الجريمة في السودان الي اين؟مقارنة سريعة بين الجريمة في المكسيك و السودان!!

Quote: الحرامي منو ؟ لعناية مدير عام الشرطة .. 🖋 مصطفى عوض الحاصل كالآتي. الخميس القبل الفات تمت سرقة منزلي انا كاتب المنشور ده مصطفى عوض ومسئول من اي حرف اكتبو هنا . تمت سرقة منزلي مجوهرات فقط . وانا كنت مسافر . والاولاد قاعدين . تمت السرقة بين صلاة العصر والمغرب . من الخزنة في البيت . لحدي ما اتفتح البلاغ كان حوالي الساعة ١٢ ليلا . تم تحريز عدد لابأس به من الأدلة للبصمات طبعا نتيجة ماجات للبصمات حتى كتابة النشر ١٥/٩ . المهم انا رجعت صباح السبت من السفر يعني بعد يوم واحد من تاريخ السرقة . صباح الأحد شاءت الأقدار أن يتم القبض على حرامي في بيت من بيوت الجيران الساعة ٧ صباح بعد طلوع سيد البيت للشغل . لأننا سكان حي واحد مشيت اشوف الحرامي . لقيتو مضروب في راسو قال ضربو شافع بحديدة. بصفتي رئيس لجنة الخدمات بالحي . انا مصطفى ده زاتي . منعت اي زول يضربو. وطلبت من صاحب البيت يمشي يفتح بلاغ . الحرامي ماكان شال حاجة من بيت الزول نط جواهو بس . سقت الحرامي ومعاي أربعة اشخاص ومشيت المستشفى عملت ليهو عملية خيطو ليهو الجرح ومعاي اتنين بتاعين مباحث ضربت ليهم انا . حضرو خياطة ونظافة الجرح . ركبت الحرامي معاي في عربيتي ومعاي نفرين . بقيت ادردش معاهو . قلت ليهو سرقتو كم بيت في حينا ده . قال لي بكل هدوء كم بيت . سرقتو شنو . سرقنا لابتوبات ودهب وقروش ومراوح وموتورات موية . طيب ممكن تمر معاي على البيوت السرقتوها. اي بمشي معاك . طيب نمشي . قمت عديل زغت بالحرامي من ناس المباحث. مشينا البيت الاول . هو بخبرنا بالبيت السرقو. انزل انا ادق باب البيت . يااخوانا انتو اتسرقتو دهب وقروش . اي والله الاسبوع الفات . طيب امشو القسم ارجوني هناك وافوت البيت التاني والحرامي يوديني. ادق باب البيت . انتو اتسرقتو لابتوب وموتور. اي والله طيب امشو القسم . نمشي البعديهو لمن مريت على بيوت وداني ليها الحرامي .. وكلها اكدت سرقتها. قمت قلت ليهو انا السرق بيتي منو . قال لي بيتك وين . جيت بجمب بيتنا. قلت ليهو بيتي ياهو ده اتسرق اول امبارح . قال لي ديل ناس محمد . جميل جدا محمد منو . قال محمد ده الخبير حقنا. طيب تودينا ليهو. قال خلاص نمشي. اتحركنا في الشارع قلت ليهو بتبيعو حاجاتكم البتسرقوها وين قال لينا في الميزان بتاع الخرد. حتى الدهب اي حتى الدهب ده نحاس محسن بتاع الميزان بدينا فيهو قروش كتير بقول جيبو منو كتير . يشهد الله ده القالو بالضبط. واللابتوب برضو لبتاع الميزان اي بنبيع ليهو اي حاجة. بعتو اللابتوب بكم. بي سته الف . لف بجاي تمام . الميزان وين حقكم. الميزان بتاع تقاطع كده . تمام عرفتو رايك شنو نمشي الميزان اول . نمشي خلاص . طبعا الميزان طلع في تقاطع الحي . سبحان الله نحن ماشين على الميزان محمد يجي قدامنا داخل على الميزان . الحرامي قال محمد ياهو داك داخل الميزان . تمام كده ظابط جدا . طوالي اتصلت على ناس المباحث جو . ومشينا الميزان كلنا عربيتين. لقينا محمد وبتاع الميزان . من شافو زولهم معانا عرفو الحاصل . محمد قال لي رفيقو كمشوك. اي كمشناهو. محمد الدهب وين ؟ قال بعناهو للزول ده . بتاع الميزان محترف جدا . قال ليهو دهب شنو . طبعا بصراحة احيانا الشلوت بنفع . شوف ياظريف انت هنا قبلك حاتعترف بأي حاجة وبعد تمشي الحراسة . دحين خارجنا اللعمنو نحن ماني فاضيين نضيع زمنا معاك . محمد جبتو الدهب متين . امباره ده ناس مهند جابو الهاجات ده هنا . ايوااا مهند ده جديد . طلعت صورة الدهب في التلفون بتاعي دهب ذي ده . اي اي ياهو زاتو يا عمك ده ما هق امباره زاتو. بتاع الميزان قال يضرب لشريكو يجي . تمام اضرب . ماضرب طبعا قال في الرواكيب. ماعلينا كدي تلفونك افتح القفل. فتحنا الاستديو والله لقينا صور دهب تلخم اشكال والوان . انت شغال شنو يا عمك . سبحان الله عاينا في الخردة تحت التربيزة نشوف ليك كيس . مرقناها عارفين فيهو شنو غويشات وختمة مكسرة . انت اشتريت اللابتوب اي . انت ديل شغالين معاك . محمد نط قال بدينا قروش يقول جيبو حاجات. بعتو اللابتوب وين ؟؟ بعناهو ليهو. طيب جبتو ليهو شنو تأني. موتورات ومراوح . تمام . ارفعو الناس . رفعناهم القسم . دخلنا مكتب الضابط المناوب. الحرامي الاول كدي وصف دهب الزول ده . سبحان الله الزول ده وصف خاتم يمكن في البلد دي نادر جدا يا سعادتك الزول ده شاف دهبنا عديل وعارفو كمان . اتاكدت ١٠٠% دهبنا بتلقي عشان ناس المباحث لقو قضية جاهزة واعترافات كاملة . طيب عايزين الكلب البوليسي سعادتك تحريز. والله عربية ماعندنا ياسعادتك انتو ٤ يوم ماعندكم عربية جبنا عربية سوناتا قلتو لا . جبنا بوكس قلتو عربية ملكية لا . طيب الأدلة بتروح والريحة بتروح. ماعندنا عربية قلنا . تمام عديلة . خليت الحرامية في القسم بي زولي الحرامي العالجتو واديت بتاع المباحث ٤ الف حق الروشيته العلاجية لانو قال لي الزول ده كاتبلو علاجات. مشيت مسرح الحادث طلبت كلب بوليسي . قال لي نرفعو في عربيتك عشان ما تاجر عربية. تمام . رفعنا الكلب . ومشينا البيت الأثر مغطينو الكلب قام بالواجب في المتابعة . اتخيلت انو بعديها بمشو بالكلب للحرامية عشان يشمهم. وياكد الريحة حقتهم مع الموجودة في الأثر. تصدقو شممو الكلب الأثر ورجعناهو قفصو. طيب يعني انتو كلبكم ده كان عايز عطور رجلين بس . المهم . اها نتيجة البصمات عشان مطابقتها مع بصمات الناس المقبوضين ديل . لسه النتيجة دي لو عندك زول في الادلة خليهو يحركا ليك . طيب البصمات سلمتوها؟؟ لسه . يااخوانا انتو ليه بتعملو كده . طبعا من جوة مغيوظ لكن كاظم غيظي. بنتحرك يا شاب . ده شغلنا. طيب تمام قبلنا. رجعت البيت . نرجع لناس الحي . والله بتاع اللابتوب طلعولو بلاغو مشطوب وبتاع الموتور حاكايتو شربت. النجي لي انا . قالو لي تدفع مبلغ كده الناس ديل عديل قالو ليك تدفع الدهب بجي تمام اتفقنا هاكم دي مقدم . واديتها بتاع المباحث وشاهد ماعندي غير الله لانو بتاع مباحث بورط نفسو مافي . شالا وهو راكب براهو في عربيتي . دايرين تحاكموني بالرشوة عشان موظف دولة يشتغل وهو طلبها عشان يشتغل جاااااهز وطظ في اي قانون ما يحمي حقي . عارفين الحصل بتصل عليهم كل يوم . شغالين تمام في بلاغك ده . طيب الجميل في الموضوع جوني اهل الحرامية قالو لي ولادنا قالو هبشوك. ياخ ديل طسوني عديل ماهبشوني بس . طيب ياخ نحل الموضوع . خلاص جيبو الدهب . خلاص نحن بنعرف مهند . تمام سلموهو المباحث . اقسم بالله بعد يوم من ظهور جودية اهل الولاد وبتاع الميزان ناس القسم فكو الحرامية جت . يا مدير الشرطة . البيوت الاتسرقت واعترفو بيها ده بلاغات. وانا بلاغ . مافي في قانونكم مادة تحاكم الناس ديل اصلو ؟؟ قضيتي اتباعت لي بتاع الميزان ولا للحرامية ؟؟ القانون عاجز عن حسم المجرم . للعلم انا حقي عند الله مابضيع لكن القانون اعرفو نفسكم بضيع في حق الناس . والمرة الجاية انا بجيب دهبي براي لأني كمان والله اواصل في الموضوع براي واسوي لي حمام حراسة في البيت لامن اجيب اخر جرام ولو عارف القانون بضيع حقي كنت من بتاع الميزان مشيت مهند لامن اصل لاخر زول . لانو البعرفا في نفسي بخاف من الخلقني بس تاني بني ادم وشيهو شبر كتير ما بقيف عندو. والقانون بحترمو ما بخاف منو لكن بحترم القانون لكن القانون براهو لمن يخالف العدالة بدوسو. اللعمنو حتى العدالة في الظلم عدالة . كان بقيتو على الاماكن والقسم والناس والمباحثية وفتح تحقيق حبابكم طن يا مدير عام الشرطة ووزير الداخلية جيبو معاك . انا المسروق وانا الناشر وانا القلت الكلام ده ومسئول منو بس اعرف الحرامي منو . القانون الضيع حقوقنا ولا الحرامي الكسر الخزنة ولا بتاع المباحث المرتشي ولا انا العالجت الزول ناحية أخلاقية خلتو يعترف لي بأي حاجة . سلام 🖋المواطن مصطفى عوض