-------------- مشهد أول في يناير 2019 ضربت تلفون لقريبي اسألو من الموقف في الشارع! لاحظت إنو بتكلم براحة جدا، سالتو بتتكلم براحة كدا ليه ؟ قال لي أنا راكب حافلة من امدرمان ماشي موكب الليلة في الكلاكلة !! قريبي ده و الشباب الكانو بركبوا مواصلات للبمبان و الرصاص و التاتشرات البتعفص الناس، كانو بحلموا بغدٍ أفضل و وطن يتبسم في وجوهنا كل صباح !! ------- مشهد تاني و أنا داخل اعتصام القيادة، فتشني شاب صغير العمر باهي الطلعة، شعرو كتير جدا . قلت ليه الشعر الكتير دا قصتو شنو ؟! قال لي قدام بس !! قلت ليه طيب ممكن أخد معاك صورة ؟! وقف جمبي للصورة، و قال لي قدام بس ! قلت ليه عندك مانع انزلها في الفيسبوك ؟ قال لي قدام بس ! الشاب دا والالاف الزيو الكانو صابنها في القيادة، كانو بحلموا بوطن تشرق فيه الشمس عدلاَ كل صباح ! ------- مشهد تالت بعد صلاة العيد، تاني يوم لمجزرة فض الاعتصام، و قبل ما أطلع من المسجد في هيوستون، لاقيت سوداني في زحمة الباب، راجل كبير، مافي أي سابق معرفة و ما شفتو قبل كدا، سلم عليّ اتأكد اني سوداني، بعد داك وبدون كلام، قلدني و بكى، نخجي بلا صوت هز المسجد،و لو أنا ما إتماسكت، كان حيرنا المصلين الوقفوا يتفرجوا !! الراجل ده و ملايين معاه كانو بحلموا بوطن على رأسه الشرفاء لا القتلة، وطن تتقدمنا فيه بطاقات الانتخاب لا دبابير العسكر ! ------- مشهد رابع يوم فض الاعتصام، الجنجويد و القوات الامنية الفضت الاعتصام أصرت على إخلاء مستشفى المعلم بأعتبارو داخل محيط الاعتصام !! سمحوا لعدد بسيط جدا من الشباب يدخلوا لنقل المصابين و الاطلاع على بيانات الشهداء. الشباب كانو بفتشوا في جيوب الشهداء عشان يلقوا بطاقة أو أي شي يدل عليهم. عشرات الشباب ملقيين على أرضية الغرفة و دمائهم تتداخل، ما تعرف دم الواحد من الجنبو ! نقلوهم أحياء و أموات ( الأحياء من استشهدوا و الاموات من كانو على قيد الحياة) !! نقلوهم بالدفارات مليانين رصاص و ثقوب و يقين إنو البلد دي تاني ما بترجع لوراء !! الشهداء و الاموات ديل كانو بحلموا بوطن يحبنا و نحبه، وطن يسعنا ما وسعنا بعضنا، وطن صحافتو حرة و أرضو مخضرة تحصد قمحاً و سلاماً و أمنياتٍ طيبات !! ------- المشهد الخامس صور الناس الطلعت تحتفل بالتوقيع على الوثيقة الدستورية و تعيين الوزراء المدنيين ! كانو و كنا جميعا نحلم بوطن عزيز عليه ما عنتنا، حريص علينا، بالسودانيين رؤوف رحيم !! ------- اليوم و بعد شهور قليلة، كيف تحولت أحلام الناس لصفوف بنزين و عيش و جيش حاكمنا عياناً بياناً ؟! كيف آلت دماء شبابنا لآل دقلو و كباشي و التوم هجو و مجلس الشركاء ؟!! كيف تآمر من قدمناهم منا لاغتيال آمالنا ؟! كيف طابت نفوسهم أن يهيلوا على أحلامنا التراب ؟! ------- و لاننا وقفنا بين بين، ها نحن نموت مرتين !! نحتاج ثورة أخرى : حرية سلام و عدالة إلى أن "يعود الوجود لدورته الدائرة: النجوم.. لميقاتها والطيور.. لأصواتها والرمال.. لذراتها والشهيد لطفلته الناظرة" !!! نحتاج ثورة للثورة : نحن شعب لا يُهزم ... ننتصر أو نواصل الثورة ✌️✌️ !!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة