عفاريت الطب فى المنبر Plantar fasciitis

10:40 PM August, 20 2024

سودانيز اون لاين
النصرى أمين-كالغرى, كندا
مكتبتى
رابط مختصر

و انا طفل صغير حبوبتى مرات تقول لى يا ولدى تعال عصّر لى بطن كراعى .
لمن وصلت الان لعمر حبوبتى بقيت امشى لعيادة العلاج الطبيعي عشان يعصّرو اسفل القدم.


قبل شهور لاحظت لمن اقوم من النوم و اقيف على رجلى اشعر بألم اسفل (بطن) القدم
مشيت للدكتور و قلت ليه عندى يا دكتور Plantar fasciitis ....طبعا مشيت للدكتور جاهز بالتشخيص بالتعاون مع السيد قووقل
الدكتور ولا حتى كشف اكد لى انها فعلا Plantar fasciitis

يلا انا قاعد اليوم كله اقووقل فى Plantar fasciitis
ويكبيديا قالت اسم الحالة هو التهاب اللفافة الأخمصية
اظن اخمصية دى من جايه من ( حتى اخمص قدميه)

المهم حبوبتى كانت بتسمى الحالة دى شنو؟
اكيد ما التهاب اللفافة الأخمصية
اكيد عندهم ليها اسم و تشخيص و علاج
و حسب كلام الدكتور هذا الالتهاب منتشر جدا جدا
بتاع العلاج الطبيعى قال لى الالياف الاخمصية دى زى شكوبزوبارت العربية

تمتص الصدمات يعنى مساعدات او يايات السيارة لمن تمر فى الدقداق

المهم
دايرين رأى ناس الطب فى المسألة دى لانه قووقل وصلنا لنهايته

النصري
هل بحثت في ال webmd.com .. جرب ممكن تلقي معلومات مفيدة.

بريمة

والله يا بريمة اول مرة اقتنع ان الانترنت دى ما فيها كل حاجة
املى كان انو زول سودانى يحكى حكاوى الحبوبات و يجيب سيرة النصيبة دى.

كدى اسال اهلك البقارة لو عندهم فى تراثهم اى ذكر للموضوع ده...
انا متاكد ان الالتهاب ده كان ولا زال موجود فى مجتمعاتنا السودانية و متاكد ان الناس اتعاملت معاهو
بصورة او باخرى ، غايتو فشلت اتحصل على اى ذكر ليهو فى الإنترنت.

ياخ الاشقدى العفين ده مذكور كم مرة الإنترنت

غايتو البركة الوحيدة من البوست ده انى اول سودانى يكتب عن آلام بطن القدم

حتلقى تمارين في اليوتيوب مفيدة جدا ، بالاضافة إلى مرهم ما بتذكر اسمو للترطيب ،
لمن حصلت لي المشكلة دي كنت بقع عديل وأنا ماشي ، المشكلة كلها نشفان

التهاب اللفافة الأخمصية Plantar fasciitis هو أحد الأسباب الأكثر شيوعًا لألم الكعب. وهو يشمل التهاب اللفافة الأخمصية، وهي شريط سميك من الأنسجة يربط عظم الكعب بأصابع القدم. وفيما يلي بعض النقاط الرئيسية حول التهاب اللفافة الأخمصية:

الأعراض:

ألم يشبه ألطعن في أسفل القدم بالقرب من الكعب.
يزداد الألم غالبًا مع الخطوات الأولى في الصباح وبعد فترات طويلة من الوقوف أو الجلوس.

الأسباب:
يمكن أن يؤدي التوتر والضغط على اللفافة الأخمصية إلى تمزقات صغيرة.
تشمل عوامل الخطر العمر (الأكثر شيوعًا بين 40 و60 عامًا)، وأنواع معينة من التمارين (مثل الجري)، وعيوب في ميكانيكا القدم (القدم المسطحة أو القوس المرتفع)، والسمنة، والمهن التي تنطوي على الوقوف لفترات طويلة.

المضاعفات:

يمكن أن يؤدي تجاهل التهاب اللفافة الأخمصية إلى ألم مزمن في الكعب ويؤثر على أنشطتك اليومية.
قد تساهم التغييرات في المشي لتجنب الألم في حدوث مشاكل في القدم أو الركبة أو الورك أو الظهر.

إليك بعض خيارات العلاج لالتهاب اللفافة الأخمصية:

الراحة والثلج:

امنح قدميك الوقت للتعافي من خلال تجنب الأنشطة التي تزيد من الألم.

ضع الثلج على المنطقة المصابة لمدة 15-20 دقيقة عدة مرات في اليوم.

تمارين التمدد والتقوية:

قم بتمديد عضلات الساق ووتر أخيل بانتظام.

قم بأداء تمارين لتقوية عضلات قدمك وأسفل ساقك.

الأحذية الداعمة:

ارتدِ أحذية ذات دعم جيد للقوس مع وسائد.

استخدام نعلات تقويم العظام أو نعلات أحذية مصنوعة خصيصًا. موجوده ورايتها في تورنتو كندا

جبائر الليل:

تحافظ هذه الجبائر على قدمك في وضع ظهري أثناء النوم، مما يساعد على تمديد اللفافة الأخمصية. موجوده ورايتها في تورنتو كندا

العلاج الطبيعي:

يمكن أن يرشدك المعالج الطبيعي من خلال التمارين والتقنيات لتحسين المرونة وتقليل الألم.

الأدوية المضادة للالتهابات:

يمكن أن تساعد مسكنات الألم المتاحة دون وصفة طبية (مثل الإيبوبروفين) في وقف الألم والالتهاب.

حقن الكورتيكوستيرويد: تحتاج لوصفة طبية
في الحالات الشديدة، قد يوصي طبيبك بالحقن لتقليل الالتهاب.

التمارين مفيدة جدا بالمناسبة

اذكر منها الوقوف على حافة عتبة السلم بحافة الامشاط ودفع الجسم بالامشاط لاعلى ثم اسقل لعدد 10 الي عشرين مرة مرتين في اليوم ..
عند النزول لازم تحس تمدد الالياف والاربطة والاوتار في راحة القدم واعلى الكعب

فايدة التمرين فائدتين
فائدة مباشرة لانو بعد تعملو الصباح بقلل كتير الوقت المحتاجو عشان يخف الالم .. لو مثلا الالم بستمر ساعتين حينزل لي ساعة وكمان شدتو اقل

فائدة آجلة بتسريع الشفاء .. لو 8 شهور ممكن ينزل 6 شهور مثلا ..

كل المعلومات اعلاه تجربة شخصية ومعرفة غير متخصصة بالتهاب الفيشيا ده

الف سلامة وتحياتي

اهلا ترهاقا

Quote: حتلقى تمارين في اليوتيوب مفيدة جدا ، بالاضافة إلى مرهم ما بتذكر اسمو للترطيب ، لمن حصلت لي المشكلة دي كنت بقع عديل وأنا ماشي ، المشكلة كلها نشفان

الغربية انو الألم بكون مباشرة لمن اقيف لمن اصحى من النوم او لمن اقعد فترة طويلة .
اثناء اليوم و النشاط و الحركة مافى الم .
بتاع العلاج الطبيعى اول جلسه لمن ضغط باصبعه على مركز الالم فى بطن القدم صرخت عديل.
الحاجة التانية بعد عده جلسات من العلاج الطبيعى لاحظت مركز الالم اتحرك من منطقة فى الوسط و مشى منطقة الكعب
ما معروف يمشى وين داك .

شكرا محمد عمر على المعلومات المفيدة

اهلا المشرف
فعلا كل تمارينك دى نصحنى بيها بتاع العلاج الطبيعى
وهى فعلا تساعد فى تخفيف الالم ...
الغريبة الموضوع ده بدأ معاى بطريقة غريبة
لمن اجى انوم اشعر ببرد شديد فى القدمين ، بطانية
بطانيتين ما نفع ، اشتريت دفاية صغيرة و وجتها فقط للقدمين
الدنيا كانت شتاء لكن كنت مستغرب ليه القدمين فقط
لمن الشتاء طشا اختفى البرد فى القدمين و ظهر الالم .
برضه بتاع العلاج الطبيعى قال لى your feet flat ، طيب هى مسطحة عمرها
كله ، الجد شنو ؟

https://postimg.cc/rdrsb0tq
صورة من مركز العلاج الطبيعي و يظهر المسدس الذى يستعمل العامل فى مهاجمة الالم

المسدس ده مانه كلاشينكوف ..طكطكطكططكطططكطكطططط و كل طك اقول الروب.
تظهر قدمى فى طرف الصورة