◾انا مصطفي نور ◾باعتباري مقيم في مصر لمده سته سنوات الان عاوزأوضح بعض المعلومات عسي ولعل تكون مفيدة للأسر في الوضع الراهن ونحن فى حاله حرب وغير معروف متى تكون النهايه المحزنه خاصة بعد ما أصبحت الشقيقه مصر ملاذ امن للسودانيين نسبة لأوضاع البلد مؤخرا .. وكل الشكر لجكومه وشعب مصر التى فتحت لنا ابوابها وكانت للكثير مكان وواحه امن وامان ◾مصر ما بلد اغتراب ولا بلد هجرة و لكنها بلد بتعيش فيها بقروشك واظن المعلومة دي واضحة تماما للجميع .. فى المقام الاول يجب احترام القانون فى البدايه تجنب بيع اى عمله ولا دولار خارج البنوك او الصرفات لانو قد يودى الى السجن والترحيل ومصادره المبالغ المعاك من العمله الاجنبيه حاول تعديل وضع الاقامه فى اسرع وقت ممكن حتى لا تدخل فى مشاكل قانونيه ◾ويجب عليك انا كنت فى اى مشوار يجب عليك ان تحمل معك جواز السفر او اى بطاقه ثبت بها شخصيتك او الاقامه ◾يجب تتجنب الدخول فى اى مشاكل اوتحل مشاكل لا تخصك ولا تعنيك يعنى خليك فى حالك ◾ابعد نفسك عن الدخول فى التزام بضمان ولا اعطاء دين او مبالغ ماليه لمن لاتعرفه او حتى تعرفه معرفه سطحيه الان كنت تريد مساعده شخص فقط لظروفه انت فى بلد غريب وانت ضيف فى البلد ولك ظروف حرب خليك فى بيتك والزم اسرتك وبيتك ولا تتدخل فيما لايعنيك وما تدخل بيتك اشخاص لاتعرفهم ◾ابعد عن اماكن الشبهات والحفلات والسهر التى كثرت الان وبمبالغ وشى موسف ان البلد والسودان تحت القصف وتحت الحرب وتقام الحفلات الترفهيه على الاقل كان يكون الحزن والحداد على حال البلد ◾لا تتضيع قروشك فيما لايفيدك فى الحفلات والكلام الفارغ والشى الموسف وصل بنا الحال تذاكر الحفلات لحفلات القونات بلغت 1000 جنيه مصرى كان من الممكن مساعده اسره بهذا المبلغ لان الكثير من الاسر فقدوا الاباء وشردوا بسبب الحرب كان من الافضل مساعده هولاء اليتامى والاطفال والارامل ◾فى مصر وفى اى مكان احترم نفسك ليحترمك غيرك فى مصر اعمل حسابك من اغلب السودانين لان الكثير والاغلبيه عطاله رمتاله الا من رحم الله رب العالمين خليك واعى فى التعامل مع كل شخص لاتعرفه حتى لاتقع فى الفخ والنصب من قبل بعض الاخوه والاسر من السودان ◾اشترى ما تريد من طعام ومن فواكه وخضروات من اسواق الجمله وحاول تاكل وتتطبخ فى البيت يعنى اطبخ فى البيت عشان تقدر توفر قروش وتجنب حتى المطاعم السودانيه وصل بنا الحال واستغلال الناس والجشع الى سعر صحن بوش بمبلغ 300 جنيه وكمان قالوا رمضان كليو بلح سودانى 90 جنيه مصرى فى حين انو هناك عشرات الانواع من البلح المصرى فى هايبر تبدا من سعر 27 جنيه مصرى للكليو وصل سعر كليو اللحمه عجالى قالوا سودانى الى 500 جنيه مصرى الجزراين للاسف من السودان الشى المحيرنى مع ظروف حرب ليها سنه من ووين بجيبوا البقر والخراف والعجول والبلد فى حاله حرب اظن دة سوال عايز اجابه يعنى نصب واحتيال انو اللحم يكون سودانى اكلت فى مطعم قبل ايام فى المهندسين صحن كسره مع تقليه وصحن فصوليا و200 جرام لحمه بقر تفاجات انو الحساب 550 جنيه مصرى والله نحن من يستغل بعضنا البعض حرام نعمل فى بعض كده الان وغدا رمضان ياريت كل الاسر التى ربنا موسع عليها تعمل افطارات وتساعد الاسر المتعففه الوضع بقى صعب والناس محتاجه تساعد بعض والله لذلك مهما كانت قروشك اللي جبتها معاك كتيرة لو ما ادرتها صح حتنتهي في لمح البصر ..لازم تحاول قدر المستتطاع انو تعرف كيف توفر بعض المصاريف والقروش من الحاجات التى ليست ضروريه لانو لو انقطعت فى مصر مافى زول بقدر يساعدك لانو الحال ن من بعضه للكثير من الناس ◾لابد من ترتيب الوضع المالي بدقة عشان الأسر تقدر تستقر فترة لحين هدوء الاحوال في السودان . .◾ طبعا معروف انه في ناس كتار عندهم شقق في القاهرة وناس كتار عندهم اهل خارج مصر حيكفلوهم ..وممكن يرسلوا ليهم قروش من خارج مصر مساعده ◾لكن برضو ناس كتار جدا ما عندهم .، وناس كتار مع وجود شققهم الا انه فقدو مصادر دخلهم في السودان مع توقف العمل سواء كانت وظائف او أعمال حرة .. حتي لو الحرب وقفت اليوم ، الأعمال حتحتاج شوية وقت عشان ترجع تشتغل .. فلابد من التدبير المالي حتي تنجلي الازمة .. فحنقول كلام عام وكل زول يشيل منو المفيد ◾السكن: حاول بقدر الاماكن ان تسكن فى المدن التى تبعد من القاهره شويه مثال مدينه بدر - العاشر من رمضان - اكتوبر - العبور وهناك فرق كبير جدا فى الاسعار بتاعت الايجار قد يكون الفرق الاف الجنيهات مافى حاجه تخليك مرتبط بمكان معين لان فى كل مصر الخدمات متوفره وبكثره وكل ما طلعت بره القاهره كل ما كان كل ارخص الخضار الفواكه الايجار الدكاتره اى شى فيه فرق كبير ابعد من مناطق التجمعات السودانيه بقدر المستتطاع ابعد من الاماكن التاليه اولا الفيصل حاول تبعد من الفيصل التى اصبحت بوره مشاكل وفساد للناس السودانين وغلاء رهيب وصلت الشقق الى ارقام فلكيه المهندسين ابعد المهندسين الشقق قدمه والاسعار خرافيه وظهور بعض المشاكل والظواهر السلبيه شحادين سودانين وحاجات تانيه لاتشبه السودانين الا من رحم الله ربى الدقى حى قديم وايجارات وصلت 80 الف جنيه مصرى حاول تجد تسكن فى العاشر من رمضان الاسكندريه اكتوبر الزقازيق مدينه بدر اى مكان خارج القاهره تجنب النصابين من لا ضمير لهم اصحاب المدراس السودانيه الجديده التى وصلت الى 45 الف جنيه مصرى وكمان هناك مدراس بالدولار ونحن فى ظروف حرب ومنا الاف لاضمير لهم تجار حروب ركز على المدراس السودانيه القديمه المفتوحه قبل الحرب وكمان اظن العام الدراسى ده ما اظن يكون معتمد من التربيه والتعليم لانو المدراس فى السودان مغلقه وهنا الطلبه شغالين يعنى متقدمين على السودان بسنه دراسيه فى المدن البعيده من القاهره تجد الهدوء والهواء العليل وكل الخدمات والله متوفره ودى ميزه من ميزات مصر اخت بلادىكل المدن فيها الخدمات الضروريه ◾السكن المفروش حيستهلك قروشك تماما ،ابعد من السكن المفروش خالص افضل خيار هو الإيجار قانون جديد، يعني شقة فاضية والناس تفرشها بالبسيط وعلي مراحل .. والناس ما تخجل لانو ده وضع طاريء .. (تلاجة صغيرة + بوتاجاز ترابيزة + مراتب + شوية عدة للمطبخ .. ) الحاجات دي كده ممكن تقعد بيها سنة كاملة في امان .. الاستهلاك المتوقع: ◾الإيجار: حاول تبحث بنفسك عن شقه فاضيه وتفرش بنفسك وابعد عن السمساره خاصه بنى وطنك الماعندهم رحمه لانو ممكن يشيل منك دم قلبك مبلغ كامل ويرفع ليك سعر الشقه كمان الايجارات ( حسب المنطقة ) المشتروات: والمصاريف الشهريه برضو ركز على محلات الجمله واكثر من الخضروات والفواكه رخيصات والمواد التمونيه شوف الشى الضرورى ابعد من اسعار اللحوم اى كان نوع اللحم انت كده حليت اكبر بند صرف حيواجهك واستقريت وتاني شهريا حتدفع مبلغ 4 الف مثلا ايجار بدل ما تدفع 10 او 15 الف في ايجار مفروش. الارقام دي ممكن طبعا تكون أقل كتييييير جدا وفقا لي ال lifestyle وال budget والمنطقة السكنية لكن عامة النسبة محفوظة انه الإيجار الفاضي 30% من المفروش .. ◾الإنترنت: طبعا اكيد حيكون في استهلاك متصل للانترنت اقله للمتابعة مع الاهل ، والاستخدامات المختلفة المعروفة .. وكمان لاحقا ممكن عبره تلقي شغل اونلاين ،، وهو هنا اهم من الغسالة والمكيف والسرير والعفش .. ◾إياك وانترنت الموبايل حياكل قروشك بأسرع مما تتصور لذلك افضل حاجة تدخل انترنت ارضي WE واللي هو بي خط التلفون ، استهلاكه بسيط ولو عندك مكالمات خليها بيه عبر الواتسب والايمو وغيرهم .. الاستهلاك المتوقع: 250 جنيه في الشهر ◾العلاج: اتجول في المنطقة حولك واسأل من العيادات الملحقة بالمساجد ، العيادات دي ممتازة جدا وقروشها بسيطة وبتحل حاجات كتيرة زي علاج الأسنان ، العيون ، الفحوصات الدورية للضغط والسكري وغيرها .. ◾المعيشة: مهما كان وضعكم ابعدوا من الدليفري والمطاعم وركزو علي شراء مواد اساسية للطبخ في البيت ، وفتشو حولكم عن أسواق خضار شعبية حتلاقوه بي اسعار رخيصة جدا ومعاه الفواكه كمان .، ◾التنقل: الأفضل التنقل يكون بالمترو ، وتفادي التكاسي والاوبر تقليلا للتكلفة .، ◾التعليم: حاليا زى ماقلت ليكم البلد فى حاله حرب وعدم الاستقرار ولاحقا لمن الحرب تنتهى و يبدأ العام الدراسى لو مارجعت من مصر في خيارات متعددة نتكلم فيها في وقتها ولو فرنا الإنترنت ممكن نضحي وندرس سنة اونلاين او ممكن تعليم منزلي. ◾الترفيه للاطفال وكبار السن: هناك العشرات من اماكن الترفيه فى مصر جزيرة المعادي لا تقتصر جزيرة المعادي على كونها من اماكن خروجات عائلية فى القاهرة فقط، بل هي أيضًا تناسب جميع الفئات العمرية؛ فجزيرة المعادي صرح ترفيهي ضخم في قلب نهر النيل يشمل عشرات المرافق الترفيهية.
ومما يجدر بنا ذكره الآن هو أبرز الأنشطة التي يمكن ممارستها عند الذهاب إلى تلك الجزيرة، وسنعرضها فيما يلي:
النزول إلى حمامات السباحة المبيت في شاليهات الجزيرة دخول الألعاب المائية عند المسابح تناول الغداء في المطاعم الراقية على نهر النيل الاشتراك في الألعاب الكهربائية مثل لعبة السيارات مشاهدة العروض المختلفة في المسرح الكبير التنزه في الممرات الخضراء داخل مشتل عصفور الجنة العنوان شارع كورنيش النيل، المعادي. الأسعار تتراوح سعر تذكرة جزيرة المعادي 2023 بين 35 جنيه في الأيام العادية و 50 جنيه في العطلات الرسمية. حديقة الأزهر مطعم القلعة مطعم ستوديو مصر العاب وملاهي جيرولاند العبور ممشى أهل مصر منتزه الطاهره حمامات السباحة الأطفال ما حيفهمو الوضع ده وعاوزين يعيشو بصورة طبيعية لذلك فتشو حولكم عن الحدائق العامة واماكن الالعاب عشان تودوهم يلعبو ويغيرو جو .. وطلعو كبار السن يشمو هوا و يغيرو من حبسة الشقق .. في حدائق دخولها بي 10 جنيه بس وغيرها كتير مجاني.. ⬛الناس تساعد أرباب الأسر بضبط الصرف لاقصي حد مهما كانت القروش متوفرة ، وربنا يرفع البلاء ويصلح حال البلد عاجلا غير ا عندما بعود الناس الي الوطن. ◾بعد انتهاء الحرب يجب قبل بناء البلاد والمنازل يجب اعاده بناء اخلاق الناس لان الحرب قد فضحت الاخلاق ومعادن الناس والرجال وكانت كل الشعارات والقيم والمثل خداع وكذب وزيف وظهرت معادن الرجال وعرفنا اننا شعب تجار حروب ونسي الناس كل القيم الانسانية والدينيه واصبحنا مجرد لصوص والله العظيم شي مخزي وشي مولم ان ناكل لحوم البشر وناكل اموال الناس بالباطل رجاء. ارسال البوست لكل من تعرف في مصر 🇪🇬 او من ينوي الحضور لمصر عسي ان ينتفع بهذه المعلومات وحفظ الله 🇸🇩 واهل السودان 🇸🇩 الشعب الطيب مع احترامي للجميع مصطفى نور
03-10-2024, 08:11 AM
مصطفى نور مصطفى نور
تاريخ التسجيل: 05-13-2022
مجموع المشاركات: 4975
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
مصطفى نور
فيس بوك
تويتر
انستقرام
يوتيوب
بنتيريست