Post: #1
Title: ابونمو سفير في الخارجية السودانية بقرار من كميل ادريس - وانت يا الدقم اقعد معنا هنا
Author: زهير ابو الزهراء
Date: 12-16-2025, 11:20 PM
11:20 PM December, 16 2025 سودانيز اون لاين
زهير ابو الزهراء-السودان
مكتبتى
رابط مختصر
أُعلن اليوم الثلاثاء 16 ديسمبر عن تعيين وزير المعادن السابق والقيادي بحركة تحرير السودان – جناح مني أركو مناوي، محمد بشير أبو نمو، سفيراً بوزارة الخارجية والتعاون الدولي.
وقال أبو نمو في منشور عبر حساباته الرسمية على فيسبوك وتويتر إنه تلقى خطاب تعيينه موقعًا من رئيس الوزراء البروفيسور كامل إدريس، معربًا عن شكره وتقديره لرئيس مجلس السيادة الفريق أول ركن عبد الفتاح البرهان ورئيس الوزراء
وحاكم إقليم دارفور ورئيس حركة تحرير السودان مني أركو مناوي، على الثقة التي أولوها له.
يا محمود الدقم.. أرخي أعصابك واشرب "جبنة" باردة!
الخبر نزل علينا زي "كعة" الكهرباء في نص الظهر. أبونمو بقى سفير! آي والله، سفير حتة واحدة.. لا "جرسون" مكتب، ولا "مراقب ترامس" في الصالة، ولا حتى "بتاع بوفيه" في الملحقية. سفير بالختم والروشتة، وبمباركة "كامل إدريس" شخصياً، يعني الزول ناقصو بس يركب "سارينة" فوق راسو ويمشي يوزع ابتسامات دبلوماسية في المطارات.
طبعاً يا محمود، لو سألت "سفير وين؟" تبقى مسكين. ولو سألت "سفير ليه؟" تبقى نية. السؤال الحقيقي هو: "الزول ده سحرهم بشنو؟".
لكن يا دقم، دي خارجية "نيو لوك". زمان كانت بتمشي باللغات والبروتوكول، هسي بتمشي بنظام "الزول ده قريبي" ونظام "كان واقف وين لما وزعوا الكيكة؟"
أبونمو اللي كان أمس "جغمسة" منصات، و"منظراتي" واتساب، وخبير استراتيجي في قروبات "المغتربين الأحرار"، فجأة بقى رجل دولة، وبقى يمثل السودان..
السودان اللي فيهو النيل والغابة، هسي بقى بمثلو "أبونمو"!
أما أنت يا محمود الدقم، فأقعد "اتفولح" لينا كدة. أقعد في ضل الراكوبة ده، واحسب النجوم عز الظهر. غلطتك يا بطل إنك استعملت مخك، وفكرت، وسألت أسئلة كبيرة.. والبلد دي يا محمود "المخ" فيها بيجيب وجع الضرس، والأسئلة بتخليك "عطالي" رسمي.
في سوداننا الجديد، السفارة دي ما "شهادة كفاءة"، دي "جائزة نوبل في التصفيق". دي "بدل سكن" سياسي، ومعاش نهاية خدمة لأي زول صوته كان عالي في الفارغة. أبونمو ده ما سفير دولة، ده "سفير الغفلة".. سفير مرحلة "أغمض عينك وافتح خشمك".
وانت يا الدقم، بدل ما تمشي تشتري "بخور تيمان" وتبارك ليهو، قعدت تقول "كيف؟ ومن وين؟". يا زول دي أسئلة بتوديك "سفارة القهوة" اللي تحت الشجرة، تشرب شاي وتشجع التعيينات زي الدوري الممتاز..
كل يوم "قون" جديد في شبكة المنطق، وكل يوم سفير جديد "نازل من السماء" ببراشوت الولاء.
هسي أبونمو لابس البدلة "المكوية" ونازل من العربية الفاخرة، وشايل ملفات (غالباً فيها صور سيلفي)، وبيصرح: "سنعمل على تمتين العلاقات". وانت يا دقم، "متّن" علاقتك ببنبر القهوة، وعمّق الشراكة مع "المافي"، وافتح ليك ملحقية ثقافية في "قروب العائلة".
دي ما سخرية من أبونمو، حرام عليك، ده "سعادة السفير" هسي.. دي سخرية من دولة بتوزع المناصب زي "لحم الضحية"، وبقت الخارجية فيها زي "لجنة عرس" في حلة شعبية.
مبروك لأبونمو البرستيج، والبدل، والشنطة الجلد السامسونايت. وأنت يا محمود الدقم.. أقعد ساي، وربّع يديك، لحدي ما البلد دي "تقعد" على حيلها، أو نلقى نفسنا كلنا سفراء.. بس في دولة "تايهة" وما عندها عنوان في الخريطة!
|
Post: #2
Title: Re: ابونمو سفير في الخارجية السودانية بقرار م
Author: عزالدين عباس الفحل
Date: 12-17-2025, 03:15 AM
Parent: #1
صديقي العزيز ابو الزهور
ليك وحشة غصة في الحلق
أضحكتني من الصباج
وانا سايق سيارة
طريق ابوظبي العين
عبارات مضحكة ومزلزلة
تخليك تفك الدركسون
وانا جاري بسرعة 140 كم/ساعة
والطريق عذب وجذاب
بين المنحنيات ،
وأشجار النخيل
تلوح بأكفها إشراقة ،
وبلسماً
،،،،،
عزالدين عباس الفحل
ابوظبي
|
Post: #4
Title: Re: ابونمو سفير في الخارجية السودانية بقرار م
Author: محمود الدقم
Date: 12-17-2025, 09:30 PM
Parent: #1
السيد ابو الزوز
تحياتي
انا ما ببدلكم بمناصب ولا ببدلكم بكراسي سلطة ابدا ابدا يااااااخ 😊مستحيل دا يحصل ..
ابو نمو قبل توقيع سلام جوبا كان في السعودية رئيس عمال والشغل ما عيب طبعن، لكن مشت معاه و بقي وزير، والان سفير
طبعن يا ابوالزوز في عملية تشريح وتشليح وتفكيك لجماعة مناوي اليومين ديل، وحركة مناوي الان في طريقها الي ان تصبح راكوبة خريف، ابونمو وزير
وبتاع المعادن داك الكان عاطل في لندن الان اصبح وزير معادن و موكبه 10 سيارات، والمصريين راضين منه علي الاخر، وحالة تمرد في صفوف مناوي ومناوي
زاتو ترك طريق الكفاح وتحول الي ناشط في منصة اكس
شاكر لك البوست، لكن زي ما قلت ليك انا بس في سودانيز اونلاين دي الي اللحد نجغجق في الكيزان ليوم الدين
احتراماتي
|
Post: #5
Title: Re: ابونمو سفير في الخارجية السودانية بقرار م
Author: زهير ابو الزهراء
Date: 12-17-2025, 11:27 PM
Parent: #4
يا حودة يا حبيب، والله بالغت فينا! يعني هسة قنعت من كراسي السلطة والوزارات والمواكب العشرية دي بالعربات والتشريفة الرهيبة ؟
ياخ نحن زاتنا ما دايرين مناصب، بس دايرين 'حظ' أبو نمو دا! الراجل قلبها من 'من عاطل عادي الي لـ 'سعادة السفير' في رمشة عين
دي طبعاً ما (ضربة حظ)، دي (ضربة جوبا) زاتها!
أما حكاية (راكوبة الخريف) دي، فإنت بالغت فيها.. الراكوبة على الأقل بتظلل، لكن الجماعة ديل بقوا زي (تطبيق إكس)؛ ضجيج وتغريد والواقع 'خلا' دا
وبعدين بتاع المعادن ده، لندن دي الظاهر كانت (فترة إحماء) بس، عشان يجي يفتش الذهب هنا بموكب يغطي عين الشمس.
خليك معنا في (سودانيز أونلاين) يا صديقي، على الأقل هناك (النجغجقة) ببلاش وما محتاجة تصريح من المصريين!"
لك الود يا صديقي
|
|