|
حفل استقبال زكمة الطير
|
حفل استقبال انفلونزا الطيور
بحضور ممثل الايدز" الوطنى " –الربو "الشعبى" –درن "الامه العظيم" و – حمى الوطن النزفية -اسهالات الحكومة الوطنية والفشل الكلوى الاتحادى وكبار رجالات الاحزاب يهنئون انفلونزا الطيور بسلامة الوصول الى ارض الوطن, ويتعهدون لها بمواصلة القضاء علي ما تبقى من الاخضر واليابس قصيدة الاحتفال الرئيسية "1" :
نحن فرحانين دار نطير يالحكومة جزاك الله خير بقينا زي العالم واخير وياحبابك زكمة الطير يالحكومه جزاك الله خير الأنفلونزا الظهرت اخير ماها بس مخسوسه للطير الأنفلونزا الأخطر كتير في العقول وخراب الضمير يالحكومه جزاك الله خير
في الجنوب تقرير المصير وفي الشمال غضب المناصير وفي الشرق ناقصنا الكتير وفي غربنا وقعنا في البير
يالحكومه جزاك الله خير
ياحليل الناس في الحفير يشربو المويه مع الحمير الكلور السمم الزير ولسه راجين منو الكتير يالحكومه جزاك الله خير في الشرق نتغدي جرجير وفي العطش عطشانين كتير الغرب بالعلو بشكير في الشمال ماتن طنابير وفي الجنوب فضل سلفاكير يالحكومه جزاك الله خير وين تطير ياهدا الوزير في الكلي بيتساوي السفير والغني الشحمان والفقير الدرب قدامك خطير وبي وراك سخط الجماهير وفي القعاد الكرسي الوثير بي تحت مغزوز مسامير يالحكومه جزاك الله خير ياحباب الآنفلونزات الطرتنا اتلملمت جات هو نحن ما همانا الشتات والحروب والانقلابات كيف نشيل هم انفلونزا في جداد اكل العمارات يالحكومه جزاك الله خير نحن ما همتنا دارفور قبل ما تتمطى وتفور كيف ح تقدر تقرضنا ليك انفلونزا بتاعة طيور شعب يضحك عابس صبور والف حاجه تودى القبور ياصفوف مستشفي الكلى الغسيل راجينا بالدور يالحكومه جزاك الله خير المرض ياهو مرض سمير الزمان ماكلنو في الطير الحمام قدام الوزير والسواسيو عند الغفير يلا فضو المستشفيات كل جداده تنوم في سرير يالحكومه جزاك الله خير ياحليل الديك الحليو والزكام مسك السواسيو الودار المننا وفيو والضياع في وشينا ووشيو
المصايب الكترت عليو يالحكومه جزاك الله خير كان اخير لنا جن البقر ولا جدادنا يضوق الحقر الله لينا من المستتر جدعولنا البيض في البحر ووسدولنا جداد في الحفر في بلاد الجن الضكر يالحكومه جزاك الله خير
في انتظار كتكوته القرود وتايفود الغنمايه ام عتود في انتظار اسهال الجراد يوم يطل من خلف الحدود جم صداع الجمل القعود والقعونجه يصيبا البرود يالحكومه جزاك الله خير بالحساب الناقص كتير وبالدراما المشهد مثير قلنا للتاريخ نستشير قال زمنكم زمنا عوير ولسه مدسوسات محافير يالحكومه جزاك الله خير انتي نغنغتي الجماهير وبس فضل لبن العصافير تاني ياخي جزاك الله خير
|
|
|
|
|
|
|
|
Re: حفل استقبال زكمة الطير (Re: طارق الأمين)
|
واحد صاحبنا مستغلاً بند: ربّ ضارة كان ينشف يديه وينفضهما قبل خروجه من محل مشاوي وطيّبات.. وبابتسامة من ظفر ثم اعتراه الندم أخذ يصرّح: "ما هو الجداد ده إلا هو يمرض، أو نحنا نمرض حتّين نتقابل في صحن".. صادق مودتي أخونا طارق والمنبر نوّر بي جيتك
| |
|
|
|
|
|
|
Re: حفل استقبال زكمة الطير (Re: الفاتح وديدي)
|
يا طارق يعني معناتا نحن المقعدنا شنو كدي عليك الله امشي تاوق لي بوست الكتاحة والملاريا بي هناك وتعال راجع...
ياخي فوق دا كلو والله مشتاقين شوق وما عارف هسي لو اتلاقينا بنتعارف والله لا...انا غايتو عن نفسي بنتعارف لأنو مواكبك تلفزيونيا وسيديا وصوريا
قبل كم يوم هنا اشراقة حيمورة...نكرتني اها ما تقوم انت كمان تنكرني...
اما القصيدة الطير المزكم فهي قمة الروعة بجيها صادي تاني وتالت بي مهل
| |
|
|
|
|
|
|
Re: حفل استقبال زكمة الطير (Re: طارق الأمين)
|
الجميل الجميل طارق الأصيل يابا إت باقي زول مصالح في الخرتوم... أها آآعشاي ما تسويلك عوا مع الحيكومة..والله الناس يلبتولك في بكان... إلا يخلو ريحتك طير عيان...إت فاهمني؟؟
عيلا النصيحة لي الله... القصيدة جميلة... وشايفك لقيتها لذيذة حكاية كتابة المنابر دي مووش؟؟ هسي هناك بعض المحاولات لإشراك الفنان الجميل طارق حسن عبود عشان يجي يضيف المزيد من الجمال على هذه الصفحات..
الله يجمل قلبكم ومصارينكم ... بركة اللا نام ولا أكل الطعام..
بالمناسبة شايفك مصهين من المداخلة المطلوبة بهناك...أعملها أعملها .. لا ينقص ذلك من أجرك شيئاً...
معزة شديدة خلاص
| |
|
|
|
|
|
|
Re: حفل استقبال زكمة الطير (Re: بدرالدين شنا)
|
الصاوي يالذيذ يافنان الناس لسه ماعرفوك ساي نحياتي واشواقي بدر الدين شنا يا اوسم الشينين انا الافخر والله عيد الضحيه ليه اخير تجي هسع قبل انفلونزا الخروف امدرمان مافيها حاجه انفلونزا الطير في الباقير تحياتي يامنقه
| |
|
|
|
|
|
|
Re: حفل استقبال زكمة الطير (Re: طارق الأمين)
|
طارق الامين الله يديك العافية قصيدة بالجد حلوه
لكن مش حكاية انفولنزا الطيور دي طاعت شبهات ساكت و لا كيف؟؟؟؟
عشان لو الحكاية بقت شبهه ساكت جهز ليك 2 مليار
لأنو سمعت قالوا وزير من وزراء حكومة الجداد حيشتكيك في المحكمة أبقي جاهز
خالد
| |
|
|
|
|
|
|
Re: حفل استقبال زكمة الطير (Re: طارق الأمين)
|
Quote: الصاوي يالذيذ يافنان الناس لسه ماعرفوك ساي نحياتي واشواقي بدر الدين شنا يا اوسم الشينين |
يا بن العم هسع تحياتي وأشواقي دي حقتي ولا حقت الصاوي اللذيذ .. أعمل ليك نقطة ولا شولة والله يا الصافي الليلة حدنا النقطة عديل كدا قلت لي في الضحية إنفلونزا الخروف .. ههههههه وأجي هسع كيف مع إنفلونز القروش
| |
|
|
|
|
|
|
Re: حفل استقبال زكمة الطير (Re: بدرالدين شنا)
|
Quote: والله يا الصافي الليلة حدنا النقطة عديل كدا |
يا البدر والله اتخيل لي السودان دا عبارة عن جان كبير هسي يا عبارتك دي....غايتو علا تكون كت معانا...
غايتو كان نقطتتك دي نقطة شرطة بس ياهو... والعجب كان فيها عراقي كمو وسخان...بس ياهو الجان زاتو
| |
|
|
|
|
|
|
Re: حفل استقبال زكمة الطير (Re: nazar hussien)
|
نزار حسين صاحبي سلام ممتد
Quote: يا البدر والله اتخيل لي السودان دا عبارة عن جان كبير هسي يا عبارتك دي....غايتو علا تكون كت معانا...
غايتو كان نقطتتك دي نقطة شرطة بس ياهو... والعجب كان فيها عراقي كمو وسخان...بس ياهو الجان زاتو |
معاكم وين يا بن العم؟؟ أنا بنوم من الساعة تمانية إنت عارف أنا من الخوف عراقي وكمو دي قريتها عرقي وكمونية لازم طارق يخت نقطة بيني وبين الصاوي عشان نعرف (تحياتي وأشواقي) دي تابعة لي منو
| |
|
|
|
|
|
|
Re: حفل استقبال زكمة الطير (Re: طارق الأمين)
|
انا بس المستغربة ليها فى انفلونزا الطيور دى ..البجيب ليهم مناديل الورق منو؟؟ ويختوها ليهم وين؟؟
ممكن الدولة تعلقها ليهم فى فروع الشجر؟؟ ولا تشتتها ليهم بالهيلوكوبترات فى الميادين ولا تدخلها ليهم "الممرضات" الطيبااااات ديلك فى القفص..
الجداد ما مشكلة ممكن الواحد يفتفت و يشتت ليهم بواقى المناديل المستعملة مع بواقى الاكل فى الحوش.. والسواسيو يقطعها ليهم سوغااااار عشان هم صغار....
مسألة محيرة فعلا...
| |
|
|
|
|
|
|
Re: حفل استقبال زكمة الطير (Re: Tumadir)
|
بدر الدين شنا والله مافي زول اصلبط منك ياخ الكلام واضح وما داير ليه نقط
Quote: الصاوي يالذيذ يافنان الناس لسه ماعرفوك ساي نحياتي واشواقي بدر الدين شنا يا اوسم الشينين انا الافخر والله عيد الضحيه ليه اخير تجي هسع قبل انفلونزا الخروف امدرمان مافيها حاجه انفلونزا الطير في الباقير تحياتي يامنقه
|
نحياتي واشواقي دي حقتي انا تحياتي يامنقه دي حقتك انت ... يعني هسه لولا انفلونزا الطيور كلمة يا منقة دي كان تشمها قدحة طارق الأمين عليك الله شابك فيني الشاب الوسيم ده مالك...اها عشان نقطة داير يودينا النقطة؟
الصاوي
| |
|
|
|
|
|
|
Re: حفل استقبال زكمة الطير (Re: elsawi)
|
الصاوي المنقة سلام وإكرام وتنازل
Quote: يعني هسه لولا انفلونزا الطيور كلمة يا منقة دي كان تشمها قدحة |
يلا يا طارق أنا منتظر بوست الكوليرا يمكن أطلع لي منو بي (يا عسل)
وتاني يالصاوي ما ترد جنبي أي واحد (يرد) في سرير براهو وكت بتخافوا من النقط
| |
|
|
|
|
|
|
|