Post: #2
Title: Re: اها بعد عودة الكيزان الشيوعيين موقفهم شنو
Author: Nasr
Date: 10-15-2024, 00:04 AM
Parent: #1
أكبر الخاسرين بعودة الكيزان هم الشيوعيين
ما حيشفع ليهم إنهم ضد تقدم وإنهم ساهموا في إسقاط حكومة الثورة
لكن هسع مهتم أسمع رأي الناس البيقولوا الكيزان فوبيا ساكت
ناس عبد الله علي إبراهيم
|
Post: #3
Title: Re: اها بعد عودة الكيزان الشيوعيين موقفهم شنو
Author: هدى ميرغنى
Date: 10-15-2024, 00:17 AM
Parent: #2
هو عبد الله على إبراهيم ما زال شيوعيا !أم رجع تانى بقى شيوعى!
#الغريبة طريقته زى خصوم الشيوعى اللذين هم أشد عداءً للشيوعى من أعدائه
دى هدية ليك يا نصر لأنك "بتقرأ" 😀
وسارفق بوستا آخر يُقرأ مع هذا
الباشا طبيق وآخرين (كيزان وفلول الجنجويد )الباشا طبيق وآخرين (كيزان وفلول الجنجويد )
|
Post: #4
Title: Re: اها بعد عودة الكيزان الشيوعيين موقفهم شنو
Author: هدى ميرغنى
Date: 10-15-2024, 00:27 AM
Parent: #3
Quote: e: يا هدي التي قالت
Quote: كل الخوازيق ذى بعض، أرفض الأثنين تماما
كلامك دا عامل زي في كورة هلال مريخ
وواحد سألك إنتي بتشجع ياتو فريق
تقومي تقولي ليهو انا بشجع الموردة
مفهوم لكن مباراتكم مع الموردة الأسبوع القادم
لكن هسع إنتي مع منو
ممكن يكون عندك حسابات مثلا لو الهلال إنتصر
فهو بيمهد ليكم الطريق يبقي الدرون كافي للفوز بالدوري
وإنتي لسه مصرة أنا بشجع الموردة بس
زمان في مثل بيقول ليك
إيه الجبرك علي المر قال الأمر منه
بالنسبة لي الإثنين تافهين
لكن من الشفناه من الجيش في أكثر من ستين سنة حكم
يخيليني اقول انا بشجع الدعم السريع
الجيش السوداني
عمالة للكيزان
عمالة لمصر عدونا الأكبر
عمالة لإسرائيل
عمالة لروسيا
خيانة وخرق عهود
بدأ من التضحية بالترابي
والبشير
لحدي التضحية بحميدتي
نهب موارنا لمصلحته ومصلحة مصر
اكثر من ثمانين في المية من الإقتصاد تحت تصرفه
كمية كبيرة من الضباط عينوا لا كلية ولا خبرة
بس لأنهم كيزان
فساد منظم
قتل منظم للشعب السوداني
فصل الجنوب
جيش رئيسه يقول نحن حركة إسلامية كاملة الدسم
وإنه البلد دي ملك للحركة الإسلامية
الجيش باع السكة حديد والنقل البحري والنقل النهري والنقل الجوي وخرب الأشغال العامة والنقل الميكانيكي
خرب مشروع الجزيرة
إستولي علي أكثر من مية مليار من قروش البترول
أغرقنا في ديون ياما
أدخلنا في قائمة الدول الراعية للإرهاب
باع الجنسيات السودانية للأجانب
نزيد ولا كفاية ’’,,..
|
ودا كان ردى عليك:
Quote:
يا نصر
قريت وجهة نظرى صاح…
إنى أشجع الطرف الثالث (الشعب السودانى) وحسب كلامك الموردة
-هل نسيت الشعار الذى ما زال قائما
لا شراكة لا تفاوض لا شرعية
وطبعا لا "مساومة"
#لا ما تقيف لازم تزيد - لأنك بتكتب فى عمائل الكيزان والجنجويد معا وتؤيد فى وجهة نظرى
شايفاك أصبحت شغال بمفهوم أخونا محمد سليمان (الله يطراه بالخير) انه القاتل حميدتي (الجنجويد) عرف غلطته!
-
تكون قريت أو سمعت لغو الطرفين
-القاتل حميدتي من جهة يشتم فى صنوه (دا كضاب، دا عايز السلطة ودا شنو ودا شنو )
-القاتل برهان وياسر العطا من جهة مليشيات الكيزان يشتموا أيضا فى صنوهم (دا كضاب دا عايز السلطة وشنو وشنو)
#ولا واحد فيهم ما جاب سيرة محارق دارفور والإبادة او مجزرة الاعتصام أو قتل الشهداء فى الشوارع نهارا جهارا
#ولا واحد فيهم ما جاب سيرة هبة سبتمبر 2013 و قرب انتصارها لولا حكومة الكيزان استنجدت بالجنجويد واستشهد وقتها 250 شهيدا
ثم انه مليشيات الجنجويد ما ياها مليشيات الكيزان زات نفسها غير أن الابن الذهبى ما وقف من تحقيق كل أمانيه
يقتلنا بمال الشعب السودانى ويسرق ويهرب ثرواتنا حتى تجاوز شيوخه الكيزان ثروة.
#ما تنزعج يا نصر قد يعود الابن الذهبى - حيث لا استغرب بعد هذه الحرب اللعينة وتدمير الوطن وقتل الأبرياء أن تتحد المليشيتان ثانيا ضدنا (تسوية يعنى)
-شايفة الجماعات تبكى ومهجومة وعايزة تلقى طرف تدخل منه مع المنتصر(أردول قال الدعم السريع فتش منزله - بحثا عن سلاح😀 لو قال بحثا عن ذهب كنا صدقناه) |
كله الكلام من هنا:
https://sudaneseonline.com/board/515/msg/1703513191.html
|
Post: #5
Title: Re: اها بعد عودة الكيزان الشيوعيين موقفهم شنو
Author: Biraima M Adam
Date: 10-15-2024, 01:46 AM
Parent: #4
الحبيب صديق
أشتم رائحة جدي االملقب بالأنصاري كوكو .. الذي سقط في الجاسر علي مدخل الجزيرة أبا برصاص الشيوعين.
بريمة
|
Post: #6
Title: Re: اها بعد عودة الكيزان الشيوعيين موقفهم شنو
Author: Nasr
Date: 10-15-2024, 02:32 AM
Parent: #5
يا هدي
عبد الله علي إبراهيم بيقول أنه شيوعي
و الحزب ما قاعد يقول إنه عبد الله ما شيوعي
يمكن ما يكون منظم في الحزب الشيوعي
لكن نفس الأفكار والتوجهات
بل أحيانا كثيرة أراءه أكثر وجاهة من الشيوعيين
بس ما داير أعرف رأيه لأنه شيوعي
داير أعرف رأيه لأنه مبتدع نظرية أنه الكيزان إنتهو
وإنه ناس الثورة عندهم فوبيا إسمها الكيزان
ولأنه طوالي ودايما بيفتش في مخارجات للكيزان
زي ما حاول يخارجهم من تهمة أشعال الحرب
وطوالي داير يشوف ليهم طريقة يرجعوا بيها للصف الوطني
ففي عودة الكيزان والتي رأينا نذرها في الحلفايا رأيه بيهمني
يمكن الكيزان يتسامحوا معاه شوية
لكن فليستعد باقي الشيوعيين لمثل حدث في الحلفايا
|
Post: #7
Title: Re: اها بعد عودة الكيزان الشيوعيين موقفهم شنو
Author: هدى ميرغنى
Date: 10-15-2024, 03:02 PM
Parent: #6
| Quote: لكن فليستعد باقي الشيوعيين لمثل حدث في الحلفايا |
الشيوعين ولا خايفين من زول ولا طالبين المحنة و"المساومة" من/مع زول
*الآن يتم اعتقالهم من الكيزان+الجنجويد ،بالتساوى كل فى مكان سيطرته وسؤ أعماله
*الكيزان -انقسموا نصين =جنجويد وغير جنجويد
*افراد الأمن نص مع ديل ونص مع ديل
#سينتصر الشعب السودانى زى ما قلت ليك فى المداخلة الفوق
# يناضلون مع شعبهم -يستعدوا كما إستعداد الشعب السودانى لمجابهة
الكيزان+الجنحويد
|
Post: #8
Title: Re: اها بعد عودة الكيزان الشيوعيين موقفهم شنو
Author: صديق مهدى على
Date: 10-15-2024, 04:44 PM
Parent: #7
تحياتي
الحبيب بريمة وما تنسى كلام وزير نميري فاروق ابوعيسى الشيوعي الذي اخذ ملابس داخلية ومعها زجاجة خمرة وذهب بها الى على شمو وقال ليهو دي وجدناها فى سراي الهادي المهدي فى الجزيرة ابا واعرضها فى التلفزيون فرفض على شمو طلب الوزير الشيوعي فاروق ابو عيسى وعلى ذلك قيس يابريمة حقد الشيوعيين على ال المهدي والانصار هههه
|
Post: #9
Title: Re: اها بعد عودة الكيزان الشيوعيين موقفهم شنو
Author: صديق مهدى على
Date: 10-15-2024, 05:26 PM
Parent: #2
حباب ناصر كلامك صح اها منو البقدر يقول ان الحزب الشيوعي السوداني بتاع لخبطة ههههه
تحياتي
|
Post: #10
Title: Re: اها بعد عودة الكيزان الشيوعيين موقفهم شنو
Author: الزبير بشير
Date: 10-19-2024, 07:53 AM
Parent: #1
العزيز الغالي درق سيدو و طبال المنصوره
شيوعيين شنو كمان ياخي 12 موهوم ما إملوا هايس ديل تقول عليهم حزب . حزب الصفوه و سجائر كاسترو و عجب النفس و زهو الطاؤؤس بطمس بصيره م عمى قلب .
مثل الحزب العجوز الهرم مثل طفل عبث بدلق حبر او شخبيت قلم علي لوحه فنان علي صفحة السياسه السودانية الانيقه التي بناها الحزب الاتحادي الديمقراطي لوحده و بمفرده في السودان و كان يمكن ان تجمل هذه اللوحه وجه السودان السياسي لولا تآمر الانانيين و المنتفعين .
حزب من 13 اغسطس 1943 الي اليوم اكبر انجاز له هو انقلاب 25 مايو 1969 علي حكومه ديمقراطيه منتخبه
اما الانجازات الاخري انت ادري بها مجازر ود نوباوي و الجزيرة ابا
هذا حزب فطيس ازكم الانوف بالروائح النتنه و هذا حزب خميره عكننه افسد كل خبز اريد به اطعام و سد رمق اليسير من زاد الطريق الي ديمقراطيه ينعم بها اهل السودان
الله اقطع الحزب العجوز و انه يزيحه من وجه السياسه السودانيه كما ازاح الجماعه ديلك .
فتك عافيه درق سيدو و طبال المنصوره شيخي و حبيبي صديق علي مهدي
الزبير الختمي
|
Post: #11
Title: Re: اها بعد عودة الكيزان الشيوعيين موقفهم شنو
Author: tasneem
Date: 10-19-2024, 02:01 PM
Parent: #10
الشيوعين والكيزان
وجهان لعملة واحدة
|
Post: #12
Title: Re: اها بعد عودة الكيزان الشيوعيين موقفهم شنو
Author: Nasr
Date: 10-20-2024, 09:08 PM
Parent: #11
يا تسنيم
Quote: الشيوعين والكيزان
وجهان لعملة واحدة |
غايتو العملة ما عرفتها
لكنهم تواجدوا مع بعض في خندق العداء لثورة ديسمبر المجيدة
ولو أن الكيزان خرجوا منتصرين في هذه الحرب
فإن الشيوعيين سيكونون أول الضحايا لعنف الفاشيست الكيزان
قصة الشيوعيين تذكرني بقصة قديمة حكيتها هنا عدة مرات
القصة تقول أنه كان لمزارع ثوريين أحدهما أبيض والتاني أسود
ويقال أن التور الأبيض يوم أنفك من قيده وسرح في مزرعة البرسيم
ولما شاهده المزارع شال عكازه وبقي يضرب في التور الأسود اللسه في قيده
الناس سألوه هسع التور الأسود دا ذنبه شنو
قال ليهم الأسود أنا عارفه ود حرام لو كان أتفك هو كان أكلها كلها
فالكيزان حيفشوا غبنتهم في عدوهم الصدوق الشيوعيين
والشيوعيين ديك مسلمية
يكوشنوا في بصلته وهو يعوعي
|
Post: #13
Title: Re: اها بعد عودة الكيزان الشيوعيين موقفهم شنو
Author: صديق مهدى على
Date: 10-20-2024, 09:59 PM
Parent: #12
حباب ناصر اها رايك شنو فى تسليم كيكل نفسه وسلاحه فى يده
|
Post: #14
Title: Re: اها بعد عودة الكيزان الشيوعيين موقفهم شنو
Author: Nasr
Date: 10-21-2024, 00:04 AM
Parent: #13
الأفراد ما شاغلني كتير يا صديق
أبن آدم قلب يعني بيتقلب حتي بين الكفر والأيمان
البيهمني في السودان هو عودة السلام والحياة الطبيعية
وكل من يعمل لذلك فهو زولي وأنا زوله
|
Post: #15
Title: Re: اها بعد عودة الكيزان الشيوعيين موقفهم شنو
Author: صديق مهدى على
Date: 10-21-2024, 01:45 AM
Parent: #14
تحياتي
ناصر
كفيت ووفيت لكن كيف نصل للسلام وقلوبنا شتى
|
Post: #16
Title: Re: اها بعد عودة الكيزان الشيوعيين موقفهم شنو
Author: هدى ميرغنى
Date: 10-21-2024, 04:27 PM
Parent: #15
نصر~
كدا أحسن ، عدو تقليدى أفضل من خصم يردد
مقولات :
*زمن عبد الخالق(كما العضو السابق بالشيوعى-عبد الله على إبراهيم)
*زمن نقد وكان وكان - أمثال الشيوعين السابقين - مجموعة الشفيع خضر (الشفيع ومحاولات تطبيق نظرية أولاد شيكاغو)
ومقولتهم الشهيرة التى رددها الشفيع خضر أيضا "لقد وقعت الكارثة"😈
رددها عند إنقلاب حميدتى+البرهان وعودته للسودان ومحاولاته بين البرهان+حمدوك
*
**أخيرا قصة ثورك الأسود دى تشبه حال تقدم/قحت مع حميدتى ونفيه للإطارى
خلى خشمهم ملح ملح😀
|
Post: #17
Title: Re: اها بعد عودة الكيزان الشيوعيين موقفهم شنو
Author: Nasr
Date: 10-22-2024, 03:32 AM
Parent: #16
ما فهمت كلامك دا كله والمقصود منه شنو
الحتة الأمكن أكون فهمتها إنك قدرتي تصنفيني عدو تقليدي
وداير أقول حاجة
أطلعي من عقلية دا عدو ودا صديق
أي حزب عنده برنامج وخطاب ومناهج في الفكر والسياسة والإقتصاد وكل مناحي الحياة
ويمكن أن تتفق مع أي حزب في أي من برامجه وما بالضرورة تكون صديق
أو العكس إذا إختلفت معاه ما معناها عدو
الأحزاب بتختلف وبتتحاور وبتقبل النقد ومرات كدا بتنقد نفسها نقد ذاتي
عموما
الحزب الشيوعي أرتكب كمية من الأخطاء في مسيرة الثورة
وحاورناه كثيرا لأجل ضمه للجبهة العريضة المعادية للفاشية الكيزانية وحلفهم مع العسكر
الدوغمائين منهم أعتبروا نقدنا ليهم هو هدم
والعقلاء من قرأوا ما كتبه المختلفون معهم بعقل مفتوح
وهذا من شأنه أن يشغلل الصراعات الداخلية في الحزب
ودي حاجة كويسة
والحياة هي الصراع
|
Post: #18
Title: Re: اها بعد عودة الكيزان الشيوعيين موقفهم شنو
Author: كمال عباس
Date: 10-22-2024, 12:41 PM
Parent: #17
يا نصر
وماذا. اخطاء قحت الكارثية ؟
في المحاصصات
وفي اتفاق جوبا
وفي الإبقاء علي نبيل اديب ولجنته
وفي. التواثق والمشاركة مع العسكر بعد المجزرة
بل في الرجوع للتفاوض معهم بعد انقلاب اكتوبر ٢٠٢١
وكذلك في الأسابيع الاولي للحرب حينما كانو قرب للانحياز للجنحويد
وحينما. يدورون في حلقة الكيزان من أطلق الرصاصة الاولي وهي حقيقة
ويتجاهلون فتح الجنحويد لجبهة قتال وسلب ونهب وتشريد - ليست ضدالجيش والكيزان وحسب وانما جبهة جديدة ضد الأبرياء والعزل
نعم قحت او تقدم لاحقا حاولت الموازنة في الادانات
والان نجح الإعلام
في دمع قحت وتقدم
بالعمالة ومساندة الجنحويد
وبانهم. الغطاء السياسي او حاضنة الجنحويد
فيما لم يستطيع احد وحتي من ألد خصومه
ان يخون او جرم الحزب الشيوعي. بهذه التهم في هذه الحرب
الحزب الشيوعي. هو الأكثر اتساقاً ومبدئية فيما يتعلق بالحرب وفيما يتعلق بالموقف من اضلاع مثلث الموت والدمار الثلاث" كيزان وجنجويد وقيادة جيش
ان كنت حادثا وناقدا. فالأولي ان تصوب سهام النقد نحو قحت
حاشية
شخصيا لا أحرم قحت او تقدم
ولكني احملها مسؤليتها فيما يتعلق بمواقفهن
ولن ادعو لإعدام او إقصاء أحزابها
وانما لازلت اوكد علي دور أحزابها فيما يتعلق بالمستقبل السياسي اما المجرب والعمل الجبهوي بكياناته هذه وبتكرار تجاربه فا اشكك في جدواه
والأفضل لقحت وتقدم
ان تركز علي تحسين صورتها ومواقفها امام الرأي العام والشعب السوداني
وان تنتقد تجاربها
|
Post: #19
Title: Re: اها بعد عودة الكيزان الشيوعيين موقفهم شنو
Author: هدى ميرغنى
Date: 10-22-2024, 01:18 PM
Parent: #18
نصر~
وين النقد …!
يبدو انك ما بتعرف الشيوعى وعمله وتحليله، عشان كدا بتصفه بعدم مقدرته على قراءة الواقع و معرفة النتايج
*انت لا تناقش فى برنامج او خلافه، أو بحسب كلامك قلت ناقشت سابقا!
*كل كتاباتك استهزاء وتجهيل ،وكانّه الشيوعى غافل وانت تنبه وتحذر فيه - يوم كتبت عنهم تباروا … تلقوا نفسكم فى الكوشة
*ومن تشوف بوست أتفتح ضد الحزب الشيوعى السودانى تكون اول متداخل ومؤيد!
*دا ما نوع الخلاف البناء - دا الخلاف الذى يضعك فى مصاف أعدائه - وبحسب كتابتك "الكيزان" والثور الأسود
*أعضاء الشيوعى يتعرضوا للاعتقالات فى السودان وفى ظروف هذه الحرب من الكيزان+الجنجويد على حد السواء (المهزلة أفراد الأمن إتقسموا بين الفريقين)
*قحت/تقدم شن طعمها وشن فهمها عشان يا معاها يا كيزان
*الشيوعى -مواقفه ثابتة و ما فيها مزايدة فى حق الشعب ودى قضيته الأساسية - ولا بيفتش مغنم ولا منتظر تصفيق
*أستغرب فيك انه طموحاتك لمستقبل الشعب السودانى تكون فى قبول التنازلات و"المساومة" والاتفاق مع العسكر - كيزان+جنجويد
*والآن تدعى بهتاناً انه الشيوعى يتفق مع الكوز!
*يا نصر قحت/تقدم التى تدعمها -مش شاركت فقط "تنازلت" عن حق الشعب السودانى ودماء الشهداء من أجل كراسى السلطة - ولك فى حديث إبراهيم الشيخ مثالا
#النضال مشواره طويل وضد "المساومات"
|
|