شاعر واحد يعني اسلوب واحد وطريقة واحدة وحس شعري واحد
اكيد عندهم كم اغنية من كلمات شعراء تانين، بس ما كتيرة
والمعنى هنا هو التركيز في غالبية ومعظم اعمالهم علي شاعر واحد وهو الطبع اغنياتهم وشكل الحيز الأكبر في مسيرتهم الفنية
الشاعر هو الدكتور علي شبيكة
بغض النظر عن نوعية الكتابة الشعرية عند الشاعر أو النفس الفني والأسلوب عنده
لكن قطعا التركيز في اي عمل ابداعي علي مصدر واحد مهما كانت قيمته، بيؤثر سلبا ويخلق خصم مهم في الابداع
الملاحظة التانية كمان في اغنيات علي شبيكة مع ثنائي العاصمة هي انه حتى الألحان طلعت شبه متقاربة وتشبه بعضها كتير
مع انه السني الضوي عليه رحمة الله، ملحن ممتاز ولحن لغيره كمان اغنيات خالدة الا انه اكيد لقى نفسه محصور ومقيد بنصوص شعرية متقاربة عشان كده ربما، ومن غير ما يشعر، لقى نفسه بكرر نفس الألحان
القصد من الموضوع: هو انه مسيرة غناء ثنائي العاصمة حتما كانت حتبقى اغزر واعمق واكتر تنوعا وتحتل مساحات سمع وتذوق اكبر لو كانو نوعو وغنو كلمات من شعراء تاني غير علي شبيكة
دي رؤية شخصية طبعا غير مجزوم بيها، وربما للآخرين رؤية مغايرة
وبرضو كمان وحسب التذوق الشخصي والخاص لي اجمل عمل غنائي لثنائي العاصمة هو اغنية
معايا معايا
كلمات المرحوم حمزة خوجلي
وقبلها كانت اغنية
وحياة المحبة
لما كانو ثلاثي العاصمة مع المرحوم محمد الحويج
وكمان اغنية
في ضميرك سر كتمته
ما بعرف مين شاعرها
الرحمة والغفران للسني الضوي وابراهيم ابو دية والشاعر الدكتور علي شبيكة
Post: #2 Title: Re: مشكلة ثنائي العاصمة Author: walid taha Date: 09-29-2022, 07:53 AM Parent: #1
يا سلام لو ترضى علينا تدينا قليل من حنك أو تسأل مره عيونا كيف بالاشواق حاضننك لو تسأل يوم تلقانا كل ثانيه بنسأل عنك ..... وكل لحظه هواك معانا يا غالى كتير راجنك ما قالوا عليك حنين ورقيق بشكل خيالى
بالله يا مطر شوف المخاطبة دي !!
يسعد صباحك ياخي
Post: #3 Title: Re: مشكلة ثنائي العاصمة Author: walid taha Date: 09-29-2022, 08:01 AM Parent: #2
Post: #5 Title: Re: مشكلة ثنائي العاصمة Author: أبوذر بابكر Date: 10-02-2022, 11:02 AM Parent: #2
ازيك يا وليد
اصلا صوت ثنائي العاصمة الاتنين مترع وفياض بالحنية عشان كدا لما يغنو أغنيات زي دي بزيدو كمية الحنان والرقة اضعاف
Post: #4 Title: Re: مشكلة ثنائي العاصمة Author: walid taha Date: 10-02-2022, 09:07 AM Parent: #1
Quote: الاقتصار علي شاعر واحد
فى تقديري يا أبو ذر هي أقرب الى (ملازمة) شاعر واحد وهنالك امثلة كثيرة صلاح مصطفى و محجوب سراج مثلا عثمان حسين و بازرعة كمال ترباس و د . كوباني عليه الرحمة هاشم ميرغى و عزمى أحمد خليل نوعا ما
تحياتي ،،
Post: #6 Title: Re: مشكلة ثنائي العاصمة Author: أبوذر بابكر Date: 10-02-2022, 11:06 AM Parent: #4
فعلا يا وليد كلامك صحيح
الثنائية كتيرة في غنانا ومن ايام الحقيبة كمان ممكن تلقى سرور مع العبادي وبعد العبادي مع سيد وعبيد
وكرومة مع ابو صلاح وبعده مع عمر البنا
وردي واسماعيل حسن ابراهيم عوض مع عبد الرحمن الريح ومن بعده مع الطاهر إبراهيم
لكن بالرغم من الثنائية بتلقى كل واحد من الفنانين ديل برضو ما اقتصر علي نفس الشاعر الواحد ونوع كتير في التعامل مع شعراء تانين
Post: #7 Title: Re: مشكلة ثنائي العاصمة Author: Ahmed Yassin Date: 10-02-2022, 12:05 PM Parent: #6
سلام...ابوذر و...وليد المشكلة دي فهمها واستوعبها وردي سريعا لانه فنان مجدد ومطور ويكره الرتابة حتى في ترديد المقطع..وردي لا يمكن يكرر نفس المقطع بنفس الاسلوب زي اداءه الاغنية بنلقى في اختلاف في كل المرات ودا لانه فنان مسيطر على اي مازورة موسيقية مع انه انا سمعت في جلسة خاصة باضاني صلاح بن البادية انتقد الحتة دي. وردي واسماعين حسن حصلت قطيعة طويلة بيناتهم .. اتظلم فيها فنان شاب اسمو احمد فرح اتحدى بيهو اسماعين حسن الجميع لانه يمتلك صوتا فريدا.. . ولكنه اتى في ظل من؟ وردي ابتعد عن اسماعين( القالب الشعري) غنى لى صلاح احمد ابراهيم وابوقطاطي ومحجوب شريف... التجاني سعيد والدوش كل عمل بقى اخطر من التاني... الياذة سودانية. بنلقى الخط حق ثنائي العاصمة يسيطر فيهو غناء(المحنة ) والحنية...واللحن الهادىء الجميل لان السني الملحن كان انسان حنين ومرهفﻻورقيق المشاعر .. وقلبه كان يحب كل البشر.. دمعته قريبة بشكل غير طبيعي. ،معايا معايا في الدرب الطويل" وانا صغير كانت امي( عليها الرحمة والمغفرة ) بتدندن بالمقطع دا.وانا والله حتى في حياتها كل ما اسمع الاغنية دي لا اتمالك نفسي من البكاء.