*✍أحمد محجوب* الاربعة انفار ديل اتلموا مشوا لي برهان قالو ليهو عايزين نعمل معاك حكومة بتاعت طوارئ أو حكومة دائمة او اي حكومة تجي منك ما عندنا معاها مشكلة مادام نحن قاعدين فيها! الاربعة ديل منو؟ الأستاذة *عائشة موسى* عضو مجلس السيادة السابقة في فترة حكومة حمدوك، واللي استقالت الوقت داك وبررت استقالتها ب (هيمنة المكون العسكري على المجلس السيادي) وأدارت ظهرها للحكومة الإنتقالية وبقوا قاعدين هي وشيراز بتها قصاد الحكومة الإنتقالية وقصاد القوى السياسية يشتموا وينتقدوا فيها.. في النهاية جات الأستاذة عشه قعدت مع العسكري زاتو في وقت الحرب كمان. التاني كابتن *عادل المفتي* احسن زول يعمل انشقاقات وتشققات واي عشرة انفار يتلموا بجي عادل المفتي يشقهم.. كان جزء من قصة اللجنة الفنية اللي حاولت تشق الحرية والتغيير، حزب امة نص كم، وبتاع كورة وانتهازي. الرابع *عبد العظيم حسن*، محامي انتهازي اكتر من عادل المفتي، غير السواطة ما عندو شغلة، كاره للحرية والتغيير عشان كان داير يجي وزير عدل وما جابوهو. في اي حته تلقاهو بشتم ليك الأحزاب والقوى السياسية ومن معارض للاتفاق الإطاري والعملية السياسية لانو قال ما عايز شراكة مع العسكر اللي هو قاعد معاهم هسا في الصورة دي.. الرابع دا اسمو حاجه كدا *ابن عوف*، وصراحة مافي داعي زاتو زول يتذكر اسمو لانو مافي زول بعرفو لا هو لا حركة (بلدنا) الشغالة مزايدات على السياسيين و معترضة على الاتفاق الإطاري لانو قالو دا رجيع للعساكر للسلطة.. لكن المهم في الموضوع دا انو ابن عوف دا كان واقف بره القاعة وقت توقيع الاتفاق الاطاري وعامل لايف بيقول فيهو (الان يجري بالداخل بيع دماء الشهداء مع القتلة )! الاربعة ديل مافي حاجه بتلمهم غير المزايدة، وكلام (باعوا الدم) ، والتلصق في اسر الشهداء عشان يظهروا وطنيتهم المزيفة ويشتموا السياسيين ، ما عندهم اي عطاء ولا انجاز غير التسلق والانتهازيه وحب الظهور والادعاء الكاذب للثورية.. الحرب دي بتكشف الغطاء لكل زول.. واي زول نواياهو وكذبو اللي كان بيكذبو بيظهر..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة