π يا السايق الفيات قوم بي و أخد سندة£

♧ كلَّ عامٍ تُرذَلون£
《1》
♧ وضعنا المقلوز حالياً لدرجة يقرف الليمون ؛ حتى
لم يعد يسرُّ عدواً ولا صليحاً. فدا ذكرني ذات مرة من
ذوات المرارات : كنا ماشين لينا لي عزا (بكا) في أم صففن
عوراض ديك المي هنا ؛ تراها جيهة ناس شلعوها الجعليين
و تمو ناقصتا الدَّقَلاب ن في ريفي حشرو عباس . وراكبين
لينا هوستن زبالة داوودي مكعكع موديل من يوم حفرو
بحر أبيض {سنة أم دقنوس مجاعة ستة مع ود تورشين}.
● قمنا وحلنا ليك في ترس حُقنة، وقف بينا حُمار الشيخ في العقبة .
أها قام للتسود ختوتو اللوري كطع سير مروحة ؛ فما لقينا أي حل. قام
مساعدي الحَلَّة قال لينا: يا جماعة الخير ما يتحير علا مغير.دحين عندنا
دَبارة غايتو علا واحد منكم يتبرع لينا بي (تكة) سروالو نربط سير مروحتنا
نمشي بيها حالنا . شب واحد أخو فاطنة طوالي قالو : أبشر ، و حل تكتو ناولو
ياها ربطنابا سير الجن ، درَّجتنا شوية ترس ترسين و حتها انكطعت ؛
قمنا ملصنا تكة واحد تاني.فهكذا دواليك و هلم جرا .
● يلا ترس ورا ترس ؛ و هُبكة ورا هبُكة و ضهر ترعة ورا
تُرعة نحن نشيل و نتهبع و نتمولص من تِككنا تكةً تلو الأخرى ؛
لامن كملنا تِكَكنا تشت عليهن ؛ و لحدما أخوان فاطنة تشت علينا بقينا
حزاماتنا ناصلات و قاعدين أم فكو ساااه مولاي كما خلقتني؛ ضاربنا
ليك همبريب الخلا والصًّيِّ حتين يا اللهربك رب الخير وصلنا بكان أهل
الفراش: من فوق هلًّا هلًّاو من تحت يشهد الله ( مولانا كما خلقتنا).
●اها أول ما وصلنا بيت البكاء ،هناك بقينا ليك ممحنين وقاعدين
نضرب خماسياً في سداسيٍّ لا عارفين ندخل بحمد لانمرق بخوجلي
قلنا : ياخوانا هسة بس شن نسوب؟! يعني ننزل نواجب الناس ديل
نرفع معاهم الفاتحة و لا نفضل ماسكين لباساتنا بخشومنا كدي
لامن نرجع وطاتنا تصبه و لامن نرجع مِقَبِّلين شايلين أهلنا؟!
▪ توقيع/ ود الأصيل
☆ ود ال ح ش ا ن ال ت ل ا ت ة
مؤذنٌ محجورٌ منزلياً بجزيرة مالطا.