استغرابات... هل موازين عقلي تحتاج إلى وزنه جديدة؟؟

Quote: (1) حماس: تتبرعوا لينا غصب، واحنا ما بنتنازل أبداً عن حقنا في التبرعات دي! فازت حركة حماس في الانتخابات الفلسطينية السابقة.. وحازت على نتيجة كبيرة دلّت على تأييد شعبي كبير (خير وبركة، وماله) حماس وقبل ان تستلم السلطة كانت في موقع المعارضة... تخطط لهجمات رداً على الهجمات الإسرائيلية على فلسطين أحياناً.. أو عشان يدّوا ناس الجزيرة خبر يقولوا في أحيان أخرى.. بغض النظر عن الهدف، كانوا يبحثون عن بائس يائس من الحياة.. يمنحونه بعض المال.. فيفجّر نفسه بين جمع من الناس (يقتل ليهو انتنين تلاته، ويروح شمار في مرقه)... (برضه خير.. وماله، موقف وأسلوب معارضه) مسكت حماس السلطة.. وبقت مواجهه بإنها تتعلم شي جديد اسمه السياسة والدبلوماسية.. لكن مما مسكوا السلطة، بقوا يرقصوا ويخطيوا في الناس زي أهلنا ناس الانقاذ.. ويكوركوا ويجعجعوا جوّه البلد، حنحرر القدس وحنرمي اليهود في البحر... لكن بعد شويه اكتشفوا ليك انه الكلام ده ما ممكن يقولوهو للناس البرّه.. فبقوا بوشين.. برضه زي أهلنا... اسرائيل وامريكا والدول الأوروبية ختوا ليهم العقده في المنشار.. قالوا ليهم (بخيت وسعيد عليكم الفوز.. وبركه يا يمه الديموقراطية جابتكم... لكن احنا قروشنا بنمسكها علينا كان ما اعترفتوا باسرائيل كدولة وشريك في عملية السلام)... حماس قامت وقعدت.. كييييييييييييييييف تحاصرونا كده؟!! تساؤلات غبية: -ليه تلتزم أمريكا بإنها تدفع نتيجة اختيار الشعب الفلسطيني والديموقراطية؟ (ما تقولوا لي عشان امريكا دولة ديموقراطية وبتدعو ليها!!!) -حصار كيف يعني؟ انا عايزه اتبرع لزول بقروش، ده موش خياري؟؟ -أديك كيف قروش عشان تموّل بيها عمليات تقتل ناسي.. حتى لو كنت انا الشيطان زاتو؟ -الصور البتجيبها الجزيرة كل مرّه عن وضع الفلسطينيين المأسوف عليه، وتحته مانشيت كبير إنهم ضحايا الحصار... كيف يعني ضحايا؟ ده خيار حكومتهم.. الحكومة اختارت الخط ده.. يعني عايزه تحنن قلب الأمريكان على الفلسطينين؟؟ طيب ما يحن قلبهم هم على الفلسطنيين ويعترفوا بإسرائيل؟ -الاتفاقية الخلت انه يكون في حكومة فلسطينية في الأساس أهم بند فيها انه الطرف الفلسطيني يعترف بدولة إسرائيل، لو البند ده اتلغي الاتفاقية الهم موجودين بسببها كلها ممكن تعتبر ملغاة، وبعد داك ما بلموا في 67 ولا 999!! -المؤتمر الاتعمل في الدوحة قبل اسبوع لنصرة الشعب الفلسطيني التعبان الجعان.. كان في الرتز كارلتون... مجموعة من الدقون دخلت خطبت وكوركت ... وبعداك اتعشت في جنّة الله في الأرض هنا؟؟! ده ضحك على ياتو دقون يا جماعة؟ على أي حال... يمكن الناس دي عندها منطق انا ما شايفاه.. !!!! بنت الحسين