رفع الحظر المصرفي عن السودان

Quote: السرحة الإلكترونية شهور طويلة أنا قاعد في قروبات تجار العملة في الواتس .. كل يوم بتزيد .. الآن ممكن أصبحت بالآلاف .. وده سبب اساسي من زيادة حمى المضاربة الســرحة الآن تحولت مع السوق العربي وعفراء .. إلي سرحة إلكترونية .. ما بالضروري الشخص يكون تاجر ولا حتى بيعرف زول في السعودية أو الأمارات عشان يفتح قروب .. بس يكون معروف أو متفق مع تاجر أو وسيط تاني " زي البيع الهرمي " .. واسماء المغتربين بتجيهو من الداتا بيز المحفوظة عشان يضيفها ... عشان كده تلقى أخوانا المغتربين يقول ليك أنا كل يوم بلقى نفسي مضاف لقروب عملة .... . اتكلمت مرة مع شباب صغار أو أطفال من صوتهم لقيتهم قاعدين في أم مقد وبيديرو القروبات لأعمامهم في جدة .. مقابل حسنة في كل تحويل ينزل في الحساب السعودي .. واحد برضو اصريت يديني تلفون في السعودية رفض مع كترت الحوار معاهو لقيتو قاعد في عد بابكر ورسل بطاقة شخصية "ما بالضروري تكون بطاقتو" .. واحد بيدير قروب من الدامر بل بعضهم نسوان وربات بيوت لمن ترسل ليك الفويس نوت واضح أنهم من القرى من اللهجة .. بعضهم حتى بينصب عليك بيفتح قروب ويرسل أسعار عالية تحول ليهو في الحساب السعودي ما بيرسل ليك التحويك من أمبوك .. وغالباً ديل بستخدمو حسابات سودانيين في المملكة .. بعض المغتربين المنصوب عليهم لمن راجعو الحسابات البستخدموها في المملكة لقت أنو في حسابات لناس غادرو المملكة في إجازة وأكيد ما بيرجعو بعضهم طماع بيفتح قروبب واتنين و حتى 20 قروب .. زي صاحبنا المرفق رقم تلفونه مسجل تلات قروبات برقم واحد " موسسه الفادني لي التحويل " موسسه ال بطحان لى التحاويل " الأحرار لي التحاويل " .. عشان الناس ما تنمط ساكت ما بالضرورة الزول ده يكون من الجهات الكاتب القروب باسمها .. الواتس ما بيطلب مستندات عشان تسمي قروب .. لكن ده بيأكد كلامي معظمهم قليل التعليم وبالكاد يستطيع تربيط الأحرف .. في ناس زعلو مني لمن قبل كده قل أميين ..لكن دي حقيقية .... المشكلة وين لو فرضا التاجر قال ليهو بديك جنيه في الريال كلهم ببدو ييرسلو الأسعار .. في واحد بيقسم الجنيه ويزيد السعر شوية عشان يفوز بأكبر قدر من الزبائن " باسواء فهم مضاربة أو كسر هلك السودان "أربح قليل عشان تبيع كتير" .. وهكذا لمن تكون بالآلاف بتتحول لشبه حمى اسعار وده سبب اساسي في الحصل في التلات اسابيع الفاتو ... عشان كده نحن نضرب حسابات السعودية البنشروها ونبلغ عنها هناك .. وأهم شيء ننشرها في تويتر ونمشن الجهات الأمنية .. السعوديين لو عرفو حساباتهم ممكن تتنشر .. ما بيجازف لأنو عملية تأجير الحساب البنكي على الأقل ياخد فيها 5سنوات سجن هناك هادي ود البوت