|
|
 Re: # نِصْفُ المَعْرِفَةِ أشَدُّ خَطَراً مِنْ (Re: علي عبدالوهاب عثمان)
|
شاهد الله ، لأنت من توشك تكسر عنقنا بعاطر ثانائك
عمو أبو علوة، ونحن من تعقر حروفنا و تتحجَّر محاجر قريحتنا
عما تجود به لكي بنابدل وُدَّاً بوُدٍّ .. و حفاوةً بحفاوة و ثناءً بثناءٍ
+ عندي ليك هنا نموذج منزلو من شوية عن صورةٍ نمطيةٍ
لمدى ذيوع هذه الظاهرة بين الناس كما النار تشبُّ في الهشيم.كما
نستميحك عذراً لغموض دارجيتنا الموغلة في محلية الضهاري.
تيلة يا تيلة الله لي من ديل بال(9) الطويلة
(Re: دفع الله ود الأصيل)
+ أخينا دا تربالي معدي يومو من البيَّاح ولاعند المطاح في نهار
صنانة فاقعة نافوخو، ما بين طلوع نخل و مسكان موية للقمح.
+ و جاي متراوح لقى البيت محروس و ستو ست النفر تكوس
أعمنها السمحة أم عجن حوامة ولا أبو الدنان مروحية هيليكوبتر
راحَّة شايلة النهارا حيح و رحيح ، كلو و را الشمارات الحارات.
+ الشاهد أخينا جاي مهوي رابط بطنو على ضهرو بي حجر مسَن
و فتران مشتهي البعلاية بعدما تلهمو ليه لهمة كسرة في بطنو تبقالو
مُدلكجية تعصرلو ضهروا إن شاء بي كدايس كدَّارة ، قبال ما يناولا
صلبو و ينوم نومة الطفل الغرير.و يخليها تنقنق : أجييي عاد يا بنات
أمي !شوفي الراجل العشيتو و عصَّرتو ومسحتو و دلكتو، و آخرتا
هدا راقد منجدع لي مقابل الهيتة و مديني حُفافة عنقرتو!!!
+ الشاهد تاني ، زولنا إذ لم يجد شيئاً مما تقدم ذكره ، قام براو
يفتش جاي وجاي و عاين في المشلعيب المعلق ، فلم يجد كسرةً
خُبْزٍ ليسُدَّ بها رمقه. ؛ ففكر في حيلةٍ ذكيةٍ و طبعن ما يتحير علا
مغير ، فمشى يتاوق بي حيطة الجيران ، شاف عندهم جدادة رامية
و حاضنة فوق بيضاتها، فنط و شال منها مِحَّاية فردواحدة بس ونزل
سلقا و أكلا وانسدح رقد يغطُّ في نومٍ و يشخرفي سُباتٍع ميقٍ.
+ و لامن رجعت البعلاية ، قام شكى ليها وحكى ليها الموغف
و الرجال طبعن مواغف : إنو انجبر يشيللو بيشضة من جدادة
الجيران ،و هي عاد تعجبك ، لقت الشمار زيتا في بيتا!!
+ يلا يا ربن تصبح الواطة ، سامعة جارتا التانية/عوضية
ربقي مناغماها بفوق الهيتة تشحد منها كورية دقيق ، فطاولي
شغلت خاصبة الطباعة و النشر و التأليف بدون حقوق(كوبي - رايت)،
و يلا عاد نجر أخدر لإعادة تدوير درامة بغلها مع جدادة الجيران!!
+ هيييي يا دي والله ماك طالباني حليفة ، علا عدمانين سلقة
الدريش و ما شفتي عاد راجلي البارح من الجوع لامن نط بحيطة
جيرنا ناس حنان سكليب و قام مهمبتلو محتين جنا جداد من تحت أمهن
و سلقفن أكلن حتين هجس رقد، ولولاهن كان ينوم بايت القوا المسكين
. و بكدا تكون زولتناضاربة عصورتين ود أبرق و عشوشة بحجر فرد
واحد، منها نحت شمار راجلا. و بالمرة كبت زوغبير من شحدة جارتا.
+ وديك كمان بالمغسة ما صدقت ، نست موضوع الشحدة زاتو و لفحت
الخبرية صاراها في تيوبا و كوركت لجارتم نمبر (03): و هيييي يا دي أقول
ليك شنو عاد و أ خلي شنو!! وا خجيلي عاد ما شفتي جارتنا فلانة الفلتكانة
وفسالتا مابية تسلفني كورية دقيق أفطر أبو وليداتي , و كمان ما شفتي راجلا
الهمباتي المعفن سراق الجنا جداد البارح ناطي بحيطت ناس فلانة ديك و لافح
لو منهم طبق بيض عدييل كدا خاميه تميرات فوق راس فكي مفترس من تحت
جدادتم لقاها راكدة . شوفتي عليك الله رجاجيل الزمن ديل الما بختشوأ !!
+ ويلا من ديييك و عييييك ، طارت الأخبار و سارت الركبان و حدس
ما حدس و لا حرج ، لامن طبق البيض تحول لي جدادة كاملة و محمرة
و الجدادة تحولت بي قدرة قادر لي راس نجيفة كامل الدسم , و الباسم بعداك
بقى سخل و العتود لبقى تيس عمبلوق، والعمبلوق تطور وراثياً لحجم بقرة حلووب
لحد ما أخينا جاتة قوة ضاربة "مدججة" باسحلة نارية و أخرى "بيضاء" من غوات
جان/ جويد الدم الصريع وراحو مكلبشنو لا إيدو لا كراعو و سايقنو بالخلا ،في شنو
يا جماعة و أن شن سويت ، قالولو أحنا معانا أمر قبض بس و لامن نوصل هناااك
براك بتعرف من ناس جاموس منو الغسل العدة و الطفى النور زاتو منو!!
+ عمومن دا عضم الدرامة لحد هنا كما هي بدون أي حذف ، كشط أ
و تغيييرفقط للعبرة و لأصحاب الفضول العجيب لو دايرين يزيدوها
بهار فو شمار يلا يتمو الباقي خيالات، و نحنا براءة..
(عدل بواسطة دفع الله ود الأصيل on 10-13-2022, 11:16 AM)
|
|
 
|
|
|
|
|
| العنوان |
الكاتب |
Date |
| # نِصْفُ المَعْرِفَةِ أشَدُّ خَطَراً مِنْ الجَهْل المُدْقِع/ | دفع الله ود الأصيل | 10-13-22, 07:37 AM |
| Re: # نِصْفُ المَعْرِفَةِ أشَدُّ خَطَراً مِنْ | دفع الله ود الأصيل | 10-13-22, 07:39 AM |
| Re: # نِصْفُ المَعْرِفَةِ أشَدُّ خَطَراً مِنْ | دفع الله ود الأصيل | 10-13-22, 07:41 AM |
| Re: # نِصْفُ المَعْرِفَةِ أشَدُّ خَطَراً مِنْ الجَهْل المُدْقِع/ | دفع الله ود الأصيل | 10-13-22, 07:47 AM |
| Re: # نِصْفُ المَعْرِفَةِ أشَدُّ خَطَراً مِنْ | دفع الله ود الأصيل | 10-13-22, 07:48 AM |
| Re: # نِصْفُ المَعْرِفَةِ أشَدُّ خَطَراً مِنْ | علي عبدالوهاب عثمان | 10-13-22, 09:08 AM |
| Re: # نِصْفُ المَعْرِفَةِ أشَدُّ خَطَراً مِنْ | دفع الله ود الأصيل | 10-13-22, 10:36 AM |
| Re: # نِصْفُ المَعْرِفَةِ أشَدُّ خَطَراً مِنْ | صديق مهدى على | 10-15-22, 08:26 PM |
| Re: # نِصْفُ المَعْرِفَةِ أشَدُّ خَطَراً مِنْ | Moutassim Elharith | 10-16-22, 04:15 AM |
| Re: # نِصْفُ المَعْرِفَةِ أشَدُّ خَطَراً مِنْ | Moutassim Elharith | 10-16-22, 04:29 AM |
| Re: # نِصْفُ المَعْرِفَةِ أشَدُّ خَطَراً مِنْ | محمد الزبير محمود | 10-16-22, 05:55 AM |
| Re: # نِصْفُ المَعْرِفَةِ أشَدُّ خَطَراً مِنْالجَهْلِ المُدْقع/ | دفع الله ود الأصيل | 10-16-22, 07:13 AM |
| Re: # نِصْفُ المَعْرِفَةِ أشَدُّ خَطَراً مِنْ الجُهٍلِ المُدْقِعِ/ | دفع الله ود الأصيل | 10-16-22, 07:42 AM |
| Re: # نِصْفُ المَعْرِفَةِ أشَدُّ خَطَراً مِنْ الجَهْلِ المُدْقِع/ | دفع الله ود الأصيل | 10-16-22, 08:18 AM |
| Re: # نِصْفُ المَعْرِفَةِ أشَدُّ خَطَراً مِنْ الجَهْلِ المُدْقِعِ/ | دفع الله ود الأصيل | 10-16-22, 08:53 AM |
| Re: # نِصْفُ المَعْرِفَةِ أشَدُّ خَطَراً مِنْ الجَهْلِ المُدْقِع/ | دفع الله ود الأصيل | 10-16-22, 07:42 PM |
| Re: # نِصْفُ المَعْرِفَةِ أشَدُّ خَطَراً مِنْ الجَهْلِ المُدْقِع/ | دفع الله ود الأصيل | 10-17-22, 06:35 AM |
| Re: # نِصْفُ المَعْرِفَةِ أشَدُّ خَطَراً مِنْ الجَهْلِ المُدْقِع/ | دفع الله ود الأصيل | 10-17-22, 06:07 PM |
|
| |
دفع الله ود الأصيل
فيس بوك
تويتر
انستقرام
يوتيوب
بنتيريست