قائمة بأسماء السودانيين: جيوبهم وقلوبهم مع حميدتي وسيوفهم مع الســـــودان!

Quote: سلاح عبدالله خليل ✍️ عبدالواحد عبدالله عبدالواحد انت يازول مجنون دخلت بيت عبدالله بك خليل وشايل معاك سلاح ، أكيد ماعارف أوجاهل بالتاريخ ومابتعرف قدر الرجال الفارس دا لمن شال سلاح ركب من هنا تلاتين فرس سافر علي إستانبول تطوع جندي في الجيش التركي وشارك في الحرب العالمية وحارب روسيا العظمة . الراجل لمن شال سلاح مارفعو علي راس سوداني ولا اقتحم بيهو بيت عدو والاروع الآمنين من النسوان والأطفال . عبدالله خليل كون جمعية اللواء الابيض مع علي عبداللطيف وعبيد حاج علي وعبدالفضيل الماظ الإستشهد وايدو علي الزناد في نفس المكان الفيهو مستشفي الخرطوم التعليمي حارب بريطانيا العظمة الامبراطورية التي لاتغيب منها الشمس !! عبدالله خليل من اوائل المهندسين خريج كلية غردون التذكارية أسس مؤتمر الخريجين مع يحي الفضلي واحمد محمد خير الوضع الأساس المتين الاستقلال السودان . عبدالله خليل السوداني الوحيد الشال سلاح ضد مصر عبدالناصر وطرد المستعمر من حلايب وشلاتين حزم وعزم وقيادة .. يامجنون اكيد لقيت باب البيت فاتح قراش والباب ماعندو مفتاح ، لانو ياود الناس ست الشاي حليمة بت منصور. ، وحاجة حواء عبدالجبار النسوان الكتار القاعدات تحت شجرة (النيم) جنب (التلتوار) أخر النهار بختو البنابر والستاير والقنا الساند الطباق والشوالات وشمسيات الغلابة الكفتيرا الكانون الفحم والكرتون وباقي الجرايد البلفن بيهن الكسرة جوه البيت وخلف الكتفة الشمال من الباب الفاتح شمال أيواااه في نفس المكان الكان بستقبل فيهو الاميرالاى وزير الدفاع الضيفان !! أوعة تكون كسرت الباب التاني الفاتح شمال العلي يمينو بيت إسماعيل الازهري وفي نفس الشارع عبدالخالق محجوب والمحجوب وبت (بتي) جبارة الكسور ، ولوكسرت الباب ده وانت داخل طوالي بتلقي شاب طويل وسيم نحيل اسمو ابو امنة حامد ساكن هنا من زمااااان الأميرية الأهلية امدرمان ايواااااه في نفس البيت في نفس المكان في داخلية طلاب ببلاش فطورك غداك وشاي الصباح والرسوم بس قلب مختوم بحب السودان وشعب السودان ، ابوامنة حامد بجاوي وبكتب في المحبوب غناوي سال من شعرها الذهب فتدلى وما انسكب كلما عبثت به نسمة ماج واضطرب النجيمات والخصل فى عناق وفى غزل نسجت حوله القبل موكبا يغزل الطرب فيه من سمرة الأصيل شعرها المذهب النبيل ثغرها اليانع البليل كرزة حفّها العنب يا حبيبى … أكلما قلبىّ المغرم احتمى بك وانزاح ملهما عاد كأسا بلا حبب يا(تتر) العصر خلاص طبعا كسرتو الأثاث والاناتيك وكراسي التك والقزاز وصور نهرو وديغول وجوزف بروس تيتو . انا بعيد وفي البلد ماموجود دحين الفرن بتاع الحطب الفاتح علي باب البيت موجود . وسألتكم بالله الحمار المربوط تحت العمود بخير ولو فيكم خير فكوهو وخلوهو ياكل من النجيلة جوه البيت احسن مايموت أسير بين العسكر والحرامية أويستخدم من الطرفين دروع بشرية . عبدالله خليل مات مديون والبيت الكبير للبنك مرهون ، لاكتل لاسرق ولا في قضية شرف كان مسجون . البيت مرهون والبلد مرهون وساكن البدروم لاطلع قاد البلد ولانصر المظلوم والحمار مات من الضحك وهو شايف مين كتل النوار والثوار في دوحة المضيوم .!!