للتاريخ. قبل 6 سنوات كنت متواجد في ولاية نهر النيل. محلية عطبرة. وقتها كنت نائب رئيس وحدة امن محلية عطبرة. بعد الدوام عند الساعة 8مساءا كنت متواجد في منزلي اتصل علي مدير الامن الاجنبي بالولاية وقتها اخونا الرائد متقاعد/محمد عباس. من ابناء النيل الازرق. رجل وطني غيور ومسؤول بن ادارة اهلية رجل ناظر كبير . افادني قائلا يا اوشيك في اجانب مسلحين موجودين معاك في فندق عادل مزاحا معي انت نايم وين؟
تحركت مباشرة للوحدة و وضعت رئيس الوحدة في الصورة وقتها العقيد متقاعد/عبدالله حسن.من ابناء ولاية القضارف.رجل شجاع وحميم وقائد وطني مسؤول. جهزت القوة بتسليح كامل وعتاد اشتباك وصلت الفندق.
تحدثت مع استقبال الفندق. قلت ليه في اجانب هنا مسلحين قال لي نعم يا جنابو ناس ديل شايلين سلاح تقيل والرشاشات وبنادق. قنص شخصية. قلت ليه تمام طلبت من الاستقبال استدعاء قائد المجموعة في الاستقبال. جاني واحد سوداني قال لي انا رقيب اول استخبارات.عرفتو بنفسي قلت ليه الناس ديل اجانب و مسلحين ومهمتي معاهم فقط الدواس لانهم مسلحين انا جاي هنا في شغل دواس بس ومستعد ادواس معاه ما عندي علم وجودهم هنا معنا في الفندق. للمرة التانية يا رقيب الكلام واضح انا داير الناس ديل يطلعوا برا الفندق الان عشان نقلل الخسائر وسط المواطنين. قلت ليه اي اجنبي مسلح بالنسبة لي دا ارهابي و مجرم ومنتهك لسيادة البلد و التسليح حصري فقط للاجهزة السيادية الوطنية (جيش. شرطة. امن). و حا اشتبك معاه مباشرة. قال لي يا جنابو الناس ديل تابعين لينا. قلت ليه يا رقيب الكلام واضح عندك عشرة دقائق يا تجمع الناس ديل بسلاحهم دا برا الفندق وتسلمني جوازات حقتهم او انا اخلي الفندق من المواطنيين اقلع السلاح بالقوة الجبرية من الارهابين ديل . نهائي ما بسمح بسلاح في ايادي الاجانب ديل دا قرار اتخذتو مشيت الاستقبال اخلي المواطنين من الفندق الرقيب اشتغل اتصالات عشان نحن ما نشتبك مع الاجانب. انتظرني قائد المجموعة روسي ومعاه مترجم سوداني في الاستقبال قلت ليه الناس ديل يطلعوا خارج الفندق بسلاحهم عندك 5 دقائق من الان يسلموا السلاح ويمشوا معنا المكاتب بالحسنة والا نحن حا نستخدم القوة الجبرية ضدڪم بعد 5 دقائق. مترجم وصل الروسي النضم الروسي خاف و وافق على تسليم السلاح. رجعت شيلت بتاع الاستخبارات معاي للمكتب.
اطلعت الجميع بالملابسات و عدم علمنا بتحرك هؤلاء الاجانب. قلت للقادة انا شخصيا لن اسمح بوجود سلاح في ايادي الاجانب ولا نحن نخلي السلاح والتامين للاجانب. الحمد لله اتفقنا على جمع السلاح من الاجانب بواسطة الاستخبارات العسكرية. اتضح الاجانب ديل دهابة تابعين لشركة فاجنر الروسية في منجم السنقير غرب بربر.
انتهى. الدرس المستفاد يوم الاجانب يقدلوا بالسلاح في بلدك دي نهاية دولتك و انتهاك لسيادة ارضك. اهلك يكونوا تحت رحمة السلاح الاجنبي.
الصورة المرفقة لنفس الشركة الروسية في افريقيا الوسطى وسبب تسليحهم الدهب.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة