لقاء صحفي نادر 2010 مع حارس الأستاذ محمود في زنزانة "الإعدام"

10:39 AM March, 27 2021

سودانيز اون لاين
Yasir Elsharif-Germany
مكتبتى
رابط مختصر

سلام سلام
لقد فاتني الاطلاع على هذا البوست في وقته. هذه فرصة لإعادة نشر البوست مع التحية للأخ الصحفي عبد الله الشيخ والشكر على اللقاء النادر بحق.
الأُستاذ محمود:" لو بَسْتَأنف أو بَسْتَرحم ما كان جيت هِنا"..!الأُستاذ محمود:" لو بَسْتَأنف أو بَسْتَرحم ما كان جيت هِنا"..!
ـــــــــــــــــ
الصحفي عبد الله الشيخ

ــــــــــــــــــــــــ

حارس الأُستاذ محمود في زنزانة الإعدام :
لم يتعامل معنا كأعداء ..!
قال لمدير السجن:" لو بَسْتَأنف أو بَسْتَرحم ما كان جيت هِنا"..!

حوار : عبد الله الشيخ
هذا الرجل ، رقيب أول / عبد اللطيف سعد علي أوكلت اليه مهمة حراسة الاستاذ محمود محمد طه داخل سجن كوبر منذ عصر السابع عشر من يناير 1985م وحتى لحظة التنفيذ فى العاشرة من صباح اليوم التالي.. مرت خمس وعشرون سنة على هذا الحدث ، وهذه الافادات التى وردت خلال الحوار تقرأ الى جانب إفادات آخرين ، إذ المشهد الكامل لحادثة اغتيال الاستاذ محمود قد يتشكل من إفادات أخرى لشهود آخرين، الى جانب ذاك الذي لم يزل فى صدور الرجال.. كان الحكمدار عبد اللطيف حريصاً على ترديد عبارات الاستاذ محمود التى سمعها منه فى تلك الساعات، يرددها حتى يكاد يطمئن السامع الى أن مرور كل هذه السنين لم تجعله ينسى الوقائع..مهما يكن ، فإن استخلاص الحقائق عن طريق الحوار يبدو صعباً مع عسكري أُمي ، ملتزم بمهنته، ، ربما لو تحدث قبل هذا العهد لما أهمل تفاصيل صغيرة ودقيقة و ملاحظات قد لا تبدو مهمة من وجهة نظره، نظراً لانغماسه فى القيام بواجبه المباشر فى حراسة سجين هدد بكلماته القوية وبمواقفه الصميمة عرش الحاكم.. ومع إعجاب السجان بالسجين ، إلا ان السجان مازال يؤكد أن جناية الاستاذ محمود التى اوصلته الى حبل المشنقة هي أنه سمع مايلي :" قالوا ، قال إنو الصلاة رُفِعت مِنو"..
فى بداية اللقاء ، وقف الرجل بشلوخه ، وقف الرجل الثمانيني " رقيب أول" عبد اللطيف سعد علي ،وألقى علي " التحية العسكرية "..! قلت له: عسكري بالمعاش، يلقى التحية العسكرية على ملكي ، لماذا؟
قال الرقيب أول عبد اللطيف: نظامنا فى العسكرية ، لما تدور تتكلم كلام مهم ترفع التحية العسكرية ،، لأنو الكلام عن الزول دا كلام مهم.. (الزول هو الأُستاذ محمود محمد طه ، وقد كان الرقيب أول عبد اللطيف مكلفاً بحراسته منذ عصر السابع عشر من يناير ، وحتى لحظة تنفيذ حكم الإعدام فى الساعة العاشرة من صباح الجمعة 18 يناير 1985م ).
* متى دخلت الشرطة..؟
ـ أنا من البرصة ، من الشمالية ، جيت الخرطوم ، اتعينت شهر واحد سنة 56 لما كان الخواجات ينقلوا عفشهم راحلين بالسكة حديد، زمن الاستقلال أنا كنت مستجد، عملت فى بورتسودان، وجابونى سجن كوبر عشان أبنى القشلاقات ، كنت شغال فى الكمينة بتاعة الطوب فى الجريف غرب، من الكمينة جابونى السجن للتنفيذ.. الترقيات زمان كانت بالأقدمية، ما عندك كفاءة ممكن تتظلم ، أنا أمي ما بعرف القراية.. نزلت المعاش سنة 93، لما نزلت المعاش أدونى معاش700 جنيه بس.. زول ما إشتغل عسكري ما بيعرف يمشى كويس فى الشارع، أنا هسه شغال بى حرارة العسكرية ، لحدي هسه عمري تمانين سنة ما بقدر أرقد فى السرير وأتناوم ، عندى روح معنوية عالية ..
* من هو قدوتك فى العسكرية..؟
ـ أحسن عسكري هو الصول طه على عيسى ، شايقي من جلاس ..
* ماهذا الغرام بين الشايقية والعسكرية ..؟
زمان كان تعليم مافى ، زمان كانوا بيقولوا الشايقى إن نجح هجاني ، وإن بطل طياني ..
*هل كنت تعرف الاستاذ محمود محمد طه من قبل؟
ـ ما بعرفو ، ما قابلتو إلا لمن الله جابو لي فى السجن، لكن كنت بلاقي ناسو فى الخرطوم واقفين فى الشارع ، بنات وأولاد شباب ، نسوان ورجال ، شايلين كتبو،واقفين " لمة لمة "، لابسين أبيض ، كنت أعرف إنو ديل الجمهوريين..لكن الله جابو لي فى السجن ، كنت حارسو من العصر لحدى ما طلع المشنقة..
* ممكن توصفو لينا؟
ـ ماهو طويل ، وماهو قصير ، مربوع ، ماهو سمين ولا هو نحيف ..
* لماذا جاءوا به الى السجن؟
ـ جابوهو محكوم عليهو بالاعدام ، قالوا " قال الصلاة رفعت مني"..
* هل سمعت منه هذا الكلام ؟
ـ لا، أنا كنت حارسو من العصر الخميس لحدي ساعة التنفيذ،،
* كيف تم اختيارك لحراسته؟
ـ انا كنت حكمدار، كنت شغال فى كماين الجريف، بنشتغل فى الطوب ،سلمونى ليهو ومعاي تلاتة من العساكر
* هل تذكر أسماءهم ؟
ـ العساكر اللى كانو حرس تحت إمرتى هم جعفر طه، صلاح محمد، خالد طه، ما بعرف بلودهم وين ، لمتنا العسكرية ..
* استلمتوهو وين؟
ـ استلمناه فى سجن كوبر، لما استلمناه وديناهو الميزان ، بعد الميزان دخلناهو على مدير السجن، مدير السجن قال ليهو : يا محمود ،، إنت بكره فى الدار الآخرة ..
* مدير السجن ـ حينها ـ إسمو منو؟
ـ مدير السجن كان الكمندان عبد الرحمن الصاوي ..
* ماذا كان رد الاستاذ محمود على عبارة إنو بكرة حيكون فى الدار الآخرة ؟
ما قال حاجة ، انا كنت واقف بى شمالو ، عسكرى واقف بى يمينو وإتنين وراهو .. وقدامو مدير السجن ، قاعد فى الكرسى قدامو تربيزة.. بعدين مدير السجن سألو تانى، قال ليهو:عندك وصية لأولادك؟ رد عليهو طوالى ، وقال: " أنا أولادي موصيين طبيعي" ، تانى سألو مدير السجن: عندك إستئناف أو إسترحام؟ رد عليهو طوالى : لو بستأنف أو بسترحم ما كان جيت هنا .. مرقنا من مدير السجن، ومشينا بى زولنا عشان ندق ليهو القيد ..
* ماهو دق القيد ؟
ـ دق القيد دا يسويهو العسكري بتاع الحدادة، القيد عبارة عن حجل كبير وجنزير، يركبوهو فى الكرعين ، وفى اليدين ، لما تجي ساعة الإعدام يفكو القيد ، ويركبو القيد فى اليدين من الخلف..
* ماذا قال الاُستاذ محمود لحظة " دق القيد"..؟
لما وصلنا للعسكرى بتاع القيد سأل العسكري : دا شنو ؟ العسكري بتاع القيد قال ليهو : دي أوامر .. رد عليهو طوالي وقال : " أوامركم زي زبد البحر"
* يعنى شنو؟ هل هذا إعتراض على وضع القيد فى يديه ورجليه؟
ـ لا، مافى احتجاج ، قال بصوت واضح ما فيهو خوف "أوامركم زي زبد البحر".. بعد ما دقينا ليهو القيد وديناهو للزنزانة ، قعد فى الزنزانة..
* قعد كيف ؟
ـ قفلنا الطبلة، الطبلة مسوكرة، والمفتاح معاي، دخل الزنزانة ، خت نعلينو تحتو وقعد لحدى الصباح..
* ما طلب منكم حاجة ؟
ـ لا حاشا ،ولا قال ماشى الحمام ..ما طلب أي حاجة ، القعدة الياها ..كان قاعد مستقبل القبلة ، ونحن كنا قاعدين قدام الزنزانة مقابلين ليهو، الزنزانة بلاط، مترين فى متر ونصف..
* قال ليكم شنو؟
ـ ما قال أي حاجة ، واحد من العساكر سألو : داير الحمام ؟ نجيب ليك موية ؟ نجيب ليك أكل ؟ قال : لا ..
* قال " لا" بى ياتو طريقة..؟
ـ قال " لا، شكراً" .. ( يحاكي الرقيب أول عبد اللطيف الاستاذ محمود ويقول أنه أومأ باصبع يده اليمنى بعلامة لا..)..
* قعد قعدة واحدة فى الزنزانة حتى الصباح؟
ـ قعدة واحدة ، ما إتزحزح منها ، لا نام ، ولا نحن نمنا، نحن كنا بنتاوب على الحراسة إتينين ، إتنين..
لما جات الساعة 4 صباحاً جانا الضابط يعقوب وقال لينا : " جيبو الراجل ده ".. سقناهو، ومرقنا بيهو الى بوابة السجن القبلي ، لقينا عربية ،، أركبوا ، أركبوا ركبنا ،، مشت العربية الى الباب الشمالى للسجن وحتى وحدة العدالة الناجزة ، لما طلعنا بالعربية لقينا البوليس مالي الفِجة بى درقاتو ، وبى سلاحو ، والأُمة طالعة فى رؤوس البيوت ، بيوت القشلاق، وفوق الكوبري ، وفى الشوارع والناس مرصوصة وزاحفة لحدى سلاح النقل و المنطقة الصناعية ،ما أعدموهو الساعة 4 زي ما بيعدموا المساجين العاديين ، أعدموهو الساعة 10، نحن المساجين العاديين بننفذ عليهم الحكم الساعة 4 صباحاً ..
* كنت تحرسه فى " وحدة العدالة الناجزة " أم تغير طاقم الحراسة ..؟
ـ كنت حارسو، و مدير السجن قال شيلو الطاقية والشال منو ،، لما شلنا الطاقية والشال منو قال : " ما عندكم كلام "، جاء القاضى وقرأ صحيفة " السوابق "..
* هل تعرف ذلك القاضي الذي قرأ صحيفة السوابق ؟
ـ مابعرفو، كمان جابوا نفر من ناسوا ، لابسين أبيض ، وقفوهم فى صف واحد ، و ونحن مشينا طلعناهو فى السِلِم ..
* لماذا لم يصعد وحده الى سلم المشنقة ؟
ـ كان مقيد بالجنازير، القيد تقيل .. المهم طلع المشنقة ، بعد سحب الحبل، الجماعة كبروا.. بعد ربع ساعة جاء الطبيب ، وكشف عليهو ، شلناه بالنقالة ، و ، إستلموهو مننا ..
* إستلمو منو..؟
ـ مافى أي زول بيعرف ودوهو وين ، لا عسكري ، ولا ملكي ، إستلموهو ناس الأمن .. الناس لو عرفت مكانو " كان بيلحسوا ترابو "..
* ليه ..؟
ـ الرجل ده صميم ، كلمتو واحدة ، وما بيعرف التراجع ..
* خلال حراسته من عصر الخميس وحتى التنفيذ هل أبدى أي اعتراض على علملكم ..؟
ـ لا ،، حاشا ،، ما أدانا و لا كلمة، كان ساكت قاعد ، ما كان بيحتج على أي حاجة ، ما أبدى أي اعتراض.. يا زول دا سجين ما عادي ..
* ماهو الشيئ الذي يميزه عن الآخرين ..؟
ـ أنا حضرت إعدام ناس كتيرين ، الزول لما يقولو ليهو " إنت بكره فى الدار الآخرة " بعضاً منهم يكورك ويبكي ، وفيهم اللى بيقع غمران ،فيهم اللى بيرجف ، فيهم اللى بيتضعضع ، فيهم اللى بـ " يتُر" لا ورا ، وفيهم .......، زولنا ده ثابت ، شجيع ، ما فيهو حبة خوف من الموت، يرد الكلمة بالكلمة .. يقول كلامو بصوت واضح ، و كلام قوي ..
* اثناء الحراسة كنتو قاعدين قدامو، شفت تعابير وجهه ؟ تعابير وجهه بتقول شنو؟
ـ أيوه ، شفتو ، شفت تعابير وشو، الموضوع ده و لا هاميهو ،، وشو طبيعي جداً ..الصاح يعلم بيهو الله ،، لكن الزول دا لا هو كاتل ولا هو سراق ، انا ما كنت بعرفو ، لامن الله جابو لي ، ولاقيتو ..
* وانت تقوم بواجبك فى الحراسة ، هل تعتقد إنو ممكن يفكر فى الهرب ..؟
ـ أنا واجبى أحرسو ،، لكن الزول ده شجاع و ثابت.. لكن لو ثابت أو ما ثابت نحن بنحرسو، وبس ..
* كيف عرفت انه شجاع وانت أول مرة تشوفو فى السجن..؟
ـ ردو على مدير السجن براهو كفاية ..
* إنت عسكري، وعندك قوة الملاحظة، احساسك شنو لما لقيتو قدامك..؟
ـ إحساسي ..؟ أنا زول حارس ..
* الحراسة مهنة، هذا عملك ، "إن الله يحب إذا عمل أحدكم عملاً أن يتقنه" ، لكن انت لما شفتو ، هل حسيت إنو الزول ده بتاع شر..؟
ـ لا ، حاشا ، ده زول ما عندو شر..
* بأمارة شنو عرفت إنو ما عندو أي شر..؟
ـ عرفت من وشو ..
* هل أداك إحساس بانك إنت عدو بالنسبة ليهو ..؟
ـ لا ، حاشا ،، ولا أدانى أحساس بإنو زعلان مننا ، ولا حتى من مدير السجن ، ولا حتى من الناس اللى حكموا عليهو..الزول دا أنا قلبى إنشرح ليهو ..
* إذن، لماذا لم تتحدث معه ..؟
ـ أنا حارس ..
* لو قدر لك أن تتحدث معه ، ماذا كنت ستقول..؟
ـ ( أطرق برهة ، وقال ) : لو إتكلمت معاهو كنت حأسألو " السبب الجابك هنى شنو"..؟ لكن، نحن ما بندخل فى الحاجات دي .. وما بنتونس ...
* تفتكر جابوهو السجن ليه..؟
ـ ما اتكلم معانا ..
* سمعت السبب الجابوهو بيهو شنو؟ هل سمعت إنو الجمهوريين وزعوا منشور " هذا أو الطوفان"..؟
ـ سمعت قالوا إنو قال الصلاة رفعت منو ..
* قلت إنو الاستاذ محمود قعد قعدة واحدة من العصر حتى الساعة الرابعة صباحاً، هل أصيب بالقلق أو تململ من القعدة الطويلة دي..؟
ـ لا ، لا، حاشا ..
* لو قلنا ليك وصف لينا حالتو فى الساعات ديك تقول شنو..؟
ـ ده زول عارف بيسوي فى شنو، أنا ما حصل لاقيت زول زي دا ، سجين ما عادي، المساجين العاديين المحكوم عليهم بالاعدام نحن بنعرفهم ، كل الناس تبطبط، إلا دا، ثابت، ناشف عود ..
* لما قال لمدير السجن " أولادي موصيين " قال الكلام دا بى ياتو صيغة ..؟
ـ قال " أنا أولادي موصيين طبيعي "..
* هل قالها بانفعال..؟
ـ لا، ما كلام زول زعلان ، قال كلامو بصوت عادى،صوت واضح ..
*هل قالها هازئاً بمدير السجن..؟
ـ لا مستهزي ، و لا ساخر، ولا خايف ، ولا زعلان ..
* لما وقف قدام الميزان ، طلع فى الميزان براهو..؟
ـ الحكمدار بتاع الوزن قال ليهو أطلع فى الميزان ، ملص نعلينو وطلع فى الميزان ..
* تتذكر وزنو كان كم ..؟
ـ لا أذكر .. لكن وقف زي خمس دقايق فى الميزان ..
* العسكري بتاع القيد إسمو منو.. ؟
ـ إسمو بلال ..
* انت كمواطن عادي، هل ترى انه مظلوم ..؟
ـ قالوا قال الصلاة رفعت منو .. لكن السمعتو منو إنو كان بيرد الكلام بكلام قوي ، رد بى معنى..
لكن ما إتكلم معانا ،هو فى حدودو ، ونحن فى حدودنا ..
* " أوامركم زي زبد البحر " الكلام دا فهمت منو شنو ..؟
ـ قالها ومدير السجن واقف قدام الباب .. في راجل بيقول كده؟، ده زول كلمتو واحدة ، ما إتزحزح لا جاي ، ولا جاي ..
* هل أنت معجب به..؟
ـ جداً جداً، أنا معجب بى شجاعتو، معجب بى رجالتو دي..
* لو لا قيت الزول الشجاع ده تانى ، حتقول ليهو شنو ..؟
ـ ( رفع يديه علامة السؤال، إبتسم وقال) : ألاقيهو وين..؟
* نفترض إنك لاقيتو تاني، حتقول ليهو شنو..؟
ـ لو لا قيتو حأهنيهو على الرجالة بتاعتو دي، مافى ولد مرا وقف الموقف دا..
**
سألت إبنه الذى كان طالباً حينها، سألته عن تلك الحادثة ، قال : فى ذلك اليوم طرق باب بيتنا فى القشلاق بعض النسوة فى عمر جدتى ،طلبن منى أن أسقيهن، جئت إليهن بجردل ماء ، قلن لي أنهن من حي لطفي ، من رفاعة ..سألتهن : هل انتن من تلاميذ الأُستاذ محمود ..؟ردن علي بصوت واحد : كيف يا ولدي..؟ والليلة نحن جينا من رفاعة عشان نحضر التنفيذ، الليلة إن شاء الله تحصل كرامة ..
* هل وقعت الكرامة..؟
ـ وهل هناك كرامة أكتر من الابتسامة ؟
إبتسامة وإنت ماشي لحبل المشنقة ..؟ في كرامة أكتر من زوال نظام نميري بعد 73 يوم من إعدام الأُستاذ..؟
** عندما ودعت عم عبد اللطيف ، الذي كانت كنيته بين العساكر "سعد حداد" لإدمانه حياة العسكرية ،، كان "سعد حداد" حريصاً على أن يقف وقفة العسكري ليودعنى .. إبتسم ، كأن الطيف الذي يروق له قد استقر فى الواقع!
قال بلكنة حديثه المميزة: " الليلي ده يوم سعيد،ذكرتنى بى زولاً ليهو تاريخ، عندو بنت إسمها أسماء ، رفعت قضية فى زمن حكومة الصادق ، قالت أبوي دفنوهو وين؟..قول ليها أنا حافظ تاريخ أبوك"..

أصدق وصف أسمعه للأستاذ محمود ولم يأت به أي من تلاميذه من قبل وأتى به هذا الحارس أن محمود زول ( صميم) ياخ دي فراسة ما بعدها فراسة في مواجهة الموت

Quote: أصدق وصف أسمعه للأستاذ محمود ولم يأت به أي من تلاميذه من قبل وأتى به هذا الحارس أن محمود زول ( صميم) ياخ دي فراسة ما بعدها فراسة في مواجهة الموت

سلام يا حبيبنا منتصر

وشكرا لك.

طبعا صمامة الأستاذ محمود وشجاعته معروفة للجمهوريين. وعمنا عبد اللطيف صدق في وصف الأستاذ بالصمامة مع أنه لم يعايشه سوى ساعات معدودة. ولكن المسألة، في تقديري، أكبر من الصمامة والشجاعة
المجردة. المسألة التي تتضح من الوصف الذي قرأناه هي أن الأستاذ محمود كان عارفا ومتوقعا كل ما يلاقيه بدون أن يكون خائفا على نفسه أو مدعيا لبطولة. إذن هي هزيمة للخوف بجانب مظهر الشجاعة النادرة
التي وصفها العم عبد اللطيف. لعلك تذكر ما جاء على قلم الأستاذ محمود مع الدكتور مصطفى محمود ويطيب لي هنا نقله:

Quote: فمرحلة الإيمان مرحلة عقيدة، ومرحلة الإيقان مرحلة علم .. ويتضح من كلام الدكتور مصطفى أنه لم ينزل هذه المنزلة .. وخير ما يكشف لنا ذلك منه حديثه عن هذا الفصل، (لا إله إلا الله) .. ثم حديثه عن الفصل الذي يليه، وعنوانه (مخير أم مسير) .. فلنأخذ في استعراض حديثه عن (لا إله إلا الله) .. وأول الدلائل على أن الدكتور مصطفى لم يرح رائحة اليقين قوله من صفحة 240: (لا إله إلا الله .. إذن لا معبود إلا الله .. (ولن يعبد بعضنا بعضا .. ولن يتخذ بعضنا بعضا أربابا ولن نقتتل على شيء وقد أدركنا أنه لا شيء هناك .. (ولن يأخذنا الغرور وقد أدركنا أننا خيالات ظل تموج على صفحة الماء .. (ولن نفرح بثراء ولن نحزن لفقر ولن نتردد أمام تضحية ولن نجزع أمام مصيبة فقد أدركنا أن كل هذه حالات عابرة .. (وسوف تلهمنا هذه الحقيقة أن نصبر على أشد الآلام .. فهي آلام زائلة شأنها شأن المسرات .. (لن نخاف الموت. وكيف يخاف ميت من الموت؟؟) إنتهى حديث الدكتور مصطفى .. وأنت، حين تقرأه، يخيل إليك أنه يمكنك تحصيل هذا الإدراك في جلسة واحدة، أو في أيام قلائل، بعدها تملك الصبر على (أشد الآلام) .. وما هو هذا الإدراك؟؟ هو إدراكنا (أننا خيالات ظل تموج على صفحة الماء)!! وهل نحن حقا خيالات ظل؟؟ أم هل نحن خلائف الله في الأرض؟؟ و(لن يخاف ميت من الموت) يقول الدكتور، ثم يردف: (وكيف يخاف ميت من الموت؟؟) فهل رأيت كيف يرى الدكتور انتصارنا على الخوف من الموت؟؟ هو يراه في اليأس من الحياة، وفي اليأس من القدرة على الفرار من الموت .. (وكيف يخاف ميت من الموت؟؟) .. والحق غير ذلك .. فإن انتصارنا على الخوف من الموت إنما يجيء من إطلاعنا على حقيقة الموت، ومن استيقاننا أن الموت، في الحقيقة، إنما هو ميلاد في حيز جديد، تكون فيه حياتنا أكمل، وأتم، وذلك لقربنا من ربنا .. وبالموت تكون فرحتنا، حين نعلم أن به نهاية كربنا، وشرنا، وألمنا .. قال تعالى عنه: (لقد كنت في غفلة من هذا، فكشفنا عنك غطاءك، فبصرك اليوم حديد) .. وإنما بالبصر الحديد ترى المشاكل بوضوح، وتواجه بتصميم .. وعندما اشتدت بالنبي غصة الإحتضار، وقالت السيدة فاطمة البتول: (وا كرباه لكربك يا أبي !!) أجابها المعصوم: (لا كرب على أبيك بعد اليوم) .. وقد سمى الله، تبارك، وتعالى، الموت (اليقين) فقال: (واعبد ربك حتى يأتيك اليقين) و (اليقين)، أيضا، العلم الذي لا يكاد يكون فيه شك، والذي به تتكشف الحقائق المستورة وراء الظواهر .. وإنما سمي الموت اليقين لأن به اليقين، ولأن به يتم اليقين الذي يكون قد بدأ هنا عند العارفين، وإنما يكون بدؤه بالموت المعنوي الذي هو نتيجة العبادة المجودة .. وعن هذا الموت المعنوي قال المعصوم (موتوا قبل أن تموتوا) .. وقال عن أبي بكر الصديق: (من سره أن ينظر إلى ميت يمشي في الناس فلينظر إلى أبي بكر) هذا هو اليقين الذي باطلاعنا عليه، لا نتحرر من خوف الموت فحسب، وإنما به قد يكون الموت أحب غائب إلينا .. وما هو الإدراك الذي به توصل الدكتور إلى مثل هذا القول الذي قاله: (وكيف يخاف ميت من الموت؟؟) ؟؟ إنه من غير شك الإدراك الذي تعطيه العقول لحقيقة الموت – الإدراك الذي يعطيه النظر – وهو إدراك قاصر، ومخيف .. فإن الموت، كما يعطيه النظر العقلي، هو، عند أكثر الناس، نهاية، به تنقطع الحياة، وتسكن الحركة، ويتصلب البدن، ويعود إلى تحلل، ونتن، ويستحيل إلى تراب .. ألم يقل الدكتور نفسه في صفحة 237: (أين كل هذا؟ تحت الردم .. انتهى .. أصبح تربا .. كان حلما في مخيلة الزمان وغدا نصبح، أنا وأنت، تحت الردم ..) إن هذا هو الموت كما يعطيه نظر العقول غير المرتاضة، ولكن الموت، كما تعطيه حقائق القلوب السليمة، والعقول الصافية، فهو شيء يختلف اختلافا كبيرا .. ولا عبرة بالعقول غير المرتاضة بأدب القرآن فإن علمها ليس بعلم، لأنه يقف عند الظاهر، ولا يتعداه إلى بواطن الأمور .. وقد قال تعالى في ذلك: (وعد الله، لا يخلف الله وعده، ولكن أكثر الناس لا يعلمون * يعلمون ظاهراً من الحياة الدنيا، وهم، عن الآخرة، هم غافلون) فهم لا يعلمون اللباب، وإنما يعلمون القشور، (يعلمون ظاهراً من الحياة الدنيا) ولا يكون بعلم القشور تحرير من الخوف .. هذا هو مبلغ علم الدكتور، وهو به يظن أنه (لن يخاف الموت ..) ويقول، فيما يشبه البداهة، (وكيف يخاف ميت من الموت؟) ألا ترى أنك قد هونت صعباً، وأرخصت عزيزاً؟؟ أني لأرجو أن تحدث مراجعة لأمرك هذا ..

وهناك نص آخر من كتاب "رسالة الصلاة أحب أن أضعه لك وللقراء الكرام:

Quote: وثاني ما تعطيه حقيقة الأشياء أن الوجود خير كله.. لا مكان للشر، في أصله، وإنما الشر في مظهره.. وسبب الشر هو جهلنا بهذه الحقيقة.. ومن ثم، فليس هناك ما يوجب الخوف.. ونحن لا نستطيع أن نستيقن هذه الحقيقة الكبرى إلا إذا تلقينا من الله بغير واسطة، ولا يكون لنا ذلك إلا إذا لقينا الله، ونحن لا نستطيع أن نلقاه إلا إذا عشنا متحلين ((بأدب الوقت)) وهو أن نعيش اللحظة الحاضرة، غير مشتغلين بالماضي، ولا بالمستقبل.. وهذا ما من أجله فرضت الصلاة.. وهذا هو الصلاة..

هناك قصيدة تشرح بعض ما جاء في الفقرة المقتبسة بعاليه مباشرة، وكم سمعت الأستاذ محمود يردد بعض أبياتها بعد أن يكون قد استمع إليها في المجلس المعين:
كلي تفنيه وتوجده
عبد الغني النابلسي

كلي تفنيه وتوجده ولقاك فنائي موعده
ظهرت بتجليك الأشيا والأمر بها مدت يده
وسواك رآك وضل فلم يقدر يهديه مرشده
يا طلعة وجه أبيضه للغافل عنه أسوده
أنت المأمول لكل فتى ومراد القلب ومقصده
وإن الأبصار سواك رأت ونفت لظهورك تجحده
هذا مدد باق أبدا من حضرة غيب يورده
والغيب تبدى في صور من ينظر فيها يشهده
يهدي قوما ويضل كما يشقي من شاء ويسعده
والقدرة أجمع قدرته فيها لا زال تفرده
وبقدر الاستعداد ترى في الشيء فيظهر موجده
يا نسمة أمر الحق هبي سرا في القلب تردده
والحضرة بثي رونقها فينا إنا نتودده
وإذا أنوار الحق بدت بالحق نراه فنعبده
للجسم ركوع يركعه للقلب سجود يسجده
والعالم ليل أجمعه يا غفلة عبد يرقده
فاحذر يلهيك تلبسه والظاهر فيك تجدده
واظهر بالحمد له أبدا قد فاز به من يحمده

ـــــــــــــــــ
يمكن سماع القصيدة ملحنة في موقع الفكرة

القصيدة من أداء الراحلة المقيمة الأستاذة إخلاص همد: