انطلاق مواكب 6 يناير 2022

Quote: يوميات البشير 1 Tage · كتير مننا قد مايعرف صاحب الصورة دي، لكن لو سألت عن واحد من اكتر الفيديوهات قساوة و واحدة من اكتر الصور الشافوها بشاعة و ألماً، لأجابك العديد: الشاب السوداني المحمول بين أصحابه يوم موكب الخميس الماضي ٣٠ ديسمبر، ورأسه مهشم بسبب طلقة دوشكا و مخه خارج رأسه، وغالباً لم يكن لهم أن يفكروا بشئٍ عن حياته بخلاف لحظة مفارقته للحياة ذاتها.. أحمد الأمين كنونة شاب سوداني في نهاية سنين جامعته، وفي نفس الوقت بيساعد والده عبر الشغل في الكهرباء، الولد الأكبر لوالده ولوالدته السيدة فاطمة تاور عباس، والشقيق ل حمود وهاجر وسارة، الخميس ٣٠ ديسمبر طلع لصلاة الظهر من بيتهم في امبدة الحارة ٢٨، لكنه مارجع، لما جاء المغرب، زاد قلق اسرته وبدأت والدته تفتش عليهو في الحي عند أصحابه لكن مع انقطاع النت والاتصالات، ما كان في زول متأكد من مكانه، والدته الما نامت للصباح، حارسة ولدها يرجع وقاعدة في مصلايتها وماسكة سبحتها تدعو، طلعت من دغش يوم الجمعة برفقة والده تفتش في المستشفيات، أمدرمان، مستشفى الأربعين، السلاح الطبي والخرطوم التعليمي، لكن أسمه مافي، طيب نمش الأقسام، برضه كلها مافيها أحمد، نصحوهم يمشوا المشارح، مشوا وقلبهم في يدهم مشرحة أمدرمان، لقوا ٤ جثامين ، منهم اتنين، اتعرفت عليهم أسرهم واتنين لسه، شافوا ولدهم لكن ماعرفوه، رجعوا تاني يفتشوا في المستشفيات، وبعد مسافة من التعب والأمل الماشي يتناقص، سأل الأب زوجته، السؤال الهم الاتنين خايفين منه، هل يمكن الشفناه قبيل دا أحمد..؟ هل يمكن فلذة كبدنا يكون تعرض لهذا الحجم من الإصابة المدمرة والمشوهة لملامحه؟ ... دُفن جثمان الشهيد احمد كنونة عصر الجمعة ٣١ ديسمبر بمقابر حمدالنيل، انقضى العام و انضاف ألم جديد لأسرة سودانية على ولدها ولأصحاب على صديقهم، انقضى العام والبرهان وحميدتي ومن خلفهم، غافلين يظنون لأنفسهم منجاة من عزم الشعب وبسالة الثوار ومن دعوات الأمهات، ولكن هيهات... هذه الحكاية لا ترجو دمعكم ولكنها توثيق لسيرة أصبحت مكررة في كل شوارع وأحياء بلادي، منذ أن قرر بعضنا أن لهم الوصاية على الشعب قسراً، ومنذ أن قرر معظمنا، رفض ذلك بغض النظر عن الثمن.. عبد الرحمن حمد #لا_للانقلاب_العسكري