|
|
 شربت لي فنجان قهوة..اتكيفت،..رجعت خطوتين لي ورا..قربت أقع
|
...لكن انسونا من فنجان القهوة حسي...
هو نحنا بنرجع لي ورا لي؟؟....
زمااااااان..لمن كنت صغير..كانو برسلوني الدكان..وطوالي كنت بنسى انو جيبي مقدود..بعد اصل سيد الدكان القى القروش مافي، ويلا برجع بي الدرب كايس قروشي..
لمن كبرت شوية ...ما كنت برجع ورا اصلو..طوالي كنت مندفع لي قدام...(لأنو دايماً كلب ناس الوسيلة كان ساكيني)..ده كمان يرجعو معاهو لي ورا كيفن؟؟!!
حسي برجع لي ورا كتيييييير.....
مرات..بفتش علي حاجات دقدق وقعت مني في السكة..
مرة وقع مني قلم..ادتني لي واحده ما متذكر اسمها..كتبت فيهو اسمي بي ناحية..و بي الناحية التانية مكتوب: (من بين الناس حبيتك)...
الدنياعز الظهر...وفي حافله داخله الموقف..قلم شنو في الحر دا وحب شنو..!!
وكده ..راح القلم..
ومرة كنت ماشي وجنبي بت ماشه معاي..برضو نسيت اسمها
شكلي سرحت وسرعت المشي..وهي تحاول تلحقني ...ولمن انتبهت انو في زول كان ماشي معاي ..لقيت روحي عييييييييييييييك..بعيييد بعييييد...وهي .. زي كأنها ما كانت..
وقبال كم سنة كده..كان عندي زول صاحبي شديييييييد ...على ما اعتقد..كان اسمو الطيب..ولا معاوية..أظن كان اسمو ابراهيم..حاجة زي كدا..، المهم صاحبي يوسف دا كان جنو يسمع الكاشف..وبي الذات غنية حبيبي اكتب لي...ولأنو ما كان عندو زولا يحبها كان بكتب جوابات لي بنات من خيالو..ويديني ليها اقراها..مره زهجت منو وقلت ليهو: ..يا حسن سيب العوارة..ما سمع كلامي..
مسكين..زعل مني ومشى...وما شفتو تاني..
قبيل شربت لي فنجان قهوة...اتكيفت..حسيت انو نفسي اسمع حاجة للكاشف..وبالتحديد..حبيبي اكتب لي
فتشت لي قلم ..ما لقيت..وحتى كان لقيت..حاكتب لي منو؟؟...مافي زولة بتحبني..!!
إحتمال اكتب حاجة لي بت في خيالي ، واديها لي صاحبي خالد داااااااك....يقراها ويوريني رايو فيها...لكن هو وينو مصطفى زاتو...
قلت خلاص...أحسن انزل اتمشى شوية...فجأة لقيتني ماشي براي..طول عمري كنت ماشي براي..
رجعت خطوتين لي ورا..قررررربت أقع...
ده شنوو...!!! انا هو شربت قنجان قهوة ولا حاجة تانية..؟؟؟!!!
|
|
 
|
|
|
|
فيس بوك
تويتر
انستقرام
يوتيوب
بنتيريست