|
Re: لماذا لم تشارك قحط ومجلس الوزراء في تشيع ج (Re: Salah Zubeir)
|
زمان يا صلاح كان عندي صاحبي شديد لدرجة سكنا فترة سواء أيام وفاة أبوي الله يرحمه كان عندو نفسيات ولا شنو ما عارف! المهم ما جاء العزاء رغم إنه أصحابنا المشتركين كلهم اتكلموا معاهو وبقول ليهم خلاص بمشي وما بيجي وهم من زعلهم بيجوا يكلموني لحدي أمه اتكلمت معاهو وحنستو دة أبو صاحبك اللصيق لازم تمشي ولمن أبى يطلع من البيت ساقت أبوهو وجو عزوني سواء وولدهم أبى يجي
المهم بعديها بي فترة حاول يصلحها بكل الطرق وانا مقفلها بي صبة خرسانية .. نتلاقى يمد يده للسلام أعمل فيها مدنقر ما شايف وامشي أخليهو .. ياخي لدرجة مرة حصل ليه حادث بعد سنوات وسنوات من الموضوع دة وكان في العناية المكثفة بين الحياة والموت اتصلت بي أمه وقالت لي قال إلا يتكلم معاك قدر ما اتبكى أنا ساكت كفارة ساي ما قلتها ليه وفي النهاية قلت ليه أنا شغال برجع ليك بعد انتهي وقفلت الخط وحاة الله زمان كنت عوير خلاص البنزلو دة تاني ببقى عندي زيو وزي الحجر واحد :)
قبل فترة كدة اتلاقيت مع صاحبنا مشترك في الخرطوم وقال لي عازمك بكرة فطور في حوش السمك بتاع الرياض .. وشايفو بلف ويدور زي داير يقول حاجة وما قادر في النهاية بي تردد شديد قال لي ياخي داير اتكلم معاك في موضوع فلان قلت ليه مالو؟ نعل ما حصل ليه مكروه! قال لي لا لا قصدي قطيعتك ليه؟ قلت ليه وانا مقاطعه في شنو؟ :) قال لي عشان ما جاء عزاء والدك قلت ليه عليك دينك دة فهم ليك؟ ياخي كبااااار وعوااااار كدة ونتكلم في عزاني وما عزاني؟ عليك الله خلي العباطة دي وناديهو بكرة يضرب معانا السمك ![](https://sudaneseonline.com/db/attention/010_Smile.gif) طبعاً هو بعاين لي مستغرب شديد شغال لي انت جادي ما زعلان منو؟ قلت ليه أزعل منه لشنو؟ وهو ضراني بشنو ذاتو عشان ازعل! يمكن كان كاتب شيكات وعليه أمر قبض اليوم داك؟ يمكن ساااااي كدة ما عندو مزاج يقابل زول .. وأساساً فاتحته دي كانت بترجع أبوي يعني؟ غايتو عباطة جهل بس ليس إلا
|
|
![Edit](https://sudaneseonline.com/db/icon_edit.gif)
|
|
|
|
|
|
|