مع بدايات تفتح الخرطوم كمدينة وعاصمة للبلد بدت فيها معالم التمدن السوسيولوجية في الظهور وزي ما كانت اتني مقهى افرنجي، في تقاطع شارع القصر مع الجمهورية، يقدم المشروبات والوجبات الخفيفة زيها زي مقاهي لندن وبيروت وبنفس الأسلوب والنكهة والطابع معاها مقهى جروبي الكان شرق سوق الخضار وشمال غرب الجامع الكبير كان في المقابل في السوق العربي بنلقى قهوة الزيبق مقابل الجامع الكبير من الناحية الجنوبية وقهوة علي السيد غرب السوق العربي في منطقة صينية القندول الان، والمكانين إضافة للمشروبات الساخنة والباردة كان بوفرو خدمات ترفيهية اخري
ثم قهوة الواثق في منتصف الشارع الببدا شمالا من الحد الفاصل بين جامع الخرطوم الكبير وميدان الأمم المتحدة والمتجه جنوبا لغاية ما يقطع شارع السيد عبد الرحمن وينتهي في سور السكة الحديد
عمنا الواثق والد الجيلاني وأخوه عثمان من مشاهير اهل الخرطوم عموم، ومن مؤسسي نادي النيل العريق
وفي ربي الخرطوم عموم، بين الحرس والترس، زي ما قال محمود أبو العزائم، وفي كنف أسرة الواثق وفضاء الخرطوم عموم نشأ وترعرع الجيلاني الفنان والجيلاني الإنسان
يتبع
12-17-2021, 04:57 PM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8610
في ستينيات القرن العشرين الخرطوم كانت لا تقل شأنا من أرقى المدن في الكوكب في كل نواحي المظاهر الحضرية نظافة ونظام وخدمات من أعلى مستوى عالمي فنادق ومطاعم وسينمات وصالات موسيقى بداية من شهر ديسمبر كانت كل الفنادق بتكون محجوزة للسياح من اوروبا وآسيا عشان يستمتعو باعياد ميلاد السيد المسيح وبعده راس السنة الميلادية
كانت الصالات والأندية تتسابق في دعوة اكبر وأشهر الفرق الموسيقية العالمية ال الجي ام اتش وسانت جيمس وحديقة رويال النادي القبطي والنادي العربي فندق اكسلسيور وفندق صحارى
إضافة للفرق الموسيقية العالمية كان في الخرطوم فرق محلية متميزة ومجتهدة
جاز الديوم بقيادة عمر عبده وجاز العقارب مع ممدوح طاهر فريد والبلو ستارز واضواء بحري بقيادة بدر الدين هاشم والد الفنانة الدكتورة منال بدر الدين
في كل الأجواء الجميلة دي عاش وعايش الصبي اليافع والمتحفز والشغوف الجيلاني الواثق كل أنواع الموسيقى وتشربت روحه واستقت وارتوت من كل الفيوض العذبة دي
12-17-2021, 05:01 PM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8610
بعد إكمال الدراسة الأكاديمية في مدارس الخرطوم أبت روح الجيلاني الوثابة والشغوفة بالفنون الا انها تنهل من ينابيع الموسيقى في أعلى المعاهد والمؤسسات العالمية التحق بكونسورفتوار القاهرة في مصر في بداية السبعينات وبعده سافر للملكة المتحدة عشان يلتحق بالاكاديمية الملكية للفنون
درس وتعلم وتأهل وعرف كل خبايا وأسرار الموسيقى
ورجع البلد
12-17-2021, 05:10 PM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8610
مع وإضافة للاختيار العالي للكلام يظهر تجلي وفن الجيلاني الواثق في استخدام الايقاعات المحلية وتفصيل كل أنواع وأساليب الموسيقى، كيف ما كانت ومن وين ما كانت، على ايقاعاتنا المحلية
الجيلاني صاحب صوت فريد وأداء اكتر فرادة
يا ريت اخونا الموسيقار احمد يسن يمر من هنا ويفصل ويورينا نوعية وطبقة صوت جيلاني الواثق
انا شخصيا ممكن اسمي صوته واوصفه ب النسخة الفيروزية المذكرة
12-17-2021, 05:45 PM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8610
جيلاني الواثق ربما لا يتمتع بكم جماهيري كبير حسب معايير التقييم السارية او المعتمدة يمكن دا حصل نسبة لأسباب كتيرة اهمها نوعية او اسلوب التناول الفني عند الجيلاني والشي دا يمكن خلق نوع من الانطباع عند كثيرين من انه الجيلاني مطرب غير جماهيري
لكن علي العكس من الانطباع دا جيلاني الواثق عنده معجبين كتار جدا جدا وعشان لاغنياته ومهتمين بمسيرته الفنية وكل صاحب ذائقة موسيقية غنائية تطريبية اكيد حيعجب باغنيات الجيلاني كلاما ولحنا واداءا وموسيقى كل المطلوب هو الاستماع والنظر سمعيا في أعمال الجيلاني بمعنى انه الزول يدي نفسه فرصه يسمع ويحكم
12-18-2021, 03:09 PM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
الهارد روك السوداني ماركة شرحبيل احمد - بروف علي نور الجليل و - كامل دردوق قبل ما نخوض في تفاصيل الجيلاني الواثق( ملك الجاز) او كما قال هو نجي للمدخل: شرحبيل هو ( لي ووكر) السودان اشتغل على الايقاعات السودانية الخالصة مثلا "التم تم " في (يا ابو شعور رقيقة) و(قول الحقيقة) يعني ثبت البلوز والجاز في مكانهما بميلودي سوداني صاف و جاب الرقي من ايقاع الدلوكة في اغنية(يا ما بكرة تندم) نجي للجيلاني
12-18-2021, 03:30 PM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
الجيلاني غنى ... "تودعني وانا مشتاق ليك كان بدري عليك) وغني (اجمل الحلوين) بتاعة صديق احمد وغنى (نور بيتنا) للبلابل..وسمعت ليهو اغاني لوردي... وعنده البوم(سلمى) اعتمد فيهو اللحن الشرقي بالطريقة المصرية واظن في كل دا لم يحقق النجاح المطلوب بتشعر ان هناك في هوة بتفصل بين الجمهور وبين نوعية اداء الجيلاني الواثق مع انه له ثقافة موسيقية واسعة واعتقد ان الجيلاني هو من صنع هذه الهوة الكبيرة..اتذكر ونحن كنا طلبة وداخلين على مباني التلفزيون لتسجيل حلقة..لقينا بالصدفة الجيلاني الواثق داخل اروقة التلفزيون واحد من زملانا جنبي ونحن ماشين بالصف عايز يسلم على الجيلاني .... وقال ليهو (ازيك يا استاااااااذ) والاستاذ عاين للزميل وانا متاكد انه سمع التحية لكن الاستاذ الجيلاني الواثق لم يرد التحية باحسن منها.. ونحن طبعا ضحكنا على الزميل ومن (كسفتو)
12-18-2021, 04:00 PM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
في السبعينات الجيلاني غنى اغنية لقت نجاح كبير مع انها مرتكزة على السلم السباعي اغنية ” ديل عيونك ولا واحة” بمصاحبة الاوركسترا و ادخل فيها الكمنجات بكثافة و " مع السلامة ابقي زي ما قلت ليكي" بعد دا رجع تاني لاسلوبه القديم والمسمى اسلوب R and B
12-18-2021, 05:27 PM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
صوت الجيلاني "البارتون".. وشرحبيل "التينور" دائما بتلقى الجيلاني بغني في طبقة متوسطة مريحة كل اعماله في هذا المدى ومعظم محبي هذا الفنان او الغالبية منهم لديهم الحس الموسيقى ومعرفة جيدة بالغناء والمطربين ودراية باختلاف المدارس الغنائية والادائية المختلفةوالمتنوعة وثقافتهم الموسيقية كبيرة. المشكلة وين؟ غناء الجاز في السودان انحصر في ثلاثة شرحبيل وكمال كيلا والجيلاني هل هناك شخص رابع؟ او يخلف هؤلاء الثلاثة. اولا الات الجاز مكلفة جدا "جيتارات" معدنية طبعا وليست خشبية(اكوستيك) و " باص" و " درمز" والات نحاسية نفخ . شىء مكلف ومحتاج امكانيات مادية كبيرة
12-19-2021, 03:21 AM
يحي قباني يحي قباني
تاريخ التسجيل: 08-20-2012
مجموع المشاركات: 18708
شاءت الاقدار ان اتابع الجيلاني الواثق سنينا عددا ..
اكاد اكون كنت حضور في جميع بروفاتهم سواء في نادي الاسرة او في البيت في تلاته .. في ايام كتيره جدا كان صديقي و صديق عمري مجدي حسن يقوم بعزف الدرمز خاصة في البروفات ..
اصدقائي من فرقته عازف الليد جيتار الرهيب البارع الفاتح كردي .. و ايضا الصديق و الجار العزيز جدا كمال عبد الوهاب حمدي عازف البيز جيتار البارع شقيق الهام زوجة جيلاني (التانية) ..
جيلاني صوت حنين جدا .. و اخد مكانته .. لكن في وجود شرحبيل في قمته و البلوستارز عمر قيلي و عاصم زين و ابرزقه .. و وليم اندريا و فرقته الابتايد و سمير اسكندر و يوسف رمضان و فرقة القولد فنقرز .. و كمال كيلا الساحة كانت مليانه بفرق بديعة .. ضغطت على جيلاني و وفرقته ..
ما زلت ابحث دائما لأغانيه ..
12-19-2021, 03:26 AM
يحي قباني يحي قباني
تاريخ التسجيل: 08-20-2012
مجموع المشاركات: 18708
Quote: اكاد اكون كنت حضور في جميع بروفاتهم سواء في نادي الاسرة او في البيت في تلاته .. في ايام كتيره جدا كان صديقي و صديق عمري مجدي حسن يقوم بعزف الدرمز خاصة في البروفات ..
معقولة يا قباني يا فنان ما نكون اتلاقينا !! بامارة (عصام، وعثمان والبقية، وحاجة الجاز) قلبي يحدثني اننا التقينا ... الخرطوم 3 وما اداركا ما تلاثة.. اديك امارة,... نبيل عبد الرحمن، عماد عبد الرحمن... نادي الاسرة.. ياخي انا لمن ناس المريديان يكونوا عاوزين الجيلاني في (القولدين قيت) بوسطوني
اسمع رد وبعدين ارد مع خالص الحب
12-19-2021, 08:27 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8610
تعرف يا احمد كل تجارب واعمال الفرق والفنانين ديل كانت محاولات للغناء باستخدام آلات غربية وبعيد عن شكل الاوركسترا التقليدي وسموها مجازا ب الجاز واكيد ما كانت جاز زي جاز الجنوب الأمريكي المعروف
يمكن أقرب فنان للجاز سواء في الآلات المستخدمة او في أسلوب الغناء هو عثمان الامو
12-19-2021, 08:10 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8610
الجيلاني يا احمد ما بحب يغني لغيره كتير ويمكن دي تكون واحدة من الحسنات بمعنى انه خلاف كل او معظم الفنانين بدأ طوالي باعمال خاصة بدون تقليد او محاكاة لأي فنان
ويمكن كمان برضو طبيعة صوته وطريقة الأداء عنده خلقت الشي دا
اما موضوع انه يتكبر علي انسان او يتجاهله ف دي انا اقدر أجزم ليك انه اكيد كان في خطأ ما في الموضوع دا لانه الجيلاني دا يا احمد على المستوى الاجتماعي او السلوكي او الشخصي هو من أطيب وارقى البشر ومستحيل يتعالى او يتكبر علي انسان مهما كان الإنسان دا منو
هل تعلم انه الجيلاني الواثق ومن عقود طويلة بتراس جمعية انسانية طوعية لمساعدة الأسر مش في الخرطوم بس لكن في كل اقاليم السودان وبدون مقابل ولو قعدت مع الجيلاني الإنسان حتعرف مين هو الجيلاني
الكلام دا عن تجارب شخصية ومعرفة اسرية
12-19-2021, 07:57 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8610
Quote: معقولة يا قباني يا فنان ما نكون اتلاقينا !! بامارة (عصام، وعثمان والبقية، وحاجة الجاز) قلبي يحدثني اننا التقينا ... الخرطوم 3 وما اداركا ما تلاثة.. اديك امارة,... نبيل عبد الرحمن، عماد عبد الرحمن... نادي الاسرة.. ياخي انا لمن ناس المريديان يكونوا عاوزين الجيلاني في (القولدين قيت) بوسطوني
اسمع رد وبعدين ارد مع خالص الحب
تحياتي يا منصوري يا جميل ..
طال الزمن من تلك الايام الجميله .. الوشوش كلها حاضره بس اسماء كتيرة بقيت ما استحضرها انحنا بنتكلم على ٤٥ سنة ورا تقريبا 🙂
انا الفاتح و كمال ما بنساهم لانهم اصدقاء الفاتح سانتانا ده اول من علمني امسك جيتار و و وراني الكوردات و من وقتها داك انا السترمنح حقي موزون و بقدر امسك ريزم كويس لكن على قدري طبعا و كمال حمدي ود حلتي لو تذكر بيتهم جنب جامع شروني
كمال غير البيز جيتار كان بعرف كي بورد فنان
بروفات نادي الاسره في الصالة الشمالية و في بيت جيلاني في تلاته و باسطة حاج ياسين قبال ما يمشي جنب سبق الخيل ايام لا تعوض ..
لو انت من الزمن داك اكيد اتقابلنا يا جمال انا و مجدي حسن (ابدرق) ما كنا بنتفارق و دائما سوا في البروفات
12-19-2021, 01:25 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
شاعرنا الكبير7 ابوذر كيف حالك واحوالك المرحوم عبده معرفتي بيه يعني ممكن تقول عليها سطحية، لكن علاقتي القوية من اللاعبين باحمد يوسف عثمان، لاعب الاهلي السابق والضابط بالقوات المسلحة السابق، وصلت لي انو كنت بدخل معاه القيادة العامة، واتذكر انو مرة قابلت معاه العميد البطل / محمد احمد الريح.. انا زيك ارتبط بعلاقات اشرسة باسرة الجيلاني الواثق، فأبناء اختي شقيقتي من الشق المنوفي )المنوفية مصر) من اسرة الجيلاني الممتدة.
Quote: تحياتي يا منصوري يا جميل ..
طال الزمن من تلك الايام الجميله .. الوشوش كلها حاضره بس اسماء كتيرة بقيت ما استحضرها انحنا بنتكلم على ٤٥ سنة ورا تقريبا 🙂
نجي لي حبيبنا وفنانا الجميل (يحى قباني الشهير ب (قبة) يا يحى نعم عاصرت ذلك الزمن الجميل، حين كانت الخرطوم عاصمة الثقافة بجميع صورها يحى قلبي يحدثني باننا التفينا، والذاكرة تضن علي بالتفاصيل يتخيل لي انتو كنو ساكنين في البيوت الكبيرة الواقعة بين جامع شروني وقطاطي العمال، او خليني اوسع المساحة شوية نقول بين كبري المسلمية وناد\ي السكة حديد.. صاح؟ لقد هرمنا يا قباني محبتي لكم جميعا
12-21-2021, 05:50 PM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8610
يا ابوذر انت الناس الساكنين شمال غرب نادي الأسرة ديل بتعرفهم. شمال جامع عبدالمنعم . زي ناس قسم السيد هارون وحسن هارون وناس الشكيري. وناس عمك كبروس. وحاجة كلثوم . .. شايفك بتوصف المكانات دي كويس . ولو مشيت قدام شوية جنوب النادي . هناك ناس عمك الخليفة والد زميل المنبر نادر الخليفة وغربهم ناس المرحوم الشريف عفان . وجورج . وجمبهم بيت عمنا الزبير والد بابكر الزبير ومحمد الزبير .
12-28-2021, 09:24 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8610
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أبوذر بابكر
يحي قباني
Ahmed Yassin
جمال المنصوري
Osman Musa
فيس بوك
تويتر
انستقرام
يوتيوب
بنتيريست