الشاعر الحقيبي محمد بشير عتيق يؤكد نتيجة بحث الحقيبة (= موشحات أندلسية)

Quote: يا أخي، خليني أحسبها معاك ببساطة. إنت قلت عندك 470 مثال للتطابق بين الزجل الأندلسي والحقيبة. لو فرضنا كل مثال جبته بيتكون من 3 أبيات من الزجل مقابل 3 أبيات من الحقيبة مع إنه ده ما الحاصل. ولو افترضنا أنه أي أغنية من الحقيبة بتتكون من 10 أبيات فقط. معناها في كل قصيدة في 7 أبيات ما عندها علاقة بالزجل، لأنه لو ده الحاصل كنت أوردتها مع أمثلتك. طيب يا سيادة الباحث، يعني إنت عايز تقول للناس إنه 70% من أي قصيدة من قصائد الحقيبة حشو ساي وبلا مضمون أو أخيلة أوأي صورة من صور الإبداع؟ الكلام ده طبعًا إذا مشّيناك في الكلام وجاملناك وقلنا إنه أمثلتك الملتّقة دي أمثلة مقبولة لتعضيد فرضياتك وحججك وتحليلاتك. إنت بعضمة كيبورديك قلت إنه في أشعار في الحقيبة خلاسية وخاطفة لونين، يعني نص أندلسية ونص سودانية، وقلت إنه في أشعار حقيبة ذات طابع سوداني خالص، بالإضافة لشعر مسروق من الزجل الأندلسي. إنت لو باحث صحي صحي كنت براك حاولت تثبت بالإحصاء أنه شعر الزجل هو "الغالب" في الحقيبة، ولو ما متأكد وعايز تضبط ألفاظك وما تزنق نفسك كان أسلم ليك تقول إنه الحقيبة "تأثرت" بالزجل الأندلسي بدل الكلام القاطع الجازم عن أنه شعراء الحقيبة سرّاقين وعملاء.