في كل مرة يتكلم الناس عن التلفزيون ومقدمي البرامج وسخافتهم والطريقة العقيمة في التقديم إلا وتووووووووووفك يحشروا ليك إسم حمزة !!!! الغريبة لمن تكون قاعد في جماعة بتلقا نفسك بدون ما تشعر تؤيد الكلام ده وتشيل وتكيل لي حمزة اللعنات وده زول مرض وده زول زعاااااااط وده زول قداااااااد و و و و .. لكن لمن تقعد براك كده ومع نفسك بتلقا إنو احسن زول في التلفزيون ده هو حمزة عوض الله .. عموماً ده رأيي انا فحمزة عوض الله حقيقي كده رضينا ام ابينا هو افضل من يدير الحوارات التلفزيونية وتحديداً البرامج البتكون على الهواء مباشرة بعد الغائب الطيب عبد الماجد .. حمزة عوض الله كمان في البرامج المسجلة ويكون طابعها الونسة و الدردشة برضو بيكون كويس وعندو حضور ما عادي وممكن يخلق من كلامك سؤال بالتالي ما بيعتمد على الورقة كتير.. ربما نعيب على حمزة او حماميزو كما يحلو للجميع إطالته لتقديم المسلسل خصوصاً لمن تكون الحلقة الأخيرة لأنو بيبييخ ليك المسلسة وبيحكيهو ليك قبل ما يبدا وإن كان في مقدمته يقوم بتقديم معلومات جميلة تنم عن ثقافة واسعة وإن كانت كلماتها درااااب .. ما دعاني لكتابة هذا الموضوع مشاهدتي للدكتور حمزة وهو يقدم سهرة تلفزيونية يوم الخميس كانت مع نجوم الرياضة مصطفى النقر وصبحي وحامد بريمة والصبابي إضافة لي إتنين من الإعلاميين .. ادهشتني المعلومات الكروية لهذا المذيع وهذه الثقافة الرياضية العالية والكم الهائل من الاحداث التي يختزنها في الذاكرة اوحت لي بي إنو حمزة ده كان مشجع قدييييييم ومرضان كورة سواء عالمية أو محلية .. حمزة عوض الله ذكر عدة اسماء والقاب لي لاعبين حتى النقر والصبابي لم يتذكروها .. حمزة تحدث عن احداث ومباريات حتى النقر الذي كان يلعب فيها لم يتذكرها .. كان واضح إنو حمزة يعرف الكرة المصرية ومتابع لها من ايام الطفولة .. وكان واضح إنو حمزة يستمتع بذاكرة كروية قوية وهي ذاكرة مشجع وليست ذاكرة مقدم برنامج قام بجمع هذه المعلومات قبل الحلقة .. حمزة قاد الحوار في الحلقة بي صورة جميلة جداً ووزع الأسئلة على الضيوف كل حسب تخصصه ومجاله ووضعه .. ناقش صحبي عن الإحتراف والعاطفة وعقلية الإداري واللاعب السوداني تجاه الإحتراف وذكر امثلة توضح إنو الزول ده متااااااابع (محمد موسى + انس + عاكف) .. جرّ شريط الذكريات مع حامد بريمة وذكّروا بي كورة الموردة وكيف حامد بريمة غيّر إتجاهو في الهواء وده كلام ما بيقولوا زول إلا وهو متابع للاحداث الرياضية في الوقت داك .. بريمة كان متواضعاً جداً وخجول ولم يتحدث عن نفسه في حين إنو بريمة هو افضل حارس انجبته الملاعب العالمية (نعم العالمية من وجهة نظري) ..واجمل ما قاله بريمة لمن قال إنو كان بيستمتع بي اهداف النقر اكتر من جمهور الهلال .. الصبابي تحدث عن رغبته ي الاحتراف سابقاً وكيف ان إدارة الموردة وقفت عائق له .. اغرب شئ في الحلقة إنو اكتر إتنين ما عروفا يتكلموا ولا يدخلوا اجواء الحلقة هم الاعلاميين فكان كلامهم ضعيف والاسئلة في وادي واجوبتهم في وادي !!!!!!! حمزة عوض الله اكد لي بما لا يدع مكاناً للشك بي انو افضل من يقدم برامج رياضية في السودان .. لماذا لا يقوم التلفيزون بوضع الرجل المناسب في المكان المناسب .. لماذا لا يكون حمزة في مكان كمال حامد وسيف الدين علي فالرجل اظهر مقدرة فائقة في هذا المجال.. اتمنى ان يكون هناك من تابع هذا اللقاء وليدلوا بلدوه في هذا الموضوع ولنسمع اراء الرياضيين في المنبر ..
06-10-2006, 03:03 AM
معتز تروتسكى معتز تروتسكى
تاريخ التسجيل: 01-14-2004
مجموع المشاركات: 9839
الاخ عمر الفاروق معليش مع احترامي لرأيك حول المذيع حمزة ، اتخيل لي اخير لينا كمال حامد بكل ابتسامته البلهاء ..!! و بصراحة الزول ده مضيقها لدرجة قفوا وتأملوا كم الضيق والاستعراض بالمعلومة بشكل يحير ويغير اتجاه الزول يعني مشكلة حمزة مش في معرفة المعلومة او يقدم ياتو برنامج ، المشكلة انه المعلومة بتطلع منه كيف؟؟؟!!! اعتقد انه محتاج شوية يقعد في ارض الله دي وياخد كورس في كيفية توصيل المعلومة للمشاهد الغلبان من سنة الكسرة مع اهل تلفزيون السودان ومذيعينه الاجلاء ذوي الدرجة العالية جدا من اجادة فقع المرارة بجدارة يحسدوا عليها
06-10-2006, 03:55 AM
إدريس محمد إبراهيم إدريس محمد إبراهيم
تاريخ التسجيل: 03-13-2006
مجموع المشاركات: 2762
بالمناسبة د. حمزة ده مثقف ثقافه عاليه جداً .. ولمن يريد إثبات ذلك فاليراجع لقاءاته الثقافية مع نزار قباني ود. غازي القصيبي ... والأديب السوداني الفذ الطيب صالح .. نعيب عليه كلنا محاولة تذكير المشاهد دائماً بأنه مثقف ويمتلك كم لا بأس به من المعلومات .. يفتقر إلى التواضع وهو من أهم ما يجب أن يتميز به مذيع التلفزيون إذا أراد إمتلاك حب المشاهدين ... لقد شاهدت حلقة الرياضة تلك وفعلاً كان الرجل مبدعاً جداً فيها وأثبت أن بجعبته الكثير والكثير من المعلومات الرياضية .. وكمان ما أتكلم كتير وبرّه المشاهدين ... حمزه عوض الله مذيع يمتلك بضاعة مزجاه ولكنه للأسف الشديد لا يعرف كيف يعرضها بالطريقة الصحيحة .. ولكن لا أحد يختلف في أنه مثقف وأنيق .. يا ليته يسمع هذا الكلام ويحاول أن يصلح من هذه الأخطاء إذن لأصبح واحداً من ألمع وأحب مذيعي التلفزيون للناس .. يا ليته .. وأشك كثيراً في أنه سيفعل ...
06-10-2006, 04:10 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
Quote: و بصراحة الزول ده مضيقها لدرجة قفوا وتأملوا كم الضيق والاستعراض بالمعلومة بشكل يحير ويغير اتجاه الزول
نحن والله يا مايا كسودانيين بنحيير (انا وانت وهناي وفلانة وووو ) كلللللللنا مجهحهين وما بيعجبنا العجب والصيام في رجب.. يجينا مقدم برامج مبشتن لكن ظريف نقوم ننسى ظرافتو دي ونمسك ليك في إنو زول مبهدل وما مفروض يكون مذيع .. يجينا واحد انيق نقول ياخ هو لبيس لكن راسو فااااااااااضي.. يجينا واحد مثقف نقول ياخ الزول ده فاكيها في روحو .. من الحق الذيع ان يستعرض بالمعلومة فهو قد حصل عليها بعد جهد جهيد ولكن تبقى المشكلة في كيف يملكها للمشاهد .. حمزة نحن ما بنريدو سااااااااي وبلا شغلة ..ودي مشكلتنا ..
Quote: اعتقد انه محتاج شوية يقعد في ارض الله دي وياخد كورس في كيفية توصيل المعلومة للمشاهد الغلبان من سنة الكسرة مع اهل تلفزيون السودان ومذيعينه الاجلاء ذوي الدرجة العالية جدا من اجادة فقع المرارة بجدارة يحسدوا عليها
ما بكضب عليك فعلاً حمزة في مرات بيفقع المرارة لكن الحلقة الانا بتحدث عنها صراحة كان الرجل متعاون لأبعد الحدود بل ولأول مرة في تلفزيون السودان اشوف برنامج حواري يتكلم فيه الضيوف اكتر من المذيع ويجلس المذيع كمستمع .. حمزة مرات كويس ومرات قداااد وفعلاً بتفق معاك في حكاية الكورس ده ..
المشكلة مش مشكلة انه الناس مجهجهة وما بيعجبها العجب ولا الصيام في رجب المشكلة انه تلفزيون السودان وكوارده في معظم ان لم تكن كل الاحيان غير مؤهلة بالشكل الكافي لادارة برامج وحوارات بشكل جيد، وجيد هذه لا تعني فقط معرفة اكبر قدر ممكن من المعلومات بل الطريقة نفسها بدرجة تجعل المشاهد لا يمل المشاهدة يعني مش عدم ريدة ساكت لحمزة ولا لغيره من المذيعين ، يعني ما قصة عواطف وريدة ، المهم كيف انه المذيع بيجعل المشاهد يلتصق بمقعده لفترة طويلة ليشاهد البرنامج دون ملل ولللاسف الخلل ظهر بشكل كبير مع كثرة القنوات الاخرى المتعددة والمختلفة البرامج فاصبح المشاهد له القدرة في مشاهدة ما يريده ليجده في قناة غير تلفزيون السودان يعني ما مضطر زي زمان عشان يحضر سقالة ومط المذيعين وبقا قادر انه يعرف وين الخلل ويميز بين الجيد والغير جيد يعني مش مسالة انه بس يطلعوا عيوب المذيع وخلاص ، لكن لانه اصلا التلفزيون السوداني ينقصه وجود المذيع الفلتة!! ما زلت اقول ما مشكلة انه حمزة قدم سهرة وضحت كيف انه مذيع يمتلك معلومات واسعة عن الرياضة السودانية ، اي زول بيقدر يمسك الجرايد والكتب ويحفظ اي معلومات ليرصها للناس لكن تبقا بعد كده كيف المعلومة دي كيف بيقدمها ويطرحها، مع حمزة عوض الله اتخيل المسالة زايدة بمقدار جكين وكوز ، يعني من الاول الكلمات بتطلع من لسانه بطريقة مضيقة كانه في حالة غثيان دي المشكلة بتعته ومشكلة الكثيرين من المذيعين في السودان زي مثلا مذيعة بتقدم برنامج من الامس ، بتقدم فقرات البرنامج للمشاهد زي اللي بتخلعه..!!
06-10-2006, 04:51 AM
Rakoba Rakoba
تاريخ التسجيل: 02-05-2002
مجموع المشاركات: 5814
ودالفاروق العجب عاجبنا أول حاجة حمزة شنو الداير تجيبو لينا كمان، في تجربة جميلة في النيل الأزرق بإسناد برنامج الرياضة للمريخية الرائعة ميرفت حسين، بهدوئها وتركيزها في مواضيع الحلقات تدير البرنامج بسهولة شديدة، باتاحة الفرصة للضيوف للحديث والمداخلة بأسئلة ذكية، ويكفيها ما فعلته في الجنرال شداد عقب استضافتها له في برنامج بالنيل الأزرق، لدرجة جعلت البروف يهيج ويخرج عن طوره ويتهمها بتدبير المكالمات لإحراجه
06-10-2006, 05:10 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
Quote: في تجربة جميلة في النيل الأزرق بإسناد برنامج الرياضة للمريخية الرائعة ميرفت حسين، بهدوئها وتركيزها في مواضيع الحلقات تدير البرنامج بسهولة شديدة،
يا سلاااااااااااااااااااام عليها ياخ .. والله يا راكوبة كنت بصدد فتح بوست منفرد للزولة دي واخرني عدم وجود صورة ليها لأنو ما كل المشاهدين بيعرفوها .. ميرفت بتعرف كورة والله احسن من المدربين البتستضيفهم .. وبتسأل اسئلة في الخطة والتكتيك والله احسن من شوقي عبد العزيز .. بت فااااااااااااااااهمة تماماً البتسوي فيهو .. بس ياهو عيبها الفاجأتني بيهو اسة ده عوووووووووووووووووووووع قال مريخابية قال
06-10-2006, 05:22 AM
Rakoba Rakoba
تاريخ التسجيل: 02-05-2002
مجموع المشاركات: 5814
والله التقول هاشم ضيف الله - رحمة الله عليه- خلت مرة حتى ناس كابتن أمين زكي - الأستاذ قبل ما يكون ضابط جيش - تلميذ قدامها.
حمزة عوض الله طبيب خريج من جامعات مصر وكونه يخلي الطب بغلته ويجي للإعلام فدا معناتو أنو الراجل لقى نفسه هنا وعشان كدا يجب أن يكون نقده نقد موضوعي بلا عواطف، ولو ثمة وصية له فهي أن يخفف كما قالوا الشباب من سطوته الثقافية، ولو ثمة جانب بعينه يشدني إليه فهو طريقة إنتقاله من موضوع لموضوع. ذكر عمر الفاروق أن الطيب عبدالماجد من أحسن مقدمي البرامج الحوارية وغيابه ملموس وأنا اضيف إليه طارق كبلو الإندس وراء ميكرفون الإذاعة.
العيب المشين الذي قلما لا تصادفه في المذيعين المحاورين عندنا هو أسلوب "استجداء" التثنية أو التزكية لرأي يسوقه المذيع، فعلي سبيل المثال المذيع معتز يستضيف المشاتر الموسوعي عمر ويقول له: لمسنا تجليك في المشاترة في مجال الكفر ثم في مجال الوتر والأعلام حيث تذهب إلى أصعاق بعيدة تسلك إليها جداول لا تكاد تبين للمشاهد العابر ففي مناسبة إعتزال أساسي رقم 6666 عزفتم على وتر ثامن بدوزنة للتاريخ الموافق يوم 6 شهر 6 سنة 6 فهل توافقني أن رؤيتكم ثاقبة؟
وأقول : أنسب مكان للدكتور حمزة هو وزارة الصحة ، البلد محتاجة لدكاترة ، ومستشفيات السودان مكتظة بالمرضى ، والا يمكن تكون فكّت منو من عدم الممارسة ؟؟ وكفاية علينا جداً المذيعين المرض البنشوفهم كل يوم ، وبصراحة أكثر أنا ما ( بيعجبني فيهم العجب ) ولا الصيام في رمضان زاتو عديل كده سؤال محيرني من زمان : - كيف يتم إختيار مذيعي التلفزيون وماهي معايير الإختيار ؟؟ - وما هي الكورسات التدريبية التي يخضع لها هؤلاء المذيعين قبل ظهورهم على الهواء ؟
وأظن أنه القصة كلها هي ( ليّس ،، ليّس ، يطلع كويس ) ... تحياتي .
06-10-2006, 07:41 AM
tmbis tmbis
تاريخ التسجيل: 10-19-2002
مجموع المشاركات: 24862
عمـــر وراكوبــة.. يعني الأسبوع ده مذيعين والا شنو ؟؟ .. ياعمر .. دكتور حمزة عوض الله احسن مذيع بقدم البرنامج ويسال ويجاوب براهووووو.. انا الحلقة البتتكلم عنها دي ما حضرتها .. حتى لو حضرتها ياهووو حمزة عوض الله بتاع كل مرة .. بتذكر الحلقة بتاعت العيد القبل الفات دهـ ....جايب ناس عقد الجلاد ومعاهو مقدمة برنامج ما متذكر اسمها منو .. جهجهو ليك ناس عقد الجلاد بيناتهم .. حمزة يسال وزميلتو تجاوب وناس عقد الجلاد اتفرجو.. .. بلاي شوف لي معاك المقدم بتاع البرنامج الاستضاف محمد الأمين وقام محمد الأمين آخر حاجة شداها ليهو .. .. بعدين بالمناسبة.. طالما جبتو سيرة النيل الأزرق .. ما تقومو تسرحــو .. خالص كدي اشوف واحد فيكم يعيب لي ( سلمى سيد ) يا قريبك .. تخيل معاي البرنامــج ده عامل كيف: - المقدم .. حمزة عوض الله - ضيوف الحلقة: ( عمر الفاروق + عوض احمودي )
06-10-2006, 08:09 AM
gamal elsadig gamal elsadig
تاريخ التسجيل: 07-07-2005
مجموع المشاركات: 3076
اتفق مع الذين يتحدثون عن الثقافة العالية لحمزة عوض الله وامكانياته في التقديم ولكن في اعتقادي بانه سيفشل في تقديم البرامج الرياضية رقم انه رياضي ومهتم بالرياضى و(هلالابي)
فالمشلكة ليس في مقدمي البرامج وحدهم انما المشكلة اشمل ..فهنالك ضعف في الاعداد و الاخراج و
الانتاج وضعف في الاجهزة و المعدات حتى الاستدويهات غير مواكبة وشكلها لايسر ...بالاضافة الى انه
في السودان لايوجد نشاط رياضي يستحق ان يسلط عله الضوء لذلك تحول برنامج الرياضة الى برنامج
حواري ورغم الحوارات الكثير في تناول القضايا فدائما ما تكون المحصلة صفر .....
يجد مقدم البرنامج نفسه امام الكاميرا ومطلوب منه تقديم ساعتين بدون اي رؤية واضحة او خطة
لبرنامجه ... الدوري الممتاز تقدم نتائجه بدون صورة للمشاكل مع الاتحاد العام واحتكارية قناة
النيل الازرق لحقوق البث ....المناشط الاخرى في بيات شتوى انشطة موسمية في زمن الانتخابات .
التلفزيون لا يمكنه من نقل حدثين في وقت واحد لانه يملك عربة تلفزة واحدة .....
اذا كيف يستطيع مقدم البرنامج ان يتجاوز كل هذه العقبات ليقدم (صورة ) جميلة مثل مايحدث في
القنوان الاخرى ..كل شئ يقوم على الاجتهاد الشخصي المحدود ...
Quote: في تجربة جميلة في النيل الأزرق بإسناد برنامج الرياضة للمريخية الرائعة ميرفت حسين، بهدوئها وتركيزها في مواضيع الحلقات تدير البرنامج بسهولة شديدة، باتاحة الفرصة للضيوف للحديث والمداخلة بأسئلة ذكية، ويكفيها ما فعلته في الجنرال شداد عقب استضافتها له في برنامج بالنيل الأزرق، لدرجة جعلت البروف يهيج ويخرج عن طوره ويتهمها بتدبير المكالمات لإحراجه
Quote: يا سلاااااااااااااااااااام عليها ياخ .. والله يا راكوبة كنت بصدد فتح بوست منفرد للزولة دي واخرني عدم وجود صورة ليها لأنو ما كل المشاهدين بيعرفوها .. ميرفت بتعرف كورة والله احسن من المدربين البتستضيفهم .. وبتسأل اسئلة في الخطة والتكتيك والله احسن من شوقي عبد العزيز .. بت فااااااااااااااااهمة تماماً البتسوي فيهو .. بس ياهو عيبها الفاجأتني بيهو اسة ده عوووووووووووووووووووووع قال مريخابية قال
راكوبة وعمر الفاروق ...(نحن ) نشكركم على هذا الاطراء .
وياعمر زي ما قال ليك راكوبة أأأي مريخابية (نحن) ماعندنا زول (مامريخابي ).....
حمزة عوض الله دة احسن حاجة يعملة يشتغل سمكرى ولا يشوف لى عجلات يعصلج فى صواميلة دة معسم ومتكلف ويعصلج فى الكلام التقول شايل مفك ولا ضاربه سلك زول ما مريح ولا عندة اى قبول قدام الشاشة غايتو يشوف لى حاجة غير البرامج الثقافية احتمال ينفع بتاع برامج رياضية , وكمان الضحكة مصنوعة .
06-10-2006, 08:30 AM
ajaj ajaj
تاريخ التسجيل: 07-27-2002
مجموع المشاركات: 971
ما كفاية برانا في التلفزيون جاي تبرانا بيه هنا كرهي ليهو مش عشان هو براي لكن لما كنا في الجامعة كنت في جمعية الكيمياء وكنت ماسكة المكتب الثقافي وننتظر متين يجي موسم التخرج عشان نشتغل وخاصة انا عشان كنت فاكرة نفسي مذيعة واحلم اشتغل في bbc المهم وما ابراك يجي اليوم الموعود واحضر الفقرات واتعب في تحضير التقديم واللبس وامشي الحفلة القايمة بمجهودتنا القي ليك الجعيص صحبك مضهب وبعد شوية يمسك الجو ثم فجأة يمسك المايك وما يفكو الا بعد ناس نادي الضباط يقولو لينا انتهينا واضيع انا وبالدمعة ابكي في الصقيعة
06-10-2006, 09:18 AM
luai luai
تاريخ التسجيل: 02-27-2002
مجموع المشاركات: 2251
والله ياعمر كان ترضى كان تابى مافي مقدم برامج (قد - ومرض- وبيض) زي حماميزو ...متكلف - مصطنع - (متساخف) يحاول ان يكون تلقائي لكنه بعيد عنها تماما ..طريقة تقديمه هي المشكلة وليس ما يقدمه ياخي حمزه دا خليهم يعيروه للبي بي سي ولا فوكس ويخلينا في حالنا ولا يمشي يقدم لناس الجزيرة الانجليزية عايزين ليهم ناس . الحمد لله الواحد يقظ ليهو يقظة كبيرة بس اول ما يجي ناطي على الشاشة بحول القناة على طول .
والتاني اسمو نااااااااجي لاحول الله ...اللهم صبرنا على حماميزوا وناجي
06-10-2006, 01:03 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
Quote: والتاني اسمو نااااااااجي لاحول الله ...اللهم صبرنا على حماميزوا وناجي
والله أنا كان لميت في الزول الاسمو ناجي ده أعضيه جنس عضة فلوق راسو ده ، والغريبة كمان قال بيغرود عويناتو ..
يا عمر .. طيب ياخ ما ياهو إنت كويس ياخ .. مالك علينا مع صاحبك حمزة القددددددداد ده ؟؟ ..
Quote: والله يا مايا الساااااااااااااعة التقول ليك إنتظرووووووووووووونا .. انا طوالي بقوم امشي اخليها كييييييتاً فيها بالرغم من إنو ده برنامجي المفضل ..
وفي واحد تاني اسمو معتصم !!! ده ود عجيب ( شوية ) وفاضي ما عندو أي حاجة غير المسيح بي كريم ( ديــــانــــا ) ..
والله فروض التلفزيون ده يقفلوه، ونشترك مع التلفزيون الصومالي ..
06-10-2006, 05:21 PM
صلاح شكوكو صلاح شكوكو
تاريخ التسجيل: 11-19-2005
مجموع المشاركات: 4484
الاسم : د.حمزة عوض الله عباس - مذيع ومعد ومقدم برامج . المؤهلات : تمهيدي ماجستير إعلام / دبلوم الإعلام العالي بكالريوس الطب والجراحة عين شمس بمصر 1992م دبلوم اللغة الألمانية الخبرات: مذيع ومعد بالاذاعة السودانية منذ عام 1993م مذيع ومعد بالأذاعة السودانية بالقسمين العربي والانجليزي والاخبار والرياضية عملت بقسم الاخبار بشبكة الأخبار العربية ANN لندن عام 1999م مراسلاً للفضائية السودانية من لندن 1999/ 2000م – مراسل قناة العالم من الخرطوم مدير ومبرمج ومقدم لمؤتمرات متنوعة : صحية / رياضية / ثقافية / سياسية باللغتين العربية والانجليزية. عضو اللجنة الثقافية بنادي الهلال السوداني منذ العام 1997م واسهم مع نادي المريخ والاتحاد العام لكرة القدم في العديد من المهرجانات والبرامج. اخترت كأحسن مذيع في استفتاء اجرته صحيفة اخبار المجتمع المحلية 1997م . عملت بادارة التثقيف الصحي بوزارة الصحة الاتحادية منذ العام 1997م. اذ اعمل جنباً الي جنب في مجال الطب والإعلام منذ العام 1993م. تعاونت مع العديد من الصحف المحلية وصحيفة السودان اللندنية. اركز في برامجي التي اعدها واقدمها على ربط الموضوعات بأسسها الثقافية : • فترات سياسية واقتصادية وثقافية ومنوعات مفتوحة. • اخبار فنية ورياضية بالاذاعة • سهرات من خارج السودان ابرزها من لندن والامارات وقطر • العمل في مجال الربط والحوار المباشر على الهواء في العديد من الفقرات والبرامج
طبعا دي سيرة ذاتية من موقع التلفزيون .. و الرجل له مواهب وإمكانيات لا بأس بها .. لكن لو أراد أن يكون متميزا بمن من المذيعين الحاليين يمكن أن يقتدي ؟؟؟
لابد أن يكون هناك تراكم معرفي على أرض الواقع لكي يتعلم منه ويبدأ من خلال هذا المعيار تحديد موقعه في القبول العام ..
المشكلة الحقيقية أننا وفي كل المجالات تقريبا نفتقد للكادر المهني الممتهن الذي يتحلى بالمهنية العالية .. حتى أساتذة مادة الأعلام في الجامعات السودانية هم من الأكاديمين الذين لا يمتون للمعايشة بصلة ولم بروا إستديوهات البرامج ولا المايكرفون .. لذا فإنهم ناقليت للحركة وليسوا حركيين ..
في كل العالم يكون الأستاذ قد مارس المهنة بصورة أو أخرى ليكون مقنعا لطلابه .. ويكون التلقى منه إستطراقيا .. لكنك في السودان قد تجد الطالب ( ممارسا ) بينما يكون الأستاذ متلقى عادي .. وهنا يكمن الإنفصام بين النظرية والتطبيق ..
صحيح أننا لن نجد كل الأساتذة قد مارسوا ولكن وجود ممارسين بين الأساتذة يمكن أن يكون حجر الزاوية في وضع المنهاج الواقعي المتسم بشيء من الإبداع
لكن عدم وجود الممارسة قد يجعل الأستاذ قصاصا وراويا ..
وهذه إشكالية كبيرة .. وتعالوا بنا نتأمل كلية التربيةالرياضية التي بلغت من العمر عتيا لم تخرج لنا مدربا واحدا حتى الآن إذ أنها تنتج لنا معلمين غي مادة ( الجمباز ) وحتى هؤلاء لم يقدموا للجمباز شيئا ..
والموضوع ظوووووووووووووويل
وغياب المرجعية العمية يجعل الأداء مجرد إجتهادات وهرجلة .. ولكم أن تشاهدوا التشابه بين (( حمزه عوض الله و حسن المصري )) فكلاهما لا يتركان للضيف فرصة لأ يأخذ نفس حتى هما لا يتنفسان ونحن مشدوهين ومقلقلين بين الكلمات المرصوصة دونما إحساس صادق يلامس شغاف احساسنا
فهل القضية هي حمزه ؟؟ أم الواقع المزري والعيون المتحفزة وتشكيلنا الذي لا يقبل أي أمر على علاته ..؟؟ ولا نعرف الصبر على الموهوبين والموهومين صحيح أن الغث كثير والرجل الغير مناسب قد يجد طريقة الى ما يتناسب غيره لكن أين نضع تراكم خبراتنا ..؟؟؟ =
الموضوع طوووووووويل
أما الرياضة وحواره فيها فهو كشأن كل السودانيين يعلم الكثير فيها لكن هذا العلم وحده لن يصنع الإبداع .. إذ ليس من المفترض أن يكون كل طالب موهوب معلم ممتاز .. فلكل مجال فنيات ومواهب وأصول مهنية ينبغي التحلي بها وليس التحلى منها .. وشتان بين أن أن تدير حوارا أو أن تدير رأسنا بالحوار ..
Quote: فعلي سبيل المثال المذيع معتز يستضيف المشاتر الموسوعي عمر ويقول له: لمسنا تجليك في المشاترة في مجال الكفر ثم في مجال الوتر والأعلام حيث تذهب إلى أصعاق بعيدة تسلك إليها جداول لا تكاد تبين للمشاهد العابر ففي مناسبة إعتزال أساسي رقم 6666 عزفتم على وتر ثامن بدوزنة للتاريخ الموافق يوم 6 شهر 6 سنة 6 فهل توافقني أن رؤيتكم ثاقبة؟
في مرة من المرات إستضاف المحنك صاحب الحرف الجميل والعبارات المنمقة حسين خوجلي الفنان حمد الريح .. وانت سيد العارفين كيف يطرح حسين خوجلي السؤال وكيف يتمنى إجابة تطابق سؤاله وبنفس الامكانيات .. قام حسين خوجلي سأل حمد الريح وبي طريقته المعهودة في طرح الاسئلة ( تخيل شكل حسين خوجلي وانت تقرأ الحوار) : قال حسين خوجلي : الأستاذ حمد الريح توتي الجمال وتوتي عبق التاريخ ..توتي الخضرة المتمثلة في جروفها وتوتي التلاقح والتعاضد الأسري ..توتي توتي زقزقة العصافير وبزوغ شمس جديدة .. كل هذه التداعيات والتداخلات ماذا شكّلت في داخل الأستاذ حمد الريح ؟؟..
حمد الريح قال : والله يا حسين خوجلي انا بتذكر زماااان كنت بركب العجلة وبمشي السوق ..
قاطعه حسين خوجلي قائلاً : استاذ حمد .. يديك العافية نسمع أغنية
هاك ده كمان يا بناديها.. واحد فنان وشاب قال المذيع عنه إنو الفنان الواعد صاحب الصوت المهول والقادم من جزيرة الخير .. سأله المذيع بي نفس إستايلك ده وقال ليهو : الفنان حمدوبة .. السلم السباعي والسلم الخماسي ومعركة الفن الأصيل ما بين التقليدية وبين علم النوتة وتداخل الشعوب والأثر الواضح لإنتشار الأغنية السودانية في هذا الفضاء السايبيري والقنوات الفضائية وخصوصاً وإنو العالم اصبح قرية صغيرة ؟؟
رد الفنان حمدوبة قائلاً : والله بالغو ..وترن ترن ترن بدا يدوزن في العود وخشّ ليهو في أغنية :
ولك تحياتي يا شيخ شباب المنابر.. بناديها..
06-12-2006, 01:48 AM
banadieha banadieha
تاريخ التسجيل: 02-04-2002
مجموع المشاركات: 2235
سيدنا عمر الفاروق للمريخ تترع الكؤوس وترفع الأنخاب ولولا أن ميرفت مريخابية ما كانت أبدعت في التحليل الرياضي وتاريخ الكرة السودانية..ولا تنسى أول "حكمة كرة قدم" كانت مريخابية (منيرة رمضان)..بعد كم يوم "نازل" البلد بعد فترة وأول حاجة حأعملها حأحقق ليك مناك (وسامحوني يالمعترضين) في أن يكون حمزة مقدم برنامج عالم الرياضة
06-12-2006, 02:09 AM
Hussein Mallasi Hussein Mallasi
تاريخ التسجيل: 09-28-2003
مجموع المشاركات: 26230
Quote: سؤال محيرني من زمان : - كيف يتم إختيار مذيعي التلفزيون وماهي معايير الإختيار ؟؟ - وما هي الكورسات التدريبية التي يخضع لها هؤلاء المذيعين قبل ظهورهم على الهواء ؟
انا من زماااااان محتار في ناس التلفزيون ديل .. اول حاجة انا ما قادر اقتنع إنو الناس العينوهم في التلفزيون ديل هم افضل من تقدم للمعاينات .. وما قادر اقتنع إنو هم اجمل وجوه (بالنسبة للمزيعات) .. في السودان نحن بنتعقد من الجمال الصارخ والوجه الجميل وحتى لاحظ لو في حلقة في ضيفة سمحة تلقا بتاع الكاميرا يتزاوغ منها زي التقول عاملا ليها عملة وبالله تلقاهو يساكك في الشينات ويثبتهم لينا بي الدقايق في الشاشة .. والأغرب من كده ممكن نقول إنو عندهم تصنيف بي حكم الثقافة دون الجمال لكن للاسف تلقا الجماعة لا خلقة لا اخلاق لا ثقافة لا يحزنون !!!!!! الموضوع وما فيهو المزاجية والواسطة وبس...
06-13-2006, 04:23 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
يا تمبس: يعني في داعي لي جنس المحن دي ؟؟؟؟ سلمى دي لا بتعرف تزيع ولا شتين انا ما عارف الزولة دي قبلوها في قناة النيل الأرزق كيف ؟؟ غايتو جنس واسطات لكن تخريمة : حلقة فيها انا وعوض احمودي مفروض تجيب فيها إضافة لي حمزة عوض الله حسين خوجلي واحمد البلال الطيب وعمر الجزلي .. ياخ مالك مع المتعة
06-13-2006, 04:40 AM
طارق جبريل طارق جبريل
تاريخ التسجيل: 10-11-2005
مجموع المشاركات: 22556
.. . فعلا قد يكون مثقف و ذو خبره عاليه و شكل جيد ولكن ما يفتقده السيد حمزه(شعره الريييييده) عمري ما شفت ليهو برنامج جميل او حوار ممتع و شيق.. يبطئ في الكلام و يحسس الشخص الذي يحاوره بانه اعله منه ما عندو السلاسه و اللباقه ..لا يبتسم كثيرا وان ابتسم تكون نصف ابتسامه جديه مبالغ فيها في الحوار و حتي ان كان الموضوع لا يستاهل..
حمزه عوض الله اقام حوار مع الطيب عبدالماجد الذي اعتبره انا من احسن مذيعين التلفزيون السوداني حوار عن الاعلام و سيره الطيب و الخ.. وفجاه قاطع الطيب عبدالماجد حمزه..قائلا بمزاح( ياخي ما تتكلف كده في الحوار.. كلامك كلو حيث ان و عندما و لماذا..خليك بسيط ياخي)..!!!! وايضا اتذكر له موقف و كان قبل سنتين في عيد من الاعياد مع فرقه عقد الجلاد.. عندما قل للعازف المذيع جويلي..(ما تخليك في مزيكتك الجابك شنو للاعلام..فقاطعه قائلا جيتا برغبه و درستها ما زيك) !! ده غير موقفو هنا مع طلبه الجامعات ..في اللقاءات التلفوزينه حمزه عوض الله اذا عمل لقاء واحد جيد...دي تبفي اول و اخر مره لحوار جيد ليهو بنفعل جدا لمن اشوفو بعمل حوار..لانو بحاور نفسو فقط
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عمر الفاروق
معتز تروتسكى
إدريس محمد إبراهيم
Rakoba
banadieha
tmbis
gamal elsadig
ajaj
luai
صلاح شكوكو
Hussein Mallasi
يحى الشريف
طارق جبريل
فيس بوك
تويتر
انستقرام
يوتيوب
بنتيريست