قالوا واحد من ناس الغابة - شمال الجزيرة - راجل مدروِش كدا ومضفّر شعره .. يوم مشى أم درمان صلى الجمعة مع السيد عبدالرحمن .. أها بعد الصلاة السيد عبدالرحمن لاحظ أنو زول غريب وما من المداومين، قال للجماعة الزول داك خلوه يجي يتغدى معانا .. بعد الغداء قال نادوه لي .. قام سألو : إنت شيخك منو؟ الزول قال ليه : شيخي الحي ولا الميت؟ قال ليه : الاتنين .. عمك قال : شيخي الميت أحمد ود بدر .. وشيخي الحي بتول ..
السيد سألو : بتول منو؟ قال لو مرتي .. السيد عبدالرحمن ضحك وطلب من واحد من الملازمين يديه ٤٠ جنيه .. وقال ليه ٢٠ ليك و٢٠ لشيخك بتول .. وقام قال ليه : يا أخينا، كلنا *(بتولاب)* إلا جنس نضميك ده ما بنقولوا
منقول..
Post: #2 Title: Re: البَتُولاب في المنبر .. بدر الدين الأمير م� Author: ABUHUSSEIN Date: 08-08-2021, 08:29 PM Parent: #1
بورق الخدرة و بقور البامية .... ازيد و ل كفاية .... ؟؟؟؟ 🤣🤣🤣🤣🤣🤣
Post: #3 Title: Re: البَتُولاب في المنبر .. بدر الدين الأمير م� Author: يحي قباني Date: 08-08-2021, 08:34 PM Parent: #2
Quote: بورق الخدرة و بقور البامية .... ازيد و ل كفاية .... ؟؟؟؟ 🤣🤣🤣🤣🤣🤣
زيد و اشجيني يا ابا حُسين .. :)
Post: #4 Title: Re: البَتُولاب في المنبر .. بدر الدين الأمير م� Author: يحي قباني Date: 08-08-2021, 09:47 PM Parent: #3
و في كمان اعضاء بعد تقدم السن .. بقوا بتولاب ..
Post: #5 Title: Re: البَتُولاب في المنبر .. بدر الدين الأمير م� Author: خضر الطيب Date: 08-08-2021, 09:56 PM Parent: #4
سلام يا قٌبة و بياكل كبدة ابل و ام فت فت و مرارة و كمونية و كوارع و راس النيفا و كبدة الضان النية طبعاً و الجلد البعملوهو مصلاية هو برميهو غايتو لو جيت شفتو في المطبخ تقول الخالة دي منو :) مرة يا قٌبة مشينا انا و المدام البحر اشترينا لينا سمكة طولا متر شئ خرافي المدام قالت لي انا حبيت الفكرة لكن ما بقدر اقطع المصيبة دي اتصلت على بدر الدين و حكيت ليهو مشى اشترى ساطور و مسن و سكين طويلة دخل المطبخ و قفلو عليهو بإختصار خلال ساعة انجزا ..قلت ليهو عافي منك يا دخري الحوبات ياخ دا بتول بجدارة :)
Post: #6 Title: Re: البَتُولاب في المنبر .. بدر الدين الأمير م� Author: Asim Ali Date: 08-08-2021, 10:58 PM Parent: #2
Quote: بقور البامية ....
هههههه الباميه بتتقمع يا ابو حسين ماببتقور الامضاء عزابى مخضرم
Post: #7 Title: Re: البَتُولاب في المنبر .. بدر الدين الأمير م� Author: ABUHUSSEIN Date: 08-08-2021, 11:17 PM Parent: #6
Quote: هههههه الباميه بتتقمع يا ابو حسين ماببتقور الامضاء عزابى مخضرم
و البتقور دا المحشي ؟؟؟؟؟ يا زول ما بيناتنا المهم عربي RPG دا يتفضح
Post: #8 Title: Re: البَتُولاب في المنبر .. بدر الدين الأمير م� Author: ABUHUSSEIN Date: 08-08-2021, 11:19 PM Parent: #7
Quote: زيد و اشجيني يا ابا حُسين .. :)
ما تحلفني يا ابو الياء ياخ ..... 🤣 لكن سمعت تحت تحت قالو في خت الحنة رهيب مسطرة بس .... 🤣🤣🤣🤣🤣
Post: #9 Title: Re: البَتُولاب في المنبر .. بدر الدين الأمير م� Author: بدر الدين الأمير Date: 08-09-2021, 11:09 AM Parent: #8
Post: #10 Title: Re: البَتُولاب في المنبر .. بدر الدين الأمير م� Author: أبوذر بابكر Date: 08-09-2021, 11:19 AM Parent: #1
هههههههه
سمعت يا قباني اغنية
البتولا حلاتا يا زولا البتولا ما خمله ما بتلعب في الرمله
الخ البتلله
انا غايتو النصيحة قاعد امشط
يقول المثل
البتولي ولا المتبوتل
Post: #11 Title: Re: البَتُولاب في المنبر .. بدر الدين الأمير م� Author: بدر الدين الأمير Date: 08-09-2021, 12:16 PM Parent: #10
يا ابوذر عندى صديقى اسمه عبدالله الصديق احد مصايب الدنيا العشرة وكنيته بيننا عدو المراة لمن يكون في موضوع محتاج تشاور هو طوالى بقرر فلان وعلان ديل ماتشاورهم اولا تمشو تشاور زوجاتهم لانو القرار عندهن مرة وانا في احد اجازاتى نهاية التمانينيات الاجازة على وشك تنتهى وداير امش الخرطوم اعمل تاشيرة الخروج سالت المدام وين جواز قالت اخر مرة لمن مشيت الخرطوم عشان تجيب الحاجات المشحونة ما اديتنى جوازك قومت عليها الدنيا اسبوع كامل تفتش نفضت البيت فوق تحت الشلة اجتمعت بقيادة عبدالله وهو يسكن جارى في اربجى والقرار كان عبدالله الصديق يجتمع معها ويفهمها تفتش بهدوء بدون مساعدة من احد المهم بعد يومين مشيت اشرب قهوة الضهر مع الوالدة لها الرحمة قالت ياولدى قالو خلاص اجازتك انتهت وراجع قطر قلت نعم قالت انت مامسكتنى جوازك يازول شلت الجواز وطوالى من الفرحة قبل ادخل بيتى مشيت لعبدالله الصديق وبشىء من الاسى قلت له ياخى نحن ظلمنا المدام الجواز انا كنت خاتيهو مع الوالدة وبشكل حاسم قال بعدين قلت نمشى نعتذر لها زجرنى زجرة انت ما راجل ولا شنو داير تمش تقوليها انا كنت ممسك الجواز لامى عشان تانى لوقلت ليها السلام عليكم تقول لك امش اسال امك قلت طيب والحل قال تمش وتعمل روحك بتفتش براك وبهدوء وخليها تمش تعمل ليك قهوة لمن تجى قوليها ياهو دا الجواز لقيتو واقع تحت الكومدينة وقد كان المسكينة رمت ليها دمعتين واعتذرت هذا السر مضى علية اكثر من 30سنة قاتل الله عبدالله الصديق ويحى قبانى وابوالحسين ومن لف لفهم
Post: #12 Title: Re: البَتُولاب في المنبر .. بدر الدين الأمير م� Author: يحي قباني Date: 08-09-2021, 02:14 PM Parent: #11
Quote: مرة يا قٌبة مشينا انا و المدام البحر اشترينا لينا سمكة طولا متر شئ خرافي المدام قالت لي انا حبيت الفكرة لكن ما بقدر اقطع المصيبة دي اتصلت على بدر الدين و حكيت ليهو مشى اشترى ساطور و مسن و سكين طويلة دخل المطبخ و قفلو عليهو بإختصار خلال ساعة انجزا ..قلت ليهو عافي منك يا دخري الحوبات ياخ دا بتول بجدارة :)
هههههههههاي
بنجز ابوها كان حي ..
Post: #14 Title: Re: البَتُولاب في المنبر .. بدر الدين الأمير م� Author: يحي قباني Date: 08-09-2021, 02:16 PM Parent: #12
Quote: هههههه الباميه بتتقمع يا ابو حسين ماببتقور الامضاء عزابى مخضرم
يمين كان طلع بقور البامية .. معناتها الانامل تتلف في حرير .. ههههههههههههه
جرّاح ضل طريقه ..
Post: #18 Title: Re: البَتُولاب في المنبر .. بدر الدين الأمير م� Author: بدر الدين الأمير Date: 08-09-2021, 02:42 PM Parent: #11
طبعا عبدالله الصديق عدو المرأة احسن زول يحل مشكلة بين زوج وزوجته وهو طوالى بنحاز للزوج غلطان ولا ماغلطان حكى لى انهم كانو شغالين تجارة عملة منتصف التمانينيات هو وصديقو برضو من قرى الجزيرة صديقو عرس وكان مواعد زوجته ان شهر العسل في الاسكنرية بس كان تجارة العملة ضربت الارض المهم صاحبو جو هو وزوجته ونزلو في فندق اركاك الزوجة قالت للزوج مافي شئ يجمع بينى وبينك كازواج غير لمن نصل الإسكندرية الزوج تانى يوم مشى لفردته عبدالله وحكى له المشكلة والحال من بعضو فلس وعطال قام عبدالله قال له استنانى هنا وهى شجرة بقعدو تحتها تجارة العملة بعد شوية رجع عبدالله الصديق شال معاهو تذاكر سفر لمصر قام صاحبو ساله دا شنو عبدالله قال له مش شغلك تشيل التذاكر وترجع الفندق وتقول للمدام انك حجزت وبكر مسافرين مصر ودى تذاكر وهمية المهم انا بجيكم الضهر ولازم التذاكر والجوازات تكون قدام عينى لمن اجيكم الفندق طوالى برسلك تنزل تجيب سجاير وبعد ماترجع انا خمسة دقائق وبطلع قام بعد ماصاحبو نزل يجيب السجاير عبدالله سأل المدام دا شنو قامت هى بكل فرح بكره مسافرين مصر شهر العسل الإسكندرية قام عبدالله قاليها دا صاحبى وبعرفو ملك البخل داير يوديك الإسكندرية في عز الشتاء عشان درجة الحرارة 30 تحت الصفر لاحاتشوفى الاسكندرية ولا الاسواق ولا حاتشترى اي حاجة والاسكندرية بمشو لها في الصيف هسى انا وزوجتى ماشين الاسكندرية في الصيف تشترى العدة الدايرها والملايات وحسب المخطط العريس رجع وبعد خمسة دقايق عبدالله الصديق تخارج وبعد دقيقتن من خروج عبدالله الصديق العروس طوالى اصدرت فرمان للعريس تمش الآن ترجع التذاكر انت قايلنى مغفلة بمشى الاسكندرية في الشتاء نحن بنمش في الصيف عبدالله بحكى لى انو الزولة دى هسى عندها اربعة عيال وماشافت مطار الخرطوم
Post: #13 Title: Re: البَتُولاب في المنبر .. بدر الدين الأمير م� Author: محمد محمد قاضي Date: 08-09-2021, 02:15 PM Parent: #1
التحية والتقدير لكل البتولاب وعاي رأسهم ود الأمير وقباني وبقاي العقد الفريد
Quote: سمعت يا قباني اغنية
البتولا حلاتا يا زولا البتولا ما خمله ما بتلعب في الرمله
أبا ذر الشاعر يا أنيق الكلام، نحنو بتولتنا في تراثنا النوبي كانت فتاة شابة جميلة مثل الملائكة هادية ورزينة ومحبوبة من الكبار والصغار في القرية وفي يوم ما هربت من القرية ولم يجدوا لها أثر وبدأت التخمينات والقصص حولها فقيل أنها ركبت في مركب سفري مع عشيقها وإختفت إلي الأبد باقي القصة شوفوا أستاذنا علي عبد الوهاب يترجمها ليكم من هذه الأغنية التراثية ومهداكم لكم جميعا يا بتولاب:
Post: #15 Title: Re: البَتُولاب في المنبر .. بدر الدين الأمير م� Author: يحي قباني Date: 08-09-2021, 02:31 PM Parent: #13
تكون بتنضم مع واحد في شغل .. تقول ليو خلاص نتقابل في المكتب ؟ حدد لي بكره او بعده .. اصلو ما يقدر .. يقول ليك برجع ليك .. (برجع ليك من وين .. ما ياها البتول) .. ههههههههه و الأعجب لو دايرين يقررو شي .. مش بمش يستشير .. بتول شخصيا بتمسك زمام المبادره ..
Post: #16 Title: Re: البَتُولاب في المنبر .. بدر الدين الأمير م� Author: بسمات الشيخ Date: 08-09-2021, 02:33 PM Parent: #13
محمد احمد قاضي لحن ممتاز واداء في غاية الروعة واذا كانت الاميرة النوبية اميرة معانا كنا استمتعنا بمعاني الكلمات ،ولا شك انها راقية ورائعة، بس هي سافرت لضواحي جزيرة سمت وكبدي على حسب قولها وستعود بعد شهر. ولكن ما حننتظر الشهر واستاذنا علي عبد الوهاب يستعجل بالترجمة
Post: #17 Title: Re: البَتُولاب في المنبر .. بدر الدين الأمير م� Author: يحي قباني Date: 08-09-2021, 02:40 PM Parent: #16
Quote: هههههههه
سمعت يا قباني اغنية
البتولا حلاتا يا زولا البتولا ما خمله ما بتلعب في الرمله
قالوا زوجات بي ازواجهم في حفله كبيره .. فجأه واحد قال نلعب لعبه ..
مسك المايك و قال .. اي راجل بخاف من زوجتو يتقدم خطوتين ..
كلللل الرجال وحاتك اتقدموا الخطوتين .. ما عدا واحد ..
بعد التهليل و التصفيق .. الراجل صاحب المايك جاهو بي صعوبه وسط الجماهير و سأله عملها كيف ؟
قال ليهو سيبك من اتقدم خطوتين .. انا المدام قالت لي ما تتحرك خطوة من هنا .. !!!!
Post: #19 Title: Re: البَتُولاب في المنبر .. بدر الدين الأمير م� Author: بدر الدين الأمير Date: 08-09-2021, 03:14 PM Parent: #17
طبعا المعادل الموضوعى لعبدالله الصديق في شلتنا باربجى هو على مازدا فردته وخصمه ومازدا غير انه تاجر اسبيرات شاطر يشهد له كل ريفى الحصاحيصا اي مشكلة بحلها لك بنكتة أو كلام ساخر والعجب لو كان من حضور الجلسة ملك الت ع رصة والضحك بابكر حسن وبجيكم لمازدا لمن صالح بينى وبين صديقتى اللبنانية وخلاها تضحك طول اليوم
Post: #21 Title: Re: البَتُولاب في المنبر .. بدر الدين الأمير م� Author: محمد بدرالدين Date: 08-10-2021, 05:58 AM Parent: #13
تحياتى ود القاضى بالله نزل الاغنية تانى لو تكرمت .. و التحايا و التقدير ليحى الجميل و كل البتولاب .. و المناصرين و المعادين
مودتى و احتلااماتى
Post: #20 Title: Re: البَتُولاب في المنبر .. بدر الدين الأمير م� Author: محمد محمد قاضي Date: 08-09-2021, 05:29 PM Parent: #1
أختنا بسمات بت الشيخ إن شاء الله إنت وصحباتك الباقيات الصالحات كلكن بتولات 😂 😂 😂 غايتو بتذكروني النساء الصغيرات أو Little Women والكاتبة الأمريكية Louisa Alcott بس ديل كانن أربعة شقيقات وإنتو ما شاء الله خمسة صديقات شقيقات هههههه
Quote: محمد احمد قاضي
ود احمد واحد تاني عضو هنا ومناضل كبير - أنا زول عادي هههه
Post: #22 Title: Re: البَتُولاب في المنبر .. بدر الدين الأمير م� Author: محمد بدرالدين Date: 08-10-2021, 06:00 AM Parent: #20
و فى رواية خليجية البتولاب تسمى : ناقل كفالة
و محبتى و احتراماتى
Post: #23 Title: Re: البَتُولاب في المنبر .. بدر الدين الأمير م� Author: علي عبدالوهاب عثمان Date: 08-10-2021, 08:15 AM Parent: #22
Quote: بتولتنا في تراثنا النوبي كانت فتاة شابة جميلة مثل الملائكة هادية ورزينة ومحبوبة من الكبار والصغار في القرية وفي يوم ما هربت من القرية ولم يجدوا لها أثر وبدأت التخمينات والقصص حولها فقيل أنها ركبت في مركب سفري مع عشيقها وإختفت إلي الأبد باقي القصة شوفوا أستاذنا علي عبد الوهاب يترجمها ليكم من هذه الأغنية التراثية
تحياتي الحبيب الجميل قباني والتحية للحبيب قادنتود على جلب هذه الاغنية الرائعة تحياتي لهميم محمد بدرالدين لم انتبه الى المداخلة اعلاه شكرا
ما قصرت محمد قاضي الحبيب على تلخيص هذه الاغنية
الاغنية طبعاً قديمة جداً جداً لأنها قبل سفر البواخر من كرمة الى كريمة وقبل اللواري والبصات .. أيام سفر المراكب بالنوبية ( بيليك beleek ) الاغنية معروفة انها أغنية رواويس حتى الايقاع متطابق مع حركة المراكب والغناء زمان عندنا كان متاح فقط للرواويس .. ولاحظت بأن اسم بتولا أو كلقب كان زمان كثير التكرار لا تخلو عائلة من الاسم ربما تأثير الفاطميين في مصر واتجاهم لأهل البيت السيدة فاطمة رضي الله عنها تماماً كإنتشار اسم (عشورا) عندنا في جيل الامهات والحبوبات بكثرة تيمناً بالعاشوراء
الاغنية كما معظم الاغاني النوبية فيها مسحة الحزن العميق والبكائيات والسفر والهجرة والفراق لا أعرف لماذا سافرت بتولا ولم تنتظر حتى تتعدل الرياح وتصبح (صلاح) في لغة الرواويس وليس (النو) لأن العبارة تقول ( كب سفريقد ويدكون) بمعنى أنها سافرت بمركب سفري ( بيليك) والمركب كسحت بها (ويدكون) وفي لغة الرواويس كما لدى ابنعوف ( مرة كاسح ومرة منجر ) والشخص لا يسافر في موسم الرياح الكاسحة إلا إذا كان مضطراً وهنا تمكن سر سفر بتولا في ذلك الظرف الصعب ربما هناك أمور فرضت عليها السفر وشخصية بتولا تجسد بعض الظواهر لدى النوبيين مثل قوة شخصية بعض الاناث لا نقول مسترجلة ولكنها تكون قوية ومسموعة الكلمة وتفرض رأيها وهذا كانت المرأة النوبية وربما تسمية البتولاب جاءت من نموذج هذه البتولة التي ركبت المركب السفري وهاجرت من قريتها وهي انثى ولكن رأيها سائد على الذكور .. وهذا النوع من النساء يطلق عليهن لقب ( أوقجيل) وهي المرأة القيادية التي تتساوى مع الرجل .. إذن فإن مصطلح البتولاب له عمق .. بالنسبة للاغنية ايضاً فهي تراثية فيها بعض الابيات الثابتة التي لا تتغير ولكن تضاف اليها الكلمات حسب ما هو متاح اللحن جميل ما في كلام غناء الرواويس الهدوء وعدم رفع الصوت والصراخ كما اغاني الوديان والجبال والصحاري .. الاغنية بها أوصاف في غاية الابداع مثلاً (جوبل) مقابلها بالعربية (رايقة ) وتشبيه بالملائكة
الاداء رائع وجميل خاصة تلك الصغيرة صوتها ملائكي هذا النوع من الاغاني ذات اللحن الفريد هي كونت موهبة الفنانين النوبيين