المسلم بياكل لحم اخية المسلم الاخوه الافاضل فى المنتدي العام فى الموقع الرائع سودانيز اون لاين يا ترى كم مرة تكلمنا مع بعضنا البعض في فى زول غائب عننا يعني ماقاعد معانا فى لحظه الكلام فيهو ؟ مرة ....!! عشرات المرات....!! آلاف المرات...!!. طبعا كتير وكتير وكثيرا هل ممكن نتفق علي انو كلامي ده صاح وحصل وممكن يحصل قبل ما اقول ليكم اي شي عن الغيبه ؟ بالله عليكم مش حاجه كعبه وحاجه ما جمليه فى حق انسان بتعرفه امكن يكون قريبك اخوك صديقك جارك زمليك معاك هنا فى الموقع بتاع سودانيز اون لاين ده القاعدين نعملوا وكثيرا وماشاعرين بفداحه الذنب فى لحظات ونسه ولحظات محادثه ولحظات ضحك ولحظات زعل من زول بنكون قاعدين نحكي ونغتاب في الكثير من الناس طيب ..كدي اتذكر اخوي الغالي كم مرة استغفرت من الذنب ده لان اكيد ذنوب تكتب علينا ؟ بالتاكيد واكيد اغلبنا لايتذكر الاستغفار من الذنب ده ؟؟؟ . .. طبعا انا لا اعمم عن كل الناس في ناس عارفين انو فى حاجه اسمها كفاره المجلس وهو دعاء عندما يكون اكثر من شخص قاعدين وبتكلموا فى مواضيع مختلفه وربما يكونوا جابوا سيره زول فى الكلام عشان كده فى دعاء لكفاره المجلس قال رسول الله صلى الله عليه واله وسلم : "لما عُرج بي مررت بقومٍ لهم أظفار من نحاس يخمشون وجوهم وصدورهم. فقلت: من هؤلاء ياجبريل ؟" فقال: هؤلاء الذين يأكلون لحوم الناس ويقعون في اعراضهم. شفتو المصيبة !! طيب , ما هو الحل ؟؟ كفارة الغيبة هي أن تعتذر للشخص وتطلب منه مسامحتك , وتندم على ما عملته لكن دى صعبة شوي يعني بتخجل من نفسك ومرات يصابك الكبر ومرات بيكون الاثم اشطر منك ويقول ليك انت ما عملت شي وتعتتذر ليه طيب اخواني الافاضل عندي الحل لنا جمعيا الحل إننا كلنا نسامح بعضنا البعض على كل غيبة أو خطأ صار بيننا سواء عرفنا أو ما عرفناه وماذا سوف تستفيد ؟؟ صدقة تؤجر عليها , وسبب لمغفرة ذنوبك قال تعالى : ( وسارعوا إلى مغفرة من ربكم وجنة عرضها السموات والأرض أُعدت للمتقين , الذين ينفقون في السراء والضراء والكاظمين الغيظ والعافين عن الناس والله يحب المحسنين ) طيب كيف ؟؟ الواحد منا يقول الدعاء ده ' اللهم إني تصدقت بعِرضي على الناس وعفوت عمن ظلمني فمن شتمني أو ظلمني فهو في حِل ' ' اللهم إني سامحت كل من أغتابني أو ذكرني بسوء في غيبتي وأسألك في ذلك الأجر والمغفرة وبلوغ مراتب المحسنين ' لحظة.... لن نتوقف عند الدعاء وبس لأن الدعاء وحده وعدم ترك المعصية كاننا لم ما عملنا اي شي ولا فى اي فائده من الدعاء ؟ لازم نعالج هذه الموضوع بحل اخر أما الدواء والعلاج بتاع الغيبة هو : 1- ليعلم المغتاب أن يتعرض لسخط الله وأن حسناته تنتقل إلى الذي اغتابه وأن لم تكن له حسنات أخذ من سيئاته. 2- إذا اراد ان يغتاب يجب أن يتذكر نفسه وعيوبها ويحاول يصلح نفسه فى الاول وامكن الانسان يستحي ان يعيب وهو المعيب. 3- والبقول ماعندو عيوب ده زول كويس يقوم يكثر من شكر الله. 4- كدي كل زول يخت نفسه مكان الذي اغتيب لذلك لن يرضى لنفسه تلك الحالة. 5- يبعد عن من الجلسات والونسه التي تسبب الغيبة عشان تدخل فى قصه قالوا وقلنا. بعد كل هذا كل منا يحاول ان يعاهد نفسه أن لاننطق الا بما يرضي الله سبحانه وتعالي فنحن نتحدث كثيرا وننسي كثيرا .... ولنتذكر قوله تعالي ((وما يلفظ من قول الا لديه رقيب عتيد)) فملائكة الرحمن لاتنسي فماذا نفعل عند ما نقف امام الله سبحانه وتعالي ويقال لك ((هذا كتابك ينطق عليك بالحق ونحن كنا بنكتب كل ما تعملون)) ولنتذكرعندما يقال لنا ((اقرأ كتابك كفي بنفسك اليوم عليك حسيبا)) أما الغيبة فإذا عرفت انها من اكبر آفات اللسان وهي من المهلكات ولازم كل زول منا يعمل حسابه شديد منها وهي نتجيه المخالطة يعني مش قالوا الكرونا من المخالطه دي اخطر من الكرونا لانو الكرونا ممكن تتعالج منها بس دي ممكن تدخلك جهنم والعياذه بالله وهي اثم عظيم لا ينجو منها إلا الصدّيقون.فإن عادة اغلب الناس كافة الونسه والكلام بأعراض الناس والتمتتع بها والتنفل بها من خبر لي خبر وكمان بقول عليها الشمارات وفي الأخير اخواني الافاضل اسأل الله العظيم رب العرش الكريم أن يفتح علينا بتوبة نصوح تمسح كل الداتا بتاعتنا بتاعت الغيبه والنميمه ويغفر لنا ذنوبنا وادعو لبعضكم البعض فى ظهر الغيب فى اليوم الجمعه فهناك ساعه مستجابه فيها الدعوه
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة