Quote: عارف يا الشيخ أراد الله يمتحني امتحان عسير في حبي لي بحري وعدم وجود ما يربطني بي امدرمان ... مافي كراهية لكن مافي كيميا ولا فيزيا ولا برمبل ولا طرماي زاتو يربطني بالمكان ولا ناس امدرمان ... إرادة ربنا جعلت نسيبي أبو زوجتي يسكن الثورة الحارة ١٣ في نفس العام الذي قررت فيهو الزواج لأسباب (تجارية) تخصه ... غايتو الشي المتأكد منو ما حصل بيتا (نمتا) خارج بحري وانا موجود داخل المديرية او الولاية .. (دي لي ولدنا الزغير مونتا) ... عارف يوم العرس غادرنا بيت العرس ٣ صباحا واخدنا ترانزيت في فندق أراك في الخرطوم نص يوم ومن ثم إلى شهر العسل في بلاد برا ... رجعنا وكان الإجازة بقى منها ٥ يوم ... ال ٥ يوم دي كانت امتحان حقيقي ... العروس المفروض تقضي آخر أياما مع أهلا حيث ينتظرا اغتراب طويل ... وانا عندي مشكلة كتمت نفس كل ما ادخل امدرمان ... بقيت من ما تصبح ألقي (شوق السحابه الراحله) متملكني ادور ألقى رقبتي في امدرمان ... اقعد ساعة ساعتين نفسي اتخما ارجع بحري ... ساعة ساعتين ألقى رقبتي (بقيت ضعيف) تاني ادور على امدرمان ... عادي ٤ او ٥ مرات في اليوم تشيلني السحابة توديني وتلم فيني خمة النفس ترجعني ... شفتا بحري دي عذابا لذيذ كيف .. طبعا نسيبي اخد قرارو ومن أول إجازة رجعنا فيها لقيناهو استقر في بحري ... أنا غايتو على قناعة (تضامنية) بأن بحري هي الحارس الأمين لي عاصمة البلد وهي التي بها (أوتاد الأرض) الخليفة ود بدر شرقا وسيدي إبراهيم الكباشي شمالا والسيد المحجوب والشيخ حمد والشيخ خوجلي والسيد علي الميرغني وزي ما قال الخليفة الزبير (والدي رحمة الله عليه) بحري هي التي تبعد الشر عن العاصمة وقيل السودان كلو ... الملاحظة الجديرة بالاهتمام إنو لم يحصل في بحري أي نوع من أنواع الدشمانات والقتال الذي حصل في امدرمان والخرطوم على مر التاريخ المنظور ... عارف يا قبه بعض من طمأنينة النفس التي تعتريك وهي ظاهرة في ما تكتب هنا سببها السنتين القضيتم في بحري ... ابوحسين قتا لي ناس امدرمان سمحين ... ههههه ... عادي تقشرو بي حق غيركم ما الاعلام عندكم ....
مفروض نطبع المداخلة دي ونوديها لي معتمد بحري- يعلقها في مداخل بحري كباري شمبات والنيل الازرق وكوبر ونسخة تكون معلقة في محطة القطر في الجيلي عشان الناس تعرف محبة الناس لي بحري. بالله كتر لينا من الحاجات دي- باقي ابو حسين وقباني ومنتصر قومو لينا نفسنا:) اي تعليق او إقتطاع لمداخلة صلاح الزبير - ح يفسد القضية وودها.
04-18-2021, 11:09 AM
الشيخ سيد أحمد الشيخ سيد أحمد
تاريخ التسجيل: 07-14-2008
مجموع المشاركات: 2725
بركات (الحفيان) ما عنده غير مقابر حلة حمد و درمة بتجدع بين حمد النيل و احمد شرفي و البكري
بالمناسبة بركات عايش ؟
هههههههههههههههه
قباني يا قلب- ضحكتني ضحك:) غايتو مداخلتك دي تكون كتبتها وباقي للآذان ربع ساعة. قبلت بينا على المقابر -الله يدينا العمل الصالح. الموت حق- لكن الحياة حلوة في بحري:)
04-18-2021, 11:57 AM
الشيخ سيد أحمد الشيخ سيد أحمد
تاريخ التسجيل: 07-14-2008
مجموع المشاركات: 2725
Quote: ما عندهم الحبة في الكورة .. التحرير جاب جيمس فقط .. لعب للفريق القومي و جاب معاهم كاس افريقيا سنة 70 قبلو ناس سعد دبيبه و الزين قديم .. بحري جابت السد العالي سليمان فارس و لعب في الهلال .. بعد داك الترابة ما عندهم .. التحرير و الاتحاد كانو ملطشة للمريخ و الهلال .. و بعد داك جات كوبر كنا بنديها بالتمانية ..
تعرف يا قبة (عيسى حياتو) كان رئيس الإتحاد الأفريقي - قال على القارة ألاوروبية أن تتوقف عن سرقة المواهب الأفريقية. دي ياها زاتا الإنطبقت علينا في بحري. كل ما تظهر مواهب بتكون عيون الهلال والمريخ مركزين معاها - والقصد طبعآ انو غفقار أندية بحري وتحديدآ التحرير من المواهب. انت عارف اذا مشيت رابطة (الدناقلة) وشفت الميادين والمواهب الموجوده كنت ح تعرف انو فعلآ بحري ولادة. كان المرحوم (طارق عبدالدائم) كالنحلة في تنظيم المنافسات ومتابعة النشئ. عارف شارع المدارس في الشعبية فيهو كم ميدان او ملعب كورة- ملعب فريق الجهاد وملعب فريق الصداقة وملعب فريق الأمراء بدون ما أحسب ليك الملعب المقابل لي بيت الأستاذ الكابلي جنب مدرسة القابلات. تخيل يا قبة ده شارع واحد- والشارع الواحد ده وتحديدآ ملعب فريق الجهاد أنجب (عزالدين الصبابي وياسر أبوورقة وصلاح شكوكو )- (إستاروستا) مدرب الفريق القومي قال انو عزالدين الصبابي امهر لاعب سوداني- عزالدين الله يرحمو كان مشارك في مباراة ليفربول ضد منتخب الخرطوم- والغريبة المدرب كان السد العالي (سليمان فارس). اما إذا مشيت ليك جهة ناس صلاح الزبير (المزاد) بتلقى المرحوم (شيخ إدريس) و (عبدو الشيخ) و (حمد كمال)- المساحة دي يا قلب بتتقطع في تلاته دقائق. اما اذا مشيت ليك على جهة ناس (المسلمي) هناك بإتجاه الصافية وغادي غادي :)بتلقى( هشام الطيب ومبارك سلمان و فايز نصرالدين و هيثم مصطفى ). يا قبة ماعايز اسوقك لي (كوبر) لأنو (جعفر عبدالرازق) ممكن يعمل ليكم (فلايت) انت وابوحسين ومنتصر :) ياخي بحري في الكفر لا تقارن- سرقتو مواهبنا وخليتونا نتلفت:).
04-18-2021, 12:32 PM
الشيخ سيد أحمد الشيخ سيد أحمد
تاريخ التسجيل: 07-14-2008
مجموع المشاركات: 2725
Quote: مالو كان مسحوك بي تراب الضريح يا الشيخ والله لو ما تراب الضريح ده كنت بقيت شيوعي ساكت
ههههههههههه
يا عادل المسوح ما بناباهو ابدآ طالما الجائزة كانت حلاوة:) الغريبة الحلاوة زاتا طعمها غير...مع انو كنت بحب جدآ حلاوة (قصب) لكن حبوبتنا ماعارف كانت من وين قاعد تجيب الحلاوة دي- قطع شك مش من ام درمان:) لا واللذيذة يوم الحولية كمان- ده بيكون يوم تاريخي لأنو فيهو دلع عجيب..الجماعة بتاعين (الطبليات) بكونو (قانصين) قدام المسجد- حلاوة أشكال والوان- اول حاجة تدخل الضريح وتسمع الذكر (دائرة) كبيرة جدآ والحيران لابسين أخضر وصوت النوبا يسمع المابسمع - صورة راسخة في الأذهان_ وانت بالك كلو في الطلعة والحلاوة الفي الطبلية ما تخلص:) اها لمن تجي طالع بتقعد تعزل في الحلاوة بالألون والأحجام والطعم. يا سلام على بحري ياخي.
04-18-2021, 12:51 PM
الشيخ سيد أحمد الشيخ سيد أحمد
تاريخ التسجيل: 07-14-2008
مجموع المشاركات: 2725
شكل المناسبات (الحفلات) في بحري متفرد- مابتلقاهو في اي حتة رغم انو العادات السودانية متشابهة. يعني اذا في مناسبة في الحلة و ح تكون في حفلة وكده -تمشي سوق بحري(حاج ياسين) وإشتريت ليك قماش ومشيت بعداك لي (كاميليو) في سعد قشرة عشان يفصل ليك بنطلون- تشوف ليك قميص ولا تي شيرت- لزوم الحفلة. لمن تمشي الحفلة من المستحيل تلقى ليك إتنين لابسين زي بعض- إختلاف الأذواق ده بيأكد ليك أنو بحري فيها تنوع جمالي فريد. حتى (البنوت) يكونو لابسات ألبسة مختلفة- طبعآ أكيد بعدما يجهزوا تلاتة أو اربعة لبسات - أصحي يا أميرة حسين :) شكل المشاركة في الحفلات الإجتماعية بين الشباب مختلف خالص- رقيص متزن بعيد عن (الشتارة)- مستحيل تلقى ليك زول في بحري زمنو فارق لانو نوبة الذكر في الضريح شكلت الإيقاع الاساسي للناس- ياخي حتى (القمري على الغصون) زمنو زابط :) في أم درمان بيكون في زول شليق كده بيقدم الفنان ويقول ليك (ما زال الليل طفلآ يحبو)- ما عارف الليل في أم درمان ح يمشي متين:) في بحري مافي كلام زي ده- مافي ليل يحبو ولا نهار جايي ناطي- مافي تقديم للفنان لأنو الفن عندنا هنا رسالة والفنان نجم مجتمع يطلع المسرح وتكون هناك عاصفة من التصفيق من الناس المتابعة...إذا عندك قروش محرقاك بتمشي تجيب مذيع راسو عديل يقدم ليك الحفل. شخصيآ شاهدت (عوض إبراهيم عوض) يقدم حفل عرس- وبتذكر عبارة قالها وهو ماشي على سيارتو لي ناس الحفل وهم بيوصلوهو لي سيارتو قال ليهم (ليت إحسانكم يجزيني شكرا) الحفل الوحيد الكان حضرتو وكان فيهو مقدم للحفل- غير كده ماعندنا البدعة دي:) قالو إبراهيم عوض عمل الموضه في قصة الشعر - الحلاق قطع شك كان من بحري:)
04-18-2021, 03:32 PM
Amira Hussien Amira Hussien
تاريخ التسجيل: 11-26-2016
مجموع المشاركات: 1727
الله يحييك يا أميرة. لازم شوية (آكشن) لأنو انا لاعب ضد تلاتة كلهم محترفين(أبوحسين و قباني ومنتصر:)
Quote: امدرمان اصلا مهد الحضارة والاناقة من زمن الاتحاد النسائى وتياب التوتال سيداتا وبناتا ما بتلحقن ذوق ورقى واصالة
اها يا اميرة بالنسبة للاناقة دي - ام درمان ما شفت فيها الجلاليب -وفي الجلاليب وانا قاطع جنب سوق العناقريب:) لكن بأمانه لمن اعاين لي (كابلي أو ابوداؤود أو صلاح بن البادية بشعر انو ساكن في الموقع الصحيح -لأنو بنقدر نستلهم من النماذج دي- الحالة لسه ما جيتك لي (باتا) في المؤسسة ولا بوتيك صلاح القاضي ولا بيت الازياء مع انو جديد نسبيآ.
اما بخصوص جنسنا الالطف - دي حاجة تانية ياخي.انا اتخيل لي الموضه كانت بتبدأ من (سلوى بوتيك). ام درمان دي البوتيك في عضمو خليهو إسم بوتيك ساكت ما حصل لاقاني:) اشهر (ترزي) نسائي في عموم الخرطوم وماجاورها هو (الطاهر) في الشعبية آخر محطة. هذا مع تقديرنا وإحترامنا ومحبتنا الكبيرة الى حواء في كل السودان.
قباني كان بيجينا في بحري يشتري من سعد قشرة ويمشي ام درمان يقبض الجو بالجماعة:)
04-18-2021, 06:44 PM
الشيخ سيد أحمد الشيخ سيد أحمد
تاريخ التسجيل: 07-14-2008
مجموع المشاركات: 2725
احيانآ ممكن تكون قاعد في حلة حمد وتسمع ليك حفلة كاملة بالمرحوم (حمد الريح) او ابراهيم خوجلي. مش انت براك- الناس كلها جو البيت وتسمع صوت الكمنجة والزغاريد. في الوكت داك بتخيل انو ناس ام درمان اذا قالو ليهم إختارو غنية لي (حمد الريح) ح يقولو (خليتني ليه عشت الشقا:) من تتحرك من شمبات و خضر بشير والأوصفوك_ بعد تنتهي تمشي لي قدام تسمع ودالبادية (من هواك). تتحرك شوية توصل محمود (الحوت) تسمع (يا عمر)- تلف منو يمين تلحق (كابلي) شغال في (حنانك يا حالم). قبل الساعة 12 تمشي على الدناقلة تحصل (ابوداؤود) بيغني (من زمان)_ ومنو على (ايوب فارس) يغني في (قلت ازور حبيبي). ده كلو إذا جيت ماري فيهو وعايز تشم هواء حلو- تتحرك على فندق قصر الصداقة وتسمع من توتي (حمد الريح). شوفو إمتداد الجمال ده. اها يا جماعة أم درمان فيها فندق- اوعكم من اللوكانده - عندكم فندق ولا نديكم فندقنا تدقو تدونا :)
04-18-2021, 08:36 PM
الشيخ سيد أحمد الشيخ سيد أحمد
تاريخ التسجيل: 07-14-2008
مجموع المشاركات: 2725
سلام اسامة العريفي. ياخي معليش - مداخلتك كانت محشورة في النص وانا شغال قاعد اطقطق ليك في الجماعة :)
Quote: تعرف اخونا الشيخ الزول البيعمل الخلطة بتاعت الباسطة دي اسمو موسي من ابناء كردفان اذكره جيدا وعندما يجهز عمل الباسطة يقوم الخال عمر مغدادي بتسقية الشربات علي الباسطة بقوم بالعمل هذا بنفسه ولازال علي هذا النهج ممنوع زول يقوم بالتسقية غيره
يا سمسم الزول ده من كردفان لكن قطع شك ساكن بحري وأخد الخلطة من بحري- حاجة طاعمة زي دي لازم تشبه بحري:)
أها يا اسامة- حصل يوم جيت علينا بي جاي في بحري- شيخ الزبير قال الحرارة في بحري اقل. يعني النسيم الفايح طيبو من تالا بحري:) تقبل اسفي لأنو اخرت عليك الرد- واهدي ليك الحنجرة البحراوية الأصيلة (ابوداؤود). وعبرك الاهداء إلى الاخ العزيز - الحاضر الغائب (معاوية محمد) يجده كما نتمنى بخير وعافية.
04-18-2021, 08:54 PM
الشيخ سيد أحمد الشيخ سيد أحمد
تاريخ التسجيل: 07-14-2008
مجموع المشاركات: 2725
Quote: ياخي مشوار امدرمان دا خاصة حي الاسبتالية كان بعمل لينا دوار
أحمد ياسين يا حبيبناوين الحي ده كمان_ غايتو تعيش كتير تشوف كتير. بالله عندهم حي اسمو الإسبتالية؟؟ ياخي بلدية أم درمان مافيها زول فنان كده بتاع تسميات. انت عارف تسميات زي دي ممكن تاخد ليك بيها سيك :)
اييييييه أبو داؤود ... بالله شوف الزول دا والتطريب الراقي والعالمي في البيت دا :- أنا في إنتظار عطفك مرت علي سنين ... مبااااالغه ... يا قبه ما عارف حضرتو في الخرطوم القديمة كان الأستاذ محمد توم التجاني بجيب ابو داؤود كل ثلاثاء في مسرح المدرسة جلسات إستماع ... وكيل وزارة التربية آنذاك كان مدمن للإستماع لأبوداؤود حد الثمالة ... وهم اللتنين من أولاد بحري ...
04-18-2021, 11:01 PM
اسامه العريفي اسامه العريفي
تاريخ التسجيل: 02-28-2014
مجموع المشاركات: 754
قالو العريس امدرماني فرحان لافي علي اهلو يعزم فبهم لي عرسو ... مشى لي واحد من اعمامو سألو العروس من وين ؟؟ العريس قال ليه من بحري ... العم قالو وشو اتغير .. مالك يا عمي ؟؟ و الله يا ولدي سيرة تقطع الكبري دي ماسيرة ... و عروس ما تقدر تمشي لي اهلها بالرقشة اخير منها العزوبية ... قال بحري قال ...... 😂😂😂😂😂😂😂😂😂😂
04-19-2021, 03:39 AM
يحي قباني يحي قباني
تاريخ التسجيل: 08-20-2012
مجموع المشاركات: 18708
إسبتالية دي كلمة ( تركية) - عشان كده الزول مايستغرب من ام درمان لي هسه مع العناقريب والحقيبة:) معقول يا جماعة - ناس ام درمان ديل قولو ليهم الاتراك (شتتو ) زماااان:)
04-19-2021, 12:12 PM
الشيخ سيد أحمد الشيخ سيد أحمد
تاريخ التسجيل: 07-14-2008
مجموع المشاركات: 2725
Quote: قالو العريس امدرماني فرحان لافي علي اهلو يعزم فبهم لي عرسو ... مشى لي واحد من اعمامو سألو العروس من وين ؟؟ العريس قال ليه من بحري ... العم قالو وشو اتغير .. مالك يا عمي ؟؟ و الله يا ولدي سيرة تقطع الكبري دي ماسيرة ... و عروس ما تقدر تمشي لي اهلها بالرقشة اخير منها العزوبية ... قال بحري قال ...... 😂😂😂😂😂😂😂😂😂😂
😂😂😂😂😂
معناها عمك ما رضيان بالعروس- وشغل لي ولدو النغمة الحزينة :)
عليك الله يا ابوحسين شفت (الشليقين) بتاعين مازال (الليل طفلآ يحبو)..انت عارف ديل اذا جونا في بحري مابنقول ليهم اي حاجة- لكن لمن نجي نوزع العشا ب(نشخت - نتجاوزه ) عادي:) يقعد بي جوعو كده لمن يتخارج - اها مرة تانية لمن يمشي حفلة بيكون قاعد بدون شلاقة.
04-19-2021, 12:27 PM
الشيخ سيد أحمد الشيخ سيد أحمد
تاريخ التسجيل: 07-14-2008
مجموع المشاركات: 2725
Quote: نغني للسودان نخبتو الخُلّاص فيهم امدرمان ليها " وضعاً خاص " ..
تعرف يا قبة- اجمل حاجة في الفيديو الجبتو ده - صورتك البي جمبة دي. قميصك اللابسو مع البدلة دي - زي التقول شفت زيو كده لابسو (ودالبادية:) اظنك اشتريتو من (سعد قشرة ) 😂😂😂😂😂.
04-19-2021, 12:19 PM
ABUHUSSEIN ABUHUSSEIN
تاريخ التسجيل: 08-14-2002
مجموع المشاركات: 39330
Quote: إسبتالية دي كلمة ( تركية) - عشان كده الزول مايستغرب من ام درمان لي هسه مع العناقريب والحقيبة:) معقول يا جماعة - ناس ام درمان ديل قولو ليهم الاتراك (شتتو ) زماااان:)
يا شايقست ما أتراك بس .... معاهم هنود و أقباط و يهود كمان ..... خلطة ما تلقاها إلا في أمدرمان بلد الناس الحٌنان بعدين شايفك بتتريق من العنقريب و سوق العناقريب شكلك كدا جديد في الحنكشة يا شايقست وحات الله لو جربت العنقريب الهبابي في ضل الشجرة في نهار رمضان ما بتتريق كدا ....
04-19-2021, 12:37 PM
الشيخ سيد أحمد الشيخ سيد أحمد
تاريخ التسجيل: 07-14-2008
مجموع المشاركات: 2725
Quote: ياخ الواحد طول من السودان توتي بقت تبع بحري ، ياخ عندك رمضان حسن ممكن تنسبوا لي بحري في فترة ما 😂
😂😂😂
انت شفت حاجة يا منص.مع النسيم الهابي من تالا توتي وجايب ليك صوت المكرفون. يوم كده اشرب Turkish coffee في فندق قصر الصداقة. ح تجي راجع تقول (نمرة 2) تبع بحري 😂 يازول دي قعدة مامنظور مثيلا.
ام درمان فيها فندق😂😂
04-19-2021, 12:45 PM
الشيخ سيد أحمد الشيخ سيد أحمد
تاريخ التسجيل: 07-14-2008
مجموع المشاركات: 2725
ابو حسين والله عاد جلسة مافيها كلام. لكن ده عنقريب ولا ( زحلقانية :)- يا زول ده ما معتمد العنقريب ده - لأنو فيهو فتلة. ده ممكن يعمل ليك غضروف في الأضان :) تجيب لينا عنقريب.
Quote: يا شايقست ما أتراك بس .... معاهم هنود و أقباط و يهود كمان ..... خلطة ما تلقاها إلا في أمدرمان بلد الناس الحٌنان بعدين شايفك بتتريق من العنقريب و سوق العناقريب شكلك كدا جديد في الحنكشة يا شايقست وحات الله لو جربت العنقريب الهبابي في ضل الشجرة في نهار رمضان ما بتتريق كدا ....
قالو لكل مقام مقال- هسه حصل شفت ليك زول أكل ليهو قراصة بي (شوكة وسكينة :) هناك لمن نمشي جهة محل الترابلة وحتة الزراعة بنقعد ونتوهط في العنقريب- لكن هنا محل الرئيس حايم والقطر قايم والزهور صاحية_مش ممكن تكون نايم :)
04-19-2021, 02:25 PM
الشيخ سيد أحمد الشيخ سيد أحمد
تاريخ التسجيل: 07-14-2008
مجموع المشاركات: 2725
ابو حسين ومنص وقبة- وناس أم درمان. كدي شوفو العنقريب ده.
https://top4top.io/
ده ياهو العنقريب الهبابي...يستعمل مرتين صباح ومساء على الريف وليس على الحضر :)
الزول الصور العنقريب ده قطع شك ماسمع وصية من (حبوبتو) - لأنو في إشتراطات للإستعمال كالآتي:
المخده والنوم يكون على الجانب الآخر وليس على جانب الشناط . تمنع المراتب بالنهار- لزوم التهوية. يمنع الجلوس على المخدة.
عليك الله يا ابوحسين بالمعلومات دي مش عادي ممكن اكون زي الجماعة المورمين فشفاشنا -ناس باحث في التراث:) يا منص - أخد ليك نقلة من المعلومات دي ح تستفيد وانت داخل على السوق :)
04-19-2021, 08:18 PM
الشيخ سيد أحمد الشيخ سيد أحمد
تاريخ التسجيل: 07-14-2008
مجموع المشاركات: 2725
يا جماعة كدي اسمعو الغنية العجيبة دي. غنية احبها جدآ- وشوفو بالله الحتة بتاعت (أبدع في تفانينو). غنية فيها روح تأمل ونفس صوفي عميق جدآ. دي الحالة لسه مامشيت ليكم جهة (الشفيع وودالقرشي). شغال معاكم حدود شمبات بس. ده منتج حصري - شوفو ليكم عنقريب واقعدو اسمعو :)
كدي شوفو ليكم ضل واقعدو اقرو عن الزول ده و(عماد البليك) كاتب فيهو شنو.
Quote: لجمال السوداني وقصته مع "الحب"
ما لا تعرفه عن شاعر الجمال السوداني وقصته مع "الحب" تابع العربية. نت – عماد البليك نشر في: 17 ديسمبر ,2018: 03:04 م GSTآخر تحديث: 17 ديسمبر ,2018: 03:41 م GST
كثيرة هي الأساطير التي نسجت حول هذا الشاعر السوداني، لاسيما تلك التي يرددها أهل الخليج، وبعضهم يقف في معارض الكتب ليسأل البائع: "هل لديك ديوان شعر لذاك الشاعر السوداني الذي تغنى بالحب والجمال". "ذلك الذي تغزل في فتاة وقال إن رموشها قاتلة!" "ذلك الذي نعى حظه وقال إنه كدقيق منثور في يوم مليء بالغبار!" وقصص لا تنتهي!! بعضهم يتذكر اسمه والبعض لا، وقد يتذكرون أبياتًا من الشعر ليست له في واقع الأمر، فالقصص حوله لم تنته والأساطير المنسوجة المتعلقة به. حلفاية الملوك إنه إدريس محمد جماع (1922 – 1980) الذي ولد في مدينة الخرطوم بحري بالتحديد في حلفاية الملوك المتاخمة للمدينة من الشمال، التي تعرف بإرثها التاريخي وكونها كانت مقراً لحكام وسلطة ملوك العبدلاب منذ قرون خلت. لقد عُرِّف إدريس جماع كما يختصر اسمه بديوان شعر يتيم هو "لحظات باقية" الذي يعبر عن حال الشعر وهو ينسج الخلود لصاحبه، وعبر هذا الكتاب الوحيد ظلّ جماع حاضراً إلى اليوم في قلوب السودانيين سواء بشعره المسطور أو المغنى في الأغاني السودانية من قبل عدد من كبار المطربين.
كذلك فإن أجيالاً تعرف جماع عبر قصائده المقررة في مناهج اللغة العربية في مدارس البلاد. حياته تنقلت بين طفولته في حلفاية الملوك، حيث التعليم التقليدي الديني، ومن ثم المرحلة المتوسطة بأم درمان ثم كلية المعلمين ببخت الرضا، فالسفر إلى مصر، حيث أكمل تعليمه هناك بدار العلوم في مجال اللغة العربية، فالعودة للعمل بمجال التعليم في السودان في فترة المخاض الوطني باتجاه الاستقلال من الاستعمار الإنجليزي. رومانسية ووطنية وجمال وقد كان له طابع جمع بين التيارين الرومانسي والوطني في شعره، بيد أن قضية التغني بالجمال والحب كانت هي مركز قصائده التي تفيض بمعانٍ ساحرة في هذا الإطار. قضى جماع أغلب عمره في مهنة التدريس وهو يتنقل في العديد من المدارس بمدن السودان، قبل أن يقعده المرض الذي استهلك روحه وشعريته، وحرم الناس من إبداعه الذي كان ربما تدفق أكثر لو أن الرجل ظل على قيد الحياة. وقد تميز جماع بقوة التعبير الجياشة عن الذات من خلال شعره البسيط في المعاني والعميق في الدلالات، كما أنه تناول القضايا ذات البعد الوطني والقومي بذات الروح الجمالية. وعلى المستوى العربي فقد اشتهرت له قصائد مثل "أنت السماء" التي غناها المطرب السوداني الذي ذاع صيته في الخمسينات والستينات بالبلدان العربية، وهو سيد خليفة، وفيها يقول عن المحبوبة: دنياي أنت وفرحتي ومنى الفؤاد إذا تمنى أنت السماء بدت لنا واستعصمت بالبعد عنا هلا رحمت متيماً عصفت به الأشواق وهنا معاناة مع المرض النفسي لقد كتب جماع القصيدة التقليدية ذات البحور الخليلية، لكن المعاني عنده كانت تفيض بالإحاسيس والجمال وتحكي عن شقاوة الإنسان في هذا العالم وطموحه ولهفة العيش بسلام. وقال عنه الناقد المصري الدكتور عبده بدوي في كتابه "الشعر الحديث في السودان: إنّ أهمّ ما يميّز الشاعر جمّاع هو "إحساسه الدافق بالإنسانية وشعوره بالناس من حوله ولا شك في أن هذه نغمة جديدة في الشعر السوداني". وقد رحل إدريس جماع وخلّف وراءه فراغاً وجراحاً لدى الأصدقاء والمحبين، لاسيما أنه عانى من مرض نفسي لفترة طويلة، حتى إنه أدخل مستشفى الأمراض العصبية بالخرطوم بحري، وأرسل للعلاج أيضًا في لبنان دون جدوى.
04-19-2021, 08:56 PM
ABUHUSSEIN ABUHUSSEIN
تاريخ التسجيل: 08-14-2002
مجموع المشاركات: 39330
Quote: يا بحراوي ما تتسلبط في الشفيع بيت الذكريات المربوع البعدنا
يا منص- الثنائي (علاء الدين حمزة و محمد عبدالكريم القرشي) من بحري- تحديدآ حلفاية الملوك. الشفيع سكن جنبهم وعمل الابداع ده كلو. حبيبنا بكري (اب صلعه) ان شاء الله يدخل البوست ده ويأكد ليك كلامي - واذا بكري عامل تقيل بي صلعتو البتلمع دي :) اهو معانا صلاح الزبير.
بحري فيها سر عجيب ياخي- بالله شفت نفحات الصباح والمرحومة (ليلى المغربي)- الشغل الجميل ده كان خلفه المرحوم (سعدالدين ) - برنامج شكل علامة فارقة في الإذاعة - اها يا منص (سعدالدين) من بحري وبرضو من الحلفايا. سعدالدين ده كتب ما كتب -لكن تبقى اغنية (العزيزة) هي الاشهر بين ما كتب من اشعار. ياخي تمشي على (الماحي سليمان وحمزة سليمان) ولا تمشي على (عابدة و اسامة الشيخ). ياخي بحري منبع إبداع لاينضب.
بعيدن يا منص سمعت غنية خضر بشير؟؟ ان شاء الله تكون آمنت :)
04-19-2021, 09:08 PM
الشيخ سيد أحمد الشيخ سيد أحمد
تاريخ التسجيل: 07-14-2008
مجموع المشاركات: 2725
Quote: الشناط ... ؟؟؟ 😂😂😂😂😂😂😂😂😂😂 اسمو الكراب يا عربي يا وهم .... 😂😂😂😂
انا طبعا مابقدر اغالطكم في اشهر منتجاتكم 😂
اها الشفيع عايزين تعملوهو منكم- الزول اصولو من شندي وجا الخرطوم بالقطر. اول حاجة نزل عندنا- ومشى كمل لفتو وزبط امورو في الإذاعة وجانا راجع وشكل (ون تو ) مع (ودالقرشي). زي ماقلت ليكم -إذا ما الإذاعة كان غنيتو ظلموه😂😂😂
04-19-2021, 09:31 PM
الشيخ سيد أحمد الشيخ سيد أحمد
تاريخ التسجيل: 07-14-2008
مجموع المشاركات: 2725
زمان بنمشي الفرن مجموعات- نسوان الحلة يكون قاعدات في بيت ويخبزو. اي واحده تطلع تنادي اول واحد تشوفو في الشارع يجي و يشيل ليهو صينية ويمشي على الفرن. الحلة كلها بتكون شغالة رايح جاي - اي سبيل في الشارع بتكون مويتو كملت.مافي زول بيكون صايم من العتالة ديل😂😂😂 الموضوع ده بيستمر تقريبآ من عشرة صباحا لغاية عشرة او حداشر مساء. تلاتة اصناف - بسكويت وكعك ناعم و بتيفور(النوع الاخير ده بيكون ما معروف في ام درمان😂 انا ماكنت بالحيل على الكعك والبسكويت...لكن عندي مزاج عجيب مع (البتيفور) و قصة الالوان الكتيرة دي- وفي واحد كده بيكون معاهو (كاكاو)- ناس البيت يوصوك توصية تقيلة - يا ولد -ماتأكل في الشارع البتيفور ده بيطلع من الفرن سخن - تعال البيت وخليهو يبرد واكلو. سخن شنو يا جماعة- حاجة بتعملوها مرة واحد في السنة معقول تقعد تنتظر- بإختصار كده الصينية بتجي أظنو ربعها منتهي 😂😂😂
منتصر بيكون شغال يعجن😂 ابوحسين (خبزتو) ولا لسه😂😂
04-20-2021, 01:26 AM
ABUHUSSEIN ABUHUSSEIN
تاريخ التسجيل: 08-14-2002
مجموع المشاركات: 39330
كل أهلنا وأنا ذاتي مستقبلا في بحري ولكن يا الشيخ أمدرمان طعم خاص أنا حبي لأمدرمان عشان سيدي الشيخ الحسن الادريسي ودائرة الادارسة في الموردة يا سلام عندما توسعت دائرة الادارسة شملت بيت فوز وأصبحت ضمن الدائرة حتى كنت أداعب شيخ الادارسة الحالي دكتور تازي الحسن الادريسي اخصائي اطفال وأقول يا ريت كان تتركوا بيت فوز كما هو عشان قريبنا خليل فرح قال ( يا جميل يا نور الشقايق أملا كاسك وأصبر دقايق ) دي فوز وبيتها بقى ضمن الدائرة شوف جمال أمدرمان يا سلام رمز للانسانية والتسامح ما في تناقضات كل له دور فوز نور الشقايق .. والسلام للمهدي الامام .. شوف خليل كيف رفع من مقام فوز ودورها في النضال من أجل عازة (الوطن ) وفي نفس القصيدة يمجد المهدي والانصار ..
ليس ذلك فقط ولكن يمتد به العشق لدرجة القداسة لامدرمان .. عندما يقول ( من علايل ابروف للمزالق من فتيح للخور للمغالق قدلة يا مولاي حاف حالق ) خليل بالاحرام في امدرمان وكأنه في الحج كما بين الصفا والمروة ,,
====== تعرف يا الشيخ مروي ليها اثر وعمق أكثر بحري بل هي بمثابة امدرمان مدينة يعشقها الزائر شوف كابلي من بحري ( ما عارف ) ولكن تغنى لمروي وكأنها أمدرمان يا ناس القوز .. بعدين أنتو أهلنا الشايقية عندكم مشكلة ما تعرفوا ( تصلحوا موية التمر) كويس نحن في دنقلا نتفوق عليكم في الطعم والرغوة .. الفرق كبير كان ( اللهم اني صائم ) معليش ذكريات ... طيب الكابلي ده لو خلى القوز وأخذ كاس من ( موية دنقلا ) كان قال كلام آخر يا سلام رجعتنا أيام الشباب ..
======= والمهم كمان محمد عوض الكريم القرشي ده من عندينا من السليم شرق دنقلا من أجمل المناطق زراعة وبشر أذكره اخوه محي الدين عوض الكريم كان نزل في الانتخابات ايام نميري مجلس الشعب ضد احد افراد الادارة الاهلية .. وفي دائرتنا كنا معاه لأن كان كاريزما وحماسي جداً رغم أنه لم يكن مايوي .. وفاز في الانتخابات ..
في برنامج برش في قناة الخرطوم قبل يومين كانوا في امدرمان معظم الناس اصولهم من الشوايقة والدناقلة .. حتى المهدي
كمان مقابل ادريس جماع .. التيجاني يوسف بشير
الحبيب الشيخ شكرا كثير كثير يا جميل .. التراويح بقى مختصر عشان الكورونا بعدها على الطول رجعت للبوست
لم أراجع ولم اعد قراءة البوست عشان ما اغير
شكرا تاني مليون يا رائع واصل هذا البوست
04-20-2021, 09:15 PM
Abdelrahim Mohmed Salih Abdelrahim Mohmed Salih
تاريخ التسجيل: 04-13-2016
مجموع المشاركات: 958
رمضان مبارك يا الشيخ بحسب تصنيف الامير الحائر توفيق نحنا ناس ضهارى ساى والاسم الاصح ناس اقاليم قبل ان تتفنن الانقاذ فى الاسماء وفى العملات فى السجل الدائر اقف على الحياد مشجعا اللعبه الحلوه والتعليق الظريف حتى الان وانت فريق الرجل الواحد تسجل صمودا وتقدم خفيف مع ظنى ان اولاد ام درمان لم يستخدموا اسلحه الدمار الشامل والهجوم الخاطف من الزوايا وعليك بتشجيع حلفائك(للدعم السريع ) للمؤازة والجرجره لنا وشيجه صله خاصه ب ام درمان حيث شهد المستشفى العسكرى ل قوات دفاع السودان (الاسم القديم لما يعرف الان ب القوات السودانيه المسلحه)ميلاد الوالده امد الله فى عمرها ونفعنا بها ورغم ذلك سنظل على حياد آمن وامين:)
04-20-2021, 10:12 PM
الشيخ سيد أحمد الشيخ سيد أحمد
تاريخ التسجيل: 07-14-2008
مجموع المشاركات: 2725
كل أهلنا وأنا ذاتي مستقبلا في بحري ولكن يا الشيخ أمدرمان طعم خاص أنا حبي لأمدرمان عشان سيدي الشيخ الحسن الادريسي ودائرة الادارسة في الموردة يا سلام عندما توسعت دائرة الادارسة شملت بيت فوز وأصبحت ضمن الدائرة حتى كنت أداعب شيخ الادارسة الحالي دكتور تازي الحسن الادريسي اخصائي اطفال وأقول يا ريت كان تتركوا بيت فوز كما هو عشان قريبنا خليل فرح قال ( يا جميل يا نور الشقايق أملا كاسك وأصبر دقايق ) دي فوز وبيتها بقى ضمن الدائرة شوف جمال أمدرمان يا سلام رمز للانسانية والتسامح ما في تناقضات كل له دور فوز نور الشقايق .. والسلام للمهدي الامام .. شوف خليل كيف رفع من مقام فوز ودورها في النضال من أجل عازة (الوطن ) وفي نفس القصيدة يمجد المهدي والانصار ..
ليس ذلك فقط ولكن يمتد به العشق لدرجة القداسة لامدرمان .. عندما يقول ( من علايل ابروف للمزالق من فتيح للخور للمغالق قدلة يا مولاي حاف حالق ) خليل بالاحرام في امدرمان وكأنه في الحج كما بين الصفا والمروة ,, ======
والله للامانه يا استاذ علي - اقول ليك على مضض - فعلآ اولاد ام درمان (ابو حسين وقباني ومنتصر ) منحو البوست جمال وروعة بمداخلاتهم. لكن برضو ح ارشهم ليك رش تقيل :)
الأدارسة على العين والرأس يا استاذنا ما عندنا فيهم كلام. وتقديرنا الى آل المهدي الممتد.
Quote: ====== تعرف يا الشيخ مروي ليها اثر وعمق أكثر بحري بل هي بمثابة امدرمان مدينة يعشقها الزائر شوف كابلي من بحري ( ما عارف ) ولكن تغنى لمروي وكأنها أمدرمان يا ناس القوز .. بعدين أنتو أهلنا الشايقية عندكم مشكلة ما تعرفوا ( تصلحوا موية التمر) كويس نحن في دنقلا نتفوق عليكم في الطعم والرغوة .. الفرق كبير كان ( اللهم اني صائم ) معليش ذكريات ... طيب الكابلي ده لو خلى القوز وأخذ كاس من ( موية دنقلا ) كان قال كلام آخر يا سلام رجعتنا أيام الشباب ..
كابلي غنى لي (مروي) وسكن في بحري- ياخي أنا نشأت بيني وبين بيت كابلي ستة منازل. تخيل الصباح وانت طالع ماشي على المدرسة تشوف الزول البديع ده بإبتسامته الجميلة دي وتمشي مدرستك- ناس ام درمان (عجاجة) من قدام الباب لغاية مايصلو سوق العناقريب :) ياخي ام درمان دي فيها عجاجة تعمل صداع في (الركبة :) والعجب اذا مشيت جهة (جامع فيصل) ودخلت يمين - عندهم سوق هناك ماعارف اسمو سوق شنو- ده كمان فيهو عجاجة (دبل كابينة:)
Quote: بعدين أنتو أهلنا الشايقية عندكم مشكلة ما تعرفوا ( تصلحوا موية التمر) كويس نحن في دنقلا نتفوق عليكم في الطعم والرغوة .. الفرق كبير كان ( اللهم اني صائم ) معليش ذكريات ...
هههههههههه
اجمل تعليق يا استانا الجليل. جاييك بي مهلة - اتعشى واجيك راجع.
04-20-2021, 10:29 PM
الشيخ سيد أحمد الشيخ سيد أحمد
تاريخ التسجيل: 07-14-2008
مجموع المشاركات: 2725
Quote: والمهم كمان محمد عوض الكريم القرشي ده من عندينا من السليم شرق دنقلا من أجمل المناطق زراعة وبشر أذكره اخوه محي الدين عوض الكريم كان نزل في الانتخابات ايام نميري مجلس الشعب ضد احد افراد الادارة الاهلية .. وفي دائرتنا كنا معاه لأن كان كاريزما وحماسي جداً رغم أنه لم يكن مايوي .. وفاز في الانتخابات ..
تعرف يا استاذ (ودالقرشي) ابوحسين وقباني زرزروني فيه زرزرة- واحد كتب لي قابلني- والتاني كتب لي أعد:) طالما انو من الشمالية معناها جابو القطر ونزل عندينا في (بحري). اول حاجة الناس تنزل في بحري - وتمشي تحوم زي ما تحوم وتجينا راجعة.
الله يحييك استاذنا الجليل
04-20-2021, 10:56 PM
الشيخ سيد أحمد الشيخ سيد أحمد
تاريخ التسجيل: 07-14-2008
مجموع المشاركات: 2725
Quote: رمضان مبارك يا الشيخ بحسب تصنيف الامير الحائر توفيق نحنا ناس ضهارى ساى والاسم الاصح ناس اقاليم قبل ان تتفنن الانقاذ فى الاسماء وفى العملات فى السجل الدائر اقف على الحياد مشجعا اللعبه الحلوه والتعليق الظريف حتى الان وانت فريق الرجل الواحد تسجل صمودا وتقدم خفيف مع ظنى ان اولاد ام درمان لم يستخدموا اسلحه الدمار الشامل والهجوم الخاطف من الزوايا وعليك بتشجيع حلفائك(للدعم السريع ) للمؤازة والجرجره لنا وشيجه صله خاصه ب ام درمان حيث شهد المستشفى العسكرى ل قوات دفاع السودان (الاسم القديم لما يعرف الان ب القوات السودانيه المسلحه)ميلاد الوالده امد الله فى عمرها ونفعنا بها ورغم ذلك سنظل على حياد آمن وامين:)
هههههههههه شفت كيف بالله فريق الرجل الواحد- ياخي انا مرات بحس اني بلعب في play station :) وكل مرة بكسب اسلحة جديدة في اللعبة- طقطقتهم ليك طقطقة شديدة :) اسلحة الدمار الشامل حقتم معروفة يا (عبدالرحيم) ح يقومو جارين للحقيبة. انا كان عارف الحقيبة دي ح تعمل فينا زي ده كان خطفتها من سيدا وسلمتها (اولاد شمبات) وخليت ليك خشماتم ملح ملح :)
انت قايل الوجع وين يا (عبدالرحيم) - الوجع كلو في (أبوداؤود)- ما باقي ليهم الا يعملو جزيرة عديل (مش كوبري) من الملازمين لي الدناقلة :) والغريبة التلاتة -قباني وابوحسين ومنتصر مكسرين في ابوداؤود. ما عارفين انو الواحد في بحري ممكن يكون خرمان للحنجرة الذهبية دي- يمشي ويقطع بيت (احمد الميرغني) ويصل الدناقلة ويسمع من خارج السور وكأنك داخل الحوش- تسمع كده وتطرب طرب عجيب- وترجع بيتك. هم اذا عايزين الكلام ده مابيقدرو يجو -لأنو الكلام ده بيكون في الليل- وفي الليل يمنع عبور (الكارو) للكوبري- ام درمان ما فيها سيارات الوكت داك :)
04-21-2021, 01:21 AM
ABUHUSSEIN ABUHUSSEIN
تاريخ التسجيل: 08-14-2002
مجموع المشاركات: 39330
يا سيدأحمد كمان انت قال نحن يجرمنا شنآن قوم أن نعدل ونقوم نقلل من قدر اب داؤود ولا خدر بشير كان كده انت ما بتعرف أم در ولا ناسها ياخ انت لي هسه ما جبت سيرة نور الجيلاني حدك في بحري الباسطة والبتي فور وبناطلين التريڤرا وتوتي ياخ أجر البوست ده لي عماد كان وراك بحري التي لم تعرف 😂
04-21-2021, 01:12 PM
ABUHUSSEIN ABUHUSSEIN
تاريخ التسجيل: 08-14-2002
مجموع المشاركات: 39330
Quote: يا سيدأحمد كمان انت قال نحن يجرمنا شنآن قوم أن نعدل ونقوم نقلل من قدر اب داؤود ولا خدر بشير كان كده انت ما بتعرف أم در ولا ناسها ياخ انت لي هسه ما جبت سيرة نور الجيلاني حدك في بحري الباسطة والبتي فور وبناطلين التريڤرا وتوتي ياخ أجر البوست ده لي عماد كان وراك بحري التي لم تعرف 😂
يا منص- انا لغاية هسه واقف في الحلفاية. لسه قدامنا الدروشاب والسامراب وبعدين نصل الكدرو ونفتح دفتر (النور الجيلاني). والله يا منص يا ريت عماد يجي يستلم- عشان يطقطقكم طقطقة صاح:) انا بي حالتي دي غالبكم لغاية هسه 6\صفر :) كان جاكم حبيبنا (عماد أحمد ) ممكن يقعد ليكم في شارع المعونة بس تلاتة صفحات- وكان بدأ ليكم في ودالبادية بتجيكم جلطة في النظر- وكمان اذا شرب ليهو كباية شاي وبدأ ليكم في ابوداؤود الا تنتظرو الربع الجاي :)
04-21-2021, 07:27 PM
الشيخ سيد أحمد الشيخ سيد أحمد
تاريخ التسجيل: 07-14-2008
مجموع المشاركات: 2725
تقول لي ام درمان محل الفن. كدي شوفو القصة الخيالية دي. مشينا لي زميلنا في ام درمان- في حتة كده انت ماشي من الشهداء على حي العمدة. لفينا لفلفة تقيلة لغاية ما حددنا انو ده بيكون المكان- المهم نزلنا وماشين قلنا نسال لينا زول من البيت- شارع فيهو كمية بتاعة (غنم) كتيرة جدآ- المهم ماشين في امان الله – بعد شوية كده واحد ماشي معانا جاهو من وراهو (تيس) اداهو ليك نطحة- الزول لمن إترتع قدامنا- لمن إتلفتنا ورانا لقينا ليك (تيس) اظنو جايبنو من (سباق الخيل :) حاجة كده كبيرة لدرجة- المهم قلنا نسرع شوية- التيس مبارينا ليك في خطراتنا- في النهاية ما لقينا حل غير انو نجري:)- نحن جارين والتيس فاتح ليك ورانا فتح مبالغة – جراي جري- واحد معانا سريع جدا –سبقنا هناك واتلفت قال لينا اسرعو اسرعو التيس ده قاعد ينطط وراكم :). وصلنا قريب من دكان- سيد الدكان شافنا فاتحين –جا طالع ومعاهو عكاز- خبط ليك العكاز في الشبك بتاع الدكان- التيس عمل ليك (كما كنت:) لكن قاعد يكشف لينا –صاحبنا السريع قال ياخي التيس ده نطاط نط اظنو بيلعب (كونغ فو :)-التيس واقف وجاري ليك فينا نور طويل وعمك بتاع الدكان واقف وشايل العكاز:)- بعد مسافة يا تيس السجم ده حتى اتخارج :) المهم بعد شوية كده شلنا نفسنا وهدينا- اتصلنا على زميلنا من تلفون الدكان. اها سلمنا عليهو واخبارك وقلنا ليهو نحن واقفين وين – عرف المكان وقال لينا انتو قريبين امشو كده كده بتلقو البيت. اللذيذة معانا واحد عندو( فوبيا ) من الكلاب قال لي دقيقة ما تقفل الخط - مسك السماعة وسلم على زميلنا وقال ليهو ان شاء الله ماعندكم (تيس) في البيت :)- عايز يقول ليهو ان شاء الله ماعندكم (كلب :). معقول يا جماعة دي بلد دي - يكون ساكيك فيها تيس:).
04-21-2021, 07:54 PM
ABUHUSSEIN ABUHUSSEIN
تاريخ التسجيل: 08-14-2002
مجموع المشاركات: 39330
Quote: تقول لي ام درمان محل الفن. كدي شوفو القصة الخيالية دي. مشينا لي زميلنا في ام درمان- في حتة كده انت ماشي من الشهداء على حي العمدة. لفينا لفلفة تقيلة لغاية ما حددنا انو ده بيكون المكان- المهم نزلنا وماشين قلنا نسال لينا زول من البيت- شارع فيهو كمية بتاعة (غنم) كتيرة جدآ- المهم ماشين في امان الله – بعد شوية كده واحد ماشي معانا جاهو من وراهو (تيس) اداهو ليك نطحة- الزول لمن إترتع قدامنا- لمن إتلفتنا ورانا لقينا ليك (تيس) اظنو جايبنو من (سباق الخيل :) حاجة كده كبيرة لدرجة- المهم قلنا نسرع شوية- التيس مبارينا ليك في خطراتنا- في النهاية ما لقينا حل غير انو نجري:)- نحن جارين والتيس فاتح ليك ورانا فتح مبالغة – جراي جري- واحد معانا سريع جدا –سبقنا هناك واتلفت قال لينا اسرعو اسرعو التيس ده قاعد ينطط وراكم :). وصلنا قريب من دكان- سيد الدكان شافنا فاتحين –جا طالع ومعاهو عكاز- خبط ليك العكاز في الشبك بتاع الدكان- التيس عمل ليك (كما كنت:) لكن قاعد يكشف لينا –صاحبنا السريع قال ياخي التيس ده نطاط نط اظنو بيلعب (كونغ فو :)-التيس واقف وجاري ليك فينا نور طويل وعمك بتاع الدكان واقف وشايل العكاز:)- بعد مسافة يا تيس السجم ده حتى اتخارج :) المهم بعد شوية كده شلنا نفسنا وهدينا- اتصلنا على زميلنا من تلفون الدكان. اها سلمنا عليهو واخبارك وقلنا ليهو نحن واقفين وين – عرف المكان وقال لينا انتو قريبين امشو كده كده بتلقو البيت. اللذيذة معانا واحد عندو( فوبيا ) من الكلاب قال لي دقيقة ما تقفل الخط - مسك السماعة وسلم على زميلنا وقال ليهو ان شاء الله ماعندكم (تيس) في البيت :)- عايز يقول ليهو ان شاء الله ماعندكم (كلب :). معقول يا جماعة دي بلد دي - يكون ساكيك فيها تيس:).
رغم انو الحتة دي ما حتة غنم و تيوس لكن التيوس بتعرف بعضها .... 😂😂😂😂 اكون خاف علي منطقتو يشاركوه فيها تيوس تانين .... ديل ساكيهم تيس و جايين يحكوها كمان ... ؟؟؟؟
Quote: رغم انو الحتة دي ما حتة غنم و تيوس لكن التيوس بتعرف بعضها .... 😂😂😂😂 اكون خاف علي منطقتو يشاركوه فيها تيوس تانين .... ديل ساكيهم تيس و جايين يحكوها كمان ... ؟؟؟؟
😂😂
يا زول كيف مافي غنم- هو في مكان في ام درمان مافيهو غنم وتيوس. ياخي حوش الإذاعة مليان غنم😂😂😂😂
04-21-2021, 08:15 PM
الشيخ سيد أحمد الشيخ سيد أحمد
تاريخ التسجيل: 07-14-2008
مجموع المشاركات: 2725
Quote: أو يكون به طرب تملكه وحب يقول يا غنم بحري قالوا بتحبوا مرة حبونا 😂
😂😂😂
الغنم في بحري يجو داخلين الساعة 6 الا ربع- يكونو واقفين عشان يفضو الحمولة. التيس بيكون شغال (أمين مخزن:) يكشف من بعيد😂 مافي زول جا طالع عشان يشوف الناس الفاتحة دي :) معقول يا جماعة- تيس ماسكين ليهو عكاز- طيب الكلب ح ترشو بي دوشكا يعني ولا كيف 😂.
انا اتخيل لي التيس ده حقكم يا منص😂
04-21-2021, 08:25 PM
الشيخ سيد أحمد الشيخ سيد أحمد
تاريخ التسجيل: 07-14-2008
مجموع المشاركات: 2725
ياخي عجاجة وغنم وتيوس- ونحن في بحرينا الحنينة نكون مهتمين بي (مجلة ماجد) تمشي أكشاك مكتبات بحري جنب المستشفى يوم الأربعاء- زحمة من الصبية منتظرين مجلة ماجد. بالله شوف الاهتمام- ناس ماسكة عكاكيز للتيوس وناس تفتش في مجلة للإطلاع😂 اذا لاقيت ليك واحد الوكت داك من ام درمان وسألتو اذا إشترى ماجد ولا لا؟؟ ممكن عادي يكون فاتح خشمو واول حاجه ح تجيهو في بالو ماجد لاعب المريخ😂 كرهتونا بي الباحث في التراث- ما كان تشوفو ليكم باحث في التيوس 😂😂😂
04-21-2021, 08:35 PM
الشيخ سيد أحمد الشيخ سيد أحمد
تاريخ التسجيل: 07-14-2008
مجموع المشاركات: 2725
بالمناسبة اتذكرت (عادل أمين - جقود) عندو قصة عن تيس المحطات😂😂😂
التيس بيتحرك بي أمر تحرك من محطة للمحطة للتانية. اها ناس ام درمان التيس عندهم زي ماقال صاحبنا بيلعب (كونغ فو😂 زي ده يعملو ليهو امر تحرك كيف - لازم يكون معاهو عكاز. انا ما عارف (حميركم وحصينكم ) المطلوقة في السوق دي بتوجههوها بي شنو- قطع شك حاجة اقوى من العكاز😂
04-22-2021, 05:02 AM
adil amin adil amin
تاريخ التسجيل: 08-01-2002
مجموع المشاركات: 37159
الصراع محتدم بين ناس يا عذارى الحي ناس بحري "المرافعين" وناس اين مي ناس ام درمان "الصيص " بخت ناس الخرطوم والله وعاملين فيها عثمان حسين انا والنجم والمسا
04-22-2021, 09:35 AM
يحي قباني يحي قباني
تاريخ التسجيل: 08-20-2012
مجموع المشاركات: 18708
Quote: الصراع محتدم بين ناس يا عذارى الحي ناس بحري "المرافعين"
هههههههه صراع شتو يا عادل- ديل حمام ميت ياخي. الحالة انا سايق بدون (مرايات الجنب) ولسه خرمت ليهم ب (حلاة زوزو :) بديت ليهم بي آمنت - عشان يآمنو :)
كويس انك جبت سيرة عثمان حسين يا (عادل) لأنو عايز اسمعكم زول كده- لقيتو طاشي في النت وقدر ماقلبت في النت غلبني اعرف باقي الجلسة دي كانت وين. قباني طبعآ متخصص في الحاجات الحلوة دي - باقي اخد التيراب من بحري:) ابوحسين متخصص في البحث والتنقيب- اقول على مضض - اضانو نضيفة في السمع. منتصر - اقول على مضض ومضمضة زاتو:) - اضاتو ونخرتو برضو نضيفة. اصحو يا ولاد ام درمان وجيبو لينا خبر الزول ده اسمو منو - وجيبو لينا باقي الجلسة دي. cc ,ودالبشرى (ملك التقصي في البورض).
04-22-2021, 06:50 PM
الشيخ سيد أحمد الشيخ سيد أحمد
تاريخ التسجيل: 07-14-2008
مجموع المشاركات: 2725
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
الشيخ سيد أحمد
Amira Hussien
Salah Zubeir
اسامه العريفي
ABUHUSSEIN
يحي قباني
Ahmed Yassin
علي عبدالوهاب عثمان
Abdelrahim Mohmed Salih
adil amin
فيس بوك
تويتر
انستقرام
يوتيوب
بنتيريست