|
|
 المدرسة الماجادة في الشعر "الجورسية والرز باللبن".. نقد
|
هذا بوست قديم للدباب الظلامي اساسي نشر في موقع اخر
اعيد نشره هنا بمناسبة العد التنازلي لكأس العالم
رغم ان لا صله لها من قريب أو بعيد بموضوع البحث ولكنها
الشلاقة والعكلتة وكل زول حر في باندويدثو يدفقو محل
ما يعجبو ولا كيف يا بكري؟؟؟
|
|
 
|
|
|
|
|
|
|
|
Re: المدرسة الماجادة في الشعر "الجورسية والرز باللبن".. نقد (Re: طيفور)
|
عن طيفور عن اساسي قال:
كتب حبيب الكل في بوست قديم( من سنة اسكت)
يقول عن المدرسة الماجادة في الشعر ما يأتي..
وباذن الله سنقوم بتفنيط ونقد لهذه المدرسة واشعارها
حيث قال:
تاسست هذه المدرسة في عهد الفرنجه بتاعين كوستي في القرون الجوارسيه
ومن اهم ما اهتم به من الشعر شعر الشعيريه باللبن ومن ابرز شعراها محمد
بن عز الدين الهلالي المشهور(بكتاحه) وطارق شات ومحمد نت واهتمت المدرسه
بعدم وجود القافيه والاوازان الثقيله والخفيفه والمتوسطه وجسدت حاله
الخوف الشديد من دفاري الكشه والحياة اليوميه المليئه بالمطبات واعتمدت
علي خطه4-4-2 ومن اهم قصائد هذه المدرسه والتي تدرس للمبتدين باعتبارها
اساس المدرسه قصائد:
غشاني عباس بالمساء للشاعر الجهبص محمد عزالدين
وقصيده الشوق زبادي
وقصيده كتاحه من زمن الرومان للعلامه طارق بشي
وقصيده رطل ايسكريم كيلو زيت للنابغه محمد علي بتاع نسرين
وسميت هذه المدرسة بالمدرسة الما جادة لان له قصيدة فيها يجب ان تنتهي
بعبارة والله بالجد يقول الدكتور كارلوس زعبوله وهو احد المتخصصين في
نقد هذه المدرسة ان ذلك بسبب ان معظم شعراء هذه المدرسة بتاعين مكن
كما نقدها الشاعر الكبير سيد فله بقوله انها افضل المدارس المتخصصة في
منح شهادة لندن ودبلوم المكنيكا في الشعر المفكك والعهده علي الراوي
لو ما فهمتو حا نتطرق لبعض النمازج الشعريه لهذا المدرسه الحديثه
ودي قصيده رطل ايسكريم بالزيت
والبقول العلامه محمد علي بتاع نسرين في مطلعها
في مرافي سكون حمير اللبن
اشتقت ليك يا حمام الدار
في زمن الودار
واكتشفتك ضهب نار الزمن
يا عرس المصايب للمحن
ونتشيت بخفة الجكس البوار
كل الكلا رقص في سلك الكهربا العريان
وينهم ناس زمان؟
يا دقسة الريد العوير
في زقاقات حلتنا والخور الكبير
كل المشاعر جرت مننا في فزع
يا حلة ملاح القرع
بقينا زي قرد ساكيه شافع بنبلتو
ينطط من فرع لي فرع
خايف حجر الهوى الشرفان يغدرو
انخفض صوت الغنا
والفنان ختم حفلتو
وما لحقناك يا زمن الضهب
وما لحقنا حتى العشا
يا زمن الخفوت والوشوشا
وين القبيل خطفوا القليب
وينهم ناس رشا؟
اختلط الامر علي بالمسا
في زمن الشواطين والوسوسا
كل الكوابيس شاركت
وفي الحفلة جات باركت
لابسه جرايد مهلهلة من زمن اخبارها انتهت
ونا في الطريق انتهيت
اشتريت رطل اسكريم
من ناس نعيم
وتلاته صابونتين
وكيلو زيت ومشيت البيت
نمت وبعدين اتعشيت
ويا ريتني ما كنت جيت
دا شنو
والله بالجد
وسنقوم باستعراض بعض القصائد ومن ثم بعمل النقد والفنيط وفرتيق الكلام
| |
|
|
|
|
|
|
|
|
|
Re: المدرسة الماجادة في الشعر "الجورسية والرز باللبن".. نقد (Re: طيفور)
|
وهذه قصيد غشاني عباس بالمساء
للجهبص محمد عز الدين
في ظل تخاريف الحقائق والوطاويط السواد
انبطح شوق الغنا الهابط على عناجريب الغسيل
وكتبت عنك سكة الوهم الرحيل
يا لوري هوستن جر فينا نور طويل
وين ناس خليل؟
واستهبل الاحساس علي
والليل لبس لون السواد لي جزمتو
واتخذنا الشوق زبادي
وبدينا نبحث عن شوايب في كشاتين النوادي
وبي هناك لقيت جدي عرس ليك هنادي
قمت انتعلت الريد رغيف
وجاتني نسرين شايلة في شنط الحديد الذكريات
جاتني زي ديك عدة الحافلة المطارد بالعكاكيز والهواجس
وجوني بيتين من شعر
واحد اجار والتاني فسحة فيها نيمة
نيمة من زمن الاذاعة على الهوى
وياهوى سرحت ليك شعري اتكوى
وكواني ليك شوق البنفسج للزبرجد
وعتبرتك مستحيل
ورحلت ام بده السبيل
وسمعتي مني شعر جميل
يا علة الزول العليل
يا قصيرة يا طول الفتيل
وجوني منك شبشبين عبر الهوى
ضربوا بغداد ياعرب
وشباشبك الشول البيض
جوني عابرين الحدود
يا خروف جلد القدود
اتمكيج الضب بالدلال
حتى الضبابين في غناك اتحنكشت
كل البنات اتشلخت
غشاني عباس بالعشا
وجيت لقيت كل الدكاكين قفلت
دا شنو
والله بالجد
| |
|
|
|
|
|
|
|
|
|
Re: المدرسة الماجادة في الشعر "الجورسية والرز باللبن".. نقد (Re: طيفور)
|
ونبدا بنقد النمازج اعلاه وتقديم البوست نفسه
وقع كاتب الموضوع في خطأ تاريخي كبير حين اعتمد ان عصر الجورسي بدا في كوستي
حيث ان المعروف في تاريخ عصور الشعر ان مدرسة الجورسية بدأت في حلة حمد ببحري
وامتدت شمالا ولم تتاثر بها اي مدينة جنوب الخرطوم سوي بعد الذين رحلوا من الخرطوم
الي مدني وبعض الاقباط الذين يتنقلون بين الخرطوم ومدني ويعملون في مصنع حجار
للسجائر فرع مدني حيث كان اختلاطهم بالمدنيين محدود نسبة لانشغالهم باكل الفسيخ
والجبنة المضفرة خلال فترة استراحتهم والمعروف تاريخيا ان مدرسة البوبلين والترفيرة
هي التي كانت مشهورة في الاقليم الاوسط ذلك الذمان حيث مشروع الجزيرة والقطن فتلك
المناطق حارة نوعا ما ولا ينفع فيها الجورسيه شعرا هذا في ما كان من تحديد الحقبة
التاريخية
اما توزيعه لانواع الشعر فقد وقع في خطأ اخر حيث صنف الشاعر القدير المفلهم طارق شا
مع محمد عز الدين في اهتمامهم بشعر الشعيرية باللبن وهو خطأ فاضح جدا فطارق شا مشهور
بانه رائد شعر الرز باللبن وسلطة الدكوة اما محمد عز الدين فالمعلوم عنه انه شاعر
الشعيرية باللبن المجود والفرق سيان بين الصحنين او الفرعين من الشعر فالمعلوم ان
شعر الرز باللبن اعتمد علي مدرجات هلال مريخ واستنباط الشعر من خلالها مع تفوق المهذوم
في قول ابيات رثاء اللاعين واعتمدت خطة 3-3-4 بعكس مدرسة الشعيرية باللبن والتي
اعتمدت خطة اوربية خاصة مع تخوفها من دفارات الكشة وتزوير بطاقات الطلبة ولم يبين لنا
الكاتب عند عرضه بعض نمازج القصائد واولها قصيدة محمد عز الدين "غشاني عباس بالمساء"
قصة هذه القصيدة العصماء والتي من الجيد دوما رواية سبب قطع القصيدة من الراس لكي ترسخ
المعاني ويعم الرخاء ولكن عطفا علي هذا الموضوع فقد قال قائل ان عباس ركس كان مشهور
بركوب الماسورة وحين قام محمد عز الدين بقول القصيدة كان تحت تاثير الغشة الكبيرة من
عباس فقد كان يجلس عباس وبقية العواطلية في راس الشارع علي لستك مدفون وراي محمد عز الدي
اتيا من بعيد فناداه بصوت عالي اسمع يا فردة جيب معاك سجارة من دكان الفوراوي وهاك قروشك
فقام محمد عز الدين بكل طيبة خاطر بشراء سجارة البرنجية وجابها مولعة واعطاها لعباس ركس
والذي بعد ان جر نفسا عميقا منها قال لمحمد عز الدين معليش طوطحتك في الماسورة اي يعني
دقست بيك مع سبق الاصرار والترصد
| |
|
|
|
|
|
|
|
|
|
Re: المدرسة الماجادة في الشعر "الجورسية والرز باللبن".. نقد (Re: طيفور)
|
ونعود الي كاتب الموضوع حبيب الكل والذي قدم المدرسة الماجادة باستعجال كبير
ولم يبين لنا بعض النقاط المهمة ولكن هذا لا يعيب الموضوع بل هذه ملاحظة لا بد منها
اما النموزج الذي تم استعراضه وهو قصيدة رطل اسكريم بالزيت فهو من اكبر نقاط
القوة لكاتب الموضوع حيث وفق في اختيار قصيدة جميلة جدا اما بالنسبة للقصيدة
فهناك ملحوظتان لا بد منهما وهي ان الشاعر اكتفي بالاسكريم والزيت والصابون فكما
قال الاخ قلقو لو اضاف لها الصلصة او الدكوة او الاثنان معا لكانت نشيد العلم
للسودان بعد السلام فالتباين الكبير الذي يجمع السودان تحت وعاء واحد لا شبيه له
الا ذلك الاسكريم والذيت والصابون والصلصة والدكوة في صحن واحد عندها لما سمعنا
بثوار دارفور او الجانجويد حتي او حتي نيفاشا فالسودان صينية ضلع كبيرة تتمركز
الخرطوم في وسطها ممثلة الضلع وقربها تماما ام رقيقة بالكسرة والتي تمثل الاقليم
الاوسط والمحشي الذي يمثل هضاب الشرق والكمونية التي يمثلها معظم الشمال وايضا
البطاطس باللحمة المفرومة ممثلة الغرب اما طبق البامية فيمثل الجنوب وقربه الصحن
الصغير للشطة ممثلا في حركة التمرد وينتظر بعد هذا كورية كبيرة من الحلو تمثل
البترول والسلام القادم اذن لو لم يقع شاعرنا في ذلك القصور من التشبيه والجلدنة
المشهور بها في استخدام فضاءات المعاني لكانت القيدة الان تعزف وتغني في افتتاح
مباريات سيكافا القادمة في السودان
واصل حبيب الكل طرحه للمدرسة الماجادة للشعر السوداني حيث قال
قال في ذلك العلامه ابن بلتعه ان الشعر الانبراشي قد سبق مرحله الكجمورو بمراحل
لانه اغلب القصائد كانت معلقه علي حمار اللبن واخير بعد تتطور هذه المدرسه اصبحت
تعلق القصائد علي الركشه كما قال الشاعر بدرالدين الشهسر بعزبونا في معلقه تراشق
البسكويت
تراشق البسكويت
قام هجام فريق بت ام زين
مريت على بتاع اللبن شفقان
ونفيسة جارتنا جابت ولدين
واحد شرد والتاني اغترب في الصين
عبده اندفس في صف الرغيف شلوت
عباس زعل وباع العتوت
في سوق السمك
كتاكيت تبشر في عرس الاسد
وكدايس تخمخم في الودك
طشط الغسيل جاط في الحبل
مروان في الامتحان اتقطعت بيه السبل
بخراتو نامن في العسل
غسلن غسيل كل الحلل
في زمن تراشق البسكويت
عيون البوتجاز دمعن
وصوت بكاهن للفريق سمعن
كل الجرايد في السوق افلسن
حميده حلق شعر عبد اللطيف
زرع في صلعتو شتلات قطن
لكن ما طرحن طاقية وعمم
وسوسن عرست تمساح سمين
من زمن فيضانات الدمازين
جعفر اغترب في تشاد
مشى وزي ما مشى عاد
لكن امونه بالصبر اتسلحت
في زمن الجفاف اتكحلت
لواري يوسف في الزلط وحلت
وكلاب الحلة اشترت صعوط
سفن لما بالغن في الشرود
وحرامي سرق ناس عبد الودود
جلكوز معلق في الوريد
محمود يوزع في البريد
سيد الركشة جنب بالطرف
وصاعقة كوت هدوم شرف
الجداد اعلن تمرد بالبلد
ما في بيض يا ولد
كلم ابوك ينوم خفيف
وفي المنام يقرض رغيف
يا كستر اللبن الظريف
تعبت من كتر الحكي
مشيت لسيدنا الفكي
قال مالك بتشتكي
اداني مستكة قال احشيها سندوتش
ياروعة الزمن الفرش
دلوكة مسخنة بالفحم
سكر مجلبط باللحم
حسين مفرطق بالشحم
علويه هاجت وفترت
زعلانة قامت كشرت
ود الحسين ركب القطر
ورقصوا البنات بالشتر
والفار بهناك انتحر
والله بالجد
| |
|
|
|
|
|
|
| |
طيفور
saif massad ali
فيس بوك
تويتر
انستقرام
يوتيوب
بنتيريست