مع بدايات تفتح الخرطوم كمدينة وعاصمة للبلد بدت فيها معالم التمدن السوسيولوجية في الظهور وزي ما كانت اتني مقهى افرنجي، في تقاطع شارع القصر مع الجمهورية، يقدم المشروبات والوجبات الخفيفة زيها زي مقاهي لندن وبيروت وبنفس الأسلوب والنكهة والطابع معاها مقهى جروبي الكان شرق سوق الخضار وشمال غرب الجامع الكبير كان في المقابل في السوق العربي بنلقى قهوة الزيبق مقابل الجامع الكبير من الناحية الجنوبية وقهوة علي السيد غرب السوق العربي في منطقة صينية القندول الان، والمكانين إضافة للمشروبات الساخنة والباردة كان بوفرو خدمات ترفيهية اخري
ثم قهوة الواثق في منتصف الشارع الببدا شمالا من الحد الفاصل بين جامع الخرطوم الكبير وميدان الأمم المتحدة والمتجه جنوبا لغاية ما يقطع شارع السيد عبد الرحمن وينتهي في سور السكة الحديد
عمنا الواثق والد الجيلاني وأخوه عثمان من مشاهير اهل الخرطوم عموم، ومن مؤسسي نادي النيل العريق
وفي ربي الخرطوم عموم، بين الحرس والترس، زي ما قال محمود أبو العزائم، وفي كنف أسرة الواثق وفضاء الخرطوم عموم نشأ وترعرع الجيلاني الفنان والجيلاني الإنسان
في ستينيات القرن العشرين الخرطوم كانت لا تقل شأنا من أرقى المدن في الكوكب في كل نواحي المظاهر الحضرية نظافة ونظام وخدمات من أعلى مستوى عالمي فنادق ومطاعم وسينمات وصالات موسيقى بداية من شهر ديسمبر كانت كل الفنادق بتكون محجوزة للسياح من اوروبا وآسيا عشان يستمتعو باعياد ميلاد السيد المسيح وبعده راس السنة الميلادية
كانت الصالات والأندية تتسابق في دعوة اكبر وأشهر الفرق الموسيقية العالمية ال الجي ام اتش وسانت جيمس وحديقة رويال النادي القبطي والنادي العربي فندق اكسلسيور وفندق صحارى
إضافة للفرق الموسيقية العالمية كان في الخرطوم فرق محلية متميزة ومجتهدة
جاز الديوم بقيادة عمر عبده وجاز العقارب مع ممدوح طاهر فريد والبلو ستارز واضواء بحري بقيادة بدر الدين هاشم والد الفنانة الدكتورة منال بدر الدين
في كل الأجواء الجميلة دي عاش وعايش الصبي اليافع والمتحفز والشغوف الجيلاني الواثق كل أنواع الموسيقى وتشربت روحه واستقت وارتوت من كل الفيوض العذبة دي
بعد إكمال الدراسة الأكاديمية في مدارس الخرطوم أبت روح الجيلاني الوثابة والشغوفة بالفنون الا انها تنهل من ينابيع الموسيقى في أعلى المعاهد والمؤسسات العالمية التحق بكونسورفتوار القاهرة في مصر في بداية السبعينات وبعده سافر للملكة المتحدة عشان يلتحق بالاكاديمية الملكية للفنون
مع وإضافة للاختيار العالي للكلام يظهر تجلي وفن الجيلاني الواثق في استخدام الايقاعات المحلية وتفصيل كل أنواع وأساليب الموسيقى، كيف ما كانت ومن وين ما كانت، على ايقاعاتنا المحلية
الجيلاني صاحب صوت فريد وأداء اكتر فرادة
يا ريت اخونا الموسيقار احمد يسن يمر من هنا ويفصل ويورينا نوعية وطبقة صوت جيلاني الواثق
انا شخصيا ممكن اسمي صوته واوصفه ب النسخة الفيروزية المذكرة
جيلاني الواثق ربما لا يتمتع بكم جماهيري كبير حسب معايير التقييم السارية او المعتمدة يمكن دا حصل نسبة لأسباب كتيرة اهمها نوعية او اسلوب التناول الفني عند الجيلاني والشي دا يمكن خلق نوع من الانطباع عند كثيرين من انه الجيلاني مطرب غير جماهيري
لكن علي العكس من الانطباع دا جيلاني الواثق عنده معجبين كتار جدا جدا وعشان لاغنياته ومهتمين بمسيرته الفنية وكل صاحب ذائقة موسيقية غنائية تطريبية اكيد حيعجب باغنيات الجيلاني كلاما ولحنا واداءا وموسيقى كل المطلوب هو الاستماع والنظر سمعيا في أعمال الجيلاني بمعنى انه الزول يدي نفسه فرصه يسمع ويحكم
الهارد روك السوداني ماركة شرحبيل احمد - بروف علي نور الجليل و - كامل دردوق قبل ما نخوض في تفاصيل الجيلاني الواثق( ملك الجاز) او كما قال هو نجي للمدخل: شرحبيل هو ( لي ووكر) السودان اشتغل على الايقاعات السودانية الخالصة مثلا "التم تم " في (يا ابو شعور رقيقة) و(قول الحقيقة) يعني ثبت البلوز والجاز في مكانهما بميلودي سوداني صاف و جاب الرقي من ايقاع الدلوكة في اغنية(يا ما بكرة تندم) نجي للجيلاني
الجيلاني غنى ... "تودعني وانا مشتاق ليك كان بدري عليك) وغني (اجمل الحلوين) بتاعة صديق احمد وغنى (نور بيتنا) للبلابل..وسمعت ليهو اغاني لوردي... وعنده البوم(سلمى) اعتمد فيهو اللحن الشرقي بالطريقة المصرية واظن في كل دا لم يحقق النجاح المطلوب بتشعر ان هناك في هوة بتفصل بين الجمهور وبين نوعية اداء الجيلاني الواثق مع انه له ثقافة موسيقية واسعة واعتقد ان الجيلاني هو من صنع هذه الهوة الكبيرة..اتذكر ونحن كنا طلبة وداخلين على مباني التلفزيون لتسجيل حلقة..لقينا بالصدفة الجيلاني الواثق داخل اروقة التلفزيون واحد من زملانا جنبي ونحن ماشين بالصف عايز يسلم على الجيلاني .... وقال ليهو (ازيك يا استاااااااذ) والاستاذ عاين للزميل وانا متاكد انه سمع التحية لكن الاستاذ الجيلاني الواثق لم يرد التحية باحسن منها.. ونحن طبعا ضحكنا على الزميل ومن (كسفتو)
في السبعينات الجيلاني غنى اغنية لقت نجاح كبير مع انها مرتكزة على السلم السباعي اغنية ” ديل عيونك ولا واحة” بمصاحبة الاوركسترا و ادخل فيها الكمنجات بكثافة و " مع السلامة ابقي زي ما قلت ليكي" بعد دا رجع تاني لاسلوبه القديم والمسمى اسلوب R and B
صوت الجيلاني "البارتون".. وشرحبيل "التينور" دائما بتلقى الجيلاني بغني في طبقة متوسطة مريحة كل اعماله في هذا المدى ومعظم محبي هذا الفنان او الغالبية منهم لديهم الحس الموسيقى ومعرفة جيدة بالغناء والمطربين ودراية باختلاف المدارس الغنائية والادائية المختلفةوالمتنوعة وثقافتهم الموسيقية كبيرة. المشكلة وين؟ غناء الجاز في السودان انحصر في ثلاثة شرحبيل وكمال كيلا والجيلاني هل هناك شخص رابع؟ او يخلف هؤلاء الثلاثة. اولا الات الجاز مكلفة جدا "جيتارات" معدنية طبعا وليست خشبية(اكوستيك) و " باص" و " درمز" والات نحاسية نفخ . شىء مكلف ومحتاج امكانيات مادية كبيرة
شاءت الاقدار ان اتابع الجيلاني الواثق سنينا عددا ..
اكاد اكون كنت حضور في جميع بروفاتهم سواء في نادي الاسرة او في البيت في تلاته .. في ايام كتيره جدا كان صديقي و صديق عمري مجدي حسن يقوم بعزف الدرمز خاصة في البروفات ..
اصدقائي من فرقته عازف الليد جيتار الرهيب البارع الفاتح كردي .. و ايضا الصديق و الجار العزيز جدا كمال عبد الوهاب حمدي عازف البيز جيتار البارع شقيق الهام زوجة جيلاني (التانية) ..
جيلاني صوت حنين جدا .. و اخد مكانته .. لكن في وجود شرحبيل في قمته و البلوستارز عمر قيلي و عاصم زين و ابرزقه .. و وليم اندريا و فرقته الابتايد و سمير اسكندر و يوسف رمضان و فرقة القولد فنقرز .. و كمال كيلا الساحة كانت مليانه بفرق بديعة .. ضغطت على جيلاني و وفرقته ..
لكن تصدق أنا محمد ميرغني عندي بجي فوق لي ابو عفان! .. رغم إنه موسيقى (شجن) مرات تقرب تفندر لي الميزان
انت يالالفين وكم ما بعرف ..
عثمان حسين عشان تسمعه .. لزم تصل لمرحلة معينة من تذوق الفن .. حتين بعد داك تبدا تستوعبه ..
عثمان حسين كلما مر الزمن .. تكتشف شي جديد في نفس الغنية بنفس اللحن السمعته زمان ..
كدي اسمع بالراحة ..
Post: #21 Title: Re: الجيلاني الواثق Author: جمال المنصوري Date: 12-19-2021, 06:40 AM Parent: #20
ابو ذر وضيوفه الكرام تحية طيبة
Quote: اكاد اكون كنت حضور في جميع بروفاتهم سواء في نادي الاسرة او في البيت في تلاته .. في ايام كتيره جدا كان صديقي و صديق عمري مجدي حسن يقوم بعزف الدرمز خاصة في البروفات ..
معقولة يا قباني يا فنان ما نكون اتلاقينا !! بامارة (عصام، وعثمان والبقية، وحاجة الجاز) قلبي يحدثني اننا التقينا ... الخرطوم 3 وما اداركا ما تلاثة.. اديك امارة,... نبيل عبد الرحمن، عماد عبد الرحمن... نادي الاسرة.. ياخي انا لمن ناس المريديان يكونوا عاوزين الجيلاني في (القولدين قيت) بوسطوني
تعرف يا احمد كل تجارب واعمال الفرق والفنانين ديل كانت محاولات للغناء باستخدام آلات غربية وبعيد عن شكل الاوركسترا التقليدي وسموها مجازا ب الجاز واكيد ما كانت جاز زي جاز الجنوب الأمريكي المعروف
يمكن أقرب فنان للجاز سواء في الآلات المستخدمة او في أسلوب الغناء هو عثمان الامو
الجيلاني يا احمد ما بحب يغني لغيره كتير ويمكن دي تكون واحدة من الحسنات بمعنى انه خلاف كل او معظم الفنانين بدأ طوالي باعمال خاصة بدون تقليد او محاكاة لأي فنان
ويمكن كمان برضو طبيعة صوته وطريقة الأداء عنده خلقت الشي دا
اما موضوع انه يتكبر علي انسان او يتجاهله ف دي انا اقدر أجزم ليك انه اكيد كان في خطأ ما في الموضوع دا لانه الجيلاني دا يا احمد على المستوى الاجتماعي او السلوكي او الشخصي هو من أطيب وارقى البشر ومستحيل يتعالى او يتكبر علي انسان مهما كان الإنسان دا منو
هل تعلم انه الجيلاني الواثق ومن عقود طويلة بتراس جمعية انسانية طوعية لمساعدة الأسر مش في الخرطوم بس لكن في كل اقاليم السودان وبدون مقابل ولو قعدت مع الجيلاني الإنسان حتعرف مين هو الجيلاني
Quote: معقولة يا قباني يا فنان ما نكون اتلاقينا !! بامارة (عصام، وعثمان والبقية، وحاجة الجاز) قلبي يحدثني اننا التقينا ... الخرطوم 3 وما اداركا ما تلاثة.. اديك امارة,... نبيل عبد الرحمن، عماد عبد الرحمن... نادي الاسرة.. ياخي انا لمن ناس المريديان يكونوا عاوزين الجيلاني في (القولدين قيت) بوسطوني
اسمع رد وبعدين ارد مع خالص الحب
تحياتي يا منصوري يا جميل ..
طال الزمن من تلك الايام الجميله .. الوشوش كلها حاضره بس اسماء كتيرة بقيت ما استحضرها انحنا بنتكلم على ٤٥ سنة ورا تقريبا 🙂
انا الفاتح و كمال ما بنساهم لانهم اصدقاء الفاتح سانتانا ده اول من علمني امسك جيتار و و وراني الكوردات و من وقتها داك انا السترمنح حقي موزون و بقدر امسك ريزم كويس لكن على قدري طبعا و كمال حمدي ود حلتي لو تذكر بيتهم جنب جامع شروني
كمال غير البيز جيتار كان بعرف كي بورد فنان
بروفات نادي الاسره في الصالة الشمالية و في بيت جيلاني في تلاته و باسطة حاج ياسين قبال ما يمشي جنب سبق الخيل ايام لا تعوض ..
لو انت من الزمن داك اكيد اتقابلنا يا جمال انا و مجدي حسن (ابدرق) ما كنا بنتفارق و دائما سوا في البروفات
Post: #30 Title: Re: الجيلاني الواثق Author: Osman Musa Date: 12-19-2021, 01:25 PM Parent: #29
استاذ ابوذر سلام وليك القومة وانت في سيرة الجيلاني الواثق. نعم الواثق . يا ابوذر ياخ ناس الجيلاني ديل هم أهل الخرطوم الحقيقين. ديل اهل الخرطوم . .. كلم بيهم حميدتي.
Post: #31 Title: Re: الجيلاني الواثق Author: جمال المنصوري Date: 12-20-2021, 05:30 AM Parent: #30
Quote: ازيك يا منصوري
زينت وجملت وشرفت الفجة
بتعرف ناس عبدو الحاج ؟
لعب فترة بسيطة في الهلال الله يرحمه
شاعرنا الكبير7 ابوذر كيف حالك واحوالك المرحوم عبده معرفتي بيه يعني ممكن تقول عليها سطحية، لكن علاقتي القوية من اللاعبين باحمد يوسف عثمان، لاعب الاهلي السابق والضابط بالقوات المسلحة السابق، وصلت لي انو كنت بدخل معاه القيادة العامة، واتذكر انو مرة قابلت معاه العميد البطل / محمد احمد الريح.. انا زيك ارتبط بعلاقات اشرسة باسرة الجيلاني الواثق، فأبناء اختي شقيقتي من الشق المنوفي )المنوفية مصر) من اسرة الجيلاني الممتدة.
Quote: تحياتي يا منصوري يا جميل ..
طال الزمن من تلك الايام الجميله .. الوشوش كلها حاضره بس اسماء كتيرة بقيت ما استحضرها انحنا بنتكلم على ٤٥ سنة ورا تقريبا 🙂
نجي لي حبيبنا وفنانا الجميل (يحى قباني الشهير ب (قبة) يا يحى نعم عاصرت ذلك الزمن الجميل، حين كانت الخرطوم عاصمة الثقافة بجميع صورها يحى قلبي يحدثني باننا التفينا، والذاكرة تضن علي بالتفاصيل يتخيل لي انتو كنو ساكنين في البيوت الكبيرة الواقعة بين جامع شروني وقطاطي العمال، او خليني اوسع المساحة شوية نقول بين كبري المسلمية وناد\ي السكة حديد.. صاح؟ لقد هرمنا يا قباني محبتي لكم جميعا
عمنا الواثق من ركائز الخرطوم فعلا زي ناس العمدة كرم الله وبقية اقطاب الخرطوم عموم برضو عمنا الواثق كان من كبار رجال الحزب الاتحادي
ومن مؤسسي نادي النيل الخرطومي ومقر ومبنى النادي الأصلي كان في شارع السيد عبد الرحمن قريب من قهوة العيلفون ونادي العمال
Post: #34 Title: Re: الجيلاني الواثق Author: Osman Musa Date: 12-21-2021, 06:04 PM Parent: #32
يا ابوذر انت الناس الساكنين شمال غرب نادي الأسرة ديل بتعرفهم. شمال جامع عبدالمنعم . زي ناس قسم السيد هارون وحسن هارون وناس الشكيري. وناس عمك كبروس. وحاجة كلثوم . .. شايفك بتوصف المكانات دي كويس . ولو مشيت قدام شوية جنوب النادي . هناك ناس عمك الخليفة والد زميل المنبر نادر الخليفة وغربهم ناس المرحوم الشريف عفان . وجورج . وجمبهم بيت عمنا الزبير والد بابكر الزبير ومحمد الزبير .