدل بواسطة ابي عزالدين البشري on 07-06-2006, 05:36 PM) (عدل بواسطة ابي عزالدين البشري on 08-12-2006, 09:09 AM) (عدل بواسطة ابي عزالدين البشري on 12-12-2006, 02:05 PM)
|
|
|
|
|
|
|
|
Re: كاتب ساخر من الدويم/ الطيب عبد الرحيم خلف الله (Re: shahto)
|
الأخ عبد الباقي سلامات/ يا حليلك ما نسيت الدويم. بالمناسبة الطيب الآن في الدويم. ولكن هذه المرة كانت زيارة الطيب للسودان بغرض مناقشة رسالة الدكتوراة. نسأل الله أن يوفقه في كل خطوة يخطوها. أبو عزام راجل يستاهل كل خير، وإن شاء الله يوم شكره ما يجي.
| |
|
|
|
|
|
|
Re: كاتب ساخر من الدويم/ الطيب عبد الرحيم خلف الله (Re: ابي عزالدين البشري)
|
الاستاذ ود عذالدين سلامات لقد تجولت لوحدي في ليلة قمرية مررت بالكثيرين لم يتعرفوا علي سخصي المسكن جبا لهم و للدويم و عند البرخ جلست ثم انبطت علي بطني او كرشي و حهشت بالبكاء ( استغفرتك يامالك روحي) و الله شمتت التراب الاسود و تزوقت و شبعت انتماء لهذا الوطن الحقيقي شققت المقابر حتي الظلط ، عدت مرة اخري لالقاء التحية لابي و جيرانه الكرام .
| |
|
|
|
|
|
|
Re: أهلا بيك إبراهيم / الطيب عبدالرحيم (Re: الطيب عبد الرحيم خلف الله)
|
مرحبا بك بيننا
لنشرب معا من بئر جدك تنيبور
بوجودك احس وجود من احب من اثري و جذوري
و بك تستدعي ذاكرتي حضرة من اهوي من من رحلوا عنا
امي صفية بت خلف الله و شقيقتها ريا
امي الحاجة ذكية ام الكل
و الخال الحاضر الغائب عوض
و فيك اشتم رائحة آبائي عبدالرحيم و محمد احمد و رجب
فيا بعض من روحي و كل دمي مرحبا
| |
|
|
|
|
|
|
Re: الشايقي (Re: أحمد الشايقي)
|
الأخ الشايقي و أنا( ابصم بالعشرة )على عضوية الأستاذ الطيب ، فهي كسب لنا جميعا. ولكن دوركم أن تكتبوا مباشرة إلى الأخ بكري كتعضيد لطلبه وطلبي.
| |
|
|
|
|
|
|
Re: كاتب النص في سطور (Re: ابي عزالدين البشري)
|
الكاتب في سطور:
الاسم: الطيب عبد الرحيم خلف الله، مشهور بلقب البرشوتي ولقب تينيبور. الميلاد: 1953 بالسودان – الدويم – حي التخديره الدراسة: الأولية، ببخت الرضا الوسطى بمدرسة الدويم الأهلية الثانوية بالدويم وكوستي الجامعة: جامعة الخرطوم – كلية الآداب ( تخصص جغرافيا) ماجستير : جامعة الخرطوم الدكتوراة : جامعة الخرطوم ... رجع السودان حاليا لمناقشة رسالة الدكتوراة وثمة دراسات أخرى . لغة ألمانية بمعاهد الأفق بالرياض، تقنية علوم الاتصال بالمعاهد العالمية بالرياض، برمجة ولغات ، شبكات و... البحث: باحث في مجال الأنهر في أفريقيا، نبات الماعونة في النيل، وموارد الأنهر. رحلاته العلمية: تقريبا طاف كل إفريقيا، بغرض البحث العلمي وله ود خاص لأفريقيا والأفريقيين. اللغة : يتحدث العربية ، الإنجليزية والألمانية بجانب لهجتين آفريقيتين. العمل: عمل مدرسا بالسودان أول تخرجه، في عدد من المدارس ثم مدرسة Sister School عمل بالسعودية مترجما، محللا للمعلومات... ثم مديرا للتدريب أخرى: إن الطيب، قارئ نهم، يحب الإطلاع، السفر والموسيقي. له عناية خاصة بعلوم الفلك، ويبدو ذلك واضحا من الصور والخرائط المعلقة على صالونه بالرياض، و أكثر من مرقاب فلكي ببيته، فهو لا يضيع فرصة مراقبة هلال رمضان، أو رؤية أي خسوف أو كسوف. الرجل يعد من العلماء في مجاله ، بجانب إلمامه الواسع بتاريخ مدينته ومنشئه الدويم، فهو شاهد على كثير من الأحداث والتغيرات الاجتماعية في هذه المدينة العملاقة. الكاتب الطيب عبد الرحيم، يكتب كثيرا مثل هذا النص المنشور أعلاه، و لا يعده إلا مجرد خواطر خاصة به، لا يهتم بأرشفتها أو نشرها. رجل نشط ، مرح و أكثر ما يميزه أنه ذو نشاط اجتماعي متميز ومعروف في الأوساط الثقافية ،العلمية والرياضية بالرياض. ملحوظة: هذه السيرة اليسيرة عن الطيب دونتها حسب معرفتي الشخصية، ودون الرجوع إلى صاحبها. وقصدت بنشر النص إظهار نوع من الكتابة لواحد من أبناء الدويم ولا شك أن هنالك غيره لا يحصون ولم تجد أعمالهم فرصة للنشر.
| |
|
|
|
|
|
|
سياحة داخل النص (Re: ابي عزالدين البشري)
|
النص ، سردي: النص الذي بين أيدينا ، يبدو كأنه خاطرة ، دارت في ذهن الكاتب ؛ إثر حادثة محددة؛ فأراد صاحبها أن يوثقها لنفسه؛ فأخرجت هذا النص. هذا النص يصعب تصنيفه، كقصة صغيرة، أو أقصوصة، رغم ما يتوفر فيه من عناصر القصة، من حيث تطور الأحداث وتصاعد الحوار. والعمل برمته يشابه شيئا من الكتابة التي مارسها الدكتور محمد عبد الله الريح ( حساس محمد حساس) في الصحافة، ضمن استراحته المشهورة، ويشبه أحيانا تجربة الأستاذ المبدع يحي فضل الله ، في ( تداعيات) خلال الثمانيات. ولكن النص اعتمد على الحوار، مما يجعله أقرب إلى العمل المسرحي أو كتابة التمثيليات، خاصة أن صاحبه قد جزأه تجزيئا يساعد على ذلك فجعله مشاهد، المشهد الأول ورمز إليه بعنوان جانبي ( في المنزل) والمشهد الذي يليه ( في مكتب التلفونات) ، ( في مكتب المدير) و... وكأن الكاتب قد أراد إخراجا مسرحيا لنصه، من خلال رسمه أو اقتراحه لشكل الحركة أو وصف المكان. فهو يقول: (أخرج حاج الطاهر نظارة القراءة من جيب جلابيته وبدأ يقرأ في تفاصيل الفاتورة ...) ويقول: (قال حاج الطاهر في استغراب وهو يضع سبابته أمام (دمغة غريق) مخاطباً المتحصل ") كذلك لم يهمل وصف المكتب ونوع الكراسي والستائر و لم يهمل وصف موقف السيارات, ولكنه سرعان ما أهمل ذلك لما استغرق في السرد. اللغة: الكاتب يستعمل لغة سهلة ، هي العادية ، الفصيحة لا الفصحى ؛ فلا يتكلف ولا يتقعر، بل يجعل الحدث نفسه هو الذي يخلق لغة السرد.؛ فكانت اللغة بسيطة وحلوة. أما لغة الحوار الداخلي، فنقلها الكاتب بأمانة تامة، كما هي، دارجة، سودانية، سهلة وحلوة. الكاتب الساخر: تتجلى روح السخرية في الآتي: أولا: النص كله، مبني على فكرة أنه يجب ( التحصيل) . التحصيل بأي صورة، سواء كانت مقنعة أو غير مقنعة. و المواطن لا يملك الحق في السؤال عن القيمة المحصلة طالما أنها ( رسمية). أما استهجان الكاتب لذلك فهو ظاهر إذ سمى النص كله بكلمة قبيحة (جباية). ثانيا: المفارقة الواضحة بين مظهر المكتب الفخم ، الذي بهر حاج الطاهر، وادعاء المدير أنه مقر متواضع. ثالثا: الحرفية في تطبيق اللوائح والقوانين التي تجعل من المدير منفذا غبيا، يدعي أن حدود مسئوليته هي الأموات ، بل الذين ماتوا غرقا ولا شأن له بالأحياء أو الحفاظ على الأحياء. رابعا: ذكر الكاتب لبعض الأسماء والمسميات التي لا معنى لها وليست موجودة وغير منطقية "..عندك هسع دمغة (الطريح ودمغة) ودمغة (الشليق) ودمغة (الحابل) ودمغة (النابل) ومثال آخر: منظمة الغرقانين بالخارج، للناطقين بغيرها ... خامسا: صور الكاتب بعين راصدة الأحداث المعاشة ، في زمن تاريخي معين وقضية فرض الضرائب ، بشكل مضحك، ومنفر في آن واحد. وهذا واقع عاشه الناس لفترة طويلة، ضريبة الشهيد ، ترعتي كنانة والرهد، رسوم القناة الفضائية، رسوم طريق التحدي، ضريبة صندوق دعم الشريعة و كثير من المسميات. وكثير من الهيئات والمؤسسات التي يحق لها أن تجمع المال، بطريقة عشوائية تنم عن الفوضى. وأظن أن الكاتب وفق لطرح القضية تحت المجهار، بغية التشخيص والعلاج. سادسا: موقف حاج الطاهر نفسه، موقف غريب، وقد يكون مرفوضا بين الناس، أن يتجشم أحدهم كل هذا العنت، ليسأل عن قيمة تافهة وهي الألف جنية. فاعتاد الناس على أن لا يسألوا إذا طلب منهم أن يدفعوا؛ طالما أن الحكومة رفضته وهو (رسمي)؛ كأنهم استسلموا للأمر. سابعا: حاج الطاهر نفسه ، الذي يمثل الضحية، لم ينج من الحرفية، فهو يسأل عن وجود الدمغة ( الدمغة دي بلصوقها...)، وكأني به لو كانت هنالك دمغة من ورق ملصقة على الفاتورة ، لما سأل. وهذا واقع اكتسبه من خلال العمل المدني. فهو أسير أيضا للوائح والقوانين، بل تعدى الأمر ليتكلم عن الدستور، مصيبا كان أم مخطئا، شأنه شأن كثيرين يظنون أنفسهم على علم ويتسمون تشدقا؛ (بالمثقفاتية). ثامنا: السخرية من موقف الحاج الطاهر، الذي اجتهد في قراءة المكتوب على الفاتورة ، بعد أن أكد الكاتب أنه قد استخرج نظارته؛ ولكنه أخطأ في قراءة الغين عينا." دي يا حاج ما دمعة.. دمغة.. بالغين مش بالعين . دمغة غريق.. ألف جنيه بس". وكأني بالكاتب قصد كلمة (دمعة) إشارة إلى الأسى الذي يحس به المواطن، فيقرأها هكذا وكأنه يهم بالبكاء. تاسعا: البرود الواضح للموظفين ، خصوصا المدير. لم يثر المدير في وجه المواطن ، كما نتوقع بل كان باردا متخلقا بسلوك من اعتاد على ذلك، متجاوزا للإثارة ؛ ليخدم غرضه الأساس في تحصيل المبالغ: " يا أستاذ ما (تهيج) ساكت.. أول حاجة انحنا ما قاعدين ناكل مال زول بالباطل لأنو المسألة دي أجيزت من المجلس التشريعي للولاية.. وانتو النواب ديل انتخبتوهم.. يعني هم بمثلوكم... بل أكثر من ذلك ساق الحجة على المواطن بأنه هو المسئول عن إصدار القرار وهذا واضح في النص أعلاه. وأخيرا: يتبنى الكاتب فكرة مفادها أن الموظفين المنعمين يستخدمون النصوص الدينة، واللغة الخطابية، مبرر للوصول لغاياتهم، لاحظ معي قول الموظف الأول، مستعملا كلمة أفتيك إشارة إلى الفتوى والتي اعتاد المواطن على سماعها، من أناس محددين: - كذلك وظفت اللوحات لكسب الشعور الديني ، رغم النقد الذي يمكن أن يوجه إليها: (من كفن غريقاً فكأنما أطعم عشرين مسكيناً) وثالثة تقول: (الغرقى إخوانكم فتبرعوا لهم)، (الغرقان في ذمة العايش). فالنص الأول ( من كفن غريقا فكأنما أطعم عشرين مسكينا) تخدع القارئ فيظن أنها حديث نبوي وهي ليست كذلك. و النص الثاني ، كتب بلغة دارجة لا يمكن أن تكون مثبتة على واجه مؤسسة ( الغرقان في ذمة العايش). و النص الثالث ( الغرقى إخوانكم فتبرعوا لهم)، نص يستطيع حاج الطاهر أن ينتقده، بحجة أن غير المسلمين ليسوا من إخوانه. تعقيب: النص ممتع واستطاع الكاتب أن ينفذ إلى قضايا مهمة في حياة المواطنين، بطريقة ساخرة. أفرز النص انتقادات لاذعة للمواطنين ، الموظفين ، أجهزة الحكم المدني ... ولم يتعرض بشكل مباشر للطعن في الحكومة.
| |
|
|
|
|
|
|
الطيب في إجازة سنوية بالسودان (Re: ابي عزالدين البشري)
|
غادرنا الأستاذ الطيب عبد الرحيم، ليلحق بأسرته بالسودان. وهو الآن بين الأهل والأحباب. أتمنى له إجازة سعيدة. أتمنى له التوفيق فهو بصدد مناقشة رسالة الدكتوراة. وعليه فقد لا يستطيع التعقيب حاليا على المداخلات.
| |
|
|
|
|
|
|
Re: كاتب ساخر من الدويم/ الطيب عبد الرحيم خلف الله (Re: إسماعيل وراق)
|
اخونا بكري ابوبكر
الرجاء اضافة هذا المغوار لنا نحتاجه دوما و كانت غرفته في جامعة الخرطوم ملجاء لاهلنا من الدويم بجميع مستوياتنا الحياتية
الاخ بكري لم استطع حضور احتفال سودانيذ اونلين و فقدت بركات لقياكم الغالية رغم انني كنت في النهار متواجد مع اخونا ياسر لكن عندما ذهبت الي ما يو تعزرت المواصلات فكان الوجستي الي الخرطوم حمارين ثم رقشة و منها الحاقلات و غيره معليش استغرغني الهامش الذي انتمي له و احبة
المهم عليك الله عاوزين الطيب ان يكون في استضافتك و شكرا
اخي ابي انا عارف بفط نقاط و حروف الباقي تمه انت انها السريالية و لك العتبي حتي ترضي
| |
|
|
|
|
|
|
Re: Noon2 (Re: noon)
|
لك كل الشكر، وأنا أتمناه قائدا لنا. للطيب الكثير المثير ولكن هذا ما وصلني وتذوقته ونشرته دون إذن منه، مستغلا سفره إلى السودان. ربما كان الرجل يود طرح مادة أخرى، لأنه حينما أرسل لي النص، كان يقول لي على الهاتف: اضحك بس، وما تعلق. خالفت أمره وخلفت ظنه. عذري أنني أنشر لأخوتي، لزملائه ولتلاميذه على السواء. قصدت أن أشير إلى أنه نوع من الكتابة غير مصنف تصنيفا دقيقا. وكنت أرجو من النقاد أن يتناولوه تناولا أدبيا، موضوعيا، وعلى أسس علمية.
| |
|
|
|
|
|
|
Re: Noon (Re: noon)
|
التحية وهذه وظيفة الأدب عموما أن يكون مرآة للواقع، تعكس هذه النماذح، بغية الإصلاح - المستحيل-، . و الأستاذ الطيب مراقب جيد للواقع، بل هو مكتوٍ بناره. أما (جماعة) حاج الطاهر ، فيظنون أنهم مخلدون.
| |
|
|
|
|
|
|
مبروك شحتو... الطيب عضو بالمنبر (Re: shahto)
|
شكرا شحتو، ومبروك فقد وصلتني هذه الرسالة من الأخ بكري أبوبكر، جزاه الله خيرا: طبعا سأقتطف منها جزءا وهو الذي لا يتعلق بالاسم وكلمة السر.
From : bakri abubakr Sent : Friday, July 7, 2006 7:25 AM To : "obai albushra" Subject : Re: تزكية طلب عضوية لرجل عالم وكاتب | | | Inbox
-------------------------------------------------------------------------------- Attachment : sep.gif (< 0.01 MB) المنتدى العام لسودانيزاونلاين دوت كم Registration
Thank You! الطيب عبد الرحيم خلف الله - You are registered now
| |
|
|
|
|
|
|
Re: هل صحيح أن وراق ...؟ (Re: إسماعيل وراق)
|
يا راجل اصحى،عندي شمار لكن خليه كلام سر. واحده من المتابعين قالت لي:" ولدكم ده بقى كسلان ماله؟" أناشخصيا ما عندي شغله بي الموضوع ده ولا تعليق! أما بخصوص موضوع الطيب ولله الحمد وصلتني من الأخ الباشمهندس بكري أبو بكر عضوية الطيب والفضل لكم جميعا.
| |
|
|
|
|
|
|
Re: Sara Issa (Re: SARA ISSA)
|
الأخت الفاضلة شكرا لزيارتك الكريمة. مقدرات الرجل أكبر مما تتخيلين، فهو مفكر قبل أن يكون قاصا. أتمنى أن تزيدي علينا فضلك و تكتبي توصيتك للباشمهدنس بكري مباشرة. ولك الاحترام
| |
|
|
|
|
|
|
Re: كاتب ساخر من الدويم/ الطيب عبد الرحيم خلف الله (Re: ابي عزالدين البشري)
|
استاذي / ابي عز الدين البشرى
لك التحية والتقدير
الاستاذ/ الطيب عبد الرحيم رجل غني عن التعريف , وعلم في راسه نار ,فانتم خير من يقدم
مثل تلك القامات التي انجبتها حاضرة النيل الابيض مدينة العلم والنور ,, فهنيئا لهذا
البورد بامثاله وامثالكم .. ونسال الله له التوفيق والسداد في مشواره العلمي
| |
|
|
|
|
|
|
Re: خضر الطيب (Re: خضر الطيب)
|
العزيز خضر لن أقول شكرا، لأنه واجبنا جميعا أن نقول كلمة مثل هذي في حق أستاذنا العظيم الطيب عبد الرحيم، ولكني قامة تقصر عن مقام الخال. وشكرا لتعضيد طلبي لعضوية الأستاذ، فقد وافق الأخ بكري مشكورا على عضويته,
| |
|
|
|
|
|
|
أخيرا.. الأستاذ الطيب، عضوا (Re: ابي عزالدين البشري)
|
شكرا بكري أبوبكر
بمزيد من السعادة أزف خبر انضمام الأستاذ الطيب لبورداب الرياض. وأشكر الباشمهندس بكري أبوبكر، لا حرمنا الله منه، كما أشكر كل من عضد طلبي وأخص بالشكر: الأستاذ/الشايقي - أحمد محمود الأستاذ/إسماعيل وراق الأستاذ/الصادق خليفة الأستاذ/خضر الطيب خضر الأستاذإسحق بله الأمين الباشمهندس/أمين سيد مختار الأستاذ/الطيب برير يوسف الأستاذ/إبراهيم عدلان الأستاذ، التشكيلي شحتو- عبد الباقي علي أزرق الأستاذة/سارة عيسى الأستاذة/ noon وأتمنى عودة الأستاذ من السودان، بعد شهرين.
| |
|
|
|
|
|
|
Re: أخيرا.. الأستاذ الطيب، عضوا (Re: shahto)
|
الحبيب عبد الباقي تثير اللوحة في نفسي شجنا قديما. بالمناسبة لا زالت لوحتك التي علقت عليها بخط يدك: Oh mother Africa... Die & let others to live موجودة. وهي معلقة بصالون الأستاذ الطيب. وسأقوم بنسخها وإرسالها لك بعد حضور الأستاذ الطيب من السودان، بإذن الله. كانت اللوحة مرسومة بالشيني وملونة. لوحة 20 20X محددة تحديدا جريئا، تتماهى الألوان بداخلها وتتراوح بين الأصفر والبني والأسود. لا أدري إن كنت تذكرها أم لا . إنها تحدد لي مرحلة هامة من تطورك الفكري والفني. اللوحة ترجع إلى الثمانينات من القرن السابق. زرتك مرة ببري ، في رمضان ، كنت حينها مهموما بمملكة كوش. كنت تعمل في لوحة، هي هجين غريب، عجيب؛ ولكنه بعض مما في نفسك في تلك الحقبة التاريخية ، المأزومة سياسيا. جعلت الإله أبادماك نأيا عجيبا لفتاة تدل ملامحها على أنها أثيوبية. كان وجه الفتاة مشحونا بنظرة مبهمة، لم تكن التأمل وإن كانت تراقب قطعاأشبه بتلك الآثار التي أجدها في البجراوية. دعوتك لمعرض الأستاذ المبدع سيف لعوتة بمعهد جوته، ودعوتك أيضا إلى محاضرة بالمركز الثقافي الفرنس حول الحضارة المروية، يتحدث فيها باحث وباحثة فرنسيان... أذن أذان المغرب، فجلست معنا ضيفا، لا تأكل إلا اليسير، وقبل التراويح قمت إلى عملك... أين أنت الآن يا أخي من كوش؟ أشتاق إليك.
| |
|
|
|
|
|
|
Re: أخيرا.. الأستاذ الطيب، عضوا (Re: ابي عزالدين البشري)
|
قبل الترحيب بالأستاذ الطيب عبد الرحيم لابد من التقدم بالشكر لجميع من أيد وساند تزكية الأستاذ الطيب ليكون أحد أعضاء هذا الموقع الرائع وعلى رأس هؤلاء أخص بالشكر الأستاذ أبي الذي يقدم لنا كل يوم وجهاً مشرقاً يزيد من بهاء هذا البيت الكبير، والشكر موصول للسيد صاحب الدار الأستاذ بكري أبوبكر بقبول عضوية الأستاذ الطيب عبد الرحيم. فمرحباً بالأستاذ الطيب عبد الرحيم، هذا الطيب الإنسان المتعدد المواهب والذي سيثري هذا المنبر الهام بكتاباته المتميزة، فالرجل قامة سامقة‘ ودخوله هذا البيت الكبير أمنية قد تحققت فألف مرحبابالأستاذ الطيب: يا هلا وألف مرحبا بأهل السماحة والندى طبتم وطابت الدار بمقدمكم وغدت روضاً يانعاً أخضرا فالقلب لكم واحة وحدقات العيون لكم مسكنا
| |
|
|
|
|
|
|
إسحق ...وشهامة امرأة سودانية (Re: إسحاق بله الأمين)
|
العزيز ود الأمين ود البلد الطيبة فداسي
أولا نتمنى زيارة سعيدة وإجازة أسعد للأخ محمد حسن خضر. أستاذ الطيب لا شك سيسطر الفرحة في دواخلنا قبل البورد، وكل كلام يقال هو استهلاك للألفاظ لن يعبر عما نريد قوله. وجوده شئ طبيعي، والذين قاموا بتزكية الطلب هم من تلاميذه وأنا منهم. شرفتنا زيارتك ، ادخل.. اجلس لنا سؤال... كنت قد وعدتنا بنشر بوست تحت اسم ( شهامة امرأة سودانية) ... أين الموضوع؟ (... باقي اليوم ده حقك وكان ما وفيت بي وعدك نحولك للقانون ... أحمد الشايقي قاضيا... وأنا السجان.. والله اقول ليك خليني المتحصــل، حتدفع رسوم رفع القضية ضدك، رسوم الورق، رسوم النشر، رسوم أخرى، توضح عند الطلب... المتحصلين ديل مرتاحين بلا ترجمة بلا قرف)
| |
|
|
|
|
|
|
Re: إسحق ...وشهامة امرأة سودانية (Re: ابي عزالدين البشري)
|
الأستاذ أبي السلام والإحترام رحبت بالأخ الطيب قبل قراءتي للنص الرائع الذي أوردته هنا في البوست ( بالمناسبة ده سناريو جاهز يا ناس الدراما)، أجمل ما في النص عفوية "حاج الطاهر" المواطن البسيط في طرحه سؤالاً منطقياً ولم يجد له للأسف الشديدأي إجابة مقنعة بعد أن داخ من اللف بين العديد من الإدارات . هذا النص الدرامي الرائع لا يمكن أن يكون كاتبه غير الأستاذ الطيب عبد الرحيم ، ذلك الإنسان الشهم الكريم الذي أعرفه "جمل شيل وعشاي بايتات" وغارق في هموم أهله الغبش. "شهامة امرأة سودانية" أبشرك "قرّبت تنضج".
| |
|
|
|
|
|
|
إعادة تنبيه (Re: ابي عزالدين البشري)
|
تذكرة لا بد منها:
سبق وأن قلت إن العمل المنشور أعلاه اتضح لي من مكالمة الأستاذ الطيب أنه ليس له، ولكن أحمد الله أن كان فاتحة خير بالنسبة لنا وتشرفنا بعضوية الأستاذ الطيب. فشكراً لصاحب النص. وشكرا للأستاذ الطيب الذي تذوق النص وأرسله لي.
| |
|
|
|
|
|
|
Re: كاتب ساخر من الدويم/ الطيب عبد الرحيم خلف الله (Re: ابي عزالدين البشري)
|
الأخ / ابى عز الدين ، لك التحيه وللأخ / الطيب الكثير منها
فعلا السودان أصبح به العجب العجاب من مسميات سلب أموال الناس بالباطل ، حدث معى فى شهر مايو الفائت شىء غريب ، سافرت من جده لسواكن بالبحر بسيارتى وعند وصولى لسواكن خرجنا من الباخره ، وجدت سيارتى واقفه امام مدخل الباخره وبحثت عن مفتاح سيارتى جاءنى رجل ومعه المفتاح وقال لى هذه سيارتك ، قلت نعم ، قال طيب أدفع 50 ريال سعودى كى أسلمك المفتاح ، قلت له 50 ريال كى تسلمنى المفتاح قال نعم ، دمغة تسليم المفتاح ب 50 ريال ، قلت له خليه معاك وبله وأشرب مويته . قال لى لن أعطيك إياه الا تسلمنى ال 50 ريال ، قلت له لا أريده . أدخلت يدى فى حقيبة يد زوجتى وأخرجت المفتاح الإحتياطى الذى كنت محتفظا به فى حال ضياع المفتاح الأصلى ، وفتحت سيارتى وأركبت زوجتى والأطفال وتوجهنا لمكان التفتيش ، لم أرى أثر لهذا الرجل بعدها ، رحت وشكيت لأحد ضباط الشرطه بالميناء ، وقال لى معليش ديل ناس محتالين بس ، أنا حأجيب ليك المفتاح ، وفعلا بعد إجراءات التفتيش سلمنى هذا الضابط المفتاح .
| |
|
|
|
|
|
|
Re: كاتب ساخر من الدويم/ الطيب عبد الرحيم خلف الله (Re: ابي عزالدين البشري)
|
الزول السمح و عديل استاذي أبي
شوق كثيف رغم انني ضحكت من الأعماق لسخرية الاخ الدكتور الطيب وسرده المتناسق لفظاً و حدثاً و معناً الا ان اعتلت وجهي ابتسامة حزينه أليمة لحال اهلنا الغبش الذين تأخذ منهم الجبابات دون وجه حق ، رسوم ما انزل الله بها من سلطان اثقلت كاهل محمد احمد وجعلته يئن تحت وطأة الفقر و العدم و العوز وقلة زاد اليد .
القصة هي تصوير حقيقي في سخرية لا تخلو من الوجع و الألم و عدم الرضاء بوضع فوق طاقة الغالبية.
الأخ الطيب عبد الرحيم اضافة نوعية للمنبر نسأل الله ان يطيب له المقام وان يضمخ المنبر بأريج الكلمة الصادقة والمعبرة وان لا يخشى في الحق .
لك التحية استاذي أبي وانت دوما تتحفنا بالروائع من طيب الكلم وحسن المفردة وهذا حالك منذ ان عرفتك وانا يافع و مازلت اذكر اول يوم وانتا تعرفنا على اسمك في الفصل بلهجة موسيقية مموثقة ما زالت ترن في اذني (ابي عزالدين البشرى )
| |
|
|
|
|
|
|
الصادق ما تخجلوني.. (Re: الصادق خليفة)
|
عزيزي الصادق لك التحية وألف شكرعلى إحساسك الطيب الذي أعرفه لا الذي عبرت عنه مفرداتك. ما أنا إلا ناقل أحداث يود أن يؤدي رسالة التوثيق والنشر، فإن كان ثمة جمال فهو لكتاب النصوص. بالمناسبة هاتفك لا يرد كنت أود مشاورتك في موضوع أود نشره ( الفكي شعيب) حتى لا يفوتني ذكر شئ و أبحث أيضا عن هاتف الأخ لقمان... الحادثة كلها مؤلمة ولكن ثم كلمة لا بد أن تقال.
| |
|
|
|
|
|
|
Re: طيب أتى بطيب .. حتماً يطيب المكان ويبتهج الزمان .. (Re: ابي عزالدين البشري)
|
سبقنا شرف التثنية فآثرنا أن نكون ضمن المهنئين بزفة الجمال والإشراق
استاذنا الكريم
تجري العين على الاسطر ورمشها لا يغمض فهو مصفوف بإحترام فالدهشة بعدسة العين ماهى بفاحصة بل
مستمتعه وهى بين فصول الرواية تبث الحنين واشكال تداعيات الوصوف الدقيقة .. فرسم الحرف يقود
بخارطة التذكار لمواقف مشابهة تزيد الضوء إنبهار في زاوية خاصة يعاود نبضها هذا الألق ...
احترامي وودي
| |
|
|
|
|
|
|
عبد المجيد..أنت في مقدمتهم (Re: عبد المجيد محمود)
|
عزيزي عبد المجيد كلك إحساس وذوق. كنت أنت معهم وكنت في مقدمتهم طالما أنك مؤمن بقضية الإبداع. والشرف لنا بزيارتك مهنئا. ومبشرا، من خلال عباراتك عن كاتب رفيع المستوى. كلنا يا بني تلاميذ ولكن الله وهبنا مقدرة على التذوق. فله الحمد. أتمنى لك التوفيق.
| |
|
|
|
|
|
|
Re: شهادة وفاة ليد مبتورة (Re: ابي عزالدين البشري)
|
شهادة وفاة ليد مبتورة
وخير ما يعبر عن ذلك الواقع الذي رسمه الأستاذ الطيب أروي هذه القصة.
حكى لي أحد أصدقائي مرة أنه قرر زيارة صديق له بمستشفى الخرطوم. دخل صديقي مستشفى الخرطوم التعليمي، بعد دفع رسوم التي قررتها إدارة المستشفى. جوار متحصل التذاكر ، كانت هنالك فتاة تجلس على كرسي وأمامها منضدة و دفاتر مالية. لم يلق سوى نظرة عابرة للفتاة؛ فقد كان في شغل عنها. نادته الفتاة: - يا أستاذ... يا إنت .. يا أبو نضارة ... لم يسمعها ؛ فلحقت به. - السلام عليكم ، الظاهر مشغول شديد. - آآآآي يا بتي والله مشغول شغلة في الدنيا دي... كيف حالك ؟ والله ما عرفتك. - معليش ، ممكن ترجع معاي لي التربيزة ديــــــكا. - حــاضر ، إن شاء الله خير. - لا لا خيــــر ، إن شاء الله اعتدلت الفتاة في كرسيها وسحبت دفتر التذاكر ثم قالت: - جزاك الله خير، نحن منظمة الشهيد. بس عندنا تذاكر هنا ، وقيمة التذكرة ألف جنية بس. - جدا جدا ، ما في مشكلة . ( وهو يقول لنفسه : بســيطه). دفع الرجل قيمة التذكرة وانصرف. وقف الرجل ، على بعد عشرين مترا؛ فقد كانت هنالك منضدة أكبر جلس وراءها شاب وشابة . كانت الشابة تحسب بعض المال وتربطه، ثم تعمد إلى رزمة أخرى بعد تصنيفها. - و انتو شنو يا شباب؟ رد الشاب ، بصورة خطابية متقنة كأنه يحفظها ودهش صديقي لأن الشاب كان يتلوها بالفصحى: - جمعية أصدقاء الكلى . هذه الجمعية جمعية طوعية خيرية، إنشئت عام ... ومن أهم أهدافها... وفروعها... قاطعه صديقي : - يا أخوي الله يديك العافية ما في زمن . باقي على زمن الزيارة نصف ساعة وأنا ماشي الكلاكلة تاني. جايي عشان أشوف مريض بس. وأنا مسافر بكره الساعة 9 مساء. أدفع ليكم حقكم و اتخارج. أوقفت البنت ما كانت تعمل فيه وبأنامل مدربة سحبت دفتر التذاكر وأمسكت برزمة تذاكر استعدادا للقطع. ثم قالت له: - كم تذكرة يا حاج؟ ولم يملك صديقي نفسه فانفجر: - كم تذكرة؟! هو أنا خاشي سينما؟ أنا جيت قلت ليكم داير تذاكر. اديني تذكرة تجيكي الكشه. دخل صاحبي إلى المستشفى و زار قريبه ؛ فعرف أن الطبيب قرر بتر يده اليمنى. نادته الممرضة وسألته : إنت قريب الراجل ده؟ - نعم ، في حاجة يا أخت؟ - أيوه . أمش الصيدلية جيب لينا الحاجات الفي الروشته دي.. بنج ، قطن وشاش وكيسين درب. أسرع إلى الصيدلية وأحضر الأشياء المطلوبة كلها وهو يدعو لصديقه بالسلامة. وعند دخوله من نفس الباب السابق ، نادته الفتاة ثانية ولكنه روى لها قصته و استطاعت أن تتذكره ، فشكرها وانصرف. وقف عند الشاب والشابة و قال لهما: - أنا القبل شوية دفعت ليكم.... ردت الفتاة: كويس كويس ما في داعي لي الغناء ده كلهو بس ورينا التذكره وأنا بعرفها من التاريخ والإمضاء. أجريت العملية و سلمته الفتاة اليد المبتورة وطلبت منه أن يذهب إلى قسم الإحصاء لاستخراج شهادة وفاة لليد المبتورة، حتى يسمح له خفير المقبرة بأن يدفنها. وقف أمام شباك صغير وقدم تقرير الطبيب و أوضح لموظف الإحصاء أنه بصدد استخراج شهادة وفاة من الطبيب الشرعي ثم إحضار ملف علاقي يمين ودفع رسوم فتح الملف 1500 جنيه. ولا أنسى أن أذكر أن الرجل في المقابر دفع شيئا غير رسمي للخفير؛ حتى يتغاضى عن ملاحظة على الشهادة. وغاظه الخفير وهو يقول: - حق العشاء بس يا أستاذ.. عشان المرة الجاية تكون عارف الشغل ولا ندفعك أكتر. ده إذا ما عايز تأخر نفسك. إنت نسيت تختم الورقة دي في الشرطة يا أخوي... إنتو فاكرين الموت ده ساكت ولا شنو؟
أبي عز الدين
| |
|
|
|
|
|
|
Re: الأغنية مهداة لك يا خال (Re: ابي عزالدين البشري)
|
Quote: نحن الأسبوع الجاي ح نفتتح مكاتب (جهاز شؤون الغرقانين بالخارج). عشان نكون مسؤولين من البغرق برة السودان كمان. ابتسم حاج الطاهر في سخرية وقال: - ودي طبعاً ح تكون دمغتها بالدولار والريال والاسترليني ولا شنو يا مــــولانا؟؟؟
|
الاخ أبي عزالدين البشرى .. والله خيال خصب .. وخلط للهم بالضحك.. شكراً جزيلا لك ولكاتب هذا السرد الظريف.
| |
|
|
|
|
|
|
اديك سر؟ (Re: ابي عزالدين البشري)
|
مشتهيه لي لمة حريم ..وبنات كتاااااااااااار فى ضل ضحى راكوبة في بيتنا الكبير الفى الدويم جبنه و بخور..فنجان يدور أول بكر ..تانى التنى .. يابت كفاك يرمو الودع.. أخدر طوووويل.. يابت وليد الصرة جاك .. أديك سر؟ .. خليك بعيد
مشتهيه لي حوليه في فسحتنا ديك حلقة زكر ..الله.. الله حي يــــــــا الله حي رايات ورق ..صاجات و طار.. والنوبه ايييييييييييييك الله ..الله .. مجانين يا شيخ العرب..مجانين الله ..الله.. يا شيخنا هووووى.. مجانين.. يا سيدنا البدوي .. مجانين والناس تميل.. الناس تميل الله .. الله.. وقلوب تميل.. الله ..الله .. يالله صلى على الحبيب الله ..الله.. والناس تغـــــــــــــيب.. والقلوب تغرق تذوب.. الله ..الله ترهف تهش.. والوجوه تصفى و تبش الله ..الله في حزتا.. بتخيلك .. في كل نبضة قلب دق و ارتعش الله .. الله في كل وش.. الله .. الله
في كل شي.. أديك سر؟ .. خليك بعيد
| |
|
|
|
|
|
|
هياااا المسخوت (Re: ابي عزالدين البشري)
|
اها انا دى
محلمة ما معلمة
نان لقيتك خفيف خشم ... شلت الكلام ... لفحتو كـــــــــــف وديتو لى ود الامين بى هناك
فجة الناس راجنى اجى ارد ... وانا يا ود امى غلبنى النضم ...
شديتك فى النبى كان خجلتنى ...
| |
|
|
|
|
|
|
Re: مرحبا بوصول الخال الطيب من السودان.. (Re: حجة امنة)
|
الأخت الكريمة حاجة آمنة لك وكل من يسأل عنا من المحبة الكثير عبر هذا البورد الجميل ونحن ضيوف عليه، وقد عدت من الوطن بكم هائل من الانطباعات بعضها مستساغ والبعض يصعب بلعه خاصة للنفس المتعطشـة للوطن، فعدت بعد أن مكثت إثنان وأربعون يوماً بالسودان قضيت منها خمسة وعشرون يوماً في ترحال دائم عرجت فيها إلى أقاصي جنوب أعالي النيل (حتى فنجاك) بعيد نقطة تلاحم نهر السوباط ببحري الزراف والغزال قريب رأس قناة جنقلي عند مصب السوباط. ولنتشارك هذه الانطباعات على جرعات خلال مشاركات أخريات.
دمتم
| |
|
|
|
|
|
|
|