العملية السياسية بعد القضاء على الجنجويـــــــد

08:06 PM April, 21 2023

سودانيز اون لاين
Elhadi-
مكتبتى
رابط مختصر

المفروض انو التفاوض القادم بين الجيش والقوى المدنية

يكون مع قوى سياسية ذات وزن وذات تأثير وفاعلية سياسية على الأرض

قوى عندها شعبية حقيقية وفعالية سياسية على الأرض ـ والوحيد من قوى قحت الذي ينطبق عليه هذا الوصف هو حزب الأمة ـ أياً كان رأي البعض فيهو

تاني قحت دي غير حزب الأمة ما فيها حزب خالص خالص خالص. ده كلو عولاق ساكت وصناعة أجهزة أمنية وتكتلات مصالح ليس إلا

بالإضافة طبعاً للأحزاب والقوى السياسية ذات الوزن والفعالية السياسية من خارج قحت..

نريد قوى عندها تمثيل حقيقي لشرائح واسعة من المواطنين

و قوى تستطيع الإضافة للساحة السياسية وللمواطن السوداني

موش تكتلات ناشطين يسهل بيعهم وشراءهم وتدقيسهم

لا أحد يرفض التفاوض والعملية السياسية من حيث المبدأ أو على الإطلاق..

لكن التفاوض يكون على أسس وعلى قضايا حقيقية ومطالب تهم الشارع

موش مجرد تكتلات مصالح وغنائم واقتسام سلطة زي ما كان الحاصل طيلة الفترة أو السنوات الماضية

يعني لو جبت ليك أي شافع صغير في السودان ده بتلقاهو كان مدرك تماماً ويقيناً إنو العملية السياسية المبنية على التحالف التكتيكي بين الجنجويد والجيش مصيرها في نهاية الأمر الانهيار ووقوع حرب بين الجيش والجنجويد لتعارض المصالح بين الجهتين ديل في نهاية الأمر..

الوحيدين الذين كانوا يحاولون الالتفاف على هذه الحقيقة وتضليل الجماهير هي تحالف قحت ـ الكلام ده 2019 موش من الليلة ولا من أمبارح

وبالتالي هذا التحالف المشئوم يتحمل دور تاريخي ومسئولية في الحرب الوقعت دي نتيجة لخطل القراءة السياسية عندهم وللأطماع الذاتية التي غلبت في نهاية الأمر على المصلحة العامة والمصلحة الاستراتيجية في إنك من الأول تقيف موقف صلب وترفض رفض قاطع بأن يكون لهذه المليشيا الفوضوية أي دور سياسي حتى لو رجعت للشارع مرة أخرى

وقعدوا يكلموا الناس عن التمن الباهظ لاستمرار التظاهرات الشعبية، متناسين انو الكلفة والتمن الباهظ الحقيقي سيكون في تفجرالصراع بين هذه القوى المسلحة التي حاولوا تبنيها ورعايتها أكثر من استمرار التظاهرات الشعبية.

وما عن العملية السياسية في حالة القضاء على الجيش يا استاذ الهادي؟

Quote: وما عن العملية السياسية في حالة القضاء على الجيش يا استاذ الهادي؟

سندخل في حكم دولة المليشيات بحق وحقيقة وحرب أهلية طاحنة لا تبقي ولا تذر وسيتقسم السودان إلى كانتونات نفوذ بين لوردات الحروب وقادة المليشيات كلو واحد يلم ليهو حلتين تلاتة حلل ويعلنهم دولة دولة

فلان الدونقلاوي وعلان الجعلي وفلتكان البطحاني ـ الخ الخ

ده وهم يا ترهاقا لن تكون هناك عملية سياسية ولن تكون هناك دولة في حالة القضاء على الجيش يا عزيزي بل سترتفع البنادق وتخرج من كل بيت وكل حارة وكل زقاق

التخويف من حكم مليشيات لا تسنده حقائق الواقع
فإثيوبيا الحديثة هي وليدة حكم مليشيات التقراي بقيادة ملس زيناوي
وهو الذي وضع أسس لدولة حديثة ومتظورة
الجيش الإثيوبي تبخر في سماء اديس حين دخلتها مليشيات التقراي
وكذلك كان حال رواندا بعد الحرب الأهلية والمجازر الشهيرة
فبول كاقامي الرئيس الحالي ومؤسس نهضتها ما هو إلا قائد مليشيا محنك
رفع رواندا لمرتبة الدول المتقدمة
وكذلك كان حال ارتريا حين دخلتها مليشيات أسياس أفورقي الحاكم الحالي
فأرتريا رغم مواردها الشحيحة تطورت كدولة محترمة
وكذلك كان حال يوغندا حين دخلها موسيفيني قبل أربعة عقود

ما تخوفوا الناس من المليشيات
يعني مليشيات حميدتي ولا مليشيات كتائب الظل ؟؟؟؟
أيهما سيكون أكثر رحمة بالسوذانيين

عشان ما يفهمني واحد غلط
أنا مع السلم ووقف الحرب ولا أشجع أيا من المتحاربين
شوفوا ما فعلهم بكم جيش الكيزان منذ العام تسعة وتمانين حتي الآن
شوفوا ملايين الارواح التي أذهق
وشوفوا عمايل الدعم السريع في دارفور وباقي السودان

فإن توصلت لأهمية السلم ووقف الحرب فسيكون السلام قد كسب في السودان

عزالدين عباس الفحل
ابوظبي