للأسف اضطررت لمغادرة بيتنا عصر امس بعد اعتداء الجنجويد ٣ مرات، في المرة الاخيرة مساء السبت كان اعتداء عنيف ورسالتو واضحه ومع تكرار السؤال اعلاه! باختصار اتخارجوا لانو احنا عاوزين ننهب البيت ده وهو اخر بيت كان لسه ما اتنهب في الحله وفيهو معالم حياة بعد خروج جميع الجيران في اول ايام الحرب. اربعة اسابيع بطعم الحلقم، قضيت منها اسبوع لوحدي في الحله مع كلبي الوفي، تالي. بعدو جاء صديق الاسرة، علي، وصنددنا سوا.
انا موجوعه ومكسوره ومهمومه زي كتيرين فقدوا كل ما يملكوا في هذه الحرب اللعينه وفيهم من حالتو اسوأ بفقدان زول عزيز عليهو.
بيتنا بنوهو ابوي وامي بحب وبعرق جبينهم بعد شارفوا على المعاش وبعد عقود من السكن في بيوت ايجار او الحكومه او مستضافين في البيت الكبير. شقتي الصغيره فيهو كانت مليانه بشريط حياتي، واشيائي البسيطة وذكرياتي من البلدان الزرتها او عشت فيها، وفيها مكتبتي البنيتها كتاب كتاب.
انا اسفه يا اسماء وساندرا، رغم الحاحكن المستمر انو اتخارج من اول يوم ، انا كنت مصره ما ننهزم وفاكره بقدر احمي البيت بوجودي فيهو. المهم ختيت ليهم الاعلان المرفق في باب البيت 😅.
خالص المواساه لكل من هم/ن في وضعي وزي ما بيقولوا، البركه في ارواحنا. حنرجع نعمر بيوتنا إنشاءالله ونبني بلدنا من جديد. رغم اني بمر بأسوأ ظرف في حياتي لكن متاكدة انو الأمل ترياق الحروب.
اخيرا حابه اشكر الشباب الساعدوني اطلع وشالو معاي حاجاتي واستضافوني في بيت اسرة غادرت البلد. علي ووحيد وعمر وعمر، ممتنه ليكم كتير. لازلت في الطائف بس في مكان أأمن وماهول اكتر من منطقتنا بين عبيد ختم وبدر. حاكتب بوست منفصل عن سيد البيت القاعده فيهو حاليا لانو طلعت مفاجأه سارة وسط الغم الأنا فيهو. بعتبرو محطه في مشوار النزوح لانو البلد كلها مافيها امان.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة