يا تلاميذى العُزاز بسم الله بسم المجد فى أحضان سُعاد اكتبوا التاريخ خمستاشر ربيع أول والمُوافِق موِلد الايقاع على خطوات سُعاد والمُرافِق للصباحات ، المناحات واخضرار الغيم وفقدان الشُعاع ارتفاع الموجهْ لى صدر الشراع اكتبوا ارتفاع الموج إلى صدر الشراع
يا تلاميذى العُزاز خلِّى بينك وبين زميلك زى مسافَهْ قَدْر أيه؟ قَدْر المسافَهْ البين عيونى وبين سُعاد قَدْرِ آلاف الفواجع فى انهيارات الحصاد قدْرِ مسحوق الأنين فى تواريخ البُعاد اكتبوا ودَيَّه أيه يا اْستاذ يكون؟ دا المُجنن طه اسألأوا ودْ سكِينَهْ اسألوا الريح المسافر فى تجاعيد السكينَهْ شاوِرِوا الموج اللِّى ساكِن فى مسافات السفينَهْ تسألونى عن سُعاد اكتبوا العنوان بخط ممشوق وواضح احذروا اللحظ البيضحك وهو جارِح مُرْكَب على الله ويلأّ نجتاز الحدود اكتبوا العنوان بِخَط مستور وفاضح (رقصة الموج الأخيرَهْ جُموح نُهودِك يا سُعاد) عنوان طويل
يا تلاميذى العزاز كِلمَهْ..كِلمَهْ على مهلْكُم واكتبوا والصيف طويل لمْلَم العُشاق مواعين الرحيل نجمَهْ شاردَهْ وغيمَهْ هاجدَهْ ضَمَّهْ ضَمَّهْ ضَموا شرف المستحيل جَوهَرُوا الحزن الكحيل مُركَب على الله ويلأّ نجتاز العويل بانت سُعاد غامت ملامح السكَّهْ وانكتم المكان رَقَصتْ سُعاد فى خانَة الأصفار وميلاد الزمان جمّعتْ من كل زهرَهْ مواجع الحُب المُهان مُركب على الله ويلأّ نجتاز الدّثخان
يا تلاميذى العزاز خلّوا بينكم وبين رنين الضحكة صرخَهْ حُب مُهان والصبر أولىَ خلُّوا بينى وبين جنون الخيبَهْ شَوْلَهْ واكتبوا عاشَ فى زمن المذلًهْ المدعو طه ودْ خدوم باع تفاصيل الكآبَهْ عشان يفرِّغ وتانى يمْلاَ جاع وخيرِك يا سُعاد مرْدُوم رَدوم عاش المدرِّس ود خدوم كأنو نكْبَهْ -كأنو شُوم عاش المدرِّس ود خدوم تسْقُط حكايات الهموم الأزاهِر والدفاتِر والمتاجِر والمقابِر والخافر والمشاعر والنجوم عاش المدرِّس ود خدوم
يا تلاميذى العُزاز من كانَ حاضِر أو تَوَلَى يقفِل الكرّاس ويلأّ نشوف بداية المهزلَهْ *** يا تلاميذى العُزاز فى صيف طويل مبطوح على صدر الزمن منظُلمَة الشوق ابتدا فى حضرَة الحُب اندَفن والنيل مدامِع للنجوم والصبر مُفتاح للشجن والحِلَّهْ مبتورَهْ وكسيحَهْ ومُهْملَهْ بانت بداية المهزلًهْ بانت سعاد بانت تفاصيل الشجون والجنون والمقصلَهْ بانت سُعاد وقفتْ على خِصر الجبل فتَحت مشارع للظنون والأسئلَهْ رقدَت على شَعَر السهل ضفَرت ملايين القُبل "والجو صفا والنيل هَدَا وغاب الأتر" وأنا يا سُعاد فى الحِلَّهْ معجون من رماد من حسرَهْ مقطوع من شَدَر
يا تلاميذى العُزاز لا زوايَهْ لا قوس لا وتَر وأنا يا سُعاد فتّشتَ ساحات الأمانى ناصيهْ ناصيهْ حجر حجر ، ما لقيتْ إلاّك زمن مالقيت إلا بِلاد وأنا يا سُعاد يا شهوَة الحُب للعِناد يا شهقَة الفرح المُعَاد خلِّينى فى بالك نغم وأنا يا تلاميذى العُزاز مخلوق بسيط من شوق وغَم وأنا يا سُعاد مخلوق بسيط من شوق وغم قامت سُعاد من رقدتهْا الكون جميع كان انحصر مابين قيامَهْا ووقفتَهْا النخلَهْ والهجليجَه والسيّالَهْ والشوق والمطر الغابَهْ والهم القديم الفرحَهْ والذُّل والخطر كلُّو انْجَمَع فى كفّتهْا قامت سُعاد من رقدتهْا قامت قيامة العُمْدهْ مليون اتجاه اشتَّتتْ كل الجموع من كلِّ أنَّهْ وكلِّ آه ومشيتْ عليكْ أنا يا سُعاد حتَّة مُعلَّم مُبتدىء غاوِى وبسيط ولو ما خَدوم كان من زمان محْسوب لقيط ما آصلى مولود لللَقِيط أو مُغفّل أو مبهدَل أو عبيط يا زعيطاً يا معيط ومشيت عليك أنا يا سُعاد شُبّاك على النار انفتَح درويش نحيل فى صُرَّهْ شال حزنو وسَرَح سيلاً تقيل وسَّع خطاويهو وكَسَخ ومشيت عليك أنا يا سُعاد مربوطهْ عينى على خُطاك فى عيونك اتجمّع كلام فى صوِتك اتجمّع ظلام حسيتو فى الحَشَا والعِظام وقريتو فى سعف النخيل ولمحتو فى طوق الحمام فى العفهْ والخُصْلهْ الحنِينَهْ اللفْتهْ والتوب والحِزام بارَت مواعيد الغرام ونزرْتُو حُبِّك للزنازين والمساجين والهوام والعُمدهْ فوق راس الفرح جمّع جريوْاتو ونبح (مسئول كبير زاير البلد) قُتْ ليهو يا عمدهْ اختشى مسئولك الزاير الكبير يا ريتو بس لو شاف سُعاد كان رسم للعفَّهْ أوصافا وتقاطيعا ومقاسا كان دخل للحِلَهْ من بابا وشبابيكا وأساسا كان اتْوَلد برَّهْ المُتاجرهْ والمحاورَهْ والمصاهرَهْ والخساسَهْ كان تاب وباع للصدقِ مجدو وذمّتو يمرُق جديد من حَر دهاليز النِخاسَهْ من هدومِك يا مرازِل يا مزابِل يا مباخر للتعاسَهْ يا مناكر يا عساكر يا ، سُعـــــاد ***** فِك علَى كلب الحراسَهْ يا تلاميذى العُزاز فى يوم طويل مبطوح على صدر الزمن اتلمّت الحِلَهْ الحنينْه عشان وداعَك يا غروب حُزن فارس وكيف يصير فى لحظَهْ مولَى كيف يجوز يا عمدَهْ كيف؟ الذُّل مُصان والحّثب مُهان والسجن أولى؟ كيف لقيت يا عُمدهْ كيف للمجازر والخنازير والخناجر فى رموش الغيم مَحَلَّهْ؟ كيف بنيت يا عُمدهْ كيف من رماد حزن المآتم من تُراب غضب المآتم ليكْ ولى ضيفَك مَظلَّهْ حِلَّهّ حادَّه وإنتَ تزْرع فوق ضُوع الوادي حفْلَهْ؟ كيف يجوز؟ قد يجوز وقد يجوز
يا تلاميذى العُزاز ضَلّض مَن قَد لا يحوز من تبتّلْ أو تيَمَمْ أو تيتَم أو ترمّل
يا تلاميذى العُزاز اكتبوا التاريخ خمِستاشر سُعاد أوّل
Post: #2 Title: Re: ود خدوم .. ماش يودّر بي .. Author: يحي قباني Date: 03-17-2022, 02:30 AM Parent: #1
و تاني سعاد .. احمد ياسين يجمع و يطرح .. و انا الدوش ماش يروح بي ..
دقت الدلوكة
قُلنا الدنيا ما زالت بخير
اهو ناس تعرس
وتنبسط
تككت فى الراكوبة
بالحنقوقة سروالى
الطويل
سويتلو رقعات فى
الوسط
فى خشمى ختيت
القميص
اجرى وأزبد شوق وانط
لا من دخلت الحفلة
فجيت الخلوق
وركزت
شان البت سُعاد
ما أصلى عارف جنها
فى زول بيركز وينستر
لكنى عارف انها
لو كلو زول فى الحلة
بالسُترة انجلد
يانى الازاها وجنها
وركزت عاد
وركزت للحُرقة المشت
فوق الضلوع
تحت الجلد
لميت مشاعرى مرقت عن
طرف البلد
وسكرت جد
وانا جايي راجع مُنتهى
لاقتنى هى
قات لى (تعال)
كبرت كراعى من الفرح
نص فى الارض نص فى
النعال
الله اكبر
يا مُعافرة يا مُدافرة يا جهاد
( هيي يا سُعاد
على ود سكينة الكلتى
فى خشمو الرماد
هى يا سعاد على ود
سكينة المات اسف
هيي يا سعاد
وانا بت بلاك ملعون
هواك ان كنت ارضى
اعرسها
وانا يا سعاد
آه يا سعاد
وكتين تطلى سحابة
رقصت الدعاش
اه يا سعاد
بفرش على روحى
واجيك
زولا قلق تعبان وطاش
وكتين اشوفك ببقى زول
فرشولو فرش الموت
وعاش )
وكتين تطلى سحابة
ترقصى للدعاش
اه يا سعاد
اه يا السعاد
قالت سعاد
بطل كلام الجرسة
وانجض يا ولد
طقيت مشاعرى مرقت عن
طرف البلد
وودرت جد
اذنت فى الشوك والسلم
ووقفت للامل البكر
ورقدت فى الالم الحكر
وحلمت زى شايلنى وسط
الزحمة
نبى الله الخضر
صحانى صوت العمدة قال
( مسئول كبير زاير البلد)
قبال يهل قبال يصل
( لازم تقيفوا صفوف
صفوف
وتهيجوا الخلا بالكفوف
وتقولوا عاش..يحيا
البطل)
سامعنى ولا اقول كمان
قُت ليهو يا عمدة اختشى
مسئول كبير فى الحلة غير
الله انعدم
ما شُفنا زول سكت جهال
ما شفنا زول رضع بهم
ما شفنا زول لتخ تيابو
وجانا من طرف البلد
فكيت مشاعرى مرقت عن
طرف البلد
وودرت جد
وانا جايي راجع اجهجهو
لاقانى هو
سايق العساكر بالحراب
ضاقت نعالى من الزعل
من تحتها اتململ تُراب
وضراعى زى داير يجن
والجوف يطقطق بالكلام
قبال يقولوا لى سلام
ختونى فى قعر السجن
ان شاء الله ما تضوقو
السجن
حصلنى قبل اليوم يتم
جارنا المدرس ود خدوم
قال لى
لا زول هتف
ولا كف مشت بتلاقى كف .
Post: #3 Title: Re: ود خدوم .. ماش يودّر بي .. Author: يحي قباني Date: 03-17-2022, 02:43 AM Parent: #2
الليلة البنومني شنو ؟ اعد بلاط البيت ؟ و الحلة ؟
الود .. عمر الطيب الدوش ..
أعيشهْا معاكَ لو تعْرف دموع البهجَهْ والأفراح أعيشهْا معاكَ واتأسّف على الماضى اللّى ولَّىَ وراح على الفُرْقَهْ الزمان طويل على الصبر الّى عِشْنَاهو مع طُول الألم والليل زمان كُنّا بنَشيل الوُّد ونَدِّى الوُّد وفى عينينا كان يكْبَر حناناً زاد وفات الحدَ زمان ما عِشْنَا فى غُرْبَهْ ولا قاسينا نِتْوحّد وهسَّع رُحْنا نتْوجّع نعيش بالحسرَهْ نتأسّف على الماضى اللِّي ما بِرْجَع أحبَّك لا الزمن حوّلْنى عن حُبّك ولا الحسرَهْ وخوفى عليكَ يمْنَعْنى وطول الإلفَهْ والعُشْرَهْ وشوقى الليك من طوَّل لسّه معاي ولى بُكْرَهْ
Post: #4 Title: Re: ود خدوم .. ماش يودّر بي .. Author: adil amin Date: 03-17-2022, 03:04 AM Parent: #3
الختمية مرو من هنا
عودة وفودة يا عثمان محمد الحسن سالم "حِمِّيد"
"عاش أبو هاشم حوض العاشم" ... مرحبتين يا جايي وراسم فوق الشوق الفجر الباسم ... ضوَّا الوطن الزفَّ مواسم ودَّعْنَابَا الزمن الغاشِم
أهلاً بيك يا زين يا طيِّب ... يا حَبُّوب للظَن مابْخَيِّب يا المبروك كُلْما انتَ قِرَيِّب ... فالْنا مطيرةْ خير وهِبَيِّبْ نَدَّت حالنا الطَوَّل كاتِم
يا عوَّاض شعبك ما فاتُو ... يا رَوَّاض للريح وشتاتُو يا بيَّاض ظاهرو ونِيَّاتُو ... السودان عادْ بيك بي ذاتُو غَنُّو ليالِي الكانُو مياتِم
أغلى سلام بي بسمة سلامك ... أحلى كلام لي نسمة كلامك يا اللِّي تواضْعَك علاَّ مقامك ... سودانية دي ولَّة مسامك سَيْ يا اْبْكَرَماً بغَّر "حاتِم"
قابِض جمرك وين ما رُحتَ ... إتْجَرَّحت جَدعْ ما نُحْتَ شِنَّ النار يا صندَل فُحْتَ ... بي سر ألَقَك بُحْتَ ولُحْتَ يا التَخَرَجْتَ الفِكْر القاتِم
جِيدْ بي جيتَك عُودَة وفُودة ... يا تُو طيوراً تنسى بِلُودا زي ما مكة اتْلَفُّو وِفُودا ... الخرطوم ازدانَتْ قُودا عديلة مَنَفَّل يا ابن "الخاتِم"
ياتُو ديموقراطية بتَبْقى ... وين حُرية بدونَك تلقى لونا اللَّحَمَر زي الطلقة ... كُونا اللَّخَدر تُوب المَرْقة الحياة حق مدَدْ يا ابو هاشم
حلفا تزِف لي نمولي قدومك ... بارا تبارك لي سَلُّومك النيلين قَلَدَنْ خرطومك ... يا تاريخنا الليلة دا يومك يوم السَّعْد اب مُوج متلاطم
جِدَنْ جيت يا جاد يا جيِّد ... يا أجْوَاد يا دابنَا نعيِّد أفتَح بابك يا شاهد وقيِّد: ... "نحن نأيِّد حزب السيِّد" "عاش أبو هاشم حوض العاشم"
***** انت بتعرف لي سعاد شنو انت خليك مع عشة الجبل بس وقوونات الزمن الكعب بعاعيت مايو بس
Post: #5 Title: Re: ود خدوم .. ماش يودّر بي .. Author: يحي قباني Date: 03-17-2022, 04:35 AM Parent: #4
جقود يا طروره ..
انت لساك مطفّح ؟
خليك عميق ياخ ..😴
Post: #6 Title: Re: ود خدوم .. ماش يودّر بي .. Author: أبوذر بابكر Date: 03-17-2022, 05:49 AM Parent: #1
نحن زمااااان ودرنا يا قباني
من يوم ما بانت سعاد وقلوبنا وارواحنا متبولة بالدوش ومع الدوش
تعرف يا يحي نوع ناس الدوش وهاشم صديق والتجاني سعيد ديل قطع شك فيهم جزء ما بشري، جزء كبير كمان
جوان ملائكة شواطين انبياء آلهة
المهم شي ما بخص البشر والله جد
اقول ليك شي
أنا مرة قعدت قريب سنة بتأمل بس في حتة
بتطلعي انتي من صوت طفلة وسط اللمة منسيه
دا في الحزن القديم طبعا
يمين بالله الجملة دي براها ممكن الزول يطلع ويكتب منها مجلد
هسي في لزوم زي الدوش دا يمش ويفوت ؟
Post: #7 Title: Re: ود خدوم .. ماش يودّر بي .. Author: Yasir Elsharif Date: 03-17-2022, 09:36 AM Parent: #6
سلام يا يحيى وشكرا على البوست اللي يرد الروح
Post: #8 Title: Re: ود خدوم .. ماش يودّر بي .. Author: Ahmed Yassin Date: 03-17-2022, 12:33 PM Parent: #7
انت فعلا ودرت بينا اعظم فنان وهو زيدان قال وعشان خائفين نعيش في ودار الدوش قصائده عبارة عن مسرح عريض يملأ فضاءاته باشراق "دقت الدلوكة" تهيئة وبيان وايذانا بمؤثرات صوتية لبدء العرضوتصوير الدوش للحياة والمعاناة ومع المعاناة والفساد ولكنه مع كدة يدخل بينا في (كاونتربوينت) لمن يقول " اهو الناس تعرس وتنبسط "
Quote: انت فعلا ودرت بينا اعظم فنان وهو زيدان قال وعشان خائفين نعيش في ودار الدوش قصائده عبارة عن مسرح عريض يملأ فضاءاته باشراق "دقت الدلوكة" تهيئة وبيان وايذانا بمؤثرات صوتية لبدء العرضوتصوير الدوش للحياة والمعاناة ومع المعاناة والفساد ولكنه مع كدة يدخل بينا في (كاونتربوينت) لمن يقول " اهو الناس تعرس وتنبسط "
هاشم يا احمد سأله حسين خوجلي قال ليو .. هل في شاعر مثلا كتب قصيده .. ادهشتك و تمنيت انك الكاتبها؟
هاشم قال: كلما عمر الدوش يكتب قصيدة جديدة .. بقعد طوالي اتلمس في ادواتي الشعريه .. و افكر و اقول الدوش ده كتب الكلام ده كيف .. !!
Post: #11 Title: Re: ود خدوم .. ماش يودّر بي .. Author: abdalla elshaikh Date: 03-18-2022, 01:32 AM Parent: #10
يا سلام عليك يا قباني هزيت سقف ذاكرتنا هزاً تليعاً فإنهمر منها رطباً طريا عن الدوش وعن الدوش نحكي ونقول ~ أجريت معه حواراً لصفحة فنون والتي كنت أشرف علي تحريرها بعنوان ~ عمر الدوش مابين صرخة صوت بناديها و دهشة الحزن القديم ~ وقلت له أري شريان خفي يربط بين هذين الشجنين وكعادته صمت عن هذه الملاحظة النقديه كان ذلك الحوار عام ١٩٨٨٣ وفي العام ١٩٨٨ بينما كنت أشاكسه نقدياً بمنزله بأمبده قال لي تعرف يا كارلوس الحزن القديم دي هي زاتها بناديها خالد الكد وعبدالواحد كمبال هم من كشفوا لنا هذا السر الإبداعي ! بجيك راجع لو تيسر المزاج !
Quote: يا سلام عليك يا قباني هزيت سقف ذاكرتنا هزاً تليعاً فإنهمر منها رطباً طريا عن الدوش وعن الدوش نحكي ونقول ~ أجريت معه حواراً لصفحة فنون والتي كنت أشرف علي تحريرها بعنوان ~ عمر الدوش مابين صرخة صوت بناديها و دهشة الحزن القديم ~ وقلت له أري شريان خفي يربط بين هذين الشجنين وكعادته صمت عن هذه الملاحظة النقديه كان ذلك الحوار عام ١٩٨٨٣ وفي العام ١٩٨٨ بينما كنت أشاكسه نقدياً بمنزله بأمبده قال لي تعرف يا كارلوس الحزن القديم دي هي زاتها بناديها خالد الكد وعبدالواحد كمبال هم من كشفوا لنا هذا السر الإبداعي ! بجيك راجع لو تيسر المزاج !
يا الله عليك و على جمال و كمال عمر الدوش ..
حقيقة الشريان الخفي و الملان حزن و شجن بربط بين كل اشعار الدوش .. و كانها بصمة يد و عين و نفس ..
رحم الله الدوش ..
يا عبد الله ياخي زيدنا من ده و داك في عوالم الدوش ..