هذه المســـاحة لأحبابنا الحلوين ..مليئة بالحكاوي والمغامرات والأكشن!!

فاطمة السمحة
وود النمير

الحبوبة : حجيتكم ما بجيتكم
الصغار :خيراً جانا وجاكم
الحبوبة :أكل عشاكم وفات خلاكم
كان يامكان
في قديم الزمان
واحدة إسمها فاطمة السمحة وكانت سمحة بالحيييل طويلة قوام .. لينة زي البان .. ناعمة وطاعمة ..شعرها أسود زي الليل.. ندية ورويانة من النيل .. وكانت وحييييييييييددة ورباية حبوبتها

وفي نص اللمة كانت محبوبة
وفي مرة قالو بنات الحلة نازلين للوادي يلعبوا ويفرحو ويسرحو بي غادي
وفي ضي العِصير يصدو راجعين قبال الدنيا تبقى مغارب
وقالتلهِن فاطمة السمحة : لكن حبوبة بتحميني
قالولها رِفقاتها : خلاص نروح ونكلم حبوبة الحين
وقالو كده إتلمو في الحبوبة
وحدثوها : ياحبوبة خلي فاطمة تمشي معانا
الحبوبة تقولهم : بس ياويليداتي فاطمة صغيرة وعندي ويحييدة ومن كترت ما بريدها بخاف تبراكن تروح تضهب وما تلقاكن.
البنيات : ياحبوبة نحن كبار وبنراعيلها و حدانا الوادي بنروح نلعب وما جابلو ودااار
تخاف حبوبة علي فطومة بس تعاين في عيونها وتحِسبا مغمومة
تقولهن خلاص لكن بي شرط تصدن من ضي ولا تسرحن في لِعب الصي
يردنلها البنوت باكِر بكير عِند قومة الطير نجري ونطير على السهل الغادي في طرف الوادي
وقبال ماتنادي تلقيينا حِداك ..وفطومة معاك