أدخلوا شوفوا تبرير ولاية الخرطوم لموضوع عدم بيع الخبز للأجانب ـ فضيحة بس

09:43 PM January, 24 2021

سودانيز اون لاين
Elhadi-
مكتبتى
رابط مختصر

أول حاجة ده الخطاب من بوست الأخ زهير عثمان..

أقروهو كويس :

بند : أ ب ج د ـ هـ



وده التبرير الفطير والفضيحة لولاية الخرطوم :

Quote: الخرطوم 24-1-2021 (سونا) – أوضحت ولاية الخرطوم أن القرار الذى تم اصداره مؤخرا حول أوزان الخبز لايعني إطلاقا عدم بيع الخبز للأجانب بالولاية، مؤكدة التزام حكومة الولاية بكل المواثيق الدولية التي تحكم علاقة الدولة في هذا الشأن. وأشارت في تعميم صحفي اليوم أنه تم خلال اليومين الماضيين تداول الفقرة ( د ) من القرار رقم (5) 2021 المتعلق بتنظيم اوزان وأسعار الخبز بولاية الخرطوم التي تنص علي الآتي (عدم بيع الخبز لغير المواطنين ). وأبانت أن هذه الفقرة ترتبط ارتباطا وثيقا بالفقرة التي تليها والتي تنص علي إن (اي كافتريا او مطعم يعمل بالخبز المدعوم يكون عرضة للمساءلة القانونية ) ، حيث تضبط هذه الفقرة ان بيع الخبز المدعوم مخصص للمواطنين والمقيمين علي حد السواء وليس للمطاعم والكافتريات.

أيه اللي ارتباط وثيق وك... أم

علاقة التبرير ده بالخطاب الفوق ده شنو أسي ؟؟

انتو عربي الله الواحد ده غالبكم برضو ؟؟

أنا الليلة كزول صاحب فرن يجيني خطاب واضح زي الفوق ده

أقعد أمشي افتش محل الارتباط الوثيق بتاع الفقرات وين ؟؟

wtf

الوالي الجحش ده ما يقول غلبتني وخلاس

والأجانب مالهم ومال أهلهم بالكافتيريات التي تعمل بالخبز المدعوم من عدمه ؟؟



بالله ده مستوى حكومة تقود أمر الناس يعني ؟؟

والله دي تصريجة في الدافوري ما حصلت

ما تفضحونا كفاية مهازل..

الواحد ما كان متصور إنو ممكن يجي أسوأ من اللمبي في يوم من الأيام ـ لكن الجحش بتاع ولاية الخرطوم ده شكلو فات اللمبي بيغادي

ههههههههه
ارتباط وثيق ... قلت لي
هسي دي زاتها يشرحوها كيف للفرن

عليك النبي شفت المستوى ده يا جعفر ؟؟

يعني هل الحكومة ممثلة في ولاية الخرطوم بتفتكر الناس طير للدرجة دي يعني ؟ عشان يمشو فيهم ا أي كلام والسلام

قال ارتباط وثيق قال..

أنا الليلة كزول بزعم انو بعرف عربي كويس يعني لحدي اسي قاعد افتش محل الارتباط الوثيق ده ما لاقيهو

وأتمنى من أي واحد غيري يجي يشرح لي محل الارتباط الوثيق ده وين

وهو أساساً ما في عيش كان لي مواطنين ولا لي أجانب ـ العيش أساساً معدوم وفي ندرة شديدة جداً

لكن البيان الزي ده والتبرير الفطير اللاحق

بيكشف ضحالة الناس الماسكين السلطة الآن..

بصراحة والله مستوى واطة بس

يا ربى قاصدين بيها الخواجية الكانت واقفة في صف الرغيف و صورتها حامت الميديا؟

يصلك عبدالعظيم بعد شوية ويقطع من راسو تبريرات للوالي هم مفتكرين المناصب وجاهات لعنة الله على قصر نظر السياسة وعدم الدراية همهم الاول والاخير عندهم كم من عضويتهم فى الحكومة لا يهمهم ازمات الشعب

قبل كل شئ أشك فى البيانين الإتنين حتى أجد المصــدر من مكتب الوالى.
ولو صح الخبر..

Quote: يا ربى قاصدين بيها الخواجية الكانت واقفة في صف الرغيف و صورتها حامت الميديا؟

بس.. عليك نور.. يكون واحد مهووس من زمن البشير وعلى عثمان.. اليوم ما قدر يقول ليها كافرة لكن عاوز يطلعها من الصف عشان أجنبية.. طيب عرف كيف انها اجنبية.. ما ممكن تكون سوريـة مثلا بجواز سودانى؟
الناس اللى يسألون عن العلاقة.. هو يعنى، لو صح البيان، يعنى الأجانب يأكلوا فى المطاعم فقط.. يعنى ما يشتروا خبز ويأكلوه فى بيوتهم. يعنى انت السودانى عشان تشترى رغيف تانى لازم تكون شايل معاك البطاقة
القومية او الباسبورت والرقم الوطنى.. البيان ما قال عامل الفرن يتأكد كيف من هوية المشترى.. تقدير شخصى؟

لو المرحوم معانا اليوم كان كتب من أين جاء هؤلاء... خجلت ليه والله.

سلام عليكم
رغم انى مؤيد للقرار - بتفسير المواطن (بعنى السودانى)- ولا ارى مشكله فيه .
لكن اسمحوا لى اوضح امر ربما يكون غير اضح للناس الاتعاملت فى رد فعلها على الخطاب الوارد اعلاه وتفسيرو السائد
موضوع المواطنين وارتباطو بالنقطه التاليه مرتبط بقرار سابق
لما طلع قار الخبز التجارى وانو تكون افران الخبز التجارة معروفه ومعرفه على اللافته بتاعت المخبز
وانو الافران العامله فى انتاج خبز مدعوم يباع للمواطن
اما
الخبز التجارى يكون للمطاعم والمناسبات وماشابه ذلك
لكن للاسف ماكان فى تنفيذ للقرار ورقابه وكان المدعوم - سواء بشكل مباشر من الفرن تحت التربيزه او سوق اسود بسعر اقل منسعر الخبز التجارى- بمشى للمناسبات والمطاعم وحتى بوفيهات قوات نظاميه احيانا
عليه حسب تبرير الولايه
دا معناه تاكيد على القرار القديم فى انو يكون المدعوم مطروح للمواطنين (الافراد/الاسر)
الخبز التجارى لخلاف ذلك انشطه اقتصاديه او مناسبات ......الخ
تحياتى

Quote: رغم انى مؤيد للقرار - بتفسير المواطن (بعنى السودانى)- ولا ارى مشكله فيه .

طيب أخ عاصم.. وبما انك ترى القرار ما فيه مشكلة:

السؤال لك:
الخرطوم فيها الاف الأجانب.. احباش، أفارقة، عرب.. الخ. والاف السودانيين الذين لا يحملون اى وثائق ثبوتية.. وأنت ترى القرار ليست فيه مشكلة.. طيب بتاع الفرن كيف يعرف السودان من غير السودانى؟

وشكراً

Quote: طيب أخ عاصم.. وبما انك ترى القرار ما فيه مشكلة: السؤال لك: الخرطوم فيها الاف الأجانب.. احباش، أفارقة، عرب.. الخ. والاف السودانيين الذين لا يحملون اى وثائق ثبوتية.. وأنت ترى القرار ليست فيه مشكلة.. طيب بتاع الفرن كيف يعرف السودان من غير السودانى؟

الرد فى البوست ادناه عندى اكتر من مداخله وبرضوفى مداخلات فى نفس الالاتجاه
ممنوع لوانت أجنبي يباع لك رغيف في ولاية بقرار من الوالي!ممنوع لوانت أجنبي يباع لك رغيف في ولاية بقرار من الوالي!

الله يرضى عنك يا أخ عاطف.. نحن فى البوست هذا وسؤالى كان عن مداخلتك (هنا) .. وهو سؤال بسيط للغاية.. عليك الله ما ترسلنى لبوست تانى. مشكور مقدما..

بتاع الفرن يعرف كيف السودانى من الما سودانى.. بس

البوست التانى فيهو اكتر منمداخله اتكلمت فيها عن موضوع سؤالك

Quote: البوست التانى فيهو اكتر منمداخله اتكلمت فيها عن موضوع سؤالك

أمشى جيبها وتعال..

Quote: رغم انى مؤيد للقرار - بتفسير المواطن (بعنى السودانى)- ولا ارى مشكله فيه

يا عاصم
الخوجية ىقول ليكم الدقيق مزروع في بلدها

Quote: بتاع الفرن يعرف كيف السودانى من الما سودانى.. بس

يقول ليهو قول جرجير ...

والله أنا فهمت كدة من البداية ودي مداخلتي في البوست الأول

Quote: يمكن قصده الجهات التجارية زي أصحاب المطاعم مثلاً

بس صياغتها المفروض تكون أكثر دقة منعاً للالتباس

عرفنا عربي جوبا دينق بيترجم لينا عربي كبوشية ده نلقى لينا زولن فحل وين يترجم لينا

أريتو لو ثبت على الراي الأول! الدعم دا مقطوع من لحم المواطن و موارده و موازنته يجب ان لا يستفيد منه من لا يساهم في الميزانية لا بضرائب لا غيره.

I'm sorry, i’m so busy now
،،،،






عزالدين عباس الفحل
ابوظبي

قرار مشلول .. وتبرير فضيحة!!!.

د/ منع بيع الخبز المدعوم للمطاعم والكافتريات.
والفسيخ الـ في هـ ما كان في داعي.

غايتو الفقرتين ما ليهم علاقة ببعض!!!.. أزمة عيش وأزمة لغة!.

Quote: أزمة عيش وأزمة لغة!.

الأزمــة يا ميرغنى فى المنطق برضو..

وصحفيو السرور ديل مافى زول سأله ناس المخابز يعرفوا السودانى من الما سودانى كيف؟

سلااااااام المهندس ابو الريش ،
الحل هو تشغيل المخابز المصرية ،
و تجاوز الأزمة فوراً،
،،،،






عزالدين عباس الفحل
ابوظبي

فى بداية تولى مدنى الوزارة ومع تفاعل ازمة الخبز خرج عليها بتصريح قال انه هو وطاقم مكتبه ما لقو اى بيانات او داتا لعدد و المخابز وحجم العمل فيها وو..وانو الكيزان مسحو او اخفو كل البيانات .... وقال انهم عاكفين على تجميع هذه البيانات حتى يتمكنو من وضع الحلول الناجعة...حتى الان وبعد مرور اكتر من عام ... لا الداتا توفرت ولا الخبز توفر .... .والمشكلة ماشة فى زيادة واخرها هذا التصريح الكارثة بمنع بيع الخبز للاجانب ثم تبريره اوتعديله بطريقة اسوا من القرار نفسه ...ك.مشكلة توفير رغيف الخبز وضح انها اكبر من من مدنى ومن الوالى ...وحلها بسيط اعطى العيش لخبازو ..جيب الناس المتخصصة واديهم الصلاحيات وخليهم يضعو الحلول ...ماممكن تكون بعيد عن المجال او التخصص ولاحتى كنت بتضع حلول على مستوى الحى او الاسرة حتى ..وتجى وزير او والى عشان تضع حلول لملايين المواطنيين ...وعندنا مثال حى للكلام دا ....الشباب الكانو فى ميدان الاعتصام نموذج للادارة والنجاح قدرو بى امكانيات بسيطة يديرو تجمع مليونى من ناحية الاكل والشرب والنظافة والامن والاتصالات باقل الامكانيات ..وقدرو يستقطبو دعم كبير جدا وينظموه بطريقة ناجحة بل ومستوى احترافى كمان ..

Quote: الحل هو تشغيل المخابز المصرية

لو الحل هو تشغيل المخابز المصرية، فهل ممكن تكلمنا عن المشكلة؟!!!

اول حاجة ي ابو الريش ،
وزير التجارة والصناعة
مدني عباس مدني ،
يبعد يدو بعيد ،
ويترك جل الموضوع ،
للسيد والي الخرطوم،
الأستاذ أيمن خالد نمر ،
ثانياً المخابز المصرية آليه ،
تمتاز بالسرعة والوفرة في الإنتاج ،
و تساهم في معالجة مشكلة الخبز،
وفي تطوير صناعة الخبز في السودان.
عكس المخابز البلدية التقليدية ،
الموجودة حالياً ،
وهي من العوامل التي تؤثر سلبا ،
في توفير الخدمة الملائمة والمناسبة.
ثالثاً توفير جهودا استراتيجية ،
لمعالجة هذه المعضلة،
وذلك بتوفير القمح أولاً،
المادة الخام ،
و تطوير صناعة الخبز جذرياً،
وإيجاد البدائل ،
،،،،





عزالدين عباس الفحل
ابوظبي

سلام عليكم
بوضح النقاط دى لانو الناس المعترضين (بالريموت كنترول) على القرار غايب عنهم كتير
-بدايه الاجنبى واحد من اتنين اما لاجىء ومكانو معسكرات لجوءمسئول منو الامم المتحده او اجنبى موجود بغرض العمل
-الاجنبى الموجود بغرض العمل/المقيم من سنوات كان فى محاولات حصر ليهم برقم (اجانب) مازى للرقم الوطنى للمواطن السودانى
- اى مواطن سودانى الان اصبح الرقم الوطنى شىء اساسى فى اى معامله وحتى الاطفال الرضع عندهم رقم وطنى
- تجربه سلع تصرف عبر قناه محدده للمواطن (التموين) بسعر مدعوم شىء ماغريب وتجربه فى كتير من دول العالم تحت ظروف ضغوط اقتصاديه او كوارث وامشو اقرو التاريخ حتى اوروبا البقت همله فى وقت محنها فى دول كانت شغاله بالنظام ومامى بعيد مصر فيها نفس النظام والسؤال ليكم وانتو فى رحله الخروج من السودان اغلبكم مر بمصر.هل كنتو بتستفيدوا من السلع المدعومه للمواطن عبر التموين ؟؟
-الوالى رغم انو مقصر فى موضوع السلع الاساسيه لكن اذا ثبت على صه المواطن يصرف المدعوم ببطاقه دى خطوه لتنظيم الفوضى لانو الاجانب اغلبهم شغالين ومابدفعو التزمهم للدوله وشغالي عشوائى (الفوضى دى اسالو منها زولكم حمدوك برضو جاى من برا البلد ومامعانى معاناه الموطن زيكم ). وحتى لو بدفعو ضرائب والتزامتاهم للدوله برضو لايمكن مساواتهم بالمواطن (جقلبتكم دى تخلى الواحديحس انكم ماعندكم مانع انو الاجنبى يشترى من الكيزان جنسيه سودانيه طالما مافى فرق بين الاجنبى والمواطن والبلد فوضى)
- الناس دايره تناقش شنو ؟ انت جوا السودان وبتعانى ؟ (الايدو فى المويه مازى الايدو فى النار) والتنظير عن بعد ساهل. الناس فعلا لو ايجابيه تناقش جذور الامه وسبل حلها مش تمسك فى قرار لصالح المواطن وتحاول تخلق راى عام لزياده المعاناه وهم بعيدين عن البلد .
-رغم دا كلو تبرير الوالى على اساس قرارسابق بشهور (طبعا انتو ماعارفينو لانو بعيدين عن البلد وبعيد عن دائره اهتمامكم) بتاع الخبز التجارى والجهات المستفيده منو والمدعوم الموجه للمواطن فقط (كاسره او فرد من دون تحديد سواء سودانى او اجنبى برضو منطقى لكن برضويحتاج وقفه ومطالبه انو السلع الاساسيه تكون فى بطاقه التموين (مش الخبز والغاز فقط)

Quote: أمشى جيبها وتعال..

انت متلقى حجج ساى
وزى عاده كتير من ناس المنبر يصدرو الاحكام المسبقه على الامور واى راى مخالف حتى لو سليم او واقعى ومنطقى برضو تطلعو غلط

ههههههههه الليلة عاصم لخ المغتربين و المهاجرين من طرف

يا عاصم عبد العظيم قالو بنجر احسن منك ...

بعدين ابو الريش حايم في البلد دي خايف يكون عايز ليهو كيلو عيش يطردوه من الصف هههههههههههه

والي مباريهو معيري.... الكيزان يشكر فيهو من بوست لبوست حيطلع شنو يعني

والوالي ده بدل ما يعمل اللخبطة دي كلها وسوء الفهم مش كان احسن
ليه يكتب : عدم بيع الخبز للمطاعم والكافتيريات"
وحتى اذا هو كتب العبارة دي ممكن الوالي يفهمنا ان صاحب الفرن يعرف
كيف ان الزول الواقف في الصف شغال في مطعم ولا موطن عادي غلبان::
ممكن ببساطة صاحب المطعم يرسل ٥ من العمال يقيفوا في الصف وكل واحد
فيهم يشتري ٥٠ كيلو رغيف..

وبعدين نقول لهذا الوالي قرارك ببيع الرغيف بالكيلو قرار غبي ..
وما سبقك عليه زول من العالمين....
ونقول ليك انت نا بتتفع والي ....
وبعدين شنو حكاية والي دي.....مفروض يغيروا هذه التسمية القميئة التي
تعني حاكم او محافظ او عمدة،،،لان كلمة الوالي بتعمل لينا حساسية لانها
بتذكرنا بعهد نظام اللصوص والحرامية...

طيب لو العيش ده أنا مشتريهو مثلاً عشان أبيعو سندوتشات ؟؟

ما ينفع يقرم منو ـ صاح ؟؟

لأنو مافي زول حا يشتري منك سندوتش عيشة مقرومة

غايتو بيع العيش بالكيلو ده أغبى قرار ـ وقرار غير مدروس من زول حمار ساكت

اتخيل لي بعد قراءة محتوى الخطاب الأول والذي ينص صراحة في الفقرة د ـ على منع بيع الخبز للأجانب

ثم قراءة التبرير اللاحق الصادر من إعلام ولاية الخرطوم

كلنا متفقين انو ما في علاقة بين الاتنين ـ ولو كسرت رقبة الخطاب الأول ( منع بيع الخبز للأجانب ) وقلبتو جاي قلبتو جاي ما حا تلقى ليهو علاقة بمحتوى التبرير الفطير في الإعلان اللاحق

وبالتالي يا إما الناس ديل بليدين خالص خالص يعني وساقطين لغة عربية ـ

يا إما عاوزين عن عمد يسوقوا الناس بالخلاء بدل الاعتراف بالخطأ ومراجعة القرار ونقضه ( إذا كانوا يعتقدون بخطله )

وده البحصل لمن تجيب ليك زول ناشط ساكت ما عارف كوعه من بوعه ولا عارف المطرة صابة بي وين وتمسكوا منصب قدر ده

وهم غالبيتهم كده ما جات على أيمن نمر بس عشان ما نظلمو ساكت

Quote: وانو الكيزان مسحو او اخفو كل البيانات .

ده ما كلام بقولو زاتو زول مسئول