|
|
 قراءة شعرية... في قصائد الشاعر الرومانسي التجديدي الكبير..... سيف الدين الدسوقي
|
رغم البعد:
رغم بعدى برسل سلامى يحوى شوقى وكل إحترامى
** **
رغم إنى بعيد فى مقامى أنت برضه مثار إهتمامى
أنت فجرى الماثل أمامى أنت ريدى وعشقى وغرامى
** **
السنين العامرة الطويلة والمشاعر السامية النبيلة
وباقة أشواقى الجميلة كلها بتكفيك عن كلامى
** **
لو أعيش فى الدنيا ساعة ليك أهديها بشجاعة
غيرك اللحظات مضاعة والهموم توقظ منامى
** **
رغم بعدك وبعدى المخير البعاد ما ممكن يغير
لى هوايا مشتول صغير من جهلتى وايام الفطام
المصير
ليه بنهرب من مصيرنا ونقضى ايامنا فْ عذاب
ليه تقول لى انتهينا ونحن فى عز الشباب
***
نحن فى الأيام بقينا قصة ما بتعرف نهاية
ابتدت ريده ومحبه واصبحت فى ذاتها غاية
كنت تمنحنى السعادة ولى تتفجر عطايا
ولما أغرق فى دموعى تبكى من قلبك معايا
***
كنا فى ماضينا قوة قوة تتحدى الصعاب
نقطع الليل المخيم ونمشى فى القفر اليباب
كنا للناس رمز طيبة وكنا عنوان للشباب
وهسى تائهين لينا مدة نجرى من خلف السراب
***
تأنى ما تقول إنتهينا تنهى جيل ينظر الينا
بانى أماله وطموحه ومعتمد أبداً علينا
نحن قلب الدنيا ديه ونحن عز الدنيا بينا
تانى ما تقول إنتهينا نحن يا دوب إبتدينا
أودع كيف
أودع كيف ولسه الشوق بعيش فىَّ
أفارقكم ، دموع تغطى عينىَّ
ولكن أه ، وأه بتخفف الالالم
بودعكم وتبقى سعادة الآيام
***
لو بالأيد أعيش بينكم مدى الأيام
أغنيلكم ، وأنتو تكونو لى ألهام
ونزرع ريد وعالم كله خير وسلام
ولكن أه، وأه بتخفف الالالم
بودعكم وتبقى سعادة الأحلام.
***
وعندى أمل أعود فى موسم الأمطار
زهور تضحك وخضرة تتوج الأشجار
والاقيكم ويصبح فينا أحلى نهار
ولكن آه ، آه بتخفف الالام
بودعكم وتبقى سعادة الأحلام
***
وفى الأخر ، وداعاً أوعوا تنسونى
أنا المشتاق، بشيلكم جوه فى عيونى
وبطراكم ، عليكم الله أطرونى
ولكن أه، وأه بتخفف الالام
بودعكم وتبقى سعادة الأحلام
مشـــــوار
بتعرف إنى من اجلك مشيت مشوار سنين وسنين
مشيت فى الليل الى الغربة على الكلمات ودمع العين
وعشتك لما فارقتك حروف تغنى بيك حنين
بتعرف؟أنت ما بتعرف أنحن بحبكم...هايمين
***
ودارت دورة الأيام ونحن مع الزمن أغراب
متين تحقق اللقيا ومتين يتقابلوا الأحباب
شربنا دموعنا ما روينا حملنا الشوق ملانا عذاب
وقلنا نجرب الصحرا جنينا تعبنا كله سراب
***
قليل فى حقك المشوار بدور من أجلك أمشى كمان
وتحفى رجولى تقطر دم وأصبح فى الطريق عطشان
محبة كتيرة فى قلبى ودعوة تمجد الإنسان
وإنت نموذجى الطيب نموذج يلهم الفنان
موجه
مافى إنسان يحكم ليكم عن دموع الناس وحبات العرق
يروى غربة زول موالف عمره لا راح لا مرق
أصبح الشوق فى حروفه نار على صفحة ورق
مافى يا ناس قلب يسأل عن غريق شبعان غرق
****
شفتو: لما الليل يروح والفجر يفرد جناحه
والعيون الساهرة تغمد والقلب تهدأ جراحه
نحن يادوب يومنا يبدأ ما ضرورى يطل صباحه
***
أنحرمنا من الحبايب وعشنا فى الغربة البعيدة
كل موجة حزن تمضى بكرة موجة تهل جديدة
لا خطاب بحمل محبة ولا وصية بت نريدها
لا أمل ينعش قلوبنا ولا خيالاتنا السعيدة
بدون رسائل
مافى حتى رسالة واحدة بيها أتصبر شوية
والوعد بيناتنا انك كل يوم تكتب .. الىّ
هل يجوز والغربة حارة بالخطاب تبخل علىّ؟
***
لما أخر مرة شفتك قبل ما أودع وأغادر
كنت حاسس أنى خائف إنى متردد ..وحاير
داير أتصبر أمامك داير أضحك ومانى قادر
بس دموعك لما فاضت ضيعت صبرى الشوية
وصحت موعدنا الرسايل وين رسايلك وين كتاباتك الىّ
***
وصرت بعدك يا حبيبى ذرة فى بحر الزمن
بعت للتجار مواهبى بعتها بابخس تمن
وحشة ما بتعرف رسايل وغربة عن أرض الوطن
بس أمل واحد بعيشه لو رسالة تصل ..إلى
بيها أطمن عليكم وتنقذ الموقف شوية
***
من عتابى أظن عرفت إيه مكانتك فى فؤادى
أنت يا فجر المحبة تستحق شوقى وسهادى
أنت صورة ماضى أبيض ولوحة بتمثل بلادى
***
بس حرام تبخل علىَّ وتنسى ما ترسل هدية
حتى لو كلمة أحبك في خطاب مسرع إلى
عزة نفس
فاكره أنى عشان بحبك أنسى عزة نفسى ليكِ ؟
وارضى ظلمك لى مشاعرى ونظرة بى أطراف عنيكِ ؟
وأبقى شاعر يبيع كرامته ديمة واقف بيم أيديكِ ؟
مستحيل ما ممكن ..أقل تانى ما بسأل ...عليكِ
***
نحن نتفانى ونضحى ونسهر الليل الطويل
نهدى للحب ضو عيونا وكل إحساسنا النبيل
نحيا مهما عشنا ليه وما بنلاقى سوى القليل
نحن ما نصنع مصيرنا وما بنضارع المستحيل
***
مرت الأيام علينا كم فرحنا وكم بكينا
كلمة طيبة تجينا منك تبقى موسم بهجة فينا
وكلمة زعلانه وحزينه تهدم أمالنا البنينا
وهسى فى تيه المشاعر ضحكت الأحزان علينا
صرت متعب فى هواك وعندى احساس بالندامة
وحاجة تعصر قلبى لما أبكى من جرح الكرامة
***
والحروف فى لسانى ماتت وفوق عيونى مشت غمامة
وأنتهت قصتنا بدرى يا ربيعى مع السلامه
أمل أخضر
اعود من غربة لى غربة أهاجر حتى فى وطنى
أعاين لا مكانى مكان وأفكر لا الزمن زمنى
****
ولمن أنت كنت قريب فؤادك كان بعيد عنى
مسافات بينا زى الليل نتوه فيها وتتوهنى
ركبت بواخر التجار وأبحر بى شىء منى
لقيت الهجرة أكبر موت هروب من ظل بيتبعني
تركت حقيبتى فى المينا ورجعت اليك بى حزنى
***
وجيت أحمل جديد أفكار ونار أشعار بتحرقنى
وقلب أبيض وحب عذرى معانى أبيت تؤرقنى
وأحلام بكرة ما اتشافت ولا طافت بغير ذهنى
وقلت هديتى ليك أنا وأشيائى البتعجبنى
أنحن هديه لعيونك بدونك نحن أيه يعنى؟
***
بحبك يا جبين النور وحبك كم يعذبنى
وكت أطراك أترسل دموعى تفيض تبللنى
وقلبى يطير يغرد ليك وأحس بسعادة تغمرنى
وأشوفك دنيا من افراح وموكب ريد يقصدنى
بحبك يا أمل أخضر بحبك أنت يا وطنى
|
|
 
|
|
|
|
|
| |
Kamel mohamad
فيس بوك
تويتر
انستقرام
يوتيوب
بنتيريست