سخط واسع على تماطل في الجيش في إنهاء المعارك مع مليشيا الجنجويد

04:53 AM October, 15 2023

سودانيز اون لاين
Elhadi-
مكتبتى
رابط مختصر

الحقيقة بسهولة جداً يمكن رصد حالة السخط والاستياء لدى قطاعات واسعة جداً من المواطنين بمختلف توجهاتهم وانتماءاتهم

على مماطلة قيادة الجيش ـ بقيادة عبد الفتاح البرهان في إنهاء المعارك مع مليشيا الجنجويد ودحر هذه المليشيا بعد مرور نحو سبعة أشهر من بدء الحرب التي دفع تكلفتها المواطن المغلوب على أمره.

في تعمد واضح جداً من قيادة الجيش لإطالة المعارك ـ وده كان واضح من البداية ـ و من أول يوم في هذه الحرب، ومستمر لحدي الآن رغم التعاطف الواسع والكاسح مع الجيش من قبل جماهير الشعب السوداني بمختلف طوائفها واتجاهاتها ـ عد قلة لا تذكر اختارت الوقوف مع مليشيا الجنجويد لدوافع مختلفة

ومهما قيل من حجج وقدمت من تبريرات من قبل قيادة الجيش لكن الناس الآن باتت مقتنعة أكثر من أي وقت مضي بتماطل قيادة الجيش وتعمد إطالة المعركة لمحاولة حصد وتحقيق نقاط وأجندات سياسية لم يتحقق منها شيء سوى حاجة واحدة بس: فضح وتعرية تحالف الحرية والتغيير قحت المركزي وانفضاض الناس عنه.

حرفياً الجيش ماخد المواطنين المساكين والمغلوبين على أمرهم رهائن ليس إلا

ولا يريد أن يستخدم حتى ربع المتاح له من مقدرات عسكرية لدحر هذ المليشيا على الأقل في ولاية الخرطوم

أنا شخصياً أعتقد يعني في رأي المتواضع وكده :

أن هناك جهات نافذة في النظام الموجود في السودان ـ إذا كان في المؤسسة العسكرية أو خلافه من تنظيم إسلاميين ولا غيره

الجهات النافذة وصاحبة القرار دي ـ أياً كانت ـ ربما هي ترى إنو القضاء على مليشيا الجنجويد قد لا يكون في صالحها مستقبلاً ـ وده ممكن يكون صحيح

ولذلك أما أنها تريد وتسعى للحصول على "ضمانات" من نوع ما ـ كأن أن يتم ابتزاز المليشيا وقيادتها ـ وليس القضاء عليها ـ وإعادة التحالف معها من جديد

أو ربما هي تسعى لترتيب المشهد على طريقتها غض النظر عن حجم الخسائر وسط المواطنين أو الدمار في البنية التحتية ومؤسسات الدولة ولذلك تتباطأ في حسم الحرب وتتعمد إطالة المعركة

وتستخدم من القوة العسكرية ما يكفي فقط لإبعاد مليشيا الجنجويد عن تشكيل أي تهديد حقيقي وجدي للسلطة نفسها ـ لكنها لا تسعى للقضاء عليهم

يعني كونه الجنجويد ينتشروا بصورة واسعة في الأحياء السكنية ويهددوا حياة وأمن المواطن فده في النهاية ما بشكل خطر على السلطة نفسها طالما هم بعيدين عن السيطرة على المراكز الحيوية والاستراتيجية والمواقع والوحدات العسكرية المؤثرة.

قصة استنزاف وما استنزاف دي ما جايبة همها ولا تمنها في ظل إنو طرق الإمداد للجنجويد لا تزال مفتوحة ـ والجنجويد ياهو ماشين جايين من غرب السودان يمشوا يودوا المنهوبات والمسروقات لي اهلهم ويجوا راجعين يهمبتوا تاني

وهم زاتهم الجنجويد شكلهم استحلوا القصة دي ـ وبقى عشان الواحد فيهم يمشي يهاجم المدرعات إلا يمشوا يسكوهو بالسوط :)

غايتو الجيش ده مهزلة الصراحة

والبتعمل فيهو ده يا برهان في نهاية الأمر حا يرتد عليك طال الزمن أم قصر

كان انت كان علي كرتي كان الزول المشغلك أو المدورك

الجيش كأنو لسان حالو بيقول لحميدتي أو أياً من كان في قيادة المليشيا :

انت ما حا تنتصر يا حميدتي ـ أحسن تعال نتفق لكن بشروطنا

كوبري شمبات الذي كثر الحديث عنه كشريان حياة بالنسبة لمليشيا الجنجويد في الخرطوم

ياخي ما هي قيمة كوبري شمبات بالنسبة لحياة المواطنين وأرواحهم التي تزهق بصورة يومية ؟؟

هل الجيش العندو سلاح طيران عاجز عن عزل وتحييد هذا الكوبري ومنع استخدامه بواسطة المليشيا ؟؟

شراذم أفواج اللصوص والنهابين البتجي من غرب السودان قاطعة آلاف الكيلومترات قبل دخولها العمران والمناطق الآهلة بالسكان ـ هل الجيش عاجز عن الإغارة عليها ؟؟ أكيد لا

ونان فائدة قاعدة وادي سيدنا شنو طيب ؟؟ قاعدة وسلاح طيران ورتب ومرتبات ـ ما قاعدة قريب ما تبلو الهمج الرعاع ديل يبلكم بلة جابر شاحد ربي

المناطق البتزود المليشيا بالإمداد البشري دي فيها دفاعات جوية ولا شنو ؟؟ ما قاعدة أم فكو ساكت

علي كرتي : انت طبعاً عقلية إجرامية من الطراز الأول وفي الدموية والوحشية والخباثة فت الكبار والقدرك

لكنك أقل ذكاء بكثير من علي عثمان محمد طه وبما لا يقارن.. وأقل خبرة ودربة وأقل كياسة

ودور الامين العام للحركة الإسلامية والله ما خايل فيك ولا حتى راكب عليك.. انت بي كبيرك عضو مكتب قيادي

فياخي سيبك من الدور الانت خاشي فيهو ده، انت ما حا تبقى الترابي ولا حتى علي عثمان مهما اجتهدت في التآمر..

ولا كمان حا تبقى رجب طيب أردوغان ـ وأهو الأمريكان أدوك نخسة عشان يوروك انهم عارفين انت قاعد تعمل في شنو

بلا شماتة....هاك يا الهادى من زمان قلنا ليكم الشغل وراهو الفلول وانتوا راكبين راسكم





start at 1:08

ومع انشغال المجتمع الدولي بالحرب في غزة

كانت فرصة سانحة لقيادة الجيش لتوجيه ضربات عسكرية مزلزلة للمليشيا المأجورة

لكن مرمي الله ما بترفع

وكل المكاسب السياسية التي حصدها البرهان من جولته الخارجية راحت شمار في مرقة تردده وتخاذله وضعفه وأياديه المرتشعة جداً

مساء الخير

الهادي وضيوفه ....

استأذنكم وأدعوكم لقراءة هذا الشريط

واضافته إلى موضوعك ...

شكراً جزيلاً

ربنا يكتب السلام والأمان للسودان والسودانيين

هل البرهان هو القائد الحقيقي لقوات الدعم السريع