حمدوك تعني شكروك... إسم على مسمى..

Quote: كتب اللامع الطيب عبد الماجد عارف يا حمدوك …!! عارف ليه الناس دي بتعزك …!! لأنهم ببساطة بشوفو فيك نفسهم ويشوفو فيك السودان الجميل بي مدنيتو وصفاهو ونيلو ….طيبتو وجمالو ونخيلو ….!!🌴 قطيتو والعازه وخليلو طبعاً ( حمدوك ) دا ممكن تشوف فيهو أي شخصية سودانية تجي في بالك…. بشبه السودان شديد فيهو ذاتنا وصفاتنا ( حمدوك ) بذكرني ( الناظر ) في المدرسة … بتحس بيهو أبو الأساتذة والطلبة ……. بحي قبلهم وبفوت بعدهم أصلو ما بجلد ولا بتنهر …..ومابتكلم كتير ومرات كتيرة كدا بيتدخل لصالح الطلاب ….. كان عندنا ناظر هو ذاتو بشبه ( حمدوك ) دا حتى شكلاً وفي مره كان عندنا ( جمعية أدبية ) ومعانا طالب اسمو ( محمود ) بقولو ليهو ( سمسمية ) وهو معقد من الإسم دا ..ما بدورو …!! ولأنو من ( عتاولة )المدرسة ( سنة رابعة بس عاد فيها سنتين ) لذلك لا أحد يستطيع الجهر أمامه بهذا اللقب المتداول سراً وعلى نطاق عريض.. الى أن تجرأ أحدهم ذات يوم وجاهر بالمسكوت عنه زميلنا المغامر دا إسمو ( بابكر ) …بابكر على اللمين ( بابكر ) دا طلع المسرح و وقدم موضوع كامل عن السمسم …زراعتة واستخداماته وفوائده وفي النهايه قال برضو بنعمل بيهو حلاوة ( سمسمية ) وهنا انفرط العقد …وخرجت الأمور عن السيطرة وعلت الضحكات حتى لامست عنان السماء وتوجهت الأنظار كلها صوب محمود ( سمسمية ) لمتابعة ردود الأفعال داير يطرشق من الزعل ….!! والكل يتسائل عن مصير ( بابكر ) الذي اخترق المحظور وجاهر بالمعصية ….!! تتخيلو ( الناظر ) دا عمل شنو …!؟؟ نادا ليك ( محمود ) بعد الجمعية انتهت وقال ليهو قدامنا كلنا …مبروك الليلة دخلت التاريخ يا ( سمسمية ) وانفقعنا ليك تاني بالضحك بما فينا ( السمسمية ) ذاتو …..كونو عمك البعاتي دا ذاتو يقول ( سمسميه ) فهو أكبر تكريم وشرف لو تعلمون عظيم …. وتم نزع فتيل كل الأزمة وتم تسجيل اعتراف دولي باللقب ومنذ ذلك التاريخ أصبح ( محمود ) هو ( سمسميه ) بالرضا والقبول …. دا الناظر البشبه حمدوك … حمدوك بذكرني الناس الراكزين في الحلة البتلقاهم في العقد وفي صلاة الجمعة وفي المستشفى … بحلو ويربطو ….في حزم وطلاوة وهمة ومسؤولية ولو شفتهم يوم هلال مريخ وهم ( بقصو ) لي بعض لاندهشت….وكلو بي أدب .. ( حمدوك ) بشوفو في مغترب وقور شغال في مؤسسة مرموقة وجاي يعيد في السودان مع الأهل ويتبادل الأشواق والقفشات والأماني….وصينيه فطور مظبتة والعمة ملفوفة ونازله بالجنبة ما شغال بيها مشي يزور خالتو الكبيرة مدنقر فيها والاتنين ميتين بالضحك ….!! ( بقول ايها في شنو ياربي …!! ) …🤔 تشوفو تقول زول مسكين ساكت وهو عندو دكتوراة في القانون الدولي المقارن والانظمةع التجارية الدولية راتبو ١٥٠ الف ريال غير البدلات بشوف ( حمدوك ) في طربيزة ( كشتينة ) بريئه يوم جمعة وهو غاضب يعاتب زميلو ( الكيشة ) الأداهم الفتوح وفي عز زعلتو …وقعادو بره ….. يضربو ليك جماعتو بالخمسين ويقع من الضحك …..ولا يسكت … بشوفو في مسؤول البحوث والغابات في سنجه يطبق في القانون زي ما قال الكتاب ومدنو بيت حكومة محافظ عليهو وعلى الحكومة أكتر من الحكومة ذاتا ….. ( حمدوك ) ممكن يكون صاحب ورشه كبيرة لابس الأبرول ويتدخل في العمليات المعقده ويتبادل الأبوه والخبرة مع الشغالين معاهو ….وبحبوهو شديد ورئيس وزرا مالي مركزو وهدومو ( حمدوك ) بذكرني أي زول سوداني جميل وطيب وشجاع ومحترم ولطيف .. عشان كدا الناس دي واقفة معاك يا ( مؤسس ) لأنها بتشوف نفسها فيك وماشافت منك كعب ولا سمعت منك شين الشباب ديل مافي زول كان قاعد يقول ليهم حننتصر وما حنرجع ورا …ونوع الكلام دا …. فقد اجادوا الحديث عن أنفسهم وتأمين النظام أديتم أمل…..وبعض ضوء …!!! وهي الحياة شنو غير عمل وحبة أمل وبياض نية … تطلع بالسلامة ان شاءالله …ربنا يفك أسرك أول مالزول تشوفو بضحك ضحكة زي دي اصلو ما تخاف منو ….دا بتكون نفسو ذاتا بتضحك كدا ….. ان شاءالله دايماً …يا ريس ….!! القصة ما تقديس شخصية القصة إحتفاء بالرمزية مشتاقين ياخ …. عامل ريحتك المدنية دي ….. أركز ….الجماعة برا واقفين قنا .. ومساء الخير يا الأمير ….!! إنتا سامعني 😱 …!