|
|
 قرنق.. حرم ( الجبنة ) عندنا بالباوقة .....
|
نيابة عن اهلي بالباوقة اتوجه بدعوة دكتور جون قرنق والوفد المرافق له بتناول (الجبنة ) الما خمج عندنا بالباوقة وتحديدا تحت شجرة عمتي النعيمة بت الخدر خاصة ان له رغية في شربها معنا ..
وعليه ان يختار هل تكون :-
1- بالزعفران
2- ام بالهيل
3-او بالزنجبيل
او بالتلاتة معا يعني مخلوطة اصلهم اهلنا هناك بحبوا(الخلط) وحرم يشرب تلاتة فناجين الاول يزغلل العيون والتاني والتالت على طول على البنطون ....
ود الباوقة
|
|
 
|
|
|
|
|
|
|
 Re: قرنق (Re: mohmmed said ahmed)
|
اخوي محمد سعيد ... شكرا على المداخلة .. لكن قول لي يا اخوي ... جبنة في الباوقة
ودكاي في عبري .. دي يا ابوحميد ما انتفاضة عديييييل ..
ود الباوقة
| |
|
|
|
|
|
|
|
|
|
Re: قرنق (Re: عمر محمد عبد القادر)
|
ود الباوفة الزول دا شرب القهوة عندنا
فى ابقوتة زمان..وظنيتو ماشى عليكم
تعرف عملو مكتب للحركة عندنا فى ابقوتة
وسجل معهم اغلب الشباب لكن باقى ليك العرب ديل
بعدين بصوتو ليه للاسياد
ولقدام
| |
|
|
|
|
|
|
|
|
|
Re: قرنق (Re: abuguta)
|
ود الباوقة ( أبوالنسب )
والتالت على طول على البنطون ....
أنا شربتها في التكاوين قبال البنطون .. و عليك أمان الله خضنا الموية للركب حتى وصلنا المركب ... 
| |
|
|
|
|
|
|
|
|
|
Re: قرنق (Re: ابو جهينة)
|
ابوجهيـــــــــــنة ... دي حقت التكاوين عملت فيكم كدا والله دي لو حقتنا
نحنا كان لا هس في المركب لا يصين في نص البحر برضو انت معزوم مع الجماعة
ود الباوقة
| |
|
|
|
|
|
|
|
|
|
Re: قرنق.. حرم ( الجبنة ) عندنا بالباوقة ..... (Re: عمر محمد عبد القادر)
|
الأخ الكريم ود الباوقة
إنت عارف من زمان وأنا ( باوقي ) الهوى ،،، وكان أخوي قرنق جاكم هناك أنا بجي معاهو ، وبجيب جماعتي ، ومعانا النوبة والطار وجلاليبنا المرقعة ،،، وهاك يا ذكر ،،، وأخونا قرنق يقيف وسط الحلقة وينتر زي الأسد ،،، أصلو يستاهل كل خير ...
أنا العشّاي
أنا البكرم ضيوف الهجعة والقايلة
أسوق الغيمة للديوان
أقدم لقمة للجيعان
وفي قدحا وسيع جوجاي
عصيدةً حارة بي ملاحا
تعوسا السمحة لمّاحة
وبي قلبا قوي وسوّاي
أخلي ضيوفي أهل الدار
وأصلي علي النبي المختار
أقول حرّم وحات الواهب العطّاي
ضيوفي عزاز
ونومي خزاز
ووارث العفة من آباي
| |
|
|
|
|
|
|
|
|
|
Re: قرنق.. حرم ( الجبنة ) عندنا بالباوقة ..... (Re: عمر محمد عبد القادر)
|
حبابك يا عمر وحباب ضيوفك لكن الظاهر الزيارة دي حاتعمل لينا مشاكل
لانو الجماعة قالو لي يا جنى هوي كلم عمر ما يجيب لينا ناس الحكومة ديل
هنالكن لمان قلت ليهم يا جماعة انا عزمت الجماعة ديل للعشاء وعيب اردهم
قالوا خلاص بس وصل لجون قرنق الكلام دة
قول ليهو كيفن يعني حكومة السجم دي بتحسب لينا التمر الضكر وتشيل فيهو
طلبة بعدين قول ليهو يعني كيفن بتحسبو لينا علي جريد التمر رسوم غابات
وبعدين قولو غايتو يمكن تكون اخير من رفاقتك اصلو نحن وليداتنا مانفعونا
بي شئ غايتو الله كريم وما عندنا غير الصبر . انتهت الرسالة
ولك التحية
| |
|
|
|
|
|
|
|
|
|
Re: قرنق.. حرم ( الجبنة ) عندنا بالباوقة ..... (Re: صديق الموج)
|
اها حرم يا ود الباوقة ما تكون احسن مننا بعد ما تشربهو القهوة في الجرانيس خليهو يجي لاهلو الملاحة في التكاوين في حوش عمو العمدة محمد عثمان وعلى الطلاق ندور ليهو النوبة دي لمن الكتاحة تقوم موش تعايش برضو ؟؟
وكان داير البرتقان ( ابوحقنة ) برضو بنديهو وما تقول دي ايامو كمان
| |
|
|
|
|
|
|
|
|
|
Re: قرنق.. حرم ( الجبنة ) عندنا بالباوقة ..... (Re: عمر محمد عبد القادر)
|
العقيد بجي
جاي
أيوة جاي
حدو العبيدية
( محطة العبيدية هي محطة السكة الحديد الثالثة بعد محطة عطبرة - دارمالي - بربر - العبيدية) (( سميت بالعبيدية لأنها تقع في منطقة يسكن بها مجموعات من قبيلة العبابدة - وفي فترة العمدة ود رحمة انتشر فيها الميرفاب أولاد ميرف - والنفافير - والهافاب - والهادباب- ولاد مقرقف- والصادقاب والأشراف)
كانت منطقة الباوقة في زمن مشيخة العبدلاب منطقة تناوش بين الميرفاب والرباطاب، وحلا للخلاف نزعها عبد الله جماع وعقد مشيختها لإبنه إدريس عبد الله جماع الذي انحدرت من سلالته قبيلة الإنقرياب ( لقب إدريس انقر) الذي تزوج بنت كبير المنطقة من العنج سكان المنطقة الأصليين الذين إنحصرو في داخل الجزيرة ارتولي ومنطقة طمس، وهم من سلالة العنج والنوبة الأوائل حيث مازالت سحنتهم متميزة في منطقة طمس والجزيرة ارتولي..
في فترة الحكم الإنجليزي أقيم مشروع الباوقة الزراعي لزراعة النخيل والحبوب والبقوليات، ونظراً للخلاف بين الإنقرياب ومأمور المشروع أستجلب مزارعين من مناطق أخرى أغلبهم من منطقة المحمية والمكنية وأكثرهم ينتسبون لبيت التكاوي وذلك لسبب سيطرتهم على ملاحات انتاج الملح في بورتسودان التي كانت في ذلك الوقت مكان تجمع عمالي ذهب إليه مأمور المشروع وأستجلب عماله وملكهم جزء كبير من المشروع مع من شارك من أبناء المنطقة ومن العبابدة وشيخهم الجليل في ذلك الوقت عبد الرحمن العبادي...
استمر الخلاف في مشروع الباوقة وأدى ذلك إلى عدم توسع المشروع حيث كان يرى كل طرف من الأطراف أن الجانب الآخر غير متعاون وخاصة سلالة العبدلاب بعد تحرير الرقيق في فترة الحكم الإنجليزي وتعرض الإنقرياب للإنقراض بسبب الملاريا التي انتشرت نتيجة لوجود المشروع وضعف المكافحة والهجرة المستمرة لمحدودية الأرض وهجرة الرقيق في فترة الحكم الإنجليزي إلى المدن التي توفر العمل والسكن وخاصة مدينة عطبرة وبورتسودان...
بعد اتساع رقعة الفقر بفعل ضعف العائد من الزراعة وعدم وجود الميكنة وضعف الأيدي العاملة ( جاء إلى المنطقة نفر من المناصير ولم يستهويهم الإستقرار فعملوا في بعض المهن والأعمال اليدوية لبعض الوقت ويتكرر ارتحالهم لمناطق أخرى) تساوى الجميع تحت مظلة الفقر وانتشار الجهل بين الشباب وانقراض الكهول لعدم الرعاية الطبية وانتشار الأمراض المستوطنة مثل الملاريا والبلهارسيا والدرن والتيفوئد والحمى الراجعة وفقر الدم والذهان والأمراض الوراثية لكثرة الزواج بين الأسرة..
بالرغم من عدم وجود مصادر للدخل غير الزراعة التقليدية ظل المشروع الزراعي مصدر استنزاف لأهل المنطقة بما فيهم المناطق خارج المشروعي الرئيسي وتعددت الضرائب واسمائها حتى أصبح المزارع يدفع ثمانية أنواع من الضرائب على نفس المزروع..
أولا هناك ضريبة أسمها ضريبة المساحة، طالما لديك ارض ممسوحة زرعت أم لم تزرع تدفع عليها هذه الضريبة.. ثانيا عندما تشق جدولا لكي تفتح الماء هناك ضريبة اسمها ضريبة الري .. زرعت أم لم تزرع.. عند بداية الزراعة هناك ضريبة اسمها ضريبة البستنة.. انتجت أم لم تنتج.. وعند غرس النخلة تدفع عليها ضريبة النخيل .. بالرغم من أنها تنتج بعد سبع سنوات.. تظل تدفع عنها كل هذه الفترة .. ويتم الدفع حسب عدد النخلات.. إذا زرعت موالح هناك ضريبة الزروع .. بعد الإنتاج هناك القبانة .. وعند الحصاد أو البيع هناك ضريبة الزكاة .. وضريبة المجلس .. تدفع عند مرور الناتج الزراعي أو خروجه.. حسب أوراق مكتب الزراعة ..
تم استخدام الشرطة والقبض وحبس المتخلفين من دفع الضرائب ..
لذلك ذكر ولدنا موضوع الشكية في جلسة الجبنة للحاكم الجديد
العقيد جاي
والمعروف عن أهل العبيدية إكرام الضيف
بشرب الجبنة في العبيدية
ما ظنيته بقطع غرب
لكن جنوده بعد أن يكونو قد تجولوا في سوق عطبرة كثيراً ربما يستهويهم الإستراحة بين أشجار النخيل في شارع الشتل
وربما يزوره وفد من أهل طمس
يشكون إليه إنحصار قريتهم بفعل توسع حلال التكاوين وحواشاتهم
وربما يصله وفد من الجزيرة سرمباس ( صير أم بأس) وتصحبهم الكيتة
أما محبي السيد علي والسيدة مريم فمن بقى منهم سوف يستظل بشتلات تعاورت سعفاتها خشية غيظ ذلك اليوم وحره وحروره وربما استعانو برشرشة الرقراق والتنسم بأريج نفحات الجبنة العابرة مع الموجة الصباحية من ضفة العبيدية..
الجبنة يا بنية
الجبنة سويها
حالف ما بخليها
جايب فناجينة
من تسني ما نسينا
جبناها يوم جينا
راكبين لوارينا
الجنة يا بنية
اقليها بكرية
قاصدينها الجية
جيتنا صبحية
| |
|
|
|
|
|
|
|
|
|
Re: قرنق.. حرم ( الجبنة ) عندنا بالباوقة ..... (Re: المسافر)
|
**** في فترة الحكم الإنجليزي أقيم مشروع الباوقة الزراعي لزراعة النخيل والحبوب والبقوليات، ونظراً للخلاف بين الإنقرياب ومأمور المشروع أستجلب مزارعين من مناطق أخرى أغلبهم من منطقة المحمية والمكنية وأكثرهم ينتسبون لبيت التكاوي وذلك لسبب سيطرتهم على ملاحات انتاج الملح في بورتسودان التي كانت في ذلك الوقت مكان تجمع عمالي ذهب إليه مأمور المشروع وأستجلب عماله وملكهم جزء كبير من المشروع مع من شارك من أبناء المنطقة ومن العبابدة وشيخهم الجليل في ذلك الوقت عبد الرحمن العبادي...***
الاخ الحبيب المسافر تشكر على السرد التاريخي لمنطقة الباوقة وهي منطقة مجهولة للكثيرين الذين لا يعرفوها الا من خلال بعض الاغاني التي تترنم بجمالها وتفاحها 
الفقرة اعلاه فيها بعض ما ساعود اليه خصاة مسالة مامور المشروع اذ ان الحقيقة هي انهم اصلا اي التكاكوة او كما يحلو للانقرياب تسميتهم بالملاحة من سكان المنطقة قبل المشروع منذ زمن جدهم الفكي حسن واصل سكان الباوقة ابناء حمد والامين ويقال باوقة حمد والامين
وتاسيس المشروع يعود لرفض اهل منطقة المكيلاب بجوار بربر اقامة المشروع فتم تحويل الوابورات الي الباوقة وتحديدا منطقة الانقرياب الا انهم لم يتحمسو للمشروع كما تفضلت وهنا اتوقف واعود لاحقا انشاء الله
| |
|
|
|
|
|
|
|
|
|
Re: قرنق.. حرم ( الجبنة ) عندنا بالباوقة ..... (Re: المسافر)
|
اخوي المسافر .. اه يا مسافر نار الشوق شديدة خلاص .. الف شكر على السرد الجميل والوافي لمنطقتنا الحبيبة الباوقة ووفيت وكفيت .. وطبعا نحن من ناس( انقر ) انقرياب .. وبعدين يا المسافر قرنق دا العبيدية المرة دي بجيها مرور ساكت خليه المرة الجاية يجيها مخصوص ..
ارقد عافية
ود الباوقة
| |
|
|
|
|
|
|
|
|
|
Re: قرنق.. حرم ( الجبنة ) عندنا بالباوقة ..... (Re: المسافر)
|
اخي المسافر تشكر مرة اخرع على الشرح الضافي .. طبعا الجد ابراهيم محمد حمزة عندما
قام بتهريب سلاطين باشا من ام درمان مر موكب التهريب بالباوقة ونزلوا في بيت
الجدة فاطمة محمد الامين وبعد ان اخدوا قسط من الراحة وشربوا كمية من اللبن اتجهوا
بالجمال الى مصر وكان وقتها سلاطين متخفيا في زي امرأة .... مش كدا....
ود الباوقة
| |
|
|
|
|
|
|
|
|
|
Re: قرنق.. حرم ( الجبنة ) عندنا بالباوقة ..... (Re: walid taha)
|
بتوهب من جميلات الباوقة في الأربيعينا
جلست وسط الحوش تسوي في الجبنة تحت الشجرة
جبنة الضحوية في انتظار جلسائها
ابراهيم من الصبيان المعروفين بمغازلتهم للنساء وقول كلام كالشعر تتناقله الألسن.
في مروره بجنب البيت حجزته عطاريب الجبنة فدلف الباب ودخل وجلس
بتوهب في وحدتها تلبشت لرؤية إبراهيم لوحده في مجلسها
حكم مجلس الجبنة الصامت
أعدت فنجان جبنة من البكري وناولته إياه
ظل يرشف الجبنة وهي تراقب هواجسه وتتوجس بوائقه
في دواخلها تتنمر وتشحذ في اظافر افكارها
وقررت أن تقطع عليه دابر افكاره التي إن لم تنقطع سوف تطير بين الأساطير والحكوات
أكمل إبراهيم فنجانه الذي حلق به فوق سحابات العطاريب
فتركزت نظرته نحو بتوهب وهو يضع فنجان الجبنة الفارغ بقربها
تكلبشت شعيرات جلد بتوهب وتكورت لكي تفجر أفكاره
قال لها:
"شكر الله الصانع"
صرخت فيه
" شكرك ضنبك ، شربت يلا على الباب"
| |
|
|
|
|
|
|
| |
mohmmed said ahmed
abuguta
ابو جهينة
ودقاسم
صديق الموج
المسافر
مريم بنت الحسين
بلدى يا حبوب
walid taha
فيس بوك
تويتر
انستقرام
يوتيوب
بنتيريست