|
|
 الكرنكى ومافيا الاستهداف المنبرى
|
اها ... يا ناس المنبر خلاص نشفتو (مياه ) روضة ورودا وروثه وخلاص كمل النضمى والنجيهة فى الامنجية والخضرجية وسالقى بيض السياسة وبطاطسها وقلتو نقبل نشيل حال الزول الاسمو (الكرنكى ) بس عشان رسل رسالة لسيد الحوش دا وطرق واستاذن عشان يخش المنبر دا ، اها لقيتوها طبعا فرصة عشان ترجعو بينا تانى لحزمة ترهات الاختراق والاستهداف وشنو ما عارف يا جماعة ما تبقو مهجسين كدا وكل صيحة تحسبونها عليكم وبعدين شنو شابكننا انو الناس فى الحكومة وكوادرها قاصداكم و(ختاكم فى راسها ) ... انتو منو ...ياخ هو اهل الجلد والراس فى احزابكم وتنظيماتكم دى كلها (صره فى خيط ) تفاوض فى الحيكومة (حكومة الجبهة ) وبيمضو ليها ومعاها فى اتفاقيات كان فى القاهرة ولا جوه الخرطوم وبناس ورموز وكان اخرها اتفاق نيفاشا مش زى فخامة السادة المناضلين البره ديل الجوه احزابهم مافى زول بيعرفهم ويمكن الواحد ما كان بيعرف سياسة الا بعد ما وقف قدام ناس ومكاتب الهجرة عشان يتذكر انو مناضل ومرق من البلد لانو مستهدف
تلقى الواحد فيهم بعد داك عمل ليهو جنسية اوربية وليهو خمسمائة سنة ما شاف السودان ولا وقف على التطورات الحاصلة فيهو و عاوز يفتى وينوح لينا كتلتو فلان وسجنتو فلان وشردتو فلان وتلقاه بعد دا هو زاتو ما قدم التكتح لناس فلان ديل وتلقاه بتاجر بقصصهم وبعد دا يجى يتهم خصومه بانهم اكبر تجار ، وعلى الطلاق ... الناس بالجد مرقت عشان اسباب سياسية وعندها حقيقة مواقف مشهودة ديل اكتر ناس فى المنبر دا فاهمة وممكن تستمع للاخر بكل تقدير وتفند رايو بعدها بموضوعية وتتحاور وتتناقش معاه باحترام ، عشان كدا يا الناس البس جنكم تهبو فى وش اى زول جاى خاشى هنا بالثكلى والعويل وانتو كتلتو فلان طيب ما بالمنطق دا فى مئات الشباب مرقو مهاجرين ومعارضين وماتو وفقدو فى معسكرات التجمع ولى هسه اهلم ما عارفين يسالو البروف ولا العميد ولا الامام ولا افورقى ولا نسال الطير فى سماهو واقلو ياخ الناس البتتهمو الحكومة انها غطست حجرهم انتو بتسالوها وتنبذوها بكدا طيب اولادنا واصحابنا الماتو فى معسكراتكم ديل نسال منو ؟؟؟؟؟؟؟؟؟؟؟؟ (روقو المنقه ) وما تبقو عارض يطرد الناس من المنبر دا والعاوزينو بس عشان تشتهرو بيهو كمناضلين ... نضال شنو ...بالله انسونا ما هسه بنعرف اسر فقدت ما فقدت بسبب نضالكم دا عملتو ليهم شنو ... ولا حاجة ... واحزابكم ذاتها عملتو ليها شنو ...وتنظيماتكم برضو ... ولا حاجة ... كلها احزاب مشققة وروحها طالعة كان فى اوربا ولا الخليج ولا جوه السودان .
طيب دا كلو خليناه ... هسه لو جا الخاتم عدلان - جا طبعا قبال كدا وعندو عضوية افتكر - ولا ياسر عرمان ولا باقان اموم ولا اى زول تانى كان جيتو مارقين العميان شايل المكسر .. اهلا ... اتفضل ... يا مراحب ... وكان عملو لينا اوبرا (حلاق اشبيليلة ) فى الترحيب والنفاق الاجتماعى - زى ما واحد شتمنا بكدا لمن قلنا عويس وابو امنه ناس عندها راس وبتكتب كويس - لكن لمن يجى زول تانى ما بلت فى لتكم دا وبعجن معاكم خلاص دا بتختوهو فى الواطه وتملوه فقر ..يا فعلتك يا تركتك ودا حصل لاى زول من الاسلاميين جا هنا او من ناس الحكومة رغم ان الزول بيخش باسمو ورايو الشخصى وما بيجى باسم القصر الجمهورى او صفتو الاعتبارية لكن برضو انتو بتصرو على الغلط ويجى ليك شوية شباب كدا انعم واكرم فى الذكاء يقول ليك الحكومة رسلت كوادرها عشان تنسف المنبر دا وتطارد الليبرالية والديمقراطية هنا ... انتو يا جماعة الحكومة دى بتشتغل بالمنطق العبيط دا كان قعدت (16 ) سنة حاكمة يعنى خلاص مشاكل الحكومة وتكاليف كوادرها بس صفت على المناضلين هنا ... ؟؟؟؟ دا فهم سخيف وما منو رجا وبالمناسبة بيضحك ناس كتار لانو بيكشف انو الناس البره دى اخير تقعد برا لو دا منطقها .
يا جماعة (باركوها ) وخلو الاصل فى تمايز الناس فى المنبر دا بالحجة الحسنة والكلام المفهوم المحتشم واقلو لو الناس الرافضة جيه الكرنكى هنا كانت صاحبة حق وشهامة كان توجه هياجها دا لبعض الكتابات البذيئة البتتكب هنا مش تاهجم ليها قلم وعلم من اعلام الصحافة السودانية - اتفقت ام اختلفت معه - يبقى قلما رصينا وشخصية اعلامية مرموقة فى كل الاحوال والظروف سيعتبر اضافة للمنبر مهمة ومميزة واقلو نقرا مادة مفيدة بدل الشتائم البتزين بوستات كتيرة فى الفارغة والمقدودة .
الاستاذ الكرنكى .... باسم كل العقلاء - من اليمين واليسار - نرحب بك فى هذا المنبر ولا تبتئس من بعض النعوت والشتائم فهى هنا دمغة لازمة وواجبة الدفع هنا واكتب وامتعنا
|
|
 
|
|
|
|
|
|
|
 Re: الكرنكى ومافيا الاستهداف المنبرى (Re: Yasir Elsharif)
|
الاخ محمد جمعة
لا ارى اى استهداف منبرى للسيد الكرنكى انما هى جملة اسئلة كنت اول من بادرت بها
اسئلة شعب بحاله اوصلته الحكومة والحزب الذى يتبنى خطه الى هاوية وحلقة شيطانية من الفقر والعوز
اذن ان ما سميته استهداف اراه استهدافا لاسئلة موضوعية ومن حقنا ان نقول قولتنا ام ان تكميم الافواه يمكن ان يتم عبر هذا الفضاء؟
ان اللذين واللآتى ساهموا/ن بشكل او بآخر الى توصيلنا الى هذه الحافة لابد من مساءلتهم/ن
عن بيوت الاشباح
عن 28 نجمة اغتالوا فيها احلامنا بالتغيير
عن جيل من الهزائم المريره
عن من ماتوا فى الحرب الضروس وعن تغييب العقل، يستمتعون فى الدنيا ويتزوجون مثنى وثلاث ورباع ورموا بشبابنا فى محرقة الحرب التى مازلات رحاها دائرة فى غربنا الحبيب
عن نساء مغتصبات
عن نساء نازحات
عن صحافة لاتعبر عن نبض الشارع المسحوق
عن
وعن
وعن
ومع ذلك تستنكر علينا يا اخى ان نعبر عن غضبنا؟
ان نمتحن ايماننا بالديمقراطية التى انقلبوا عليها وعلى احلام شعبنا، حقيقة اتساءل وانا احدى المؤمنات تماما بالديمقراطية والرأى الآخر ولكن الجمرة التى احرقتنا بها الجبهة التى تشرزمت اربا ارحم مرات كثيرة من اقول له مرحبا كعضوة لى اسهاماتى وكمهمومة بواقع وطنى
ومع ذلك نحتاج لسنوات طويلة لنتدرب على هذه الديمقراطية
لنشفى جراحاتنا
وحين يعتزر من ارتكب فى حق شعبنا الجرائم آخرها مايدور فى دارفور
حينها فقط نقول مرحبا
وحينها فقط نتعلم من دروس ماسأة وطن
وحينها فقط نغنى لتعددنا النضر
ومع ذلك يبقى الاحترام ومساحة للحوار
اشراقه مصطفى
| |
|
|
|
|
|
|
|
|
|
Re: الكرنكى ومافيا الاستهداف المنبرى (Re: Ishraga Mustafa)
|
اشراقة مصطفى (شخصيا ) داخل بوستى ......... ساوزع الحلوى وانثر عطر الكرامة فى هذا النهار الجميل ..
حبابك ... وحباب الكرنكى الخلاك تخشى علينا ..
قلت فى مداخلتك فيما قلتى (ومع ذلك يبقى الاحترام ومساحة للحوار) ...هذا ما اود الخلوص اليه وان نصبر قليلا وبعدها لنات بالمحلفين والشهود اذ اننى اخشى ان تنحرف المسالة عن مقصدك ومقصد الاخت لنا ومقاصد واهداف واسس الحوار الى (كعه ) لفظية جهيرة وضاجة بالاتهامات المتبادلة
| |
|
|
|
|
|
|
|
|
|
Re: الكرنكى ومافيا الاستهداف المنبرى (Re: محمد حامد جمعه)
|
Quote:
قلت فى مداخلتك فيما قلتى (ومع ذلك يبقى الاحترام ومساحة للحوار) ...هذا ما اود الخلوص اليه وان نصبر قليلا وبعدها لنات بالمحلفين والشهود اذ اننى اخشى ان تنحرف المسالة عن مقصدك ومقصد الاخت لنا ومقاصد واهداف واسس الحوار الى (كعه ) لفظية جهيرة وضاجة بالاتهامات المتبادلة |
شكرا ياسيدى على الترحيب
هذه الاتهامات التى وصفتها بالضجيج هى الغضب... ومن حقك ان ترحب به ومن حقنا وحق الآخرين/ت ان يعلنوا/ن عن غضبهم/ن وقلتها لك فى نهاية تعقيبى السابق.... اننا نحتاج لسنوات ضوئية بقدر عمرنا... ربما لنتناسى ولنتعلم من عثرات الماضى ولن يتم ذلك { بااخوى واخوك}
ومع ذلك يبقى بيينا الاحترام
اشراقه
| |
|
|
|
|
|
|
|
|
 Re: الكرنكى ومافيا الاستهداف المنبرى (Re: محمد حامد جمعه)
|
اخي الحبيب محمد
بما ان شخصي الضعيف من اوائل من رحب بكرنكي"على الطريقة التاجية" فاحسب ان كرمك شملنى من ضمن المخاطبين هنا
بالمناسبة
لو امعنت النظر فى معظم من كتب نتيجة رسالة كرنكي لبكري لوجدتهم وضعوه فى كرسي ساخن،وكونك وضعت احدهم فى كري ساخن فهنالك حتما خد و هات،وهذا حق الجمهور،ولم يطالبوا بنفيه. و لو تذكرت البوست الشهير الذى كتبه خالد عويس لمحاورتك باعتبارك تمثل الاسلاميين هنا كان رايي الذى سجلته هناك و لا زال ان الحوار يوصل لغايات الحقيقة اكثر من لافتات الشجب وعرائض النفي.
اما كون المنبر مهما فاعتقد ان هذا تنضح به رسالة الكرنكي والا لما كان تخيره مكاناً لمقالاته.
| Quote: الاستاذ الكرنكى .... باسم كل العقلاء - من اليمين واليسار - نرحب بك فى هذا المنبر |
رحب به باسمك فقط اخي الكريم فليس من حق احدنا ان يتكفل بواجبات او حقوق الاخر فى هذا المنبر.
| Quote: ويجى ليك شوية شباب كدا انعم واكرم فى الذكاء يقول ليك الحكومة رسلت كوادرها عشان تنسف المنبر دا وتطارد الليبرالية والديمقراطية هنا |
ديل شوية شباب زى الورد ما جابتم ولادة،امل السودان و مستقبله هم أأمن عليهو من ارواحهم
وأخيرا
| Quote: ولى هسه اهلم ما عارفين يسالو البروف ولا العميد ولا الامام ولا افورقى |
سؤال من واحدة تبع ناس "الامام"
كنتا وين يا محمد لمن اعدموا ال28 ضابطا فى الشهر الحرام؟؟!!
| |
|
|
|
|
|
|
|
|
|
Re: الكرنكى ومافيا الاستهداف المنبرى (Re: lana mahdi)
|
الكريمة (لنا )
ابتداء تقدير كبير لرايك وتعليقك فانت من اللائى - وبلا مواربة - اظن ان لهن عقولن راجحة ومشاركات مفيدة .
وحيث انك طلبت فى ثنايا قولك ان ارحب بالكرنكى وحدى ............
ok ...
مرحبا ... الاستاذ الكرنكى ...
| |
|
|
|
|
|
|
|
|
|
Re: الكرنكى ومافيا الاستهداف المنبرى (Re: محمد حامد جمعه)
|
اخي الحبيب محمد
لم اطالبك "فى ثنايا قولى"ان ترحب بالكرنكي وحدك
بل طالبتك صراحة الا ترحب به نيابة عن عقلاء يمين و يسار المنبر
لا اضمن ان كل عقلاء يمين و يسار المنبر يودون الترحيب به
أنا مثلا -وقد عددتنى فى زمرة العقلاءواشكرك لرايك هذا-ارحب بالحوار معه ولا ارحب به
انت ترحب به و ترحب بمحاورته معاً
وهنالك نفر ثالث قد يرى ان يرحب به دون ان يرحب بمحاورته
ونفر رابع لا يرحب به ولا بالحوار معه
ارجو ان تكون فكرتي وصلت اليك كما وددت لها ان تصل
| |
|
|
|
|
|
|
|
|
|
Re: الكرنكى ومافيا الاستهداف المنبرى (Re: محمد حامد جمعه)
|
عزيزي اتدري ان اكبر مصيبة في هذا المنبر هي ان البعض هنا اكتفي بعوليمه الاكتروني او السايبري كما يحلو لهم عن الحقيقه ونسوا ان كثير من الامور تجاوزها الواقع واصبحت تاريخ وبالتالي لم يدركوا ان افكارهم ومواقفهم الهلامية لم يعد لها حيز في الواقع قرنق بتونس مع علي عثمان والبشير بفاوض في الميرغني ونقد بسخن بي مقالات وحوارات عشان اجي طالع والسايبرين ديل لسع بحلموا
واقولوا عندهم راي في الكرنكي؟؟؟؟؟؟؟؟؟؟
| |
|
|
|
|
|
|
|
|
|
Re: الكرنكى ومافيا الاستهداف المنبرى (Re: 7abib_alkul)
|
Quote: الامور تجاوزها الواقع واصبحت تاريخ وبالتالي لم يدركوا ان افكارهم ومواقفهم الهلامية لم يعد لها حيز في الواقع قرنق بتونس مع علي عثمان والبشير بفاوض في الميرغني ونقد بسخن بي مقالات وحوارات عشان اجي طالع والسايبرين ديل لسع بحلموا
|
ولهذا ينبغى ان نخرس؟؟؟
شخصيا لدى موقفى وامثل هذا الموقف الذى قد يتفق وقد يختلف مع ماذكرتهم يا اخى 7abib_alkul
ومن قال ان التاريخ تجاوزها؟
ومن قال ان ارواح الشهداء ستريحهم من عذاب الاسئلة
ومن قال باننا سنكف عن هذا الغضب؟
ولك الاحترام
| |
|
|
|
|
|
|
|
|
|
Re: الكرنكى ومافيا الاستهداف المنبرى (Re: محمد حامد جمعه)
|
| Quote: تلقى الواحد فيهم بعد داك عمل ليهو جنسية اوربية وليهو خمسمائة سنة ما شاف السودان ولا وقف على التطورات الحاصلة فيهو و عاوز يفتى وينوح لينا كتلتو فلان وسجنتو فلان وشردتو فلان وتلقاه بعد دا هو زاتو ما قدم التكتح لناس فلان ديل وتلقاه بتاجر بقصصهم وبعد دا يجى يتهم خصومه بانهم اكبر تجار ، وعلى الطلاق ... الناس بالجد مرقت عشان اسباب سياسية وعندها حقيقة مواقف مشهودة ديل اكتر ناس فى المنبر دا فاهمة وممكن تستمع للاخر بكل تقدير وتفند رايو بعدها بموضوعية وتتحاور وتتناقش معاه باحترام |
| |
|
|
|
|
|
|
|
|
|
Re: الكرنكى ومافيا الاستهداف المنبرى (Re: محمد الامين احمد)
|
العزيزه اشراقه احترامي لك رغم اختلافي معك
ولكنها الحقيقه جاثمه بيننا
استطاعت الانقاذ بكل براعه تحسد عليها ان تخرج من المطب بمجموعه من الاتفاقات في سبيل تفلت من الحساب وقبلت كل التنظيمات ذلك الوضع بمافيها الحركة الشعبية بعد سئمت واعيته الحرب
وكما نسينا ان نحاسب من تسبب في موت الزعيم الازهري لمجرد ان رفع شعار الثورية ومايو اشتراكية نسينا معه عزاب الشهيد اسماعيل الازهري وهو يلفظ انفاسه الاخيره في المعتقل
وهكذا نحن شعب تعود علي المسامحه ولا اظن ان هناك جرم لا يغتفر بعد قتل الازهري
| |
|
|
|
|
|
|
|
|
|
Re: الكرنكى ومافيا الاستهداف المنبرى (Re: 7abib_alkul)
|
| Quote: وهكذا نحن شعب تعود علي المسامحه ولا اظن ان هناك جرم لا يغتفر بعد قتل الازهري |
اتفق معك باننا شعب تعود على المسامحة ويجب ان نتعلم ان نحاسب كل من ارتكب جرما فى حق شعبنا الكريم
ولك احترامى اخى حبيب الكل
| |
|
|
|
|
|
|
|
|
|
Re: الكرنكى ومافيا الاستهداف المنبرى (Re: محمد حامد جمعه)
|
الاخ العزيز محمد حامد جمعة تحياتي
والله بالجد من اجمل واظرف البوستات التي اقراها مؤخرا عموما والله انا بقرا وبضحك حد الضحك وسارسل الرابط لعدد من الاصدقاء .
محمد حامد جمعة بهذا البوست اختصر ت كلام كتير كنت عايز اقولو..تاني ما علي الا اشيل واخت الرابط انا ما عارف بعض الناس مفتكرين الحكاية شنو..
| Quote: ويمكن الواحد ما كان بيعرف سياسة الا بعد ما وقف قدام ناس ومكاتب الهجرة عشان يتذكر انو مناضل ومرق من البلد لانو مستهدف |
| Quote: انتو منو ...ياخ هو اهل الجلد والراس فى احزابكم وتنظيماتكم دى كلها (صره فى خيط ) تفاوض فى الحيكومة (حكومة الجبهة ) وبيمضو ليها ومعاها فى اتفاقيات كان فى القاهرة ولا جوه الخرطوم وبناس ورموز وكان اخرها اتفاق نيفاشا |
شكرا لك محمد حامد ...هذه كلمة حق في وجه زمن صعب وبائس
| |
|
|
|
|
|
|
|
|
|
Re: الكرنكى ومافيا الاستهداف المنبرى (Re: محمد حامد جمعه)
|
ود جمعة انت لسة عايش والله جيت بس اتفقدك اشوفك لسة بشحمك ولحمك علا أطمئنيت عليك خالص بس والله خايف عليك تروح مع الجماعة ديل شمار فى مرقة تحيات ليك وللجماعة الحلوين القاعدين فى حوشك ديل كنت بدور أشرب موية من زيركم علا مالقيت لى كوزاً أشرب بو أها عاد ودعتكم الله ورسوله أنشرب من السبيل القدام يمكن ألقى فيهو علبة صلصة مخرومة من تحت وأكشح نص الموية فى هدومى وأشرب الباقى
| |
|
|
|
|
|
|
|
|
|
Re: الكرنكى ومافيا الاستهداف المنبرى (Re: تاج السر حسن)
|
| Quote: ياللحسرة والأسف لقد تم أستهداف (الكرنكى) وجره مغمض العيتين وأدخاله لأحد بيوت الأشباح فى هذا (المنبر) ، وتعذيبه وتشريده من وظيفته !!!! |
وقد تشكلت لجنه من القانونين لمتابعة حالة الكرنكى كما تصدت للامر
مجموعات ناشطه فى مجال حقوق الانسان والذين ابانوا ان دورالكرنكى
لا يتعدى كونه عمل بوغا اعلاميا لنظام اعطى كل ذو حق حقه وفتح
المجال لاهل الكفاءه على حساب القوى الامين واعدم 28 ضابط حاولوا
سرقة ثورة اتت بهم لدفة الحكم على اكتاف الجماهير
كما ترك النظام الباب مشرعا لكل من يود التعبير بحريه كما انه عمل
جادا على الا تصادر اى من الصحف التى تتبنى قضايا الشعب
كما انه اعدم مجدى لانه عمل على ان يكون سعر الدولار 14 جنيها
فى حين يبنى النظام خططه على ان يقترب الدولار من حاجز ال 2000
هذا وتفيد اخر الانباء بان صحة المعتقل الكرنكى تشهد تقدما ملحوظا
نحو الحريات
| |
|
|
|
|
|
|
|
|
|
Re: الكرنكى ومافيا الاستهداف المنبرى (Re: Elawad Eltayeb)
|
يا اخوى الحكومة خلها ووجه السؤال دا نفسو للاحزاب المعارضة ما هى كلها وقعت ميثاق اسمته الدفاع عن الديمقراطية قال شنو لو جو عساكر وخمشو السلطة الشعب وقطاعات الاحزاب دى كلها تهب وتناضل ضدو وجا البشير واستلم السلطة وما فى زول قال (غيق ) ليه ، لان الشعب السودانى كان اصلا بطنو طامة من (الاحزاب ) ولو ما كان كدا مما مكن الشعب السودانى دا (قول تلتين مليون ) يفشل فى اسقاط الحكومة دى ... يعنى انصارها كم (عشرة مليون ) ... عشرين ...التلاتين ذاتها !
يا باشا حكاية (تمثيل ) الشعب دى خلوها وما تذايدو لينا بيها والشعب اعلم بمن يوليهم ثقته ودعمه
| |
|
|
|
|
|
|
| |
محمد حامد جمعه
Yasir Elsharif
Ishraga Mustafa
lana mahdi
7abib_alkul
محمد الامين احمد
luai
وليد محمد المبارك
Badri
المسافر
osly2
المكاشفي الخضر الطاهر
فيس بوك
تويتر
انستقرام
يوتيوب
بنتيريست