|
|
 Re: قصص واقعيه من شهود عيان عن الحرب فى الخرطو (Re: مصطفى نور)
|
طلعونا من بيتنا..
لغاية امبارح قبل الساعة 7مساء كنت بقول مستحيل نطلع من بيتنا وإنه من لزم داره فهو أمن..
كنت بقول كدة وانا على قناعة لأنه الموضوع بالنسبة لي كان إشتباك وضرب متبادل وكدة وبنقول الحافظ الله طالما نحن في بيتنا وقافلين بابنا علينا...
حوالي الساعة 7مساء فجأة لقينا إنتشار مبالغ فيه للدعم السريع حوالين البيوت غير القوة الأساسية الكانت مرتكزة جمبنا
وبدأ إقتحام البيوت بالصف وتكسير كل الشقق
من إحساس العجز والخوف والرهبة نحن كنا في بيتنا منتظرين متين يجي الدور على المبنى بتاعنا عشان يكسرو الباب ويدخلو يسرقو عشان نخلص من الرعب دة
الشقة الوحيدة في المبنى القصادنا كان فيها راجل لما حاول يقاوم ويعترض اتلمو فيه مجموعة واخدوه وم عارفة اخدوه لوين بس الله يسلمه من شرهم،و الباقين إستفردو بشقته
ما عارفة الشنط الكانو بطلعو بيها من البيوت كانو شايلين فيها شنو لكن ما خلو شي في الشقق ما شالوه، مافي عربية مبركنة في بيت سلمت منهم كل واحد بختار العربية العايزها وبسوقها وبملاها شنط من الشقة الدخلها وبطلع يمشي
وفي جزء م إكتفى بكدة وبس إحتلو المبنى بعد ما سرقوه
من الساعة 7مساء هم بسرقو لغاية م نحن طلعنا من بيتنا
الحمدلله إنه اخوي كان موجود وقدر يتعامل مع الموضوع بحكمه وقال ليهم نحن أسرة ومعي الوالدة واخواتي بس يا سعادتك وبكرة الصباح طالعين من هنا
قالو ليه اي المكان دة طلعهم منه بعد كدة بقى ما كويس 😂💔
المضحك المبكي ونحن طالعين لقيناهم جمب الباب وقفونا وقالو لي امي اعفي لينا يا خالة
نحن الأسر ما عندنا معاهم مشكله لكن بنقتحم العمارات عشان بتجينا تعليمات إنه فيها ناس
إستخبارات وبرضو عرفنا إنه دي بيوت ضُباط وكيزان وعندهم جواسيس ببلغو عن تحركاتنا
امي قالت ليهم نحن مواطنين يا اولادي لا بينا لا علينا والله
قال ليها عارفين عشان كدة قلنا ليك اعفي لينا وادعي لينا يا خالة وإن شاءالله نحن العمارة حقتكم دي م بندخلها طالما إنتو مواطنين🤡 😂💔
ملاحظات:
إنتشار كثيف للجيش في الشارع تحديداً إتجاه الحلفايا قبل الكبري وبعد الكبري في تفتيش دقيق للعربات والرجال تحديداً
لو جيت اقول الحقيقة انا يائسة جداً بعد الشفته من إستباحة بيوت الناس بالطريقة دي بدون خوف
وبكل قوة عين تتكسر البيوت وتتسرق ونكون شايفين بعيونا وم نقدر نستنجد بأي جهه عشان تجي تحمي حق الناس
إتعونا انه الحرامي بجي نص الليل يسرق،ما اتعودنا انه نشوفه
الان هم بدخلو البيوت من 7م وممكن عادي ابدر من كدة ولغاية م تصبح هم قاعدين فيها عادي كأنها بيوتهم
،ويضربو رصاص بسبب وبدون سبب ك تخويف وإستعراض قوة وبعين قوية فاتحين أبواب البيوت ضلفتين
جزء قاعد في الشارع وجزء لسة ما طلع وجزء شال واكتفى ملى العربات السرقوها ومشى
الله يعوض اصحاب البيوت الإتسرقت تعبهم والله يصلح حال البلد دي 💔
شهد عبدالله
|
|
 
|
|
|
|
|
| |
مصطفى نور
فيس بوك
تويتر
انستقرام
يوتيوب
بنتيريست