|
أغرب الأسماء والألقاب السودانية التى قابلتنى فى حياتى
|
شمو عشميق الكارس دكين الدعكون - إمرأة الجقر - لقب كامتور كبسيبة همرور الخشيف - إمرأة كدفرو- إمرأة منوهة - إمرأة مهلب هويد- لقب كبروس ليسا- لقب ود الجل (وتقرأ الجيم كما فى جانجا عندما تريد الطفل السودانى أن يأكل) رشو- لقب الأموابى - لقب الكارورى أم رخام- إمرأة شرحبيل - إسم ولقب زريبو- لقب قربة- لقب ود أشقر الكعوك - لقب رينقو- لقب بجق - لقب الخزين غرنوق - لقب
والقائمة تطول ، أرجو مساهماتكم
|
|
|
|
|
|
|
|
Re: أغرب الأسماء والألقاب السودانية التى قابلتنى فى حياتى (Re: يازولyazoalيازول)
|
كيفك يازول يازول
عندنا اتنين في الحِلَّة واحد لقبو ود الملايكة والتاني لقبو ود القمرا والاتنين يقطعو الخميرة من البيت.
على ذكر الخميرة، اتزوَّج واحد (اسمو حسن كباية) في حلتنا وفي يوم عرَّفوهو (في بيت المعلوم) على واحد تاني من الحلة اسمو الطيِّب (لقبو السوزوكي) قالو ليهو يا السوزوكي دا حسن كباية ناسبنا قريب دا قام السوزوكي (عاين للكباية القِدام الزول) وقال ليهو، بالله اسمك حسن كباية، أخوك الطيب النُص...بالله كُبِّي نُصْ.
أمَّا الشاب الظريف الملقَّب "الchيرة" فمشى يجيب المعلوم قامو الجماعة حاولو يمسكوهو قام قال ليهم معليش يا جماعة معاي السوزوكي في البيت فقالو ليهو ياخي بالغت معاك السوزوكي وما تجيبو لينا، قال ليهم: الحقيقة يا جماعة السوزوكي "كَبَّتو" ما هنا.
طبعاً الكلام دا كان أيام توزيع "كَبَّات" البنزين على محطَّات معيَّنة وحسب علمي الجماعة ديل وِقفو ذاتو من الكُبَّاي...الكُبَّاي البيهو جافو النوم وعقدو الرأي.
نرجع لموضوعنا لأني نسيت أقول ليك نسيب "حسن كباية" لقبو "جر" وتنطق الجيم كما فى جانجا عندما يريد الطفل السودانى أن يأكل أو مثل قولك "الكَلِب جرَّ فيني" أما نسيبو الآخر فلقبو "لَبَخ" والثالث "الكِجيك" وله لقب آخر هو "بِتْ جادين"
تحياتي لهم كلَّهم أينما كانو، وإن عدتم عدنا
| |
|
|
|
|
|
|
Re: أغرب الأسماء والألقاب السودانية التى قابلتنى فى حياتى (Re: يازولyazoalيازول)
|
هشـام والجميع، سـلام؛ أعـرف الكتير من الأسمـاء الغـريبة، لكن الآن سأحكي ليكم قصة سمعتها من أحـد أقربائي ويعمل مساعد طبي في قرية قرب الأبيض؛ مرة جاهو مريض وقام هو سألوا: اسـمك منو؛ قاليهو: خـاطر - خاطـر ود مـنو؟ - خاطـر ود مـتخطري!! - من ياتي حلة انت يا خاطر؟ - حلتنا (عـارض المـغرب!) - وشـيخكم مـنو؟ _ شـيخنا مَـزعزَع!!
| |
|
|
|
|
|
|
Re: أغرب الأسماء والألقاب السودانية التى قابلتنى فى حياتى (Re: يازولyazoalيازول)
|
الأستاذ هشام تحياتى... أول حاجة البوست بتاعك دا دايرو كم صفحة؟ لأنه بنوصلوا ليك بتاع ناس أميتاب باتشان نبدا ليك من الجبال عرب ونوبة: لواء صول شاويش حكومة(إسم مؤنث) سرير سكرتير صابون شجرة كركور دابى دفتر ألقاب المصارعين: التسمم الملاريا الخور( ما بتاع بكرى ) التندة الكتات المساعد نمر القوز كجامة كسر الباب كمونية
أتذكر وبرجع ليك،،،
| |
|
|
|
|
|
|
Re: أغرب الأسماء والألقاب السودانية التى قابلتنى فى حياتى (Re: يازولyazoalيازول)
|
اورد الاستاذ خضر الطيب اسم (قمش) بكسر القاف , كأغرب الاسماء التي مرت عليه ,,, اسرة القمش هي من الاسر المعروفة بين مروي وكريمة مع اسرة خطاب وحجار وغريبة في تنقاسي وقد جاء اسمها من تجارة القماش في تغريبة التجارة بين مصر ودارفور ثم استقروا بمروي , ولا صلة لهم بااللقب الذي يحمله مخرج التلفزيون عبد العظيم قمش المنحدر من القضارف . اي ان اسم الاسرة ينتمي للمهنة التي كانوا يعمل بها اجدادهم , وهو الامر الذي ابلغني به جدي لأبي صادق علي احمد القمش , وهنالك الكثير من الاسر في السودان التي يعود اسمها الى مهنة اجدادها , اما القمش فهو غير منتشر خارج هذه الاسرة
(عدل بواسطة Dr.Abbas Mustafa on 02-08-2006, 09:27 AM) (عدل بواسطة Dr.Abbas Mustafa on 02-08-2006, 09:28 AM)
| |
|
|
|
|
|
|
Re: أغرب الأسماء والألقاب السودانية التى قابلتنى فى حياتى (Re: يازولyazoalيازول)
|
الاب والاخ والصديق هشام كل سنه وانت طيب! السودان كلو غريب؟؟؟وعجيب؟؟؟
جزء من الاسماء والالقاب التي استحضرها!
كركبه (جدا لينا) عوج الدرب حوا اللمبه الرتينه الخصيصه الضبيه (اسم حبوبتنا واظن اصل الاسم الظبيه لكن تقول شنو) تام زينو بركيه (بكسر البا والكاف) شكاك السمهدر شبونه كبشو زنقار الدعيته الكو مشاوي ابوكليوه النفيدي الكجم ضبع (بضم الاول والثاني وسكون الاخير) كرراوي الفنوب كجراوي بجك شمه سوركتي عجبه الجاغوم والبقيه تاتي؟؟؟ ده ما اسم(ههها)
| |
|
|
|
|
|
|
Re: أغرب الأسماء والألقاب السودانية التى قابلتنى فى حياتى (Re: يازولyazoalيازول)
|
العزيز ود عزاز ازيك
سكرتير مالية
وسكرتير مالية هو والد زميلنا محمود سكرتير حيث تزاملنا بمدرسة الدلنج الاميرية
وصدف ان شغل محمود منصب السكرتير المالي لرابطة ابناء جنوب كردفان بجمهورية مصر
ولقد شغل هذا المنصب لامانته التى عرف بها.
ألا رحم الله محمود الذي كان صديقا سميا
مع تحياتى اليك يا زول يا زول
شمس الدين السنوسى
| |
|
|
|
|
|
|
Re: أغرب الأسماء والألقاب السودانية التى قابلتنى فى حياتى (Re: Shams eldin Alsanosi)
|
الشقيق، أو الخال لكونها أعمق شمس الدين السنوسى........ ألف تحية و سلام.؛؛ شفتك فى المتواجدين ، و قد أحسست أنّى استطيع إدخالك هنا فقط قل لى هل تعنى من كان يلعب لفريق الحضارة حتى منتصف التسعينات؟ له الرحمة و المغفرة، و حسن العزاء لنا جميعاً بالمناسبة إنتظر أسماء حى المطار، و المعاصر (فريق بقارة) بداءاً من جدى أبوشوك! تحياتى للأسرة،،،
| |
|
|
|
|
|
|
Re: أغرب الأسماء والألقاب السودانية التى قابلتنى فى حياتى (Re: يازولyazoalيازول)
|
اخوي هاشم
امسك عندك
الله جابو اسد ( مشهور في الابيض ) ود العليقي
منقا
بت قضيم
والشكر للاخ الدكتور عباس على التصحيح في شأن اسرة ( قمش )
اما عن اسرة غريبة فكما وردت في كتاب المرحوم د. عون الشريف قاسم فهي اسرة ممتدة من اصل جعفري اصلهم في مناطق جنوب مصر وبخاصة منطقة دراو و الرقبة واسوان ووصل جدودهم الاوائل موسى و سيد غربية في اوائل القرن الماضي الى السودان وعاشو في مناطق تنقاسي السوق والدهسيرة والزومة وفتنة ( وهي مناطق الشايقية ). وكانو يتعاملون بالتجارة .
وقال شاعر الشايقية :
ان كنت عاوز السمح والعمار تلقاوه عند ناس غريبة وحجار
| |
|
|
|
|
|
|
Re: أغرب الأسماء والألقاب السودانية التى قابلتنى فى حياتى (Re: يازولyazoalيازول)
|
Quote: فقط قل لى هل تعنى من كان يلعب لفريق الحضارة حتى منتصف التسعينات؟ |
طبعا يا ود عزاز دي ما بقدر افتى فيها لأنى غادرت الدلنج فى الثمانينات لكن محمود كان من العاشقين لكرة القدم ونحن طبعا حضرنا العصر الذهبى لفريق الحضارة بقيادة كمش شاكوش ومصباح طبعا الاسماء ممكن نضيفها للستة بتاع يا زول
وبعدين انت شكلك حايم فى الدلنج كويس بس كيف ما مر عليك عمنا مدنى شوربة قطية عريس احمد تلاتين ام قماش جنقو إمراة وطالما نويت تدخل علي حي المطار فعليك الله تبدا بعمنا العشا والطريفة استاذ الانجليزى جيم كان كان بنادينى بـشمس الدين كربونات لانو جدى الرابع عطرون وشكرا ليك مرة تانية يا زورل
شمس الدين السنوسى
| |
|
|
|
|
|
|
Re: أغرب الأسماء والألقاب السودانية التى قابلتنى فى حياتى (Re: يازولyazoalيازول)
|
يازول
سمعت بي ديل ؟؟
العِـزْ وهـاط دهر النِســو تام زينو الحي يشوف
وديل كلهن كانن في شرق الجزيرة بياكلن من ( عرق ) الجبين وخدمة ( أرجلهن )
وبالمناسبة كان في واحد من أخوالنا زبون دائم عليهن مرة سافر الخرتوم كانت زيارة لمريض عمل عملية مرارة وبعد الزيارة مشى بيت العزابة في الختمية بالليل جابو ليهو قزازة من الديوم القدام سعد قشرة عاين لي القزازة لقاها مليانة لحد الفلينة
أطلق زفرة عميقة وقال أيووة ديل الناس البخافو الله مش زي ناس عِـز وهاط
| |
|
|
|
|
|
|
Re: أغرب الأسماء والألقاب السودانية التى قابلتنى فى حياتى (Re: يازولyazoalيازول)
|
الاساتذة الكرام عزاز ويازول ,, لا والله لم ازعل ,, وقد اعجبني موضوع البوست فهو يفتح نافذة تهوية جيدة للمنبرالذي يعاني من عتمة هذه الايام ولكنني علقت بالطريقة التي اعتقدت بانها يمكن ان تضيف ,, ثم ياليتنا نسمع صوت الاستاذ عبد العظيم قمش حول ( ملابسات ) اللقب او الاسم فلربما طلعنا اقرباء ,,,, والسودانيون في كل الاحوال ابناء عمومة .. وهاكما اسماء اعتز بمعرفة بعضها مثل : - حوض العاشم ( حبوبة كثيرين من اهل الدامر وقد ساهمت كثيرا في تربيتي ) . - خاتي الزغل ,, اسم صادفته صغيرا !! - الريل ,, اسم جميل ولكنه غير منتشر ,, اليس كذلك - بت مريسيل ( يا بت مريسيل تعال اوصيك !! ) اما الاسم الذي ادهش صديقي العربي حينما ذكرته امامه فهو ( وقيع الله ) وانا اتحدث معه عن الخطاط السوداني الشهير عثمان وقيع الله .
(عدل بواسطة Dr.Abbas Mustafa on 02-08-2006, 10:44 AM)
| |
|
|
|
|
|
|
Re: أغرب الأسماء والألقاب السودانية التى قابلتنى فى حياتى (Re: hatim)
|
زكاه لنا (ود قسم السيد), التقاه- قال- فى الحلة الفوق, حيث اشتركا سويا فى بناء بيتين متجاورين لبعض القادمين من الخليج حديثا.
- هو بناء ماهر
قال (بانقا ود قسم السيد), وهو يمصمص فمه عند الحنفية فى طرف الحوش من بقايا الصعوت الذى التصق باسنانه العلوية. علق (حسن الفتاة), جارنا, الذى تطوع للاشتراك فى مناقشة التكاليف.
- نحن لانريد بناء ماهرا, هذا مكلف .. نريد من يعرف كيف يبنى حائطا بطول مترين بدلا عن حائط المرحاض الذى رماه السيل!!
صاحت (امنه عطا), زوجته, من فوق الحائط وهى تمد صينية عليها بعض الاكواب الممتلئة بالشاى الاحمر, وتناولها (زين العابدين), شقيقى الاكبر, متمتما بعبارات الشكر المعتادة ثم راح يقدمها لنا واحدا واحدا
- تفضل يا... قلت اسمك من؟
تطوع (بانقا ود قسم السيد) بالاجابة:
- الضو.. ود ام زقدة
- ود من؟؟!
تسائل (حسن الفتاة) مندهشا بينما احسست بان فكى الاسفل قد لامس اسفل صدرى.
- (زقدة) هذه اختى الكبرى من امى . قال الرجل فى نبرة من اعتاد على شرح الامر مرات ومرات, فسأله (حسن الفتاة):
- زقدة؟ هل انتم فى الاصل فلاتة؟
- لا. جدتى لامى نوباوية.. من الجبال, وكانت جارية لجدى وهو جعلى من الشقالوة شرق النيل, شمال شندى وقد سمى امى- ابنته- (مستورة). وقيل ان والد زقدة كان هو الاخر مملوكا لجدى فزوجه امى ثم سمى وليدتهما زقدة, قيل لانها رفضت الرضاعة من صدر امى, وقيل لانها ولدت وزبد ما يخرج من فمها وقيل.. وقيل.. الشاهد ان امى كنيت ب (ام زقدة) حتى نسى الناس اسم مستورة. وانت.. لماذا سموك حسن الفتاة؟ رغم انه لايبدو عليك- لاسمح الله - علامات الخنوثة؟!
ضحك زين العابدين, وتابعته انا فى الضحك وهو يشرح ل ود ام زقدة:
- خنوثة؟! تعرف يا ود ام زقدة, حسن الواقف امامك هذا, يمسك الثور من قرنيه ويلقى به على الارض ويذبحه وحده دون مساعدة!! اظنك لاتعرف انه من شيوخ الجزارين.
- اصدقك. فمثل هذا الطول والعرض لايمكن الا ان يكون جزارا او ... رباطا
ضحكنا جميعا, حتى حسن نفسه ضحك ولكن لماذا يقولون له الفتاة؟
-ايييه.. ان هى الا اسماء سميتموها..
زفرها حسن بعد تنهيدة طويلة
- ان جدتى لامى هى الاخرى كانت جارية مملوكة لجدى النور ود التلب, من كبار تجار الرقيق فى كوستى. وعندما وضعت جدتى ابنتها الوحيدة- امى - سماها( الفتات) يعنى البقايا, وجدها فى القرآن قال, وعندما جئت انا الى هذه الفانية نادانى الناس اول الامر ب(حسن ولد الفتات), ثم لما استثقلوا الاسم فى افواههم قالوا (حسن ولد الفتاة ) ولا اذكر منذ متى اختفت كلمة ولد من اسمى وصار السائد عند الناس قول (حسن الفتاة) مباشرة.
بعد اسبوع جلس حسن الفتاة يشوى لنا بعضا من طيب اللحم الذى انتقاه بنفسه, بينما انهمكنا نحن فى ضحك متواصل من طرائف ود ام زقدة, والتى لا تنتهى. ونحن نشرب العرقى البكر الذى جائنا هو به من اين لا ادرى, احتفالا - قال - بانتهاء بناء الحائط.
منعم الجزولى
أزقــــــــــة 2
(عدل بواسطة Gazaloat on 02-08-2006, 11:35 AM) (عدل بواسطة Gazaloat on 02-08-2006, 11:38 AM)
| |
|
|
|
|
|
|
Re: أغرب الأسماء والألقاب السودانية التى قابلتنى فى حياتى (Re: Dr.Abbas Mustafa)
|
كلو كوم والإسمين ديل كوم وهما..
سيد أحمد و أبوعيسى.. فكلما حاولت أن أجد لهمادلالة إرتجف.. فمن هو سيد أحمد والمعروف أن أحمد من أسماء الرسول عليه الصلاة والسلام ثم من هوأبوعيسى .. وددت أنأسأل الأستاذ فاروق أبو عيسى عن دلالة إسم والده.. الرجاء الإفادة .. المعروف بأن سيدنا عيسى يلقب بإسم عيسى بن مريم.. فمن هو أبوعيسى..
| |
|
|
|
|
|
|
Re: أغرب الأسماء والألقاب السودانية التى قابلتنى فى حياتى (Re: يازولyazoalيازول)
|
[/i/] الاخ الدكتور /عباس
لك التحية والتقدير
لولا (شلاقة) العزيز هشام وايرادنا لاسم اسرتكم الكريمة لما عرفنا هذه المعلومة القيمة التي
ادليت بها والتي هى اضافة حقيقة لاثراء هذا البوست بمثل تلكم المعلومات الضافية كما في
مداخلة الاستاذ صلاح غريبة والتي كان لها قصة اوردها الاستاذ
فهؤلاء هم اهلنا باسماءهم( الغريبة) تلك وببساطتهم المحببة فاتمنى ان تتابع هذا البوست فبلاشك
ستكون رصيدا اضافيا ورصدا دقيقا لملامح اسماء اهلنا الطيبين ومعانيها الجميلة التى تنبع من
بئتنا السودانية الخالصة
ولاننسى زميلنا وحبيبنا ابن القضارف المخرج التلفزيوني عبد العظيم قمش فان لم يكن من الاسرة
فربما اعجبهم هذا الاسم . فلك العتبى حتى ترضى ايها القمش
خرمجة:
كردش دا ماقريبكم يادكتور (وجه ضاحك ).. وتسلم ياغاليبالمناسبة انحنا نسايب يادكتور ورغم ذلك لم اكن اعرف ان اسم الاسرة قمش فلك التحية مجددا وللذين لايعرفون الدكتور عباس مصطفى صادق . فالرجل من الكتاب القلائل . قابلته اخر مرة قبل عشرة سنوات وعلمت بعدها انه خارج السودان للتحضير .. فالرجل قلم قل مايجود الزمان بمثله . والتحية للمهندس بكري ابوبكر لاتاحته الفرصة لنا للالتقاء بالرائعين امثال الدكتور عباس . وبالله يادكتور عباس هل هنالك اروع من هذه الصدفة ؟ لاتضنى علينا فنحن في انتظار ابداعاتكم التي حرمان منها زمنا ليس بالقصير والتحية للاستاذ عبد الرحمن عزاز للتوضيح
(عدل بواسطة خضر الطيب on 02-08-2006, 01:57 PM)
| |
|
|
|
|
|
|
Re: أغرب الأسماء والألقاب السودانية التى قابلتنى فى حياتى (Re: يازولyazoalيازول)
|
الاخ الكريم خضر اشكرك كثيرا على التقريظ ,,,
اعرف جيدا صلة النسب بييننا واقدر ذلك كثيرا ,, وابناء الخوولة يخلدون العلاقات الطيبة بين الاهل ,, ولكنني لست عاتبا وانما ملتمسا لنفسي مساحة لمقاربة اسم عائلتي مع معناه وجذره ,,وفي مرات تحدثت مع الاستاذ الكريم المخرج عبد العظيم قمش عن حقوق الملكية في هذا الاسم , ولك التحية ولكل المبدعين من اهل بلدي ,,
| |
|
|
|
|
|
|
Re: أغرب الأسماء والألقاب السودانية التى قابلتنى فى حياتى (Re: يازولyazoalيازول)
|
يا زول يازول انت وين ماشماشي الديش انت وين ماش
عمل لي { لفت نظر } لهذا البوست الحبيب جزلوت { منعم آل جزولي } وهو قلما يهديني البشارات ولكن أي منها يكفي حتى تأتي الأخرة تجرجر أذيال الخيبة ، ومنعم بوصلتي للجهات/ البوستات الجميلة والمفيدة ، { فجزاه الله عننا كل خير} و { جعلها في ميزان أوزارو الحلوة } أما بعد ،،،
هاكم ديل
- عاصقيل : دي أسرة في العفاض في الشمالية ويعود الإسم لشيخ ولي وأصل الأسم { عاصي القيد } - عاصي قيدو ولا علاقة لهم ب { عاصي الحلاني } ولا ب { عاصي الرحباني }ولكن جميعه عصاة - حربكانين : ومع الإعتذار لصديقنا الإعلامي في الجزيرة عبدالله إلا أن الإسم يشي عن إستعلاء عرقي فهو حر من الناحيتين يعني في الحالتين هو حر والحالة مقصود بها الحالة الإجتماعية
- هيمت : هذه أسرة كبيرة في الديم يمتاز ون ببسطة الجسم والحرفنة في الكورة - قرزن : كان لقب لأفضل ثيردباك في منطقة الخرطوم جنوب { رحمه الله } - جقدول : لقب لاعب المريخ السابق المرحوم عبدالوهاب عبدالفضيل - ترباس : بالنسبة لخميس فهو والده وبالنسبة لكمال مجرد لقب مستمد من مهنته الأولى { نجار} - دبورة ، أسرة معروفة في عطبرة ومنهم صاحب المكتبة الشهيرة عوض الله دبورة - منقزا : وممكن تكتب منقزة لقب جماعي لأولاد أسرة واحدة -عوة : أو عوا ، لقب صاحبنا حسن نميري : أسم مشترك لأكثر من أسرة ، واحدة من تلك الأسر لديهم إبن عاق - عبود : إسم زعامة ، رئيس { الفريق إبراهيم عبود } و ملك { والد مهيرة بت عبود} - بعشوم : بتلقاهو في جبل من الجبال - كبسون: أسرة حيدر كبسون وده كان مدير ديوان شئون الخدمة وإستوزر في أخريات خريات نميري - كبشور: ومنها البروف كبشور ، وزير - شيبون :أبرز رموزها أسد إسماعيل شيبون وأخوه صديقنا كمال - الزيبق: أسرة معروفة -الماظ : أسرة البطل الوطني عبدالفضيل الماظ ،وبرضو إسم متداول عند الأحباش - الشعار : أسرة من الدويم ، أولاد ريف وكان منهم وزير -الحواتي : أسرة البروف بركات موسى الحواتي وهناك أسماء اسر حضرمية في بورتسودان تبدا با : با ومنها باعبود باوارث باخريبة
وهناك ألقاب تحير منها لقب بلفظ نابي ، الغريب أنو الناس بينادوهو عاااادي حتى البنات بينادو { حسن كسية } وهناك القاب معفنة زي صاحبنا كمال الهرو
أكتر إسم كامل عاجبني هو إسم أستاذنا البروف: هنود أبيا كدوف
ويا ملامح قلت لي أبو عيسى منو ؟ باااالغت وشذيت
| |
|
|
|
|
|
|
Re: أغرب الأسماء والألقاب السودانية التى قابلتنى فى حياتى (Re: يازولyazoalيازول)
|
الوســـــيـلة
وبمناسبة اسم الوسيلة فقد سمعت قصة حكاها لي منذ زمن طويل الأخ الفاتح الوسيلة حاج موسى وهو ابن الدكتور الوسيلة حاج موسى الداعيــة المعروف. كان شيخنا الوسيلة يعمل أستاذاً في السعودية في فترة مضت، ويومها كان يتوضأ وبجانبه أحد السعوديين يبدو أنه زميل في العمل .. فسأله السعودي مداعباً: "والله إنتو يا السودانيين عندكم أسماء ما أدري من وين جيبتوها ... ها الحين قول لي يا دكتور إيش يعني الوسيلة" وكان الدكتور يملك سرعة بديهة عاليــة فسأل السعودي على الفور: ما هو اسم جدك: فقال له السعودي إسمو مبيعر: فأجابه الدكتور وبسرعة: "عليك الله إنت اسمك دا هسع ما بيبطل الوضــوء" ...
| |
|
|
|
|
|
|
Re: أغرب الأسماء والألقاب السودانية التى قابلتنى فى حياتى (Re: يازولyazoalيازول)
|
ود الباوقة تعرف إنو أي عوض لاقيتو في الدنيا أم بناين قش دي كان له لقب فأنظر: عوض جولط : معروف كان لاعب في فريق النيل العاصمي عوض كوكا: لاعب الهلال والفريق القومي المعروف ، شفاه الله عوض كيتا: من ظرفاء الديم / المايقوما عوض حريقة عوض الضب عوض الطويل ،وهذا له مليون لقب منها إستركشن ، طهيهي عوض ابوزعوط عوض زوبعة عوض دوقماس عوض ضب أعور عوض سكينة عوض ستونا عوض ودالحاجة عوض روثمان عوض { عمك} عوض ابزنقلة عوض كديس عوض نوبة : ده صاحب حسن الجزولي عوض أص عوض بس تعبت من القاب العليهم العوض
| |
|
|
|
|
|
|
Re: أغرب الأسماء والألقاب السودانية التى قابلتنى فى حياتى (Re: يازولyazoalيازول)
|
يا غاز لوت أهنيء ذاكرتك الخصبة وأمال المليون ديك الإتذكرهم منو وجاب طاريهم عوض الكباكا : لاعب خرطومي كان في النيل على ما أظن عوض قامزوت : كان في بالي ةسقط سهوآ و عوض نوبة : برضو كان صاحبك وإلا صاحب أخوك حسن صاحبك ، لكن ما تصاحب أصحاب كمال
ونسيت من قائمة الأسماء الغريبة :
- التني : أسرة سفراء ووجهاء وشعراء -بريدو : ومنهم السفير عمر يوسف بريدو { مالو إتأخر بريدو يا ناس}
| |
|
|
|
|
|
|
Re: أغرب الأسماء والألقاب السودانية التى قابلتنى فى حياتى (Re: Gazaloat)
|
انجزت قبل فترة تقريرا حول الاسماء في السودان، واستضفت فيه العالم الراحل البروفيسور عون الشريف قاسم وكذلك عميد كلية الاداب في جامعة افريقيا العالمية الدكتور عبد الله حمدنا الله وقد تضمن ذلك التقرير معلومات مهمة وادهشتني خاصة من البروفيسور الراحل حول الاسماء التي ينفرد بها السودان ودلالاتها ، وكذلك التوزيع الجغرافي للسودان، واسماء المراحل السياسية وغير ذلك سابحث عن التقرير وان تسنى لي فيمكن ان احمله بالصوت للفائدة
| |
|
|
|
|
|
|
Re: أغرب الأسماء والألقاب السودانية التى قابلتنى فى حياتى (Re: Salwa Seyam)
|
مدير جرمة تريبو
(التلاتة الفوق بيشكلوا الاسم الثلاثي لأحد أقربائي) تربو تريبوية(لقب مؤنث) دقيس(علم مذكر) الأغبش يعقوب رقيّق( شخص إلتقيته غربي دارفور منذ سنوات) تامبيرا(لقب رجالي) برّة السرق التيس(لقب) أبوقطية(لقب رجالي) أبوقطيطية( مثله) مسواك الحديد(مثله) شيطان التلج(مثله) عريس(مثله) حران حارن الساير عطرون كبر(بضم الكاف و الباء و هو اسم رجالي) كبير كبّرو ضحية مركز برشم دكين أبو قبورة دبورة كرمبلو(لقب رجالي) كدفور همرور جقدول فطومة كلتومة حوّاية نفرين( علم مؤنث) أم بلدين(مثله) أم بلد(مثله) أم بختين(مثله) أم بخت(مثله) دقيشة(لا أدري أهو لقب أم اسم مؤنث) إنقاتة(لا أدري ما إذا كان لقب أو اسم مؤنث) بخت(علم مذكر) باخت(علم مذكر) السرة السريرة تبشة(لقب رجالي) تبش(لقب رجالي) مرق(لقب رجالي) شيتا(لقب رجالي) خرطوم( علم مذكر) دارفور( علم مذكر) ود نواي ود نفاش(لقب رجالي شهير) أبو آمنة أبو فاطنة أبو خديجة(لقب يطلق على رجال الشرطة) الإريرة(لقب يطلق على رجال الشرطة) النواي المحبوب عبد النضيف خادم الله خادم الرسول تمساح(لقب رجالي) الجيلون الكلجو أبوندلك الدود بعشوم بقاري التور ديكورلوس(لقب) تقزوز(لقب رجالي) قبة في راس صقر(لقب رجالي لأحد أصدقاء والدي أطال الله عمريهما) أحمدية(لقب رجالي لأحد اصدقائي و اسمه أحمد ، ديكورلوس أحد ألقابه أيضا) محمدين الدين(علم مذكر) عابدين عبدين(علم مذكر) أبو قنيبير(لقب رجالي) تور الله الأنطح(لقب رجالي) رقيق باطل(الاسمين الثالث و الرابع لأحد معارف أحد اصدقائي) سفاهة(منطقة جنوب غرب السودان) النهود(مدينة غربي السودان) أضان الحمار(منطقة غربي السودان) قميلاية(مثلها) كاس(منطقة غربي السودان) سرف عمرة(مثلها) فور برنقا(مثلها) دبس(مثلها) دليج(مثلها) كفية قنجة(منطقة جنوب غربي السودان) الرطرط(مثلها) أم دافوق(مثلها) بركة سايرة(مثلها) دبة سبر( منطقة جنوب الأواسط) خور الطلبة(موضع نواحي جبل مرة) خور أجول خور عدار (أصلا هو عدار ييل) و قد شهرته حكومة الإنقاذ
و للأسماء بقية
| |
|
|
|
|
|
|
Re: أغرب الأسماء والألقاب السودانية التى قابلتنى فى حياتى (Re: Ibrahim Adlan)
|
سلامات يا زول يا زول،
حبوبتنا اسمها قَدُولَة وما عرفنا ليها إسم غير دا. لما خلاص قرَّبت تموت عرفنا إنو إسمها قَنْدَ اليمن. وما عرفنا إنو قَنْدَ اليمن دي أصلاً هي: قندول يمن إلا بعد ما ماتت (الله يرحمها) لي هسَّع ما عارفين ياتو قندول من قناديل اليمن سموها عليهو.
الحقيقة الكاملة، كما الجريمة الكاملة، نادرة.
حبوبتنا التانية إسمها (ما لقبها) اللِخَيَّة وأعتقد إنو يعني "الأخيَّة" تصغير أخت الغريبة إنو لي حدي ما ماتت (الله يرحمها) ياهو دا أسمها. الأغرب إنَّها ماتت عن 110 سنة (على الأقل) وشفتها بي عيني دي قبَّال ما تموت وكان حجمها أصغر من أصغر "أُخيَّة"
حبوبتاً لينا تانية إسمها "عِسيلة" تصغير "عَسَلة" وجداً لينا لقبو ود "الكبيدة" تصغير "الكَبْدَة".
شِنْ قولك بالله في الكَّبْ دا.
لله في (السودانيين) شئون ولهم في أنفسهم شئون وشئون وشئون.
| |
|
|
|
|
|
|
|